Oboresorọ E Vwo Vwo Ọdavwaro Kpahen Evwoghovwo ri Jihova

1-2. Idjerhe vọ yen ẹdia rẹ ihworakpọ vwọ họhọ ọ rẹ eghene ọshare re djunute vwẹ ẹkorota 1 na?

VWẸ ẹwẹn roro eghene ọshare ra yọnre ghwanre vwẹ orua ro feri mamọ. Ẹdẹ ọvo vwo te emu ri kpregede da phia; ọsẹ vẹ oni rọyen de ghwu phiyọ asidẹnti. Obo re phiare na kpokpiro ẹwẹn mamọ. Ẹkẹvuọvo, iyẹnrẹn ọfa ro che gbe unu mamọ je cha vwẹ obaro. Ọ da rhe mrẹvughe nẹ ọsẹ vẹ oni rọyen re igho rẹ orua na eje je yanjẹ esa buebun vwọ kẹ. Enẹna, ukpe rọ vwọ riuku rẹ efe, esa kọyen ọ re re, ihwo rẹ ọsẹ vẹ oni rọyen riosa rayen je guọnọ nẹ ọ hwa esa na. Esa na vrẹ rẹ oma.

² Vwẹ idjerhe evo, ẹdia avwanre pha kerẹ ọ rẹ eghene ọshare nana. Adam vẹ Ivi, re dia ọsẹ vẹ oni rẹ avwanre rẹsosuọ, eyen ihwo re gbare re je dia iparadaisi rọ pha yoyovwin. (Jẹ 1:27; 2:7-9) Ayen se yeren akpọ rẹ omavwerhovwẹn bẹdi bẹdẹ. Jẹ, erọnvwọn eje de wene siẹvuọvo. Ayen de ku Iparadaisi kufia ji te uphẹn rẹ ayen vwọ dia bẹdẹ. Uku vọ kọyen emọ rayen re mie ayen? Baibol na tare nẹ: “Kirobo rẹ umwemwu womarẹ ohwo ọvo [Adam] ro akpọ na, rẹ ughwu da womarẹ umwemwu rhe na, ọtiọyena ughwu da rhe hrabọ ro ihwo ejobi kidie ayen eje ru umwemwu.” (Ro 5:12) Uku rẹ avwanre re mie Adam yen umwemwu, rọ ghwa ughwu rhe. Umwemwu nana rẹ avwanre riuku rọyen na pha kerẹ okposa, rẹ avwanre vuọvo cha sa hwaa.​—Un 49:8.

3. Diesorọ a vwọ reyọ imwemwu rẹ avwanre vwo dje ‘esa’?

³ Jesu reyọ imwemwu avwanre vwo dje ‘esa.’ (Mt 6:12; Lu 11:4) Siẹrẹ avwanre de ru umwemwu, ọ pha kerẹ osa rẹ avwanre re Jihova. Ọtiọyena, Jihova rhe ru ọrhuẹrẹphiyotọ rọ vwọ reyọ imwemwu na vwo ghovwo avwanree, ukuotọ rọyen kẹ ughwu. Iphiẹrophiyọ ra vwọ rhoma dia gbe je herọ ọfaa.​—Ro 6:7, 23.

4. (a) Ababọ rẹ ukẹcha, die yen rha phia kẹ irumwemwu eje? (Une rẹ Ejiro 49:7-9) (b) Vwẹ Baibol na, die yen ota na “umwemwu” mudiaphiyọ? (Ni ekpeti na “Umwemwu.”)

⁴ Oborẹ Adam vẹ Ivi ku kufia na sa rhoma te avwanre obọ? Ọ dia vwọrẹ ẹgba rẹ avwanre ọvoo. (Se Une rẹ Ejiro 49:7-9.) Ababọ rẹ ukẹcha, avwanre che se vwo iphiẹrophiyọ rẹ evrẹnushi yẹrẹ dia vwẹ obaro naa. Vwọrẹ uyota, ughwu rẹ avwanre rha dia kerẹ ọ rẹ eranvwe.​—Agh 3:19; 2Pi 2:12.

5. Idjerhe vọ yen Ọsẹ avwanre ro vwo ẹguọnọ na vwọ cha avwanre uko vwọ hwosa rẹ umwemwu ra riuku rọyen? (Ni uhoho rọhẹ opharo ọbe na.)

