Karophiyọ Nẹrhovwo kẹ Ihwo Efa

1. Mavọ yen e ru riẹn nẹ ẹrhovwo avwanre pha ghanghanre kẹ Jihova?

ẸRHOVWO ọyen okẹ rẹ igbunu. Di roro: O vwo ewian rẹ Jihova vwọ kẹ emekashe evo. (Une 91:11) Ọ je vwẹ ewian eghanghanre vwọ kẹ Ọmọ rọyen. (Mat. 28:18) Jẹ, ra vwọ kerhọ kẹ ẹrhovwo vwo? Ọnana orọnvwọn ọvo rẹ Jihova komobọ ruẹ. Jihova rọ dia ohwo ro “nyo ẹrhovwo na,” yen kerhọ rẹ avwanre komobọ.—Une 65:2.

2. Udje vọ yen ọyinkọn Pol phi phiyotọ kpahen obo ra nẹrhovwo kẹ ihwo efa?

² Dede nẹ a sa ta ọdavwẹ avwanre kẹ Jihova odedede, o ji fo a vwọ nẹrhovwo kẹ ihwo efa. Ọyen oborẹ ọyinkọn Pọl ruru. Kerẹ udje, o si rhe ukoko Ẹfesọs nẹ: “Mi djunute ovwan ọkieje vwẹ ẹrhovwo mẹ.” (Ẹfe. 1:16) Pọl je nẹrhovwo kẹ iniọvo na ọvuọvo. Kerẹ udje, ọ vuẹ Timoti: “Me kpẹvwẹ Ọghẹnẹ, . . . ọkieje yen me vwọ karophiyọ owẹ vwẹ orẹ mẹ, te ason te uvo.” (2 Tim. 1:3) Pọl vwo ebẹnbẹn romobọ rọyen rọ nẹrhovwo kpahen. (2 Kọr. 11:23; 12:7, 8) Dedena, ọ ghwọrọ ọke vwọ nẹrhovwo kẹ ihwo efa.

3. Die yen sa nẹrhẹ ẹrhovwo ra nẹ kẹ ihwo efa chọrọ avwanre ẹro?

³ Ọkievo ọ sa chọrọ avwanre ẹro ra vwọ nẹrhovwo kẹ ihwo efa. Diesorọ? Oniọvo aye ọvo re se Sabrinaa djunute emuọvo rọ sorọ. Ọ da ta: “Ukpanukpa rẹ akpeyeren dia ọmọrhiẹẹ. Ebẹnbẹn avwanre se mu avwanre rọ te ẹdia rẹ ọdavwẹ avwanre ọvo kọyen a nẹrhovwo kpahan.” Wo ni ọnana so vwẹ oma wẹn re? Ọ da dia ọtiọyen, uyono nana cha vwẹ ukẹcha kẹ wẹ. O che (1) dje oboresorọ ọ vwọ ghanre a vwọ nẹrhovwo kẹ ihwo efa kugbe (2) iroroẹjẹ rẹ obo ru wo se vwo ruo.

DIESORỌ A VWỌ NẸRHOVWO KẸ IHWO EFA?

4-5. Idjerhe vọ yen ẹrhovwo ra nẹ kẹ ihwo efa sa vwọ ‘vọn vẹ ẹgba mamọ’? (Jems 5:16)

⁴ Ẹrhovwo ra nẹ kẹ ihwo efa “vọnre vẹ ẹgba mamọ.” (Se Jems 5:16.) Ẹrhovwo ra nẹ kẹ ihwo efa se ghini wene ẹdia rayen? E, o se wene. Jesu vwọ riẹn nẹ o rhe che kri ọyinkọn Pita ke sen ọyeen, ọ da vuẹ nẹ: “Me rẹ orẹ fiki wẹ nure, rere esegbuyota wẹn vwo je yeghe.” (Luk 22:32) Pọl je riẹn nẹ ẹrhovwo se wene ẹdia rẹ ohwo. Ọke re vwo muo phiyọ uwodi ekueku vwẹ Rom, o de si rhe Filimọn nẹ: “Me rhẹro rọyen nẹ womarẹ ẹrhovwo rẹ ovwan, e che siobọnu uvwe bru ovwan rhe.” (Filim. 22; ni study note “for I am hoping that through your prayers.”) Kirobo erọnvwọn wanre, o kririi e de siobọ nẹ Pọl, ọ da rhoma ton iruo aghwoghwo rọyen phiyọ.

⁵ Jẹ, ọ dia ọyen o vwo mudiaphiyọ nẹ womarẹ ẹrhovwo avwanre a sa gba Jihova vwo ru obo ra guọnọree. O vwo oniso ọdavwẹ rẹ idibo rọyen, ọkiọvo ọ da guọnọ ko ru ọdavwẹ rayen kẹ ayen. Ọnana sa cha avwanre uko vwọ nẹrhovwo nẹ ubiudu vẹ imuẹro vwo rhe Jihova kpahen ẹdia ra hepha je yanjẹ erọnvwọn eje vwo vwẹ obọ rọyen.—Une 37:5; ni 2 Kọrẹnt 1:11 kugbe study notes.

6. Mavọ yen ẹrhovwo ra nẹ kẹ ihwo efa se vwo toroba ẹro re vwo ni ayen? (1 Pita 3:8)

⁶ Ẹrhovwo ra nẹ kẹ ihwo efa nẹrhẹ e vwo “arodọnvwẹ.” (Se 1 Pita 3:8.) Aruẹdọn ọyen oniso rẹ oja rẹ ohwo ọfa ria vẹ owenvwe ra vwọ vwẹ ukẹcha vwọ kẹ. (Mak 1:40, 41) Ọkpako ọvo re se Michael tare nẹ: “Me da nẹrhovwo kẹ ihwo efa kpahen ọdavwẹ rayen, ki mi vwo ẹruọ ebẹnbẹn rẹ ayen nene muabọ je nẹrhẹ ẹguọnọ ri mi vwo kpahen ayen ganphiyọ. Ọnana nẹrhẹ mi siẹkẹrẹ ayen, dede nẹ ayen se jẹ ẹriẹn.” Ọkpako ọvo re se Richard djunute erere ọfa. Ọ da ta: “Wọ da nẹrhovwo kẹ ohwo, owenvwe ru wọ vwọ vwẹ ukẹcha vwọ kẹ kọ ganphiyọ. Siẹrẹ a da vwẹ ukẹcha ro fori vwọ kẹ ohwo ra nẹrhovwo kẹ na, kọ ghwa họhọ nẹ e toroba ẹkpahọnphiyọ rẹ ẹrhovwo ra nẹ vwọ kẹ.”

7. Mavọ yen ẹrhovwo ra nẹ kẹ ihwo efa sa vwọ cha avwanre uko vwọ vwẹ ẹro abavo vwo ni ebẹnbẹn avwanre? (Filipae 2:3, 4) (Ni ihoho na.)

⁷ Ẹrhovwo ra nẹ kẹ ihwo efa nẹrhẹ a vwẹ ẹro abavo vwo nẹ ebẹnbẹn avwanre. (Se Filipae 2:3, 4.) Avwanre ọvuọvo vwo ebẹnbẹn re nene muabọ kidie avwanre yerẹn vwẹ akpọ rẹ Idẹbono suẹn. (1 Jọn 5:19; Ẹvwọ. 12:12) Siẹrẹ e de vwo ẹkuruemu ra vwọ nẹrhovwo kẹ ihwo efa, ọ nẹrhẹ a karophiyọ ‘iniọvo rẹ [avwanre] rehẹ akpọ na eje ri ji hirharokuẹ oka rẹ ojaẹriọ tiọyena.’ (1 Pita 5:9) Ọkobaro ọvo re se Katherine tare nẹ: “Ẹrhovwo re me nẹ kẹ ihwo nẹrhẹ ovwẹ karophiyọ nẹ ihwo efa je herọ ri vwo ebẹnbẹn. Ọnana rha nẹrhẹ me tẹnroviẹ ebẹnbẹn romobọ mẹ gan nọọ.”

