Oborẹ Jihova Vwẹ Ukẹcha kẹ Avwanre Vwo Chirakon

1. Diesorọ a vwọ guọnọ akoechiro, ukẹcha vọ yen e vwori? (1 Pita 5:10)

VWẸ ẹdẹ re koba rọ bẹn e yeren na, idibo ri Jihova guọnọ akoechiro. O vwo evo re mwa okpọga. Efa yerẹn ghene ọmiaovwẹ rẹ ohwo re vwo ẹguọnọ kpahen ro ghwuru. Efa ji hirharokuẹ ẹvwọsuọ ro nẹ obọ rẹ ihwo rẹ orua yẹrẹ ihwo ri suẹn cha. (Mat. 10:18, 36, 37) Vwo imuẹro nẹ kobẹnbẹn kobẹnbẹn ru wo nene muabọ, Jihova sa vwẹ ukẹcha kẹ wẹ vwo chirakon.​—Se 1 Pita 5:10.

2. Tivọ yen ẹgba rẹ avwanre vwori re vwo chirakon kerẹ Inenikristi nẹcha?

² Akoechiro ọyen ẹgba re vwo vwo erhiorin je sẹro rẹ iphiẹrophiyọ dede nẹ e hirharokuẹ ebẹnbẹn, omukpahen, yẹrẹ edavwini. Ẹgba rẹ avwanre vwori kerẹ Inenikristi re vwo chirakon, ọ dia obọ rẹ avwanre yen o nẹchaa, ẹkẹvuọvo obọ ri Jihova, rọ dia ohwo rọ sa kẹ avwanre “ẹgba rọ vrẹ ẹgba.” (2 Kọr. 4:7) Vwẹ uyono nana, a cha ta ota kpahen erọnvwọn ẹne rẹ Jihova vwọ kẹ avwanre rere e se vwo chirakon. A je cha ta ota kpahen obo ra sa vwọ reyọ ayen ọvuọvo vwo ruiruo.

ẸRHOVWO

3. Diesorọ a sa vwọ tanẹ ẹrhovwo ọyen igbevwunu rẹ otaẹtakuẹgbe?

³ Jihova ru emu rẹ igbevwunu ọvo rọ sa cha avwanre uko vwo chirakon. O ruro rere avwanre vẹ ọyen sa vwọ ta ota kugbe dede nẹ avwanre irumwemwu. (Hib. 4:16) Di roro: Avwanre sa nẹrhovwo rhe Jihova kọke kọke kpahen kemu kemu. O se nyo avwanre vwẹ kephẹrẹ kephẹrẹ vwẹ kasan kasan ra hepha, ọ da tobọ dianẹ avwanre hẹ asan ro siomanu yẹrẹ evunrẹ uwodi. (Jona 2:1, 2; Iruo 16:25, 26) Ẹnwan de mu avwanre rọ te ẹdia rẹ avwanre rha sa ta obo rehẹ ẹwẹn avwanree, Jihova ji se vwo ẹruọ rẹ oborẹ avwanre guọnọ ta. (Rom 8:26, 27) Vwọrẹ uyota, ẹrhovwo ọyen igbevwunu rẹ otaẹtakuẹgbe!

4. Diesorọ a sa vwọ tanẹ ẹrhovwo akoechiro avwanre vẹ ọhọre ri Jihova shephiyọ?

⁴ Vwevunrẹ Ota rọyen, Jihova kẹ avwanre imuẹro nẹ “kemu kemu rẹ avwanre nọre vwo nene ọhọre rọyen, o nyo avwanre.” (1 Jọn 5:14) Kẹ, a sa nokpẹn rẹ ukẹcha mie Jihova e se vwo chirakon? E! Kidie ọ vẹ ọhọre rọyen shephiyọ. Diesorọ a sa vwọ ta ọtiọyen? Siẹrẹ avwanre de chirakon rẹ edavwini, Jihova kọ sa mrẹ ota kpahen kẹ ohwo rọ reyọ vwọ jehwẹ na, Eshu rọ dia Idẹbono na. (Isẹ 27:11) Vwọ vrẹ ọyena, Baibol na tare nẹ Jihova vwo owenvwe “ro vwo dje ẹgba rọye kpahe ihwo rẹ udu rọye fon kpahọ.” (2 Ikun 16:9) Ọtiọyena, ke se vwo imuẹro nẹ Jihova vwo ẹgba vẹ owenvwe rọ vwọ vwẹ ukẹcha kẹ avwanre vwo chirakon.​—Aiz. 30:18; 41:10; Luk 11:13.

