Reyọ Odjekẹ ri Baibol Vwo Yono Ẹwẹn Obrorhiẹn Wẹn

1-2. (a) Okẹ vọ yen a vwọ kẹ Adam vẹ Ivi? (b) Mavọ yen ayen rhe se vwo djephia nẹ ayen vwo ọdavwaro kpahen okẹ yena?

EROMA yen muẹ eranvwe vwo ruẹ oborẹ ayen ruẹ. Imashini buebun wian nene obo re ghwe ru ayen wan. Ẹkẹvuọvo ihworakpọ fẹnẹre. O vwo okẹ ọghanghanre ọvo ra ma phiyọ avwanre oma rọ pha ghanghanre kẹ Inenikristi uyota. Okẹ yena yen ugbomọphẹ—kọyen ẹgba rẹ avwanre vwọ jojẹ ji bru erhiẹn romobọ vwẹ akpeyeren. Baibol na vuẹ avwanre nẹ a ma ọshare rẹsosuọ, Adam họhọ oma rẹ Ọghẹnẹ. (Jẹn. 1:26, 27) Kerẹ ihwo ri vwo aghwanre, a kẹ Adam vẹ Ivi uphẹn rẹ ayen vwo bru erhiẹn romobọ rayen.

² Jihova vwẹ irhi buebun vwọ kẹ Adam vẹ Ivii. Ọ de vuẹ ayen nẹ ayen vwẹrote otọrakpọ na, vwiẹ emọ vọn akpọ na, ji muọghọ kẹ uturhi ro vwori ro vwo gbere ughwru kẹ ayen ji vuẹ ayen oborẹ ayen ru. (Jẹn. 1:28; 2:16, 17) Idjerhe vọ yen Adam vẹ Ivi se vwo djephia nẹ ayen vwo ọdavwarọ kpahen Ohwo rọ kẹ ayen okẹ rẹ ugbomọphẹ na? Ofori nẹ erọnvwọn eje rẹ Jihova ru kẹ ayen na mu ayen vwo nyupho rọyen fikirẹ ẹguọnọ rẹ ayen vwo kpahọn vẹ owenvwe rẹ ayen vwo ru obo re vwerhọn oma.—Isẹ 23:15.

3. Mavọ yen Adam vẹ Ivi reyọ okẹ rẹ ugbomọphẹ rayen na vwo ruiruo wan?

³ Kirobo ri Baibol na tare, Adam vẹ Ivi reyọ ugbomọphẹ rayen vwo ruiruo vwẹ idjerhe rẹ aghwanree. Ukperẹ ọtiọyen, ayen de gbevwọso Jihova. Ọ dia ẹguọnọ yen mu ayen vwo ru oborẹ ayen ruru naa, ẹkẹvuọvo ojevwe romobọ. (Jẹn. 3:1-7) Avwanre je rioja rẹ oborẹ ayen ruru na rhi te nonẹna.—Rom 5:12.

4. (a) Vwo nene obo rehẹ Galesha 6:5, die yen ofori nẹ avwanre eje ru? (b) Ọrhọ yen okẹ ọfa ra cha ta ota kpahen vwẹ uyono nana?

⁴ Nonẹna, avwanre si ukpanukpa rẹ akpeyeren. Kẹdi kẹdẹ, o vwo erhiẹn buebun ro fori nẹ avwanre bru. (Se Galesha 6:5.) Evo pha lọlọhọ, o ji vwo efa re pha gangan. Mavọ yen e se vwo bru erhiẹn re cha ghwa omavwerhovwẹn bru Jihova ra? Ẹsosuọ, ofori nẹ e vwo ọmrẹvughe nẹ a guọnọ ukẹcha ri Jihova. (Isẹ 16:3; Jer. 10:23) Jesu rọ tobọ dia ohwo rọ gbare je riẹn nẹ ọyen guọnọ ukẹcha rẹ Ọghẹnẹ. (Hib. 5:7) Kerẹ ihwo re gbaree, avwanre guọnọ odjekẹ rẹ Ọghẹnẹ vwọ vrẹ Jesu. Asaọkiephana, e gbe jẹ a ta ota kpahen okẹ ọfa ro nẹ obọ rẹ Ọghẹnẹ rhe rọ sa vwẹ ukẹcha kẹ avwanre vwo bru erhiẹn ri fori—ẹwẹn obrorhiẹn rẹ avwanre.