AYEN GUỌNỌ ẸRHOVWO AVWANRE

8. Djudje rẹ ihwo re se djunute vwẹ ẹrhovwo avwanre.

⁸ Ono yen e se djunute vwẹ ẹrhovwo avwanre? A sa nẹrhovwo kẹ ẹko rẹ ihwo—kerẹ udje, ihwo ri vwo omakpokpọọ, ighene ri hirharokuẹ ehwẹjẹ vẹ okeke vwẹ isikuru, yẹrẹ ihwo ri vwo obẹnbẹn ọghwo. Iniọvo avwanre buebun chirakon rẹ omukpahen ri nẹ obọ rẹ ihwo orua yẹrẹ igọmẹti cha. (Mat. 10:18, 36; Iruo 12:5) Iniọvo avwanre evo djẹ nẹ iwevwin rayen fikirẹ ozighi-egbe rẹ ihwo re vwọsua igọmẹti. Efa je rioja rẹ oghwọrọ ri kpregede. E se jẹ edẹ rẹ iniọvo nana ẹ riẹn komobọ. Ẹkẹvuọvo, a da nẹrhovwo kẹ ayen, jẹ e djephia nẹ e nene iji rẹ Jesu vwọ kẹ avwanre nẹ e “vwo ẹguọnọ rẹ ohwohwo.”—Jọn 13:34.

9. Diesorọ o vwo fo a vwọ nẹrhovwo kẹ iniọvo re kobaro vwẹ ukoko ri Jihova ji te eya rayen?

⁹ A je sa nẹrhovwo kẹ iniọvo re kobaro vwevunrẹ ukoko ri Jihova. Iniọvo nana yen Ẹko Rọvwẹrote kugbe iniọvo re vwẹ ukẹcha kẹ ayen, Umẹ Rọvwẹrote Oghọn Ukoko, iniruo ri tedje vwẹ oghọn ukoko, iniruo okinriariẹ, ekpako ukoko vẹ idibo rowian. Iniọvo nana buebun vwo ẹbẹnbẹn rẹ ayen nene muabọ, dedena ayen wian gangan vwọ vwẹ ukẹcha kẹ avwanre. (2 Kọr. 12:15) Kerẹ udje, oniruo okinriariẹ ọvo re se Mark tare nẹ: “Obẹnbẹn ọvo mi vwori rọ pha gangan yen ọsẹ vẹ oni mẹ ri sherabọ kẹ vwẹ. Ayen ihwo ivẹ na vwo omakpokpọọ. Dede nẹ oniọvo mẹ ọmọtẹ vẹ ọshare rọyen vwẹrote ayen, ọ da vwẹ nẹ mẹvwẹ hẹ etiyin re me da vwẹ ukẹcha kẹ ayen komobọọ.” Owenẹ avwanre vwo ẹruọ rẹ obo ri kpokpọ iniọvo nana ẹwẹn yẹrẹ e vwo ẹruọ rọyeen, o fori a vwọ karophiyọ ayen vwẹ ẹrhovwo rẹ avwanre. (1 Tẹsa. 5:12, 13) A je sa nẹrhovwo kẹ eya rẹ iniọvo nana ri biẹcha eshare rayen rọ nẹrhẹ ayen muomaphiyọ iruo rayen ọkieje na.

10-11. Jihova vwo omavwerhovwẹn kpahen ẹrhovwo ra nẹ kẹ iniọvo eya vẹ eshare? Djekpahọn.

¹⁰ Kirobo ra ta ota kpahen re na, ọkieje a vwọ nẹrhovwo kẹ iniọvo eya vẹ eshare kerẹ ẹko. Kerẹ udje, a sa rẹ Jihova nẹ ọ vwẹ ukẹcha kẹ iniọvo re mu phiyọ uwodi yẹrẹ iniọvo rẹ ihwo rẹ ayen vwo ẹguọnọ kpahen ghwuru jẹ e vwo ohwo vuọvo vwẹ ẹwẹẹn. Ọkpako ọvo re se Donald tare nẹ, “Avwanre vwo iniọvo eya vẹ eshare buebun ri hirharokuẹ ebẹnbẹn, ọtiọyena ka ghwa nẹrhovwo kpahen ayen eje re rioja.”

¹¹ Jihova vwo omavwerhovwẹn kpahen ẹrhovwo tiọyena? Dẹn! Kidie avwanre riẹn ọdavwẹ rẹ iniọvo avwanre ọvuọvoo. Ọtiọyena ọ chọre ra vwọ nẹrhovwo kẹ iniọvo eya vẹ eshare kerẹ ẹkoo. (Jọn 17:20; Ẹfe. 6:18) Ẹrhovwo tiọna djephia nẹ e “vwo ẹguọnọ rẹ iniọvo na eje.”—1 Pita 2:17.