5. Idjerhe vọ yen ẹrhovwo sa vwọ nẹrhẹ e vwo ẹwẹn ri dọe? (Aizaya 26:3)

⁵ Baibol na tare nẹ a da nabọ nẹrhovwo kpahen ọdavwẹ rẹ avwanre, “ufuoma rẹ Ọghẹnẹ rọ vrẹ ẹruọ ejobi kọ sẹro rẹ ubiudu vẹ ẹgba iroro” avwanre. (Fil. 4:7) Roro kpahen oborẹ ọyena mudiaphiyọ. Ihwo re vwẹ ẹga kẹ Jihovaa hirharoku ebẹnbẹn, ọtiọyena, kẹ ayen davwẹn ena sansan ayen se vwo vwo ẹwẹn ri dọe. Kerẹ udje, evo reyọ oka rẹ ona erorokodo ọvo vwo si iroro eje ri kpokpo ayen, ọtiọyen ji te ẹnwan vwo nẹ ẹwẹn rayen. Ọyen emu rẹ imuoshọ e vwo si kemu kemu nẹ evunrẹ ẹwẹn na. (Ni Matiu 12:43-45.) Vwọ vrẹ ọyena, ufuoma rẹ Jihova vwọ kẹ avwanre siẹrẹ a da nẹrhovwo rhe, yovwin vrẹ ufuoma ro nẹ erorokodo tiọyena cha dibidibi. A da nẹrhovwo rhe Jihova, je djephia nẹ avwanre vwẹrosuọ nẹ ọ je cha kẹ avwanre “ufuoma” ro vwo obaa. (Se Aizaya 26:3.) Idjerhe ọvo rẹ Jihova vwo ru ọtiọyen yen ọ vwọ karophiyọ avwanre ẹkpo ri Baibol re vọnre vẹ imuẹro re yono vwo nẹ Ota rọyen rhe. Ẹkpo ri Baibol tiọyen nẹrhẹ ẹwẹn vẹ ubiudu avwanre totọ kidie a riẹnre nẹ Jihova vwo ọdavwẹ avwanre, ọ je guọnọ nẹ e yeren uvi rẹ akpọ.​—Une 62:1, 2.

6. Mavọ yen wọ sa vwọ reyọ uphẹn rẹ ẹrhovwo vwo ruiruo vọnvọn? (Ni uhoho na.)

⁶ Obo wo se ru. Wo de chirakon rẹ ọdavwini, “mu oghwa wẹn nyẹ Ọrovwohwo,” wọ je nẹrhovwo nẹ ọ kẹ wẹ ufuoma rọyen. (Une 55:22) Je nẹrhovwo kpahen aghwanre ru wọ guọnọre wo se vwo yerin ghene ebẹnbẹn wẹn na. (Isẹ 2:10, 11) Vwọba oyare rẹ obo wo se vwo chirakon, o ji fo nẹ wọ kpẹvwẹ vwẹ ẹrhovwo wẹn. (Fil. 4:6) Jokaphiyọ oborẹ Jihova vwẹ ukẹcha kẹ wẹ vwẹ edavwini na eje, wọ je kpẹvwẹ. Wo jẹ ebruphiyọ ri te we obọ re chọrọ owẹ ẹro fikirẹ ebẹnbẹn ru wo hirharokuẹẹ.​—Une 16:5, 6.

OTA RẸ ỌGHẸNẸ

7. Mavọ yen eyono ri Baibol na sa vwọ cha avwanre uko vwo chirakon?

⁷ Jihova kẹ avwanre Ota rọyen rọ nẹrhẹ avwanre se chirakon. O vwo ẹkpo ri Baibol buebun re vwẹ imuẹro kẹ avwanre nẹ Jihova che bicha avwanre. Roro kpahen udje ọvo. Matiu 6:8 tare nẹ: “Ọsẹ rẹ ovwan riẹn oborẹ ovwan guọnọre tavwen ovwan ke tobọ nọ.” Jesu yen ta eta yena, ọ nabọ riẹn Jihova vwọ vrẹ kohwo kohwo. Ọtiọyena, o vwo oboresorọ e vwo vwo iroro ivivẹ sẹ Jihova vwo ọdavwẹ rẹ oborẹ avwanre guọnọre a dahẹ edavwinii. Ẹkpo sansan tiọna jehẹ evunrẹ Baibol na re sa nẹrhẹ owenvwe avwanre vwori e vwo chirakon ganphiyọ.​—Une 94:19.