DIE YEN ẸWẸN OBRORHIẸN NA?

5. (a) Die yen ẹwẹn obrorhiẹn na? (b) Ukẹcha vọ yen ẹwẹn obrorhiẹn na vwọ vwẹ kẹ avwanre? (Rom 2:14, 15)

⁵ Ẹwẹn obrorhiẹn ọyen ẹgba rọ nẹrhẹ e vughe obo ri yovwirin vẹ obo re chọre. Ohwo rọ tobọ riẹn emu vuọvo kpahen irhi rẹ Ọghẹnẹẹ vwo ẹwẹn obrorhiẹn. (2 Kọr. 4:2) Ẹwẹn obrorhiẹn avwanre pha kerẹ oguẹdjọ rọhẹ oma avwanre ro brẹ hwe yẹrẹ brẹ kẹ avwanre siẹrẹ avwanre de ru obo ri yovwirin yẹrẹ chọre. (Se Rom 2:14, 15.) Ẹwẹn obrorhiẹn avwanre se si avwanre orhọ kpahen oborẹ avwanre riẹnre nẹ ọ chọre, rere e vwo je eruo. (1 Sam. 26:8-11) Yẹrẹ o se mu avwanre vwo ru obo ra riẹnre nẹ o shephiyọ. Ọ dia e di vwo vwo ọke ugbomọphẹ ọvo yen Jihova che vwo rhiabọreyọ korhiẹn korhiẹn rẹ avwanre che bruu. Ofori nẹ ẹwẹn obrorhiẹn rẹ avwanre vwẹ ukẹcha kẹ avwanre vwọ riẹn ofẹnẹ rọhẹ omamọ vẹ orharhe rẹ orhiẹn.

6. Diesorọ ọ vwọ bẹn ẹwẹn obrorhiẹn rẹ avwanre rhe ruiruo vwẹ idjerhe abavo ọkievoo?

⁶ Jẹ, ọ da ohwo mamọ nẹ ọ dia ọkieje yen ẹwẹn obrorhiẹn na vwọ ruiruo vwẹ idjerhe abavoo. Kirobo rẹ avwanre gbaree na, ọtiọyen ẹwẹn obrorhiẹn avwanre je hepha. Asan avwanre dia ghwanre, ẹkuruemu rẹ avwanre kugbe urhurusivwe rẹ umwemwu rọhẹ oma avwanre sa nẹrhẹ ẹwẹn obrorhiẹn rẹ avwanre jẹ wian vwẹ idjerhe ro fori. Baibol na tare nẹ ẹwẹn obrorhiẹn na sa dia ‘gbegbe,’ ‘vwiẹrẹ,’ vọn vẹ “umwemwu” ji ‘ghwu timẹ kerẹ asan ra vwẹ ogba rọ tuabọ gidigidi vwo bru oka phiyọ.’ (1 Kọr. 8:12; Taitọs 1:15; 1 Tim. 4:2; Hib. 10:22) Ẹwẹn obrorhiẹn tiọyena cha sa kpọ avwanre vii. Ọ pha kerẹ ovwanvwọ ro miovwirin ro fori nẹ a rhuẹrẹ. Ọtiọyen o ji fo nẹ e yono ẹwẹn obrorhiẹn rẹ avwanre ọ sa vwọ nabọ wian abavo. (1 Pita 3:16) Mavọ yen e se vwo ru ọtiọyen?