A DA NẸRHOVWO KẸ OHWO ỌVUỌVO

12. E de notọ sua, mavọ yen ọnana sa vwọ cha avwanre uko vwo djunute iniọvo avwanre vwẹ ẹrhovwo?

¹² Notọso. Vwọba ẹrhovwo ra nẹ kẹ iniọvo eya vẹ eshare, o ji fo e vwo se odẹ rẹ ohwo ọvuọvo vwẹ ẹrhovwo avwanre. O vwo oniọvo ọvo vwẹ ukoko wẹn ro nene okpọga muabọ? O vwo eghene ọvo rẹ ofu dje, ọkiọvo fikirẹ okeke ro hirharokuẹ vwẹ isikuru? O vwo ọmiọvwọn ọyen ọvo mrẹ bẹnbẹn rọ vwọ yọnrọn ọmọ rọyen vwo nene “ọghwọku kugbe uchebro ri Jihova”? (Ẹfe. 6:4) Wo de notọ sua, ẹguọnọ ru wo vwo kpahen iniọvo na ko che kodophiyọ, owenvwe wọ vwọ nẹrhovwo kẹ ayen kọ je cha ganphiyọ.b—Rom 12:15.

13. Mavọ yen a sa vwọ nẹrhovwo kẹ iniọvo avwanre re vugherii?

¹³ Djunute edẹ ihwo efa vwẹ ẹrhovwo. E se djunute edẹ rẹ iniọvo rẹ avwanre je mrẹ dẹvoo. Kerẹ udje, roro kpahen iniọvo avwanre re mu phiyọ uwodi vwẹ ekuotọ kerẹ Crimea, Eritrea, Russia, kugbe Singapore. Wọ sa mrẹ edẹ rẹ iniọvo avwanre re mu phiyọ uwodi vwẹ jw.org.c Oniruo okinriariẹ ọvo re se Brian tare nẹ: “Me mrẹvughe nẹ mi de si odẹ oniọvo re mu phiyọ uwodi phiyotọ ji se odẹ na phia, ọ nẹrhẹ me karophiyọ ji djunute vwẹ ẹrhovwo mẹ.”

14-15. Mavọ yen a sa vwọ nẹrhovwo kpahen ebẹnbẹn re vwori?

¹⁴ Nẹrhovwo kpahen ebẹnbẹn rayen. Michael, re djunute siẹvure na tare nẹ: “Mi de se kpahen ikuegbe rẹ iniọvo avwanre re mu phiyọ uwodi vwẹ jw.org, ke me vwẹ ẹro roro oborẹ oma che ru vwe ọ da dianẹ mẹvwẹ yehẹ ẹdia rayen. Me riẹnre nẹ me cha ro ẹnwan kpahen aye mẹ, je guọnọ nẹ a nabọ vwẹrote. Ọnana kọ nẹrhẹ me riẹn oborẹ mi che djunute vwẹ ẹrhovwo mẹ kpahen iniọvo eshare re mu phiyọ uwodi re rọvwọnre.”—Hib. 13:3, eta rehẹ obotọ.

¹⁵ Siẹrẹ e de roro kpahen oborẹ akpeyeren hepha kẹ iniọvo avwanre re mu phiyọ uwodi, a je sa gbẹn idjerhe efa ra sa vwọ nẹrhovwo kpahen ebẹnbẹn rayen. Kerẹ udje, a sa nẹrhovwo nẹ ihwo re vwẹrote uwodi na dje uruemu esiri kẹ iniọvo avwanre kugbe ihwo ride rehẹ usuon nẹ e vwẹ uphẹn kẹ ayen vwọ vwẹ ẹga kẹ Jihova odedede. (1 Tim. 2:1, 2) A je sa nẹrhovwo nẹ udje rẹ evun-ẹfuọn rẹ iniọvo re mu phiyọ uwodi vwẹ ọbọngan kẹ iniọvo rẹ ukoko na yẹrẹ ihwo re vwẹ ẹga kẹ Jihovaa ji vwo oniso rẹ omamọ uruemu rẹ oniọvo re muru na, ọnana me nẹrhẹ ayen kerhọ rẹ ovuẹ Uvie na. (1 Pita 2:12) Vwọrẹ uyota, odjekẹ nana cha vwẹ ukẹcha kẹ avwanre siẹrẹ a da nẹrhovwo kẹ iniọvo eya vẹ eshare ri chirakon rẹ ebẹnbẹn efa. A da dia ihwo ri notọ sua, ri se edẹ rẹ ihwo ji djunute ebẹnbẹn rayen vwẹ ẹrhovwo, jẹ e djephia nẹ avwanre vwo “ẹguọnọ rẹ . . . ohwohwo.”—1 Tẹsa. 3:12.