8. (a) Djudje rẹ ẹkpo ri Baibol ọvo rọ sa cha avwanre uko vwo chirakon. (b) Die yen sa cha avwanre uko vwọ karophiyọ ẹkpo ri Baibol sansan siẹrẹ a da guọnọ ayen?

⁸ Odjekẹ ri Baibol sansan sa cha avwanre uko vwo chirakon. Kidie e sa kẹ avwanre aghwanre ra guọnọre e se vwo bru emamọ erhiẹn. (Isẹ 2:6, 7) Kerẹ udje, Baibol jiriro kẹ avwanre nẹ a ro ẹnwan kpahen oborẹ odẹ cha ghwa rhe yẹrẹ rọ cha ghwa chaa, ukperẹ ọtiọyen e yeren akpọ vwo nene kuẹdẹ ku obo rọ ghwa rhe. (Mat. 6:34) Ọ da dianẹ avwanre vwo ẹkuruemu re vwo se Baibol na ji roro kpahọn, ka sa karophiyọ ẹkpo ri Baibol sansan siẹrẹ e de vwo ebẹnbẹn vẹ ọke ra vwọ guọnọ ayen.

9. Idjerhe vọ yen ikuegbe rehẹ Baibol na vwo ruẹ ẹroẹvwọsuọ avwanre kpahen ukẹcha ri Jihova ganphiyọ?

⁹ Ikuegbe rẹ ihwo ghevweghe re vwẹroso Jihova je mrẹ obicha rọyen vọn evunrẹ Baibol na. (Hib. 11:32-34; Jems 5:17) Siẹrẹ e de roro kpahen ikuegbe tiọyena, kọ nẹrhẹ ẹroẹvwọsuọ avwanre nẹ Jihova yen “odjahọ kugbe ẹgba rẹ avwanre, omamọ rẹ ọchuko ra mrẹ, vwẹ ọke rẹ ukpokpogho” ganphiyọ. (Une 46:1) E de vwo oniso oborẹ idibo ri Jihova vwẹ obuko re fuevun wan, ọnana kọ nẹrhẹ a vwẹrokere akoechiro vẹ esegbuyota rayen.​—Jems 5:10, 11.

10. Mavọ yen wọ sa vwọ reyọ Baibol na vwo ruiruo vọnvọn?

¹⁰ Obo wo se ru. Se Baibol na kẹdi kẹdẹ, wo ji si ẹkpo ri Baibol sansan ru wo niri nẹ e sa vwẹ ukẹcha kẹ wẹ phiyotọ. Ihwo buebun je mrẹ isese ri kẹdi kẹdẹ na phiyọ uvi idjerhe ọvo ra vwọ tuẹn irueru ẹdẹ phiyọ vẹ ẹkpo ri Baibol rọ vwẹ ọbọngan phia. Oniọvo aye ọvo re se Mariea mrẹ ọnana vughe ọke ra vwọ mrẹ ikansa vwẹ oma rẹ ọsẹ vẹ oni rọyen. Die yen vwẹ ukẹcha kẹ vwo chirakọn rọ vwọ vwẹrote ayen vwẹ emeranvwe re koba rẹ ughwu rayen vwo siẹkẹrẹ phiyọ na? Ọ da ta: “Kurhiọke kurhiọke yen mi vwo se ẹkpo ri Baibol rẹ ẹdẹ yena vwo nẹ Fuẹrẹn Isiesi Ọfuanfon na Kẹdẹ Kẹdẹ ji roro kpahọn, ọnana mi ruẹ na nẹrhẹ mi muẹ ẹwẹn mẹ kpahen ẹkpo ri Baibol rẹ ẹdẹ yena, je vwẹ ukẹcha kẹ vwẹ vwọ tẹnroviẹ Jihova vẹ ive rọyen ukperẹ ẹdia rẹ me hepha na.”​—Une 61:2.

INIỌVO AVWANRE

11. Diesorọ ọ vwọ vwerhoma ra vwọ riẹn nẹ ọ dia avwanre ọvo herọ vwẹ edavwini re chirakon rayeen?

¹¹ Jihova vwẹ iniọvo rehẹ akpọ na eje vwọ kẹ avwanre e vwo chirakon. Ọ vwọ dianẹ a riẹnre nẹ “iniọvo rẹ [avwanre] rehẹ akpọ na eje ji hirharokuẹ oka rẹ ojaẹriọ tiọyena” nẹrhẹ e vwo imuẹro nẹ ọ dia avwanre ọvo yen herọọ. (1 Pita 5:9) Vwọrẹ uyota, e se vwo imuẹro nẹ kẹdia kẹdia avwanre hepha, ihwo efa ji hirharoku ọkpọ ẹdia tiọyen re, ayen ji chirakon. Ọyena mudiaphiyọ nẹ avwanre ji se chirakon!​—Iruo 14:22.

