Chirakon Ọ da Tobọ Dianẹ E ku we Phiyotọ

1. Erhọ yen ebruphiyọ evo avwanre riavwerhen rọyen kidie nẹ avwanre hẹ ukoko ri Jihova?

ỌYEN emu rẹ omavwerhovwẹn ra vwọ dia ukoko ri Jihova vwẹ ọke rẹ oba nana rọ pha gangan na. Akpọ na vwo miovwẹ phiyọ na, Jihova kẹ avwanre iniọvo eya vẹ eshare re vwẹ ukẹcha kẹ avwanre. (Un 133:1) Ọ nẹrhẹ avwanre vwo uvi rẹ orua ri vwo oyerinkugbe rọ kpẹkpẹre. (Ẹf 5:33–​6:1) Ọ je kẹ avwanre ọhọ vẹ aghwanre ra guọnọre e se vwo vwo obọdẹn rẹ ufuoma.

2. Die yen ofori nẹ e ru, kẹ diesorọ?

² Ọtiọyena, o ji fo nẹ a davwẹngba vwọ fuevun ga Jihova ọkieje. Diesorọ? Kidie ọkievo ivun se miovwo avwanre fikirẹ jẹgba rẹ ihwo efa. Ofu ji se dje avwanre fikirẹ oruchọ rẹ avwanre, ma rho ọ da dianẹ e dje ayen ẹvwẹvwanriẹn. Ofori nẹ e muomaphiyọ ẹga ri Jihova ọ da tobọ dianẹ (1) oniọvo avwanre gbe avwanre ku, (2) ọrivẹ rẹ orọnvwe ku avwanre phiyotọ, kugbe (3) ofu dje avwanre fikirẹ umwemwu rẹ avwanre ruru. Vwẹ uyono nana, a cha ta ota kpahen ẹdia nana ọvuọvo re djunute na. A je cha ta ota kpahen obo re se yono vwo nẹ udje rẹ ihwo evo re fuevun vwẹ Baibol na.

CHIRAKON SIẸRẸ ONIỌVO WẸN DE GBE WE KU

3. Ebẹnbẹn vọ yen ihwo ri Jihova hirharokuẹ?

³ Obẹnbẹn na. Iniọvo evo se vwo iruemu ri je avwanree. Efa se ku avwanre phiyotọ yẹrẹ ta eta ri se miovwo avwanre ivun. Ekpako na ji se ru obo re chọre. Ẹdia nana sa nẹrhẹ ihwo evo vwo ẹwẹn ivivẹ sẹ ọnana ghini ukoko rẹ Ọghẹne. Ukperẹ ayen vẹ iniọvo rẹ ayen vwo “ku evun gbe” ga Ọghẹnẹ, ayen sa tobọ dobọ rẹ uyono ẹra ji je kẹnoma kẹ iniọvo ri gbe ayen ku na. (Zẹf 3:9) Ọhọ herọ? Jẹ a ta ota kpahen udje rẹ ohwo ọvo vwẹ Baibol na ro rhiẹromrẹ oka rẹ ebẹnbẹn ọtiọyen.

4. Ebẹnbẹn vọ yen ọyinkọn Pọl hirharoku?

⁴ Udje ọvo vwẹ Baibol na. Ọyinkọn Pọl riẹnre nẹ iniọvo rọyen re dia Inenikristi na eyen ihwo re gbaree. Kerẹ udje, o rhe krii rọ vwọ vwomaba ukoko na nu, iniọvo na da reyọ vwo guẹdjọ. (Iru 9:26) Ọke vwọ yanran na, evo da ta erharhe rẹ eta kpahọn vwẹ obuko vwo miovwo oka rẹ ohwo rọ hepha. (2Kọ 10:10) Pọl mrẹ oniọvo ọvo ro tedje ro brorhiẹn rọ chọre rọ sa dia ekprowọ kẹ ihwo efa. (Ga 2:11, 12) Vwọba, Mak rọ dia ugbeyan rọ kẹrẹ Pọl mamọ kuro phiyotọ. (Iru 15:37, 38) Pọl rha sa vwẹ uphẹn kẹ obo re phiare na nẹ ọ nẹrhẹ ọ kẹnoma kẹ ihwo yena ri gbere ku na. Dedena, ọ vwẹ ẹro abavo vwo nẹ iniọvo na ji muomaphiyọ ẹga ri Jihova ọkieje. Die yen cha Pọl uko vwo chirakon?