OBO RE SE VWO YONO ẸWẸN OBRORHIẸN AVWANRE

7-8. (a) Die yen cha vwẹ ukẹcha kẹ avwanre vwo yono ẹwẹn obrorhiẹn avwanre? (b) Idjerhe vọ yen odjekẹ ri Baibol sa vwọ kpọ avwanre vi? Djudje rọyen. (Ni ifoto na.)

⁷ Mavọ yen e se vwo yono ẹwẹn obrorhiẹn rẹ avwanre? Ọyen re vwo se Baibol na ọkieje ra sa vwọ riẹn ẹro ri Jihova vwo nẹ obo ri yovwirin vẹ obo re chọre. E de yono kpahen irhi rẹ Ọghẹnẹ, ọ sa cha avwanre uko vwo vwo ẹruọ rẹ iroro rọyen. Kirobo re djunute vwẹ uyono rọ wanre na, ọ dia kẹdia kẹdia eje yen a da vwẹ irhi vwo ruiruoo. Kọyensorọ o vwo fo a vwọ riẹn oboresorọ a vwọ vwẹ irhi na vwọphia, kidie e cha nẹrhẹ e vwo ẹruọ rẹ iroro vẹ oborẹ oma ruẹ Jihova vwẹ ẹdia sansan.—Aiz. 55:9.

⁸ A sa vwẹ akpeyeren avwanre vwo dje ohwo rọ yan oyan vwevunrẹ aton. Vwẹ ẹwẹn roro nẹ aton na vwo eka re nene yẹrẹ idjerhe ra wan ruọọ. Ọ sa dianẹ uhoho rẹ ọnre yẹrẹ isio na yen e vwo vughe ẹbẹre ro fori nẹ a wan rere e se vwo te asan ra ra. Ẹkẹvuọvo, imapu ro vwo eka vwẹ asan sansan vwẹ idjerhe na yen cha ma vwẹ ukẹcha kẹ avwanre. Imapu tiọyena cha vwẹ imuẹro kẹ avwanre nẹ idjerhe na yen avwanre hepha na, je nẹrhẹ a riẹn siẹrẹ e de bo ghwru nẹ idjerhe na. Ọdavwẹ avwanre vwẹ akpeyeren yen e vwo ru obo re vwerhan Jihova oma. Baibol na pha kerẹ imapu rọ vwẹ odjekẹ ro fori vwọ kẹ avwanre. Odjekẹ ri Baibol pha kerẹ eka rehẹ asan sansan vwẹ idjerhe na. Aphro herọọ nẹ e se te asan rẹ avwanre ra siẹrẹ e de nene odjekẹ yena.

9. Die ọfa yen e djunute vwẹ Rom 9:1 rọ sa vwẹ ukẹcha kẹ avwanre vwo yono ẹwẹn obrorhiẹn rẹ avwanre?

⁹ A je guọnọ ukẹcha rẹ ẹwẹn ọfuanfon rẹ Ọghẹnẹ a sa vwọ nabọ yono ẹwẹn obrorhiẹn rẹ avwanre rere ọ sa vwọ wian abavo. (Se Rom 9:1.) Ẹwẹn ọfuanfon na cha vwẹ ukẹcha kẹ avwanre vwo vwo ẹruọ rẹ ẹro ri Jihova vwo nẹ erọnvwọn. Ọ je sa kẹ avwanre ẹgba yẹrẹ mu avwanre vwo ru erọnvwọn ri shephiyọ ọhọre ri Jihova. (Fil. 2:13) Kẹ, mavọ yen a sa vwọ mrẹ ukẹcha rẹ ẹwẹn ọfuanfon ri Jihova?