12. Idjerhe vọ yen iniọvo avwanre sa vwọ vwẹ ukẹcha kẹ avwanre, kẹ die yen e se ru kẹ ayen? (2 Kọrẹnt 1:3, 4)

¹² Iniọvo avwanre sa bọn avwanre gan e vwo chirakon na. Ọyinkọn Pọl mrẹ uyota rẹ ọnana vughe. Ọkieje yen o vwo dje ọdavwaro kẹ iniọvo re vwẹ ukẹcha kẹ ọke ra vwọ kanrọ phiyọ uwevwin, o ji se edẹ rayen. Ayen vwẹ ọbọngan, obicha, kugbe oborẹ Pọl guọnọre vwọ kẹ. (Fil. 2:25, 29, 30; Kọl. 4:10, 11) Nonẹna, e se hirharoku oka rẹ ẹdia tiọyen. E de chirakon rẹ ebẹnbẹn, iniọvo avwanre hẹ etiyin re vwẹ ukẹcha kẹ avwanre, ayen da je guọnọ ukẹcha rẹ avwanre, e ji bicha ayen.​—Se 2 Kọrẹnt 1:3, 4.

13. Die yen vwẹ ukẹcha kẹ oniọvo aye re se Maya vwo chirakon?

¹³ Iniọvo rehẹ akpọ na eje ghini uvi rẹ ọbọngan vwọ kẹ oniọvo aye re se Maya vwẹ Russia. Vwẹ ukpe ri 2020, elọkpa da hiẹ uwevwin rọyen ji muo kpo aguare kidie ọ vuẹ ihwo efa kpahen obo ro segbuyota. Maya da ta: “Uvwre rẹ ọke yena rẹ oma mẹ vwo bruku, ofu ji vwo dje vwe na, iniọvo na de se vwe, si evuẹ kugbe ileta rhe vwe je vwẹ imuẹro kẹ vwẹ nẹ ayen vwo ẹguọnọ mẹ. Ọkieje me vwọ riẹn nẹ mi vwo orua ro vwo ẹguọnọ, rọ pha rhuarho. Ghwe vwo nẹ ukpe ri 2020 rhe, yen me ma vwọ riẹn ọnana.”

14. Mavọ yen a sa vwọ mrẹ erere vwo nẹ obicha rẹ iniọvo rhe re vwo chirakon na? (Ni uhoho na.)

¹⁴ Obo wo se ru. Sikẹrẹ iniọvo eya vẹ eshare wo de chirakon rẹ edavwini. Wo hwọke wọ vwọ nokpẹn rẹ ukẹcha mie ekpako naa. Ayen sa dia “odjahọ vwọ kẹ aphopho, urhurho vwọ ọke rẹ ogiribo.” (Aiz. 32:2) Je karophiyọ nẹ iniọvo wẹn ji chirakon rẹ ebẹnbẹn. Siẹrẹ wo de ru emu esiri vwọ kẹ ohwo rọ guọnerọ, ọnana cha nẹrhẹ wo vwo ẹro abavo wo vwo chirakon rẹ ọdavwini wẹn na.​—Iruo 20:35.

IPHIẸROPHIYỌ RẸ AVWANRE

15. Die yen iphiẹrophiyọ ru kẹ idibo ri Jihova re fuevun, ji te Jesu? (Hibru 12:2)

¹⁵ Jihova kẹ avwanre uvi iphiẹrophiyọ rọ nẹrhẹ avwanre se chirakon. (Rom 15:13) Karophiyọ oborẹ iphiẹrophiyọ vwẹ ukẹcha kẹ Jesu vwo chirakon rẹ ẹdẹ rọ ma gan vwẹ akpeyeren rọyen eje. (Se Hibru 12:2.) Jesu riẹnre nẹ ọyọnregan rọyen che toroba orufon rẹ odẹ ri Jihova. Jesu rhẹro rọ vwọ vwomaba Ọsẹ rọyen ji nene iniọvo rọyen sun vwẹ Uvie rẹ odjuvwu ọke vwọ yanran na. Ọtiọyen ọ je hepha, nẹ iphiẹrophiyọ ra vwọ dia bẹdẹ vwẹ akpọ kpokpọ rẹ Ọghẹnẹ na, nẹrhẹ avwanre chirakon rẹ kọdavwini kọdavwini ro nẹ obọ rẹ Eshu cha.