⁵ Jẹ a rhoma roro kpahen ọshare re djunute vwẹ ọtonphiyọ rẹ uyono nana, mavọ yen oma che ruo ọ da dianẹ ọdafe ọvo tare nẹ ọyen cha hwesa rọyen eje? Aphro herọọ nẹ, eghene ọshare na che rhiabọreyọ ẹse nana ji dje ọdavwaro phia. Vwẹ idjerhe vuọvo na, Jihova Ọsẹ avwanre ro vwo ẹguọnọ, kẹ avwanre okẹ rọ nẹrhẹ a sa hwosa rẹ umwemwu ra riuku rọyen mie Adam. Jesu djere vwẹ idjerhe ọtiọna nẹ: “Ọghẹnẹ vwo ẹguọnọ rẹ akpọ na mamọ te ẹdia ro de siobọnẹ Ọmọ rọyen ọvuọvo, rere kohwo kohwo ro vwo esegbuyota kpahọn vwo jẹ ẹghwọrọ, ẹkẹvuọvo ko vwo arhọ ri bẹdẹ.” (Jọ 3:16) Vwọba, okẹ nana je nẹrhẹ avwanre vwo uphẹn rẹ avwanre vẹ Jihova vwo vwo uvi rẹ oyerinkugbe.

6. Erhọ yen eta ri Baibol evo re vwo ruiruo ra cha ta ota kpahen vwẹ uyono nana, kẹ diesorọ?

⁶ Mavọ yen a sa vwọ mrẹ erere vwo nẹ okẹ ọghanghanre nana rọ nẹrhẹ a sa reyọ imwemwu, yẹrẹ ‘esa’ rẹ avwanre vwo ghovwo avwanre? A cha mrẹ ẹkpahọnphiyọ rẹ onọ nana vwẹ obo ri Baibol na reyọ eta nana vwo ruiruo, arhuẹrẹ, ephoro, ophu efuon, ọtanhirhe, esivwon, kugbe a vwọ dia ọvwata. Vwẹ uyono nana, a cha ta ota kpahen oborẹ eta nana ọvuọvo mudiaphiyọ. Siẹrẹ e de roro kpahan obo ri Jihova ruru rọ vwọ reyọ imwemwu avwanre vwo ghovwo avwanre, ọdavwaro rẹ avwanre kpahọn kọ cha ganphiyọ.

OBORESORỌ: ARHUẸRẸ

7. (a) Die ọfa yen Adam vẹ Ivi ku kufia? (b) Kerẹ emọ rẹ Adam vẹ Ivi, die yen a ma guọnọ? (Rom 5:10, 11)

⁷ Vwọ vrẹ uphẹn rẹ arhọ ri bẹdẹ rọ va ayen abọ, Adam vẹ Ivi ji ku uvi rẹ oyerinkugbe rẹ ayen vẹ Ọsẹ rayen, Jihova vwori kufia. Ẹsosuọ, Adam vẹ Ivi ayen usun rẹ ihwo rehẹ orua rẹ Ọghẹnẹ. (Lu 3:38) Ẹkẹvuọvo, ayen vwo gbevwọso Jihova nu, ọ da djẹ ayen nẹ orua rọyen tavwen ayen ke rhe ton emọ evwiẹ phiyọ. (Jẹ 3:23, 24; 4:1) Ọtiọyena, kerẹ emọ rayen ofori nẹ avwanre vẹ Jihova rhuẹrẹ kugbe. (Se Rom 5:10, 11.) Kọyen, a guọnọre nẹ avwanre vẹ ọyen vwo uvi rẹ oyerinkugbe. Vwo nene oborẹ ọbe ọvo ra rionbọ ra tare, “ra vwọ rhuẹrẹ kuẹgbe” re vwo ruiruo vwẹ etinẹ na se mudiaphiyọ “ra vwọ rhẹriẹ ọvweghrẹn phiyọ ugbeyan.” O gbe ohwo unu nẹ, Jihova yen jowọ nana. Vwẹ idjerhe vọ?

ỌRHUẸRẸPHIYOTỌ NA: EPHORO

8. Die yen (a) ephoro? (b) ophu efuon?

⁸ Ephoro ọyen ọrhuẹrẹphiyotọ ri Jihova ruru rọ vẹ emọ rẹ ihworakpọ re dia irumwemwu sa vwọ rhoma vwo uvi rẹ oyerinkugbe. O churobọ si a vwọ reyọ obo ri shephiyọ abavo vwọ hwosa rẹ obo re ku kufia. Vwẹ idjerhe ọtiọna, orọnvwọn ro ghwruru yẹrẹ ọ ro miovwirin na ka sa rhoma mrẹ yẹrẹ wene. Ẹbẹre ra Vwẹ Grik si Vwẹ Isiesi Ọfuanfọn Na reyọ ota na ophu efuon, ro dino họhọ “ephoro” vwo ruiruo. (Ro 3:25) Ophu efuon ọyen uruemu ra vẹ Ọghẹnẹ vwọ dia vwọrẹ ufuoma, ọ me je nẹrhẹ a vẹ ọyen vwo uvi rẹ oyerinkugbe.

9. Ọrhuẹrẹphiyotọ rẹ ọmọke vọ yen Jihova ruru a sa vwọ reyọ imwemwu rẹ ihwo rẹ Izrẹl vwo ghovwo ayen?

⁹ Rere ihwo rẹ Izrẹl vẹ ọyen se vwo vwo uvi rẹ oyerinkugbe, Jihova de ru ọrhuẹrẹphiyotọ rẹ ọmọke vwọ kẹ evwoghovwo rẹ imwemwu rayen. Obọ ọvo ẹgbukpe yen e ruẹ Ẹdẹ Ephoro na vwẹ Izrẹl. Vwẹ ẹdẹ yena, orherẹn rode na ze izobo rẹ eranvwe vwọ kẹ ihwo na. Vwọrẹ uyota, izobo rẹ eranvwe che se phoro imwemwu rẹ ihworakpọ noo kidie ihworakpọ ghanre vrẹ eranvwe. Jẹ, kọke kọke rẹ ihwo rẹ Izrẹl ri kurhẹriẹ vwo ze izobo ri Jihova guọnọ mie ayen, o muegbe ọ vwọ reyọ imwemwu rayen vwọ vrẹ ayen. (Hib 10:1-4) Vwọba, izobo rẹ ayen ze vwẹ ẹdẹ re vwo phoro oma na kugbe efa ọtiọyen nẹrhẹ ayen riẹn nẹ ayen irumwemwu nẹ ayen guọnọ orọnvwọn ọfa ro se phoro imwemwu rayen no karekare.

10. Ọrhuẹrẹphiyotọ vọ yen Jihova ruru rere a sa vwọ reyọ imwemwu rẹ ihworakpọ vwo ghovwo ayen karekare?

¹⁰ Jihova vwo ọrhuẹrẹphiyotọ ọvo vwẹ ẹwẹn rere a sa vwọ reyọ imwemwu rẹ ihworakpọ vwo ghovwo ayen karekare. Ọtiọyena ọ da vwẹ ọmọ rọyen ro vwo ẹguọnọ kpahen “vwọ kpahotọ ẹsiẹvo goi rọ vwọ ghwa imwemwu rẹ ihwo buebun.” (Hib 9:28) Jesu “vwẹ arhọ rọyen vwọ kpahotọ kerẹ ọtanhirhe vwọ kẹ ihwo buebun.” (Mt 20:28) Die yen ọtanhirhe?

ỌTANHIRHE NA: YEN OSA NA

11. (a) Vwo nene obo ri Baibol na tare, die yen ọtanhirhe? (b) Die yen a guọnọre a sa vwọ hwosa rẹ ọtanhirhe na?

¹¹ Vwo nene obo ri Baibol na tare, ọtanhirhe ọyen osa ra hware e se vwo phoro imwemwu rẹ avwanre ji ru arhuẹrẹ rere a vẹ Jihova se vwo vwo uvi rẹ oyerinkugbe. Jihova yen ruro rere ihworakpọ sa vwọ rhoma mrẹ oborẹ Adam ku kufia na. Vwẹ idjerhe vọ? Karophiyọ nẹ, Adam vẹ Ivi ku arhọ ọgbagba rayen vẹ uphẹn rẹ ayen vwọ dia bẹdẹ kufia. Ọtiọyena, osa rẹ ọtanhirhe na vẹ oborẹ ayen ku kufia na cha dia abavo. (1Ti 2:6) A sa hwa ọ da dianẹ omiragua ohwo herọ (1) rọ gbare; (2) ro vwo uphẹn rọ vwọ dia otọrakpọ na bẹdẹ; (3) ro vwo owenvwe rọ vwọ vwẹ arhọ rọyen vwọ kpahotọ kẹ avwanre. Ẹdia nana ọvo yen a da sa vwẹ arhọ rẹ ohwo nana vwo wene yẹrẹ hwosa rẹ arhọ rẹ Adam vẹ Ivi ku kufia na.

12. Diesorọ Jesu sa vwọ hwosa rẹ ọtanhirhe na?

¹² Jẹ e roro kpahen erọnvwọn erha re nẹrhẹ Jesu sa hwosa rẹ ọtanhirhe na. (1) Ọyen ohwo rọ gbare​—“o ru umwemwu-u.” (1Pi 2:22) (2) Fikirẹ ọtiọyena, o vwo uphẹn rọ vwọ dia otọrakpọ na bẹdẹ. (3) O ji vwo owenvwe ro vwo ghwu je vwẹ arhọ rọyen vwọ kpahotọ kẹ avwanre. (Hib 10:9, 10) Jesu, ọyen ohwo rọ gbare kirobo rẹ Adam hepha tavwen o ki ru umwemwu. (1Kọ 15:45) Womarẹ ughwu ri Jesu, ko se phoro imwemwu rẹ Adam no, kọyen, ọ hwosa rẹ oborẹ Adam ku kufia na. (Ro 5:19) Ọtiọyena, Jesu kọ rhe dia “Adam rọ koba.” Ọnana yen sorọ rẹ a rha guọnọ ohwo ọfa rọ gbare rọ cha hwosa rẹ oborẹ Adam ku kufia naa. Jesu ghwuru “ẹsiẹvo goi.”​—Hib 7:27; 10:12.

13. Ofẹnẹ vọ yen herọ vwẹ ọrhuẹrẹphiyotọ rẹ ephoro kugbe ọtanhirhe na?

¹³ Kẹ, ofẹnẹ vọ yen herọ vwẹ ọrhuẹrẹphiyotọ rẹ ephoro kugbe ọtanhirhe na? Ọghẹnẹ yen ruẹ ọrhuẹrẹphiyotọ rẹ ephoro na rere ọ vẹ emọ rẹ ihworakpọ se vwo vwo uvi rẹ oyerinkugbe. Ọtanhirhe na ọyen osa ra hware e se vwo phoro imwemwu rẹ ihworakpọ no. Osa na mudiaphiyọ ọbara ọghanghanre ri Jesu ro kuphiyotọ kẹ avwanre.​—Ẹf 1:7; Hib 9:14.

OBO RI NẸ OBUKO RỌYEN RHE: ESIVWON KUGBE A VWỌ DIA ỌVWATA

14. Die yen a cha ta ota kpahen enẹna, kẹ diesorọ?

¹⁴ Die yen nẹ obuko rẹ ọrhuẹrẹphiyotọ rẹ ephoro rẹ imwemwu na rhe? Ra vwọ kpahenphiyọ onọ nana, a cha ta ota kpahen oborẹ eta ivẹ re vwo ruiruo vwẹ Baibol na mudiaphiyọ kugbe erere avwanre mrẹ nẹ evwoghovwo ri Jihova rhe.

15-16. (a) Vwẹ Baibol na, die yen ota na “esivwon” mudiaphiyọ? (b) Idjerhe vọ yen ọnana vwo shekpahen avwanre?

¹⁵ Vwẹ Baibol na, esivwon mudiaphiyọ ra vwọ rhan yẹrẹ siobọnẹ ohwo fikirẹ osa rẹ ọtanhirhe ra hware. Ọyinkọn Pita djere vwẹ idjerhe ọtiọna: “Ovwan riẹnre nẹ ọ dia erọnvwọn re ghwọrọ kerẹ idọnọ efuanfon yẹrẹ iro yen a vwọ tan [“yẹrẹ vwo sivwin”] ovwan vwo nẹ akpeyeren ofefe rẹ ovwan riuku rọyen mie esẹ rẹ ovwan ride-e. Ẹkẹvuọvo, womarẹ ọbara ọghanghanre ri Kristi na, rọ họhọ ọ rẹ omogodẹ ro vwo upe yẹrẹ oka-a.”​—1Pi 1:18, 19; eta rehẹ obotọ.

¹⁶ Fikirẹ izobo rẹ ọtanhirhe na, ka sa tan avwanre vwo nẹ abọ rẹ umwemwu vẹ ughwu. (Ro 5:21) Vwọrẹ uyota, o vwo oboresorọ avwanre vwo dje ọdavwaro phia kẹ Jihova kugbe Jesu fikirẹ usivwin ro nẹ ọbara ọghanghanre ri Jesu rhe.​—1Kọ 15:22.

17-18. (a) Die yen o mudiaphiyọ re vwo se ohwo ọvwata? (b) Erere vọ yen che te avwanre obọ kidie nẹ Jihova se avwanre evwata?