10. Mavọ yen a sa vwọ mrẹ ukẹcha rẹ ẹwẹn ọfuanfon na? (Luk 11:10, 13)

¹⁰ Rẹ Jihova nẹ ọ vwẹ ẹwẹn ọfuanfon rọyen vwọ kẹ wẹ. (Se Luk 11:10, 13.) E se vwo imuẹro nẹ Jihova kẹkẹ obọ ọke rọ da vwẹ ẹwẹn ọfuanfon rọyen vwọ kẹ avwanree. (Jọn 3:34) O siobọno kẹ ihwo ri yeren akpọ vwo nene odjekẹ rọyen ghwologhwolo. (Isẹ 1:23; Jems 1:5) Jẹ, die ọfa yen sa vwẹ ukẹcha kẹ avwanre vwo yono ẹwẹn obrorhiẹn rẹ avwanre?

11. (a) Die yen ofori nẹ a ma tẹnrovi vwẹ akpeyeren? (b) Diesorọ o vwo fo e vwo yono ẹwẹn obrorhiẹn avwanre je mrẹvughe nẹ ọ nabọ wian abavo?

¹¹ Vwẹ ọkieje ru obo re vwerhan Jihova oma. (Isẹ 8:34, 35) Ọyena yen obo ro fori nẹ a ma tẹnrovi vwẹ akpeyeren. A da kọn ọnana phiyọ ẹwẹn vwẹ kẹdia kẹdia avwanre hirharoku vwẹ akpeyeren, ọnana sa cha avwanre uko vwo yono ẹwẹn obrorhiẹn rẹ avwanre. Ẹwẹn obrorhiẹn ra nabọ yono, ọyen ẹwẹn ro ruẹ nene iroro ri Jihova kugbe ubiudu ro vwo ọdavwẹ rẹ oborẹ oma ruo. A sa riẹn oborẹ ẹwẹn obrorhiẹn ra nabọ yono ghanre te, e de roro kpahen oborẹ akpọ na gan te nọnena. Ọke buebun, avwanre hirharokuẹ ẹdia sansan re ghwe djunute vwẹ Baibol na phiọguun. Enana se churobọ si erọnvwọn ra vwọ diotọ, iruo, ẹbe eyono, kugbe oyerinkugbe rẹ avwanre vẹ ihwo efa. Kẹ, mavọ yen a sa vwọ riẹn sẹ Jihova vwo omavwerhovwẹn kpahen erhiẹn rẹ avwanre bru kpahen erọnvwọn nana?—2 Kọr. 1:12.

12. Die yen sa vwẹ ukẹcha kẹ avwanre vwọ riẹn sẹ ẹwẹn obrorhiẹn na kpọ avwanre viẹ vwẹ idjerhe ro fori? (Ẹfesọs 5:10)

¹² Roro kokodo kpahen obo wo se vwẹ Ota rẹ Ọghẹnẹ. (Une 49:3) Wo de se Baibol na, guọnọ odjekẹ re sa vwẹ ukẹcha kẹ wẹ vwo vwo ẹruọ rẹ iroro ri Jihova. (Se Ẹfesọs 5:10.) Avwanre vwọ davwẹngba vwo yerẹn ghene ẹdia re pha gangan vwẹ akpeyeren na, ofori a vwọ guọnọ odjekẹ ri Baibol re cha nẹrhẹ avwanre riẹn sẹ ẹwẹn obrorhiẹn avwanre vwẹ ukẹcha kẹ avwanre vwo bru emamọ rẹ erhiẹn. (Isẹ 2:4-9, 11-13) Odjekẹ nana sa vwẹ ukẹcha kẹ avwanre vwọ rhoma wene yẹrẹ kpọ ẹwẹn obrorhiẹn rẹ avwanre vi kirobo ro fori rere ọ sa vwọ wian abavo.—Hib. 5:14.