16. Mavọ yen iphiẹrophiyọ vwẹ ukẹcha kẹ oniọvo ọvo vwo chirakon, kẹ die wo yono vwo nẹ obo rọ tare?

¹⁶ Roro kpahen oborẹ iphiẹrophiyọ rẹ Uvie na vwẹ ukẹcha kẹ oniọvo aye re se Alla vwẹ Russia, re mu ọshare rọyen phiyọ uwodi rọ vwọ hẹrhẹ ẹdjọeguo rọyen. Ọke rẹ ọnana vwọphia, Alla da ta: “Ra vwọ nẹrhovwo ji roro kpahen iphiẹrophiyọ avwanre kpahen obaro na vwẹ ukẹcha kẹ vwẹ, ọ rha nẹrhẹ ofu dje vwee. Me riẹnre nẹ ọ dia oba na naa. Jihova che phikparobọ, eriyin ji te avwanre.”

17. Mavọ yen e se vwo dje ọdavwaro kpahen iphiẹrophiyọ avwanre vwori? (Ni uhoho na.)

¹⁷ Obo wo se ru. Ghwọrọ ọke vwo roro kpahen uvi akpeyeren rẹ Jihova rhuẹrẹphiyọ vwẹ obaro na. Mrẹ oma wẹn vwẹ akpọ kpokpọ rẹ Ọghẹnẹ na, wọ je vwẹ ẹwẹn roro kpahen ebruphiyọ sansan ri che te avwanre obọ. Kọdavwini kọdavwini rẹ avwanre hirharokuẹ asaọkiephana ‘ọ rẹ ọmọke, ọ je cha pharhe.’ (2 Kọr. 4:17) Vwọba, davwẹngba wẹn eje vwọ vuẹ ihwo efa kpahen obo ru wo segbuyota. Vwẹ ẹwẹn roro akpeyeren ọgangan rẹ ayen dia di yerẹn na vẹ ebẹnbẹn rẹ ayen hirharokuẹ vwẹ akpọ rẹ Eshu nana jẹ ayen tobọ riẹn ọhọre rẹ Ọghẹnẹ kpahen obaro naa. Wọ sa ta ota kprẹn vwọ kpare urhurusivwe rayen kpahen iphiẹrophiyọ re vwo kpahen Uvie na.

18. Diesorọ a vwọ vwẹroso ive ri Jihova?

¹⁸ Ọke rẹ Job vwọ fuevun chirakon rẹ edavwini buebun nu, ọ da vuẹ Jihova: “Me riẹnre nẹ wo se ru emu ejobi, o vwo ohwo ro se miovwi obo ru wo ruẹ-ẹ.” (Job 42:2) Kirobo rẹ Job riẹnre, o vwo emu vuọvo ro se gbowọphiyọ orugba rẹ ọhọre ri Jihovaa. Uyota yena sa vwẹ ọbọngan kẹ avwanre vwo chirakon. Kerẹ udje, vwẹ ẹwẹn roro aye rọ muọga, rẹ ofu dje kidie ebo buebun se sivwoon. Jẹ, ọ da dianẹ ọbo rọ nabọ tẹn ona ra je vwẹroso vughe ọga ro rhere na, ji djefiotọ kẹ obo ro che sivwon wan, ẹwẹn rọyen kọ cha nabọ totọ, dede nẹ omaesivwon na cha reyọ ọke. Ọtiọyena, ko se chirakon, kidie o vwo iphiẹrophiyọ​—iphiẹrophiyọ nẹ oma rọyen che kpo. Ọtiọyen ọ je hepha, nẹ iphiẹrophiyọ avwanre kpahen Iparadaisi rọ cha na nẹrhẹ avwanre chirakon.

19. Die yen a guọnọre rere e se vwo chirakon?

¹⁹ Kirobo ra mrẹre, Jihova vwẹ ukẹcha kẹ avwanre vwo chirakon womarẹ ẹrhovwo, Ota rọyen, iniọvo avwanre kugbe iphiẹrophiyọ rẹ avwanre. A da reyọ erọnvwọn nana vwo ruiruo vọnvọn, Jihova cha vwẹ ukẹcha kẹ avwanre vwẹ kọdavwini kọdavwini re hirharoku rhi te ọke ebẹnbẹn rẹ akpọ Eshu vwo no kakare.​—Fil. 4:13.