¹⁷ Ra vwọ dia ọvwata mudiaphiyọ nẹ Jihova rha guọnọ nẹ avwanre hwosa rẹ imwemwu rẹ avwanre ruruu, kidie o phoro ayen nure. Ọnana ro ruru na, vwọso uwan orhiẹn abavo rọyeen. Avwanre muwan rẹ ọvwata ro se avwanre naa; yẹrẹ kọ rhọnvwephiyọ imwemwu rẹ avwanree. Jẹ, fikirẹ esegbuyota rẹ avwanre vwo kpahen izobo ri Jesu kugbe osa rẹ ọtanhirhe ra hware na, ọnana kọyen nẹrhẹ Jihova phoro imwemwu rẹ avwanre karekare.​—Ro 3:24; Ga 2:16.

¹⁸ Die yen ọnana mudiaphiyọ kẹ avwanre ọvuọvo? A sanẹ itu evo re seri evwata nẹ i nene Jesu sun vwẹ odjuvwu e ji se ayen emọ rẹ Ọghẹnẹ. (Tai 3:7; 1Jọ 3:1) A vwẹ imwemwu rayen vwo ghovwo ayen nure. O rhe vwo emu vuọvo re kere ba ayen abọ kerẹ irumwemwuu, ọtiọyena, ayen muwan rẹ ayen vwọ ro Uvie na. (Ro 8:1, 2, 30) E ji se itu ri vwo iphiẹrophiyọ re vwọ dia otọrakpọ na evwata, a je vwẹ imwemwu rayen vwo ghovwo ayen, e da rhe dia igbeyan rẹ Ọghẹnẹ. (Jem 2:21-23) Otugbidigbidi re cha wan Amagidọn vrẹ, che ghwu kakakaa. (Jọ 11:26) A cha kpare “evwata” vẹ “ihwo ri jẹ evwata ẹdia” ri ghwuru nushi. (Iru 24:15; Jọ 5:28, 29) Ukuotọ rọyen, idibo ri Jihova eje rehẹ otọrakpọ na ri nyẹme che “vwo urinrin rẹ ugbomọphẹ rẹ emọ rẹ Ọghẹnẹ.” (Ro 8:21) Avwanre rhẹro rẹ ọke yena ra vẹ Ọsẹ rẹ avwanre Jihova che vwo vwo uvi rẹ oyerinkugbe je dia emọ rọyen re gbare!

19. Idjerhe vọ yen ẹdia rẹ avwanre vwo yovwinphiyọ? (Ji ni ekpeti na “Obo ro Mudiaphiyọ.”)

¹⁹ Vwọrẹ uyota, ẹdia rẹ avwanre pha kerẹ ọ rẹ eghene ọshare ra ta ota kpahen siẹvure rẹ erọnvwọn ejobi va abọ rọ je riuku rẹ okposa rọ cha sa hwaa. Ẹkẹvuọvo, a kpẹvwẹ Jihova rọ vwẹ ukẹcha kẹ avwanre. Ẹdia rẹ avwanre rhi wene kidie Jihova gbẹn idjerhe ro vwo phoro imwemwu rẹ avwanre womarẹ osa ẹhwa rẹ ọtanhirhe na. Esegbuyota rẹ avwanre kpahen Kristi nẹrhẹ a sa tan avwanre nẹ umwemwu kugbe ughwu. Enẹna, ka sa reyọ imwemwu rẹ avwanre vwọ vrẹ avwanre, o rhe vwo emu vuọvo re che se kere ba avwanre abọọ kidie e phoro ayen eje nure. Ẹkẹvuọvo, obo re ma ghanre kparobọ yen avwanre vẹ Ọsẹ rẹ avwanre Jihova, rọ vọnre vẹ ẹguọnọ rọhẹ obodjuvwu na ki se vwo uvi rẹ oyerinkugbe.

20. Die yen a cha ta ota kpahen vwẹ uyono rọ cha na?

²⁰ Siẹrẹ avwanre de roro kokodo kpahan obo ri Jihova kugbe Jesu ru vwọ kẹ avwanre, ubiudu rẹ avwanre kọ mwavwa vẹ ọdavwaro. (2Kọ 5:15) Ababọ rẹ ukẹcha rayen, avwanre che se vwo iphiẹrophiyọ vuọvoo! Vwẹ uyono rọ cha na, a cha fuẹrẹn idje sansan ri dje oborẹ avwanre sa vwọ mrẹ erere vwo nẹ ọtanhirhe na.