3 | Mrẹ Erere nẹ Idje ri Baibol Rhe

BAIBOL NA TA OTA KPAHEN . . . Eya vẹ eshare re fuevun ri ji rhiẹromrẹ odjadja kerẹ avwanre kidie ayen pha “kirobo rẹ avwanre epha na.”—JEMS 5:17.

Oborẹ Ọyena Mudiaphiyọ

Baibol na vwo ikuegbe rẹ eya vẹ eshare ri ghini yerin ri ji rhiẹromrẹ ofudjevwe vẹ erọnvwọn sansan vwẹ akpeyeren. E vwo se kpahen oborẹ ayen rhiẹromrẹ na, e se se mrẹ ohwo ọvo ro hirharoku oborẹ avwanre hirharokuẹ na.

Ukẹcha rẹ Ọnana sa Vwọphia

Avwanre eje guọnọ vwo imuẹro nẹ ihwo efa vwo ẹruọ rẹ oborẹ oma ruẹ avwanre. Ma rho, kẹ ọke rẹ avwanre de nene ọga iroro muabọ. Avwanre de se Baibol na, e se se mrẹ ihwo ri vwo ọkpọ iroro rẹ avwanre vwori. Ukuotọ rọyen, ka cha rhe mrẹvughe nẹ ọ dia avwanre ọvo yen rioja rẹ ofudjevwe-e, ihwo efa ji hirharoku ẹdia tiọna jovwo re.

Baibol na niyẹnrẹn rẹ eta rẹ ihwo buebun, ri niro nẹ ayen vwo ọchuko-o, rẹ ofu akpọ ji dje. Ofu dje we te ẹdia ru wọ da ta: ‘Me rha guọnọ yerin ọfa-a’? Eriyin yen oma ru Mosis, Ilaija kugbe Devid.—Ukeri 11:14; 1 Ivie 19:4; Une rẹ Ejiro 55:4.
Baibol na vuẹ avwanre kpahen aye ọvo re se Hanah rẹ ophrophro rọyen “kparọ ophu gangan” kidie o se vwiẹ emọ-ọ, ophrophro rọyen na, