Re Vwo Vwo Ọdavwẹ rẹ Ihwo Efa Ghwa Ebruphiyọ ri Bẹdẹ Cha

Ọsẹ mẹ ọkpako vwẹ United Church of Canada rọhẹ ekogho avwanre, ọtiọyena kudughwrẹn kudughwrẹn yen ọ vwọ vuẹ vwẹ vẹ oniọvo mẹ otete ọmọtẹ nẹ avwanre kpo Sunday school, avwanre de ru nu, kẹ avwanre nene kpo ẹga rẹ ughọjọ 11 rẹ urhiọke. Avwanre mi rhe nene Oni mẹ kpo Ọguan Ruvie vwẹ oghẹruvo. Ọ rha bẹn rẹ avwanre vwo vughe ofẹnẹ rọhẹ ẹga ivẹ na-a.

Oni mẹ da vuẹ igbeyan rọyen re kẹrerẹ mamọ re se Bob kugbe Marion Hutcheson kpahen esegbuyota kpokpọ rọyen na, ayen de ji rhiabọreyọ uyota na. Vwẹ 1958 orua ri Hutcheson de mu vwe vẹ emeshare rayen erha nene oma kpo Osikoko rẹ Akpọeje ri Divine Will re ruru ẹdẹ ẹrenren vwẹ New York City. Enẹna, me rhe mrẹvughe re nẹ ọ dia ọmọrhiẹ orọnvwọn ayen ru kẹ vwẹ rẹ ayen vwo mu vwe nene oma-a; osikoko yena ọyen ọvo vwẹ usun rẹ erọnvwọn re me ma karophiyọ vẹ omavwerhovwẹn.

IHWO RI VWO ỌDAVWẸ MẸ CHA VWẸ UKO VWO RU YOVWINPHIYỌ

Vwẹ ọke eghene mẹ, aghwa re de churu eranvwe yen avwanre diare; oma vwerhen ovwẹ me da vwẹrote eranvwe na. Ọnana da nẹrhẹ mi vwo ẹwẹn me vwọ dia idọktọ rọ vwẹrote eranvwe. Oni mẹ da vuẹ ọkpako ukoko ọvo kpahọn. Vwọrẹ ẹguọnọ, ọ da karophiyọ ovwẹ nẹ “ẹdẹ re koba na” yen avwanre de yerẹn na; ọ da je nọ vwẹ kpahen oborẹ yunivasiti re me cha ra ikpe buebun na se vwo gbowọphiyọ oyerinkugbe mẹ vẹ Jihova. (2Ti 3:1) Ọtiọyena mi de brorhiẹn nẹ mi rhe che kpo yunivasiti-i.

Mi ji roro kpahen oborẹ mi che ru siẹrẹ mi de wontọ nẹ ikọleji nu. Dede nẹ mi vwobọ vwẹ iruo rẹ aghwoghwo na vwẹ oba ri kudughwrẹn kudughwrẹn, jẹ oma rẹ iruo rẹ aghwoghwo na vwerhen ovwẹ-ẹ, mi ji no nẹ me cha sa dia ọkobaro-o. Vwẹ uvwre ọke nana, jẹ ọsẹ mẹ vẹ oniọvo rọyen otete ọshare jiro kẹ vwẹ nẹ me wian ọkieje vwọ kẹ ikọpini rẹ inshọransi ọvo ro titiri mamọ vwẹ Toronto. Oniọvo rẹ ọsẹ mẹ hẹ ẹdia rode vwẹ etiyin, ọtiọyena mi de rhiabọreyọ iruo na.

Vwẹ Toronto, kidie nẹ ọkieje yen me vwọ wian ọke vrẹ ji kuomakugbe ihwo rehẹ ukoko na-a, mi rhe se vwobọ vwẹ iruo rẹ ẹga na ọkieje-e. Ọsẹ mẹ rode rọ dia Oseri-i yen mi ke nene dia, ẹkẹvuọvo ro vwo ghwu nu, ke me guọnọ asan ọfa re me cha dia.

Oniọvo Hutcheson vẹ aye rọyen ri mu vwe nene oma kpo ọghwẹkoko ri 1958 na pha kerẹ ọsẹ vẹ oni vwọ kẹ vwẹ. Ayen tare nẹ mi rhi nene ayen dia, ayen da je cha vwẹ uko vwo ru oyerinkugbe mẹ vẹ Jihova ganphiyọ. Vwẹ 1960, mẹ vẹ ọmọ rayen ọmọshare re se John de bromaphiyame. John da ton iruo ọkobaro phiyọ, ọnana de mu vwe vwo ru bunphiyọ vwẹ iruo rẹ aghwoghwo na. Iniọvo rẹ ukoko na de vwo oniso rẹ ẹyan-obaro mẹ, ọke vwọ yan obaro, a da vwẹ ovwẹ vwo mu odibo rẹ Isikuru rẹ Iruo Ruvie Na.a

ME MRẸ OMAMỌ RẸ AYE ME DA JE DIA ỌKOBARO

Vwẹ 1966, me da rọvwọn Randi Berge, ọkobaro vẹ oruru ro vwo owenvwe rọ vwọ ga vwẹ asan ra da ma guọnọ ukẹcha. Oniruo ọkinriariẹ avwanre vwo ọdavwẹ rẹ avwanre, o de jiro kẹ avwanre nẹ avwanre ra vwẹ ukẹcha kẹ ukoko rọhẹ Orillia vwẹ Ontario. Ọtiọyena avwanre da kua kpo oboyin.

Ugege rẹ avwanre vwo te Orillia, me da vwomaba Randi vwẹ iruo ọkobaro ọkieje. Oruru rọyen kua ro vwẹ oma jovwo re! Ugege mi vwo mu ẹwẹn phiyọ iruo ọkobaro na, ki mi rhi rhiẹromrẹ aghọghọ rọ herọ ra vwọ reyọ Baibol na vwo ruiruo je mrẹ ihwo ri vwo ẹruọ rẹ uyota na. Oma vwerhen avwanre rẹ avwanre vwọ vwẹ ukẹcha kẹ aye gbe ọshare ọvo vwẹ Orillia vwo ru ewene vwẹ akpeyeren rayen je rhe dia idibo ri Jihova.

EWENE VWẸ EJAJẸ VẸ IRORO

Vwẹ ọke ọvo rẹ avwanre vwo kpo Toronto, me da mrẹ Arnold MacNamara rọ dia ọvo vwẹ usun rẹ iniọvo re kobaro rẹ iruo na vwẹ Bẹtẹl. Ọ da nọ sẹ avwanre guọnọ dia ekobaro oghẹresan. Me da kpahen ugege yena nẹ: “E! Vwẹ kasan kasan jokparẹ Quebec ọvo!” Mi ji rhi vwo orharhe iroro ro rhe ihwo ri Canada re jẹ Oyibo kpahen ozighi rọhẹ ubrotọ ri Quebec ra da jẹ French. Vwẹ ọke yena, ihwo djẹ egbada vwẹ Quebec vẹ ẹwẹn rẹ ayen vwọ hẹrioma vwo nẹ Canada.

Arnold da kpahen nẹ, “Quebec ọvo yen oghọn ukoko jẹ ekobaro oghẹresan ra asaọkiephana.” Ugege yena, me da rhọnvwe nẹ me cha ra. Me riẹnre jovwo nẹ Randi vwo ẹwẹn rọ vwọ ga vwẹ etiyin. Ukuko na me da rhe mrẹvughe nẹ ọyen ọvo vwẹ usun rẹ orhiẹn ri me yovwin kparobọ rẹ avwanre bruru!

Ọke rẹ avwanre vwo kpo iklasi re de yono ephẹrẹ ri French vwẹ ẹdidjana iyorin nu, mẹ vẹ Randi kugbe aye gbe ọshare ọfa de kpo Rimouski rọ vwẹ omarẹ iroko 540 (imaili 336) vwo sheri kẹ obohwẹre rẹ ẹbẹre rẹ ọnre va nẹcha ri Montreal. Avwanre ji vwo erọnvwọn buebun rẹ avwanre che yono, ọnana teyen oma phia vwẹ ọke mi vwo se aghwoghwo evo vwẹ uyono. Me da tanẹ vwẹ ọghwẹkoko rọ cha na, “igomugoro” buebun cha rhe, ukperẹ me vwọ tanẹ “ihwo rẹ Austria” buebun.

Vwẹ Rimouski, iniọvo eya ẹne re je rọvwọ-ọn ri vwo oruru mamọ kugbe oniọvo aye gbe ọshare Huberdeau vẹ emetẹ rayen ivẹ da vwomaba avwanre ihwo ẹne. Avwanre eje vẹ oniọvo Huberdeau vẹ aye rọyen yen gba hwosa rẹ uwevwin rẹ ekobaro na ro vwo uvun ighwrẹn rẹ avwanre se White House fikirẹ igbẹhe rọhẹ obaro vẹ ichivwo rọyen. Ọke buebun, omarẹ ihwo 12 fiẹ 14 yen dia etiyin. Kerẹ ekobaro oghẹresan, mẹ vẹ Randi kpo aghwoghwo vwẹ irhiọke, oghẹruvo, kugbe ovwọnvwọn, ọtiọyena oma vwerhen avwanre kọke kọke rẹ avwanre da mrẹ ohwo ro che nene avwanre wian vwẹ aghwoghwo—tobọ vwẹ ovwọnvwọn rẹ ekpahen da herọ.

Avwanre vẹ ekobaro yena re fuevun na rhe kpẹkpẹ te asan rẹ ayen da rhe dia kerẹ orua rẹ avwanre. Ọkievo avwanre chidia riariẹ erhanre re koko phiyọ yẹrẹ avwanre ruẹ “pierogi day,” ẹdẹ rẹ avwanre de koko chere oka rẹ emu sansan. Ọvo vwẹ usun rẹ iniọvo na ọbuine, ọtiọyena vwẹ ason ri Saturday buebun, avwanre suine ji gbeha.

Vwẹ Rimouski ihwo buebun dje omavwerhovwẹn phia kpahen Baibol na! Vwẹ uvwre rẹ ẹgbukpe iyorin, oma vwerhen avwanre mamọ rẹ avwanre vwọ mrẹ ihwo buebun rẹ avwanre vwẹ Baibol yono re yan obaro tẹdia rẹ ayen de bromaphiyame. Ighwoghwota rẹ ukoko na de rhi bun te omarẹ 35.

Vwẹ Quebec, avwanre yono erọnvwọn buebun kerẹ ighwoghwota. Avwanre mrẹ oborẹ Jihova cha avwanre uko vwevunrẹ iruo aghwoghwo na je kẹ avwanre oborẹ avwanre guọnọre. Vwọba, avwanre de rhi vwo ẹguọnọ rẹ ihwo ri French na, ephẹrẹ rayen, kugbe ẹkuruemu rayen—rọ je nẹrhẹ avwanre vwo ẹguọnọ rẹ ẹkuruemu rẹ ihwo efa.—2Kọ 6:13.

Siẹvuọvo na, oghọn ukoko da vuẹ avwanre nẹ avwanre kpo orere ri Tracadie rọhẹ ẹbẹre ọnre va nẹcha vwẹ orhoma urhie ri New Brunswick. Ọnana ghwa egbabọse ọvo rhe kidie avwanre ghwa hwosa phiyọ uwevwin ọvo nu obọ, mi ji vwo iruo rẹ ubrọke kerẹ oyono vwẹ isikuru ọvo. Vwọba, ihwo evo rẹ avwanre vwẹ Baibol yono ghwa dia ighwoghwota obọ, avwanre je bọn Ọguan Ruvie ọvo.

Avwanre vwẹ oba rẹ udughwrẹn na eje vwọ nẹrhovwo kpahọn, avwanre de ke re ni Tracadie; ọ fẹnẹ Rimouski emerha. Ẹkẹvuọvo avwanre de brorhiẹn nẹ rọ vwọ dianẹ Jihova yen guọnọre nẹ avwanre kpo etiyin na, avwanre cha ra. Avwanre davwen Jihova ni, avwanre da mrẹ obo ro si egbabọse na ọvuọvo no kẹ avwanre. (Mal 3:10) Kirobo rọ hepha ọkieje, oyerinkugbe ri Randi vẹ Jihova rọ ganre mamọ, ẹwẹn rẹ omaevwoze rọyen, kugbe uruemu rọ vwọ nẹrhẹ ohwo phiyọ ehwẹ na nẹrhẹ ebẹnbẹn ra vwọ kua na lọhọ.

Robert Ross yen ọkpako vuọvo rọhẹ ukoko kpokpọ rẹ avwanre rare na. Ọ vẹ aye rọyen Linda gare kerẹ ekobaro vwẹ etiyin, ayen de ji brorhiẹn rẹ ayen vwọ dia etiyin ọke rẹ ayen vwo vwiẹ ọmọ rayen rẹsosuọ nu. Dede nẹ ayen vwẹrote ọmọshare rayen, jẹ ayen phi udu phiyọ ovwẹ vẹ Randi awọ mamọ womarẹ edede ri sasasa kugbe oruru rayen vwẹ iruo aghwoghwo na.

EBRUPHIYỌ RỌ HERỌ RA VWỌ GA VWẸ KASAN KASAN RA DA GUỌNỌ UKẸCHA

Avwanre vwọ ga kerẹ ekobaro vwẹ Tracadie ẹgbukpe ivẹ nu, avwanre da rhoma mrẹ emu ọfa ro gbe avwanre unu—e durhie uvwe nẹ me rhe ga kerẹ oniruo okinriariẹ. Avwanre gare vwẹ okinriariẹ rẹ Oyibo sansan vwẹ ẹgbukpe ighwrẹn, ọyena vwọ wan nu, e de wene avwanre kpo okinriariẹ ri French vwẹ Quebec. Kọke kọke yen Léonce Crépeault rọ dia oniruo ubrotọ rẹ avwanre vwẹ Quebec vwo jiri uvwe me da ta ota mẹ nu. Ẹkẹvuọvo vwẹ ọke ọfa, ọ me nọ nẹ, “Mavọ yen ota na sa vwọ nabọ shephiyọ vẹ ọdavwẹ rẹ ihwo na?”b Ọdavwẹ nana ro vwo kpahen ovwẹ na cha vwẹ uko vwọ tẹnrovi obo ri mi se vwo ru uyono mẹ o mi shekpahen ẹkpo na dẹn je dia lọlọhọ.

Ọvo vwẹ usun rẹ iruo ri mi ruru re me ma karophiyọ yen ọ ri mi ruru vwẹ Ọghwẹkoko rẹ Akpọeje ri “Victorious Faith” vwẹ Montreal vwẹ ukpe ri 1978. Me wianre vwẹ Akon Iruo rẹ Uchere. Avwanre rhẹro rẹ ihwo 80,000, jẹ a vwẹ ọrhuẹrẹphiyotọ rẹ emuẹriọ kpokpọ vwo mu. Erọnvwọn ejobi ekpokpọ: ekuakua re vwo chere emu na, oka rẹ emu na, vẹ ona rẹ obo re chere wan. Avwanre vwo ifriji ride ri te omarẹ 20, ẹkẹvuọvo ọkievo e riẹn wia-an. Fikirẹ irueru rẹ ehẹha re ruru vwẹ afieha na, ọke te uherevie rẹ ason tavwen avwanre ke sa ro evun rọyen ra rhuẹrẹ ekuakua phiyọ hẹrhẹ ọghwẹkoko rọ cha tonphiyọ vwẹ ẹdẹ rọ vwọ kpahọn. Jẹ ofori nẹ a vwẹ ovunu na vwo mu tavwen ọke ki rhie rere e se vwo ru emu rẹ urhiọke! Oma ghwọrọ avwanre, ẹkẹvuọvo mi yono erọnvwọn buebun vwo nẹ owian ọgangan na, uruemu rẹ ihwo ri tedje rẹ iniọvo na djephia, kugbe uruemu rẹ ayen vwọ nẹrhẹ ohwohwo phiyọ ehwẹ. Avwanre sikẹre ohwohwo, ọ da nẹrhẹ avwanre dia igbeyan rhi te ọke nana. Oma vwerhen avwanre mamọ avwanre vwọ riavwerhen rẹ ọghwẹkoko nana ra mrẹ vwọ dje-e na vwẹ Quebec, ubrotọ rẹ omukpahen ọgangan da vwomaphia vwẹ uvwre rẹ 1940 fiẹ 1960!

Mi yono erọnvwọn buebun miẹ iniruo kerẹ omẹvwẹ vwẹ ọke avwanre vwo ruẹ eghwẹkoko ride vwẹ Montreal. Vwẹ ukpe ọvo, David Splane rọ ga vwẹ Ẹko Rọvwẹrote na asaọkiephana yen dia oniruo rẹ ọghwẹkoko na. Ukuko na, ra vwọ tanẹ me vwẹrote iruo yena vwẹ ọghwẹkoko ọvo, David bicha vwẹ mamọ.

Vwẹ 2011 rẹ avwanre vwọ riavwerhen rẹ iruo ikienkin vwẹ ẹgbukpe 36 nu, e de durhie uvwe nẹ me rhe ga kerẹ oyono vwẹ Isikuru rẹ Ekpako Ukoko. Mẹvwẹ vẹ Randi sherhẹn ehwa 75 sansan vwẹ uvwre rẹ ẹgbukpe ivẹ, ẹkẹvuọvo omaevwoze yena ejobi kẹ avwanre omavwerhovwẹn. Oma vwerhan ekpako na vwẹ oba rẹ kudughwrẹn kudughwrẹn, kidie ayen mrẹ oborẹ Ẹko Rọvwẹrote na davwerhọn rẹ oyerinkugbe rayen vẹ Jihova te.

Ọke vwọ yan obaro, mi de yono vwẹ Isikuru rẹ Ihwo ri Gwhoghwo Uvie Na. Ọke buebun, oma ghwọrọ iniọvo re rhe isikuru na fikirẹ erọnvwọn buebun re ruẹ vwọ: e chidia iklasi omarẹ inọke ighwrẹn kẹdi kẹdẹ, a vwẹ inọke erha vwo ruẹ ihomwọku kovwọnvwọn kovwọnvwọn, e ji ruẹ asaimẹnti ẹne yẹrẹ iyorin kudughwrẹn kudughwrẹn. Mẹ vẹ oyono ochekọ na da vuẹ ayen nẹ ababọ rẹ ukẹcha ri Jihova ayen che se ruo-o. Ọkieje me cha vwọ karophiyọ obo ro gbe iniọvo na unu te, ọke rẹ ayen da mrẹ nẹ siẹrẹ ayen da vwẹroso Jihova, ayen se ru vrẹ oborẹ ayen vwẹ ẹro roro shesheri.

RE VWO VWO ỌDAVWẸ RẸ IHWO EFA GHWA EBRUPHIYỌ RI BẸDẸ CHA

Ọdavwẹ rẹ ihwo efa rẹ oni mẹ vwori nẹrhẹ ihwo rọ vwẹ Baibol yono yan obaro, ọ tobọ je vwẹ ukẹcha kẹ ọsẹ mẹ vwo wene iroro rọyen kpahen uyota na. Ẹdẹ erha vwọ wan rẹ oni mẹ vwo ghwu nu, ọsẹ mẹ de ru obo ri gbe avwanre unu rọ vwọ rhe Ọguan Ruvie rhe kerhọ rẹ ota rotu, nẹ ọke yena rhe kọyen o vwo kpo uyono vwẹ ẹgbukpe 26 re vwọ kpahọn. Dede nẹ ọsẹ mẹ bromaphiyame-e, jẹ ekpako na vuẹ vwẹ nẹ ọyen ke te uyono kudughwrẹn kudughwrẹn.

Uvi udje rẹ oni mẹ phi phiyotọ cha sa chọrọ avwanre emọ rọyen ẹro-o. Iniọvo mẹ emetẹ erha vẹ eshare rayen fuevun ga Jihova. Ivẹ ga vwẹ oghọn ukoko—ọvo vwẹ Portugal, ọ ro chekọ vwẹ Haiti.

Mẹvwẹ vẹ Randi ga kerẹ ekobaro oghẹresan vwẹ Hamilton, Ontario asaọkiephana. Ọke avwanre vwọ hẹ iruo ikienkin, oma vwerhen avwanre rẹ avwanre vwo nene ihwo kpo irhivwinbrura vẹ uyono ri Baibol. Ẹkẹvuọvo asaọkiephana, oma vwerhen avwanre rẹ avwanre vwọ mrẹ ihwo rẹ avwanre vwẹ Baibol yono re yan obaro vwẹ ẹga ri Jihova. Avwanre vwo siẹkẹrẹ iniọvo eshare vẹ eya rehẹ ukoko kpokpọ rẹ avwanre hepha na, ọ bọn avwanre gan rẹ avwanre vwọ mrẹ oborẹ Jihova biẹcha ayen vwẹ ọke rẹ erọnvwọn de shephiyọ vẹ ọke rẹ erọnvwọn vwọ bra.

Avwanre vwo ni kpuko, oma vwerhen avwanre kpahen ọdavwẹ rẹ ihwo efa dje kẹ avwanre. Ọtiọyena kẹ avwanre je davwẹngba vwo dje “ọdavwẹ okokodo” phia kẹ ihwo efa rẹ avwanre vwo phiuduphiyọ ayen awọ nẹ ayen ru oborẹ ayen se ru eje vwọ ga Jihova vọnvọn. (2Kọ 7:6, 7) Kerẹ udje vwẹ orua ọvo, oni na, ọmọshare, vẹ ọmọte rọyen, hẹ ẹga rẹ ọkieje. Me da nọ ọsẹ na sẹ o roro kpahọn re, sẹ ọ sa ga kerẹ ọkobaro. Ọ da kpahen kẹ vwẹ nẹ ọyen biẹcha ekobaro erha na. Me da nọ nẹ, “Wo se bicha ayen vrẹ oborẹ Jihova che bicha ayen te?” Mi de jiro kẹ nẹ ọ davwẹngba vwọ riavwerhen oborẹ ayen riavwerhen rọyen. Emeranvwe esan vwọ wan nu, ọ da rhe dia ọkobaro.

Mẹvwẹ vẹ Randi cha rha vuẹ “uvwiẹ rọ cha” na kpahen iruo rẹ “igbunu” ri Jihova, avwanre je rhẹro rọyen nẹ ayen cha riavwerhen rẹ ẹga rọyen kirobo rẹ avwanre riavwerhen rọyen.—Un 71:17, 18.