5. Die yen cha Pọl uko vwo jẹ iniọvo rọyen egbobọnyẹ? (Kọlose 3:13, 14) (Ni uhoho na.)

⁵ Pọl vwo ẹguọnọ rẹ iniọvo rọyen. Ẹguọnọ ro vwo kpahen ihwo efa vwẹ ukẹcha kẹ vwọ tẹnrovi emamọ rẹ iruemu rẹ ayen vwori, ọ dia jẹgba rẹ ayeen. Ẹguọnọ je cha uko vwo ru nene obo ro si phiyotọ vwẹ Kọlose 3:13, 14. (Se.) Roro kpahen obo ro nene Mak yerin wan. Dede nẹ Mak yanjẹ Pọl vwo vwẹ oyan rẹ imishọnare rẹsosuọ rọyen, jẹ Pọl phi ota na phiyọ evuun. Ọke vwọ yanran na ri Pọl vwo si ileta vwo rhe iniọvo rehẹ ukoko ri Kọlose, o de jiri Mak kerẹ uvi rẹ ohwo rọ vẹ ọyen gba wian kuẹgbe, “esiri rẹ uchebro rode.” (Kọl 4:10, 11) Rọ vwọ hẹ uwodi vwẹ Rom, Pọl vwẹ ovuẹ rhe Mak nẹ ọ rhe cha ọyen uko. (2Ti 4:11) O muẹro dẹn nẹ Pọl gbobọnyẹ iniọvo rọyeen. Die yen avwanre se yono vwo mie Pọl?

6-7. Die yen sa cha avwanre uko vwo vwo ẹguọnọ rẹ iniọvo rẹ avwanre ọkieje dede nẹ ayen ihwo re gbaree? (1 Jọn 4:7)

⁶ Obo re yono norhe. Jihova guọnọre nẹ avwanre dje ẹguọnọ phia kẹ iniọvo rẹ avwanre ọkieje. (Se 1 Jọn 4:7.) Ọ da dianẹ oniọvo rẹ avwanre gbe avwanre ku, a sa reyọ phiyọ nẹ ọ guọnọ nene odjekẹ ri Baibol na ọ dia o me ruoo. (Isẹ 12:18) Ọghẹnẹ vwo ẹguọnọ rẹ idibo rọyen re fuevun dede nẹ ayen ihwo re gbaree. O gbobọnyẹ avwanre siẹrẹ e de ru obo re chọree; yẹrẹ o mu ophu krẹẹ. (Un 103:9) Mavọ yen ọ ghanre te ra vwọ vwẹrokere Ọsẹ rẹ avwanre ro vwo ghovwo na!​—Ẹf 4:32–​5:1.

⁷ Karophiyọ nẹ oba na vwo siẹkẹrẹ na, ofori nẹ e sikẹre iniọvo rẹ avwanre ọkieje. E se rhẹro rọyen nẹ omukpahen cha ganphiyọ. A sa tobọ mu avwanre phiyọ uwodi fikirẹ esegbuyota rẹ avwanre. Ọyena da phia, a cha guọnọ ukẹcha rẹ iniọvo rẹ avwanre vrẹ obo ri jovwo. (Isẹ 17:17) Roro kpahen obo re phia kẹ ọkpako ọvo vwẹ Spain re se Josepa. E muro vẹ iniọvo efa phiyọ uwodi kidie ayen guọnọ ka ẹbẹre vuọvoo. Ọ da ta: “Vwẹ uwodi, ogbeku sa fobọ vwomaphia kidie asan vuọvo yen ihwo eje hepha. Avwanre chirakon rẹ ohwohwo ji vwo ghovwo ohwohwo nẹ otọ rẹ evun rhe. Ọnana nẹrhẹ avwanre dia vwọrẹ okugbe je vwẹrote ohwohwo. Avwanre vẹ ihwo efa re ga Jihovaa yen gba hẹ uwodi na. O vwo ọkiọvo re me vwọ woma vwẹ obọ me rha sa reyọ vwo ruiruoo, ọtiọyena mi rhe se ruẹ emu vuọvo komobọ mẹẹ. Ẹkẹvuọvo, oniọvo mẹ ọvo kọyen fọnrhọn emwa mẹ je vwẹ ukẹcha kẹ vwẹ vwẹ idjerhe efa. E dje uvi rẹ ẹguọnọ kẹ vwẹ ọke re me ma vwọ guọnọ.” Mavọ yen o yovwin te ra vwọ rhuẹrẹ ebẹnbẹn ra vẹ iniọvo rẹ avwanre vwori phiyọ asaọkiephana!

CHIRAKON SIẸRẸ ỌRIVẸ RẸ ORỌNVWE DE KU WE PHIYOTỌ

8. Ebẹnbẹn vọ yen ihwo re rọvwọnre hirharokuẹ?

⁸ Obẹnbẹn na. O vwo orọnvwe rẹ ebẹnbẹn kanree. Baibol na tarọ phephẹn nẹ ihwo re rọvwọnre cha mrẹ “ukpokpogho vwẹ ugboma rayen.” (1Kọ 7:28) Diesorọ? Orọnvwe kuẹ ihwo ivẹ re gbaree, ri vwo iruemu re fene ohwohwo kuẹgbe, obo ri je ọvo je ọfaa. Ihwo ivẹ re rọvwọnre se nẹ asan sansan rhe yẹrẹ vwo ẹkuruemu re fẹnẹre. Ọke vwọ yanran na, ayen ji se dje iruemu re nisoo tavwen ayen ke rọvwọn phia. Iruemu nana sa so ebẹnbẹn. Ukperẹ ayen vwọ rhọnvwe nẹ ayen ivẹ na yen so obẹnbẹn na, kẹ ayen guonyẹ ohwohwo. Ọkiọvo, ayen se no nẹ a da hẹriẹ oma yẹrẹ fan orọnvwe yen me fuoma. Kẹ oma ẹhẹriẹ yẹrẹ orọnvwe ẹfan yen che si obẹnbẹn na no?b Jẹ e yono vwo nẹ udje rẹ ohwo ọvo vwẹ Baibol na ro chirakon rẹ ebẹnbẹn rẹ orọnvwe rọyen.

9. Ebẹnbẹn vọ yen Abigail hirharoku?

⁹ Udje ọvo vwẹ Baibol na. Abigail ọyen aye ri Nabal, Nabal ọyen ohwo ri Baibol na tare nẹ ọ pha brabra ọ ke rha dia ohwo vẹ ọkon. (1Sa 25:3) Ọ bẹn kẹ Abigail ro vwo nene ọshare ọtiọyena dia. Abigail rhe se vrẹn nẹ orọnvwe na ọ da dianẹ uphẹn ọtiọyen herọ? Uphẹn yena rhiephiyọ kẹ ọke ri Devid rọ cha dia ovie rẹ Izrẹl vwẹ obaro na, vwọ rhe rhi hwe ọshare rọyen kidie nẹ o yinvwaro kpahọn vẹ ituofovwin rọyen. (1Sa 25:9-13) Abigail rha sa djẹ je vwẹ uphẹn kẹ Devid nẹ o hwe. Ẹkẹvuọvo o ru ọtiọyeen, ọ da vuẹ Devid nẹ ọ yan jovwo. (1Sa 25:23-27) Die yen muro vwo ru ọtiọyen?

10. Die yen a sa tanẹ ọyen mu Abigail vwo chirakon rẹ ebẹnbẹn ro hirharoku vwẹ orọnvwe rọyen?

¹⁰ Abigail vwo ẹguọnọ ri Jihova o ji muọghọ kẹ iwan ro vwo mu ri shekpahen orọnvwe. Aphro herọọ nẹ ọ riẹn oborẹ Ọghẹnẹ vuẹ Adam vẹ Ivi ọke ro vwo ku ayen ihwo ivẹ kugbe vwẹ orọnvwe. (Jẹ 2:24) Abigail riẹnre nẹ Jihova ni ọrhuẹrẹphiyotọ rẹ orọnvwe fuanfon. Ọ guọnọ ru obo re vwerhen Ọghẹnẹ oma, ọ sa dianẹ ọyen muro vwo ru obo ro se ru eje vwọ vwẹrote evwruwevwin rọyen, ọtiọyen ji te ọshare rọyen. Ọ jowọ kpakpata rọ vwọ dobọ ri Devid ji ro vwo jẹ Nabal ẹteyọn hwe. O ji yovwo unu dede nẹ ọ dia ọyen yen ru chọọ. O phenre dẹn nẹ Jihova vwo ẹguọnọ rẹ aye nana ro fiudugberi, rọ guọnọ erhuvwu rẹ oma rẹ ọyen ọvoo. Die yen eya vẹ eshare re rọvwọnre se yono vwo nẹ udje rẹ Abigail?

11. (a) Die yen Jihova guọnọ mie ihwo re rọvwọnre? (Ẹfesọs 5:33) (b) Die yen wo yono vwo nẹ ẹgbaẹdavwọn ri Carmen ọ sa vwọ sẹro rẹ orọnvwe rọyen? (Ni uhoho na.)

¹¹ Obo re yono norhe. Jihova vwẹ odjekẹ kẹ ihwo re rọvwọnre nẹ i muọghọ kẹ ọrhuẹrẹphiyotọ rẹ orọnvwe ọ da tobọ dianẹ ọ bẹn ayen vwo nene ọrivẹ rẹ ayen yerin kugbe. O muẹro dẹn nẹ oma vwerhen Ọghẹnẹ ọ da mrẹ ihwo re rọvwọnre re davwẹngba vwọ rhuẹrẹ ebẹnbẹn rayen phiyọ ri muọghọ ji dje ẹguọnọ kẹ ohwohwo. (Se Ẹfesọs 5:33.) Roro kpahen udje ri Carmen. Omarẹ ẹgbukpe esan ri Carmen vwọ rọvwọn nu, ọ da ton uyono ri Baibol phiyọ vẹ Iseri ri Jihova ji bromaphiyame ọke vwọ yanran na. Carmen da ta: “Oma vwerhen ọshare mẹ kpahọọn, kẹ ọ rioma kpahen Jihova. Ọ hanrha ovwẹ je djoshọ mu vwe nẹ ọyen cha yanjẹ uvwe vwo.” Dedena, Carmen chirakon vwẹ orọnvwe rọyen. Ẹgbukpe 50 soso yen ọ vwọ wian gangan vwo muọghọ ji dje ẹguọnọ kẹ ọshare rọyen. “Ikpe na vwọ yanran na, ki mi rhi yono obo ra vwẹ aghwanre vẹ aghẹnghẹn ta ota kẹ ọshare mẹ. Kidie nẹ me riẹnre nẹ orọnvwe pha fuanfon vwẹ ẹro ri Jihova, mi de ru oborẹ ẹgba mẹ muru eje vwọ sẹro rọyen. Mi gbobọnyẹ ọshare mẹẹ kidie mi vwo ẹguọnọ ri Jihova.”c Ebẹnbẹn da vwomaphia vwẹ orọnvwe wẹn, jẹ o muwẹro nẹ Jihova che bicha wẹ je cha wẹ uko.

WỌ DOBỌ RẸ ẸGA RI JIHOVA JẸ FIKIRẸ ECHOBỌ WẸẸN

12. E de ru umwemwu ọgangan, obẹnbẹn vọ yen e se hirharoku?

¹² Obẹnbẹn na. Ofu se dje avwanre ọ da dianẹ e ru umwemwu ọgangan. Baibol na tare nẹ imwemwu avwanre sa nẹrhẹ e vwo “udu rọ guọghọre.” (Un. 51:17) Oniọvo ọshare ọvo re se Robert wianre gangan vwẹ ikpe buebun o se vwo muwan kerẹ odibo rowian. Ẹkẹvuọvo, o de rhi ru umwemwu ọgangan rọ nẹrhẹ o no nẹ ọyen ku Jihova phiyotọ. Ọ da ta, “Ẹwẹn rẹ obrorhiẹn mẹ de rhi kpokpo uvwe mamọ kerẹsiẹ ra da mrẹ nẹ mi mu oghwa rẹ ekpẹn. Obo ri mi ruru na da vwẹ mamọ, ọ da nẹrhẹ me viẹ je nẹrhovwo rhe Jihova. Mi rorori nẹ Ọghẹnẹ rha cha kerhọ rẹ ẹrhovwo mẹ ọfaa, kidie mi kuro phiyotọ.” E de ru umwemwu, ubiudu rẹ avwanre se she ọkuọrọn e de roro nẹ Jihova gbobọnyẹ avwanre. (Un 38:4) Ọ da dianẹ wọ mrẹ oma wẹn vwẹ ẹdia ọtiọyen jovwo re, roro kpahen udje rẹ ohwo ọvo vwẹ Baibol na rọ fuevun, ro ji muomaphiyọ ẹga ri Jihova dede nẹ o ru umwemwu ọgangan.

13. Umwemwu ọgangan vọ yen ọyinkọn Pita ruru, kẹ die yen muro vwo ruo?

¹³ Udje ọvo vwẹ Baibol na. Ason rọ koba tavwen e ki hwe Jesu, ọyinkọn Pita ru erọnvwọn buebun re chọre rọ nẹrhẹ o she ro umwemwu ọgangan. Ẹsosuọ, Pita vwẹroso oma rọyen gan nọ, ọ je yan oma nẹ ọ da tobọ dianẹ iyinkọn ichekọ na yanjẹ Jesu vwo, ọyen che ru ọtiọyeen. (Mk 14:27-29) Ọke ọfa ayen vwọ hẹ ogba ri Gẹtsimani, vwẹ abọ buebun Pita je sa rhẹrẹẹ. (Mk 14:32, 37-41) Ọtiọyena, ọke rẹ otu na vwọ rhe vẹ elọkọ kugbe ibirhe rhi mu Jesu, Pita da djẹ jovwo. (Mk 14:50) Ukuotọ rọyen, Pita da sen Jesu abọ erha soso, ọ da tobọ duvwun iyorin nẹ ọyen riẹnrẹẹ. (Mk 14:66-71) Die yen Pita ruru rọ vwọ mrẹvughe nẹ ọyen ru umwemwu ọgangan? Ọ darọ mamọ, ọ je viẹ gangan, ọ sa dianẹ abe rẹ obo ro ruru na kpokpiro. (Mk 14:72) De vwẹ ẹwẹn roro oborẹ oma ru Pita ọke re vwo hwe Jesu inọke evo vwọ wan nu. Ọnana nẹrhẹ Pita ni oma rọyen kueku!   

14. Die yen vwẹ ukẹcha kẹ Pita vwo muomaphiyọ ẹga ri Jihova? (Ni na.)

¹⁴ O vwo erọnvwọn buebun re sorọ Pita se vwo muomaphiyọ ẹga ri Jihova. Aphro herọọ nẹ Pita sioma reyọọ; o bru iniọvo na ra ayen da vwẹ ọbọngan kẹ. (Lu 24:33) Vwọba, Jesu vwo vrẹnushi nu, ọ da vwomaphia kẹ Pita, ọ sa dianẹ ọ vwẹ ọbọngan vwọ kẹ. (Lu 24:34; 1Kọ 15:5) Ọke vwọ yanran na, ukperẹ Jesu vwọ ghwọku Pita fikirẹ obo ro ruru, ọ da vuẹ nẹ o vwo ewian efa ro che ru. (Jọ 21:15-17) Pita riẹnre nẹ obo ro ruru na chọre, ẹkẹvuọvo ọ davwẹngba vwo ru obo ri yovwirin. Diesorọ? Kidie o vwo imuẹro nẹ Jesu ji vwo ẹguọnọ rọyen. Vwọba, ọkieje yen idibo ri Jesu ichekọ vwo bicha Pita. Die yen avwanre se yono vwo nẹ udje ri Pita na?

15. Imuẹro vọ yen Jihova guọnọre nẹ avwanre vwo? (Une rẹ Ejiro 86:5; Rom 8:38, 39) (Ni uhoho na.)

¹⁵ Obo re yono norhe. Jihova guọnọre nẹ avwanre vwo imuẹro nẹ o vwo ẹguọnọ rẹ avwanre nẹ o ji che vwo ghovwo avwanre. (Se Une rẹ Ejiro 86:5; Rom 8:38, 39.) E de ru umwemwu, ẹwẹn se bru hwe avwanre. Ọyena shephiyọ, ọ braree. Ẹkẹvuọvo, e jẹ e roro nẹ Jihova rhe vwo ẹguọnọ yẹrẹ che se vwo ghovwo avwanree. Ukperẹ ọtiọyen e jẹ a guọnọ ukẹcha ro fori kpakpata. Robert, re djunute siẹvure na tare nẹ: “Kidie nẹ me vwẹroso ẹgba romobọ mẹ, nẹ me sa vrabọ rẹ ọdavwini yen nẹrhẹ mi she ro umwemwu.” Ọ da rhe mrẹvughe nẹ ofori nẹ ọyen vuẹ ekpako na. Ugege me vwọ jowọ yena nu, me da rhe mrẹ ẹguọnọ ri Jihova womarẹ ekpako na. Ekpako na kpairoro vrẹ vwẹẹ. Ayen nẹrhẹ mi vwo imuẹro nẹ Jihova je kpairoro vrẹ vwẹẹ.” E ji se vwo imuẹro nẹ Jihova vwo ẹguọnọ rẹ avwanre nẹ o ji che vwo ghovwo avwanre siẹrẹ e de kurhẹriẹ nẹ imwemwu rẹ avwanre, guọnọ ukẹcha ro fori, a me je davwẹngba re vwo jẹ oruchọ na ẹvwanriẹn. (1Jọ 1:8, 9) Imuẹro nana cha cha avwanre uko e vwo jẹ ẹga ri Jihova e gbobọnyẹ ọ da tobọ dianẹ e ru umwemwu.

16. Die yen nẹrhẹ wo vwo owenvwe ru wo vwo muomaphiyọ ẹga ri Jihova?

¹⁶ Jihova vwo ọdavwaro kpahen ẹgbaẹdavwọn rẹ avwanre vwọ vwẹ ẹga kẹ vwẹ ọke rẹ oba nana rọ pha gangan na. Womarẹ ukẹcha ri Jihova, avwanre sa fuevun ga ọ da tobọ dianẹ e ku avwanre phiyotọ yẹrẹ ofu dje avwanre fikirẹ imwemwu rẹ avwanre ruru. E se vwo ẹguọnọ rẹ iniọvo rẹ avwanre ji vwo ghovwo ayen ọ da tobọ dianẹ ayen gbe avwanre ku. E se djephia nẹ avwanre nabọ vwo ẹguọnọ rẹ Ọghẹnẹ nẹ e ji muọghọ kẹ ọrhuẹrẹphiyotọ rọyen womarẹ a vwọ rhuẹrẹ ebẹnbẹn re sa vwomaphia vwẹ orọnvwe rẹ avwanre phiyọ. Siẹrẹ e de ru umwemwu, a sa guọnọ ukẹcha ri Jihova, rhiabọreyọ ẹguọnọ kugbe evwoghovwo rọyen, je vwẹ ẹga kẹ ọkieje. E se vwo imuẹro nẹ e che vwo ebruphiyọ gbidiki siẹrẹ “oma rẹ emu esiri eruo” rha rhọ avwanree.​—Ga 6:9.