13. A da guọnọ brorhiẹn, die yen ofori nẹ a kẹnoma kẹ? Djudje rọyen.

¹³ Wo brorhiẹn nẹ wọ ke guọnọ odjekẹ ro shekpahọọn. Avwanre guọnọ vwẹrokere ihwo rẹ Izrẹl re dia Judia ra vwọ ghwọrọ Jerusalẹm vwẹ 607 B.C.E nuu. Ayen da vuẹ Jerimaya nẹ: “Ọrovwohwo Ọghẹnẹ wẹn na se dje idjerhe rẹ avwanre wan kẹ avwanre, vẹ obo rẹ avwanre ru.” (Jer. 42:3-6) Jẹ, ọke rẹ ayen vwo ta eta nana, ayen brorhiẹn rẹ oborẹ ayen che ru nure. Ọtiọyena, ayen de tinkamu orhiẹn rẹ ayen ke bru kidie odjekẹ rẹ Jihova vwọ kẹ ayen je ayeen. Ọnana da ghwa okpetu rhe. (Jer. 42:19-22; 43:1, 2, 4) Ọtiọyena, ofori a hiẹ guọnọ odjekẹ ri Baibol re vwẹ iroro ri Jihova phia ji ru nene obo re tare tavwen e ki brorhiẹn.

14. Diesorọ o vwo fo nẹ e mu erhiẹn avwanre kpahen odjekẹ ri Baibol na?

¹⁴ Mu erhiẹn wẹn kpahen odjekẹ ri Baibol. (Mat. 7:24-29; Jems 1:23-25) Avwanre de mu erhiẹn avwanre kpahen odjekẹ ri Baibol, jẹ avwanre gbe nene ẹwẹn ọfuanfon na. Ukuotọ rọyen, Jihova ko che rhe siobọnẹ ẹwẹn ọfuanfon rọyen vwọ kẹ avwanre. (Iruo 5:32) Ẹkẹvuọvo, avwanre sa vwọso yẹrẹ nẹrhẹ ẹwẹn ọfuanfon na muomaphiyọ siẹrẹ e rhe gbe nenee. (Ẹfe. 4:30; Aiz. 63:10; Iruo 7:51) Jihova sa tobọ mie avwanre ẹwẹn ọfuanfon rọyen. (Une 51:11; 1 Tẹsa. 5:19) Ọyena emu rẹ imuoshọ kidie avwanre guọnọ ẹgba vẹ ogangan ro nẹ obọ rẹ ẹwẹn ọfuanfon na cha.—Ẹfe. 3:16.

OBO RA SA VWỌ MRẸ ODJEKẸ RI BAIBOL RA SA REYỌ VWO RUIRUO

15-16. (a) Mavọ yen a sa vwọ mrẹ odjekẹ ri Baibol re se vwo ruiruo? (b) Erhọ yen odjekẹ ri Baibol evo re sa vwẹ ukẹcha kẹ ohwo ra vwẹ Baibol yono vwo vwo owenvwe rọ vwọ dobọrẹ isigati ephopho ji?

¹⁵ Reyọ ẹbe re vwo ruẹ ehiahiẹ vwo ruiruo. Tavwen a ke reyọ odjekẹ ri Baibol vwo ruiruo, ofori nẹ e vughe asan re hepha vwevunrẹ rọyen. Kerẹ udje, kọ da rha dianẹ ohwo wọ vwẹ Baibol yono mrẹ bẹnbẹn rọ vwọ dobọ rẹ isigati ephopho ji vwo? Ọ sa tanẹ: ‘O vwo asan vuọvo vwẹ Baibol na re de djunute isigatii. Ọtiọyena, mavọ yen e ru riẹn nẹ ọ chọre?’ Mavọ yen wọ sa vwọ vwẹ ukẹcha kẹ vwọ mrẹ odjekẹ ri Baibol rọ sa reyọ vwo ruiruo, wẹ vẹ ọyen me je ta ota kpahen ayen? Orọnvwọn ọghanghanre ọvo rọ sa vwẹ ukẹcha phia yen Research Guide for Jehovah’s Witnesses. Wo se jiro kẹ ohwo wọ vwẹ Baibol yono nẹ o ni uyovwinrota na “Tobacco and Smoking.” Vwẹ obotọ rọyen, ọ cha mrẹ asan rọ rionbọ kpo uyovwinrota na “What Is God’s View of Smoking?” (Ni Uwevwin Orhẹrẹ ri June 1, 2014, ọ rẹ Oyibo.) O de se uyovwinrota yena, ẹkpo ri Baibol vẹ odjekẹ vọ yen ọ cha mrẹ?