VWẸ ẸRO ABAVO VWO NI ẸRHOVWO

16. Mavọ yen a sa vwọ vwẹ ẹro abavo vwo ni ẹrhovwo rẹ avwanre? (Matiu 6:8)

¹⁶ Kirobo ra tare siẹvure, ẹrhovwo rẹ avwanre se wene ẹdia rẹ ohwo ra nẹrhovwo kẹ na. Dedena, o ji fo re vwo vwo ẹro abavo. Ọke avwanre da nẹrhovwo, ọ dia a vuẹ Jihova kpahen obo rọ je riẹẹn, yẹrẹ ka vwẹ uchebro kẹ kpahen idjerhe ro me yovwin rọ vwọ rhuẹrẹ ẹdia na phiyọọ. Jihova tobọ riẹn oborẹ idibo rọyen guọnọre tavwen ihwo ra nẹrhovwo kẹ yẹrẹ avwanre ke rhe riẹn. (Se Matiu 6:8.) Ọ da dia ọtiọyen, kẹ diesorọ a rha vwọ nẹrhovwo kẹ ihwo efa? Vwọ vrẹ obo ra ta ota kpahen vwẹ uyono nana, ọtiọyen ihwo ri vwo ọdavwẹ ruẹ. Ẹguọnọ yen mu avwanre vwọ nẹrhovwo kẹ ohwohwo. Oma vwerhen Jihova siẹrẹ ọ da mrẹ idibo rọyen ri dje ẹguọnọ rọyen phia.

17-18. Mavọ yen e se vwo djudje ẹrhovwo ra nẹ kẹ iniọvo na?

¹⁷ Ọ da tobọ dianẹ ẹrhovwo avwanre wene ẹdia rẹ iniọvo avwanre hephaa, jẹ ọnana odjephia nẹ e vwo ẹguọnọ rẹ iniọvo na, Jihova ji vwo oniso rọyen. E se djudje rọyen ọtiọna: Vwẹ ẹwẹn roro orua rẹ imitete ivẹ hepha—ọmọtẹ te ọmọshare. Oma rẹ ọmọshare na ganree. Ọmọtẹ na kọ rẹ ọsẹ na: “Biko vwẹ ukẹcha kẹ oniọvo mẹ. Oma rọyen ganre kakakaa!” Ọsẹ na vwẹrote ẹdia na re, kidie o vwo ẹguọnọ ọmọ rọyen, o che ru kemu kemu oma rọyen vwọ gan. Mavọ yen oma cha vwerhen ọsẹ na te rọ vwọ mrẹ ọmọtẹ rọyen rọ nabọ vwo ọdavwẹ rẹ oniọvo rọyen ọmọshare mamọ te ẹdia rọ da rẹ ọsẹ rọyen nẹ ọ vwẹ ukẹcha kẹ!

¹⁸ Ọyena yen oborẹ Jihova jiri kẹ avwanre nẹ e ru—ra vwọ vwẹrote ọdavwẹ rẹ ohwohwo je nẹrhovwo kẹ ohwohwo. E de ru ọtiọyen, je djephia womarẹ ẹrhovwo avwanre nẹ e vwo ọdavwẹ okokodo kpahen ihwo efa, Jihova vwo oniso rẹ ọnana. (2 Tẹsa. 1:3; Hib. 6:10) Vwọba, kirobo ra ta ota kpahen re na, ọkievo ẹrhovwo avwanre se wene ẹdia rẹ ihwo ra nẹrhovwo kẹ na hepha. Ọtiọyena, e jẹ a davwẹngba vwọ karophiyọ ohwohwo vwẹ ẹrhovwo.