¹⁶ Ta ota kpahen odjekẹ iyorin ra vwọphia vwẹ uyovwinrota yena. (1) Ofori nẹ a dia ọviẹn vwọ kẹ orọnvwọn ro che sun avwanre kpo ughwuu. (Rom 6:16) (2) Ofori a vwọ kẹnoma kẹ kemu kemu rọ cha so omaẹwan kẹ ugboma rẹ avwanre. (2 Kọr. 7:1) (3) Jihova guọnọre nẹ avwanre vwẹ ẹwẹn avwanre eje vwọ ga ọyen. (Mat. 22:37) (4) Ofori nẹ avwanre vwẹ uruemu avwanre vwọ so okpetu kẹ ihwo efaa. (Mat. 22:39; 1 Kọr. 10:24) (5) Jihova cha kẹ avwanre ẹgba re vwo ru obo ri fori. (Fil. 4:13) Dede nẹ Baibol na djunute isigati ephopho kiriguoo, jẹ odjekẹ rọhẹ evunrẹ ọyen sa vwẹ ukẹcha kẹ ohwo wọ vwẹ Baibol yono vwo vwo ẹruọ rẹ iroro ri Jihova.

17. Mavọ yen oniọvo aye vẹ ọshare ri muegbe rẹ orọnvwe sa vwọ mrẹ odjekẹ ri Baibol re sa vwẹ ukẹcha kẹ ayen?

¹⁷ Mavọ yen oniọvo aye vẹ ọshare ri muegbe rẹ orọnvwe sa vwọ mrẹ odjekẹ ri Baibol ri fori re sa vwẹ ukẹcha kẹ ayen vwo bru emamọ erhiẹn? Research Guide na je sa vwẹ ukẹcha phia. Vwẹ obotọ rẹ uyovwinrota na “Weddings and Receptions,” wọ cha mrẹ iyovwinreta sansan vẹ odjekẹ ri Baibol rehẹ evunrẹ rayen. Fuẹrẹn odjekẹ esan oniọvo aye vẹ ọshare ri muegbe orọnvwe se roro kpahen. (1) Ofori nẹ irueru orọnvwe na eje brọghọ phiyọ Jihova oma. (1 Kọr. 10:31, 32) (2) Ofori nẹ osenvwe avwanre dia ọ rẹ abavo, ro shephiyọ rọ cha so ekprowọ vwọ kẹ ihwo efaa. (1 Tim. 2:9; 1 Pita. 3:3, 4) (3) Ofori a vwọ kẹnoma kẹ igho efio rọ dia uruemu rẹ akpọ na titẹ. (Jọn 17:14; Jems 1:27; 1 Jọn 2:15, 16) (4) Ofori nẹ e ru erọnvwọn ejobi utetemute. (1 Kọr. 14:40) (5) Ofori irueru rẹ akpọẹriọ rẹ orọnvwe dia ọ re de ruẹ obo ri je ohwo ra da je da idi vromaa. (Gal. 5:21) (6) Ofori nẹ a vwẹ ohwo mu rọ cha vwẹrote irueru rẹ orọnvwe na.—Jọn 2:8, 9.

18-19. (a) Ọrhọ yen ọbe ọfa re vwo ruẹ ehiahiẹ rọ sa vwẹ ukẹcha kẹ avwanre? (b) Erhọ yen odjekẹ evo wọ sa mrẹ vwẹ ọbe nana siẹrẹ a da ta ota kpahen erẹ ohwo se vwobọ vwọ? (Ni ekpeti na “Mavọ Yen Wo se Vwo Vughe Odjekẹ ri Baibol Na?”)

¹⁸ Ọbe ọfa re vwo ru ehiahiẹ rọ vwẹ ukẹcha kẹ ihwo buebun re yen Ẹkpo ri Baibol vwọ kẹ Akpeyeren rẹ Inenikristi. O vwo ẹkpo ri Baibol ra sa reyọ vwo ruiruo vwẹ obotọ rẹ iyovwinreta sansan. Wọ da sane uyovwinrota ọvo, wọ cha mrẹ enọ vẹ ẹkpo ri Baibol re sa vwẹ ukẹcha kẹ wẹ vwo vughe odjekẹ ri Baibol. Kerẹ udje, oniọvo se vwo ẹwẹn ivivẹ sẹ o se kpo orẹ ọvo. O de kpo uyovwinrota na “Erẹ,” ọ cha mrẹ uyovwinrota otete na “Erẹ rẹ Inenikristi kẹnoma kẹ.”

¹⁹ Roro kpahen erọnvwọn efa re djunute vwẹ ẹbẹre yena: “Diesorọ ọ vwọ dia obo re chọre re vwo vwobọ vwẹ erẹ ri churobọsi ẹga rẹ efian? (1 Kọr 10:21; 2 Kọr 6:14-18; Ẹfe 5:10, 11).” O vwo erẹ evo re ru idje rayen phiyọ etiyin. Vwẹ obotọ rẹ uyovwinrota otete na “Erẹ rẹ Ẹkuotọ,” o vwo odjekẹ ri Baibol re se vwo ruiruo siẹrẹ Onenikristi de vwo ẹwẹn ivivẹ sẹ o se vwobọ vwẹ erẹ re vwo titi ẹkuotọ fikirẹ oborẹ ayen ru re, ra vwọ karophiyọ ifovwin rẹ ẹkuotọ, yẹrẹ erẹ re vwo brọghọ phiyọ ihworakpọ oma. Mavọ yen ọ vwerhen oma te nẹ ukoko ri Jihova kẹ avwanre ẹbe nana eje re cha avwanre uko vwo yono ẹwẹn obrorhiẹn rẹ avwanre!

DJEPHIA NẸ WO VWO ẸWẸN OBRORHIẸN RA NABỌ YONO

20. Mavọ yen e se vwo djephia nẹ ẹwẹn obrorhiẹn rẹ avwanre ọyen obo ra nabọ yono?

²⁰ Okẹ rẹ ugbomọphẹ na pha ghanghanre kẹ avwanre. Ẹkẹvuọvo avwanre mrẹvughe nẹ ofori e vwo yono ẹwẹn obrorhiẹn avwanre rere a sa vwọ vwẹ ugbomọphẹ avwanre ruiruo vwẹ idjerhe ro fori. Ẹwẹn obrorhiẹn ra nabọ yono cha vwẹ ukẹcha kẹ avwanre vwo bru erhiẹn ri shephiyọ ọhọre ri Jihova, ri ji che brọghọ phiyọ oma. Re se vwo ru ọnana, a guọnọ ukẹcha rẹ ẹwẹn ọfuanfon ri Jihova. Ọtiọyena, ofori nẹ a vwẹ ọkieje vwọ yare ukẹcha rẹ ẹwẹn ọfuanfon na ji gbe nene. Odjekẹ ri Baibol je cha vwẹ ukẹcha kẹ avwanre vwọ kpọ ẹwẹn obrorhiẹn rẹ avwanre vi. E jẹ avwanre reyọ okẹ nana eje vwo ruiruo vwẹ idjerhe ro fori je mrẹ oborẹ Ota rẹ Ọghẹnẹ vwẹ ẹgba te vwẹ akpeyeren rẹ avwanre.—2 Tim. 3:16, 17; Hib. 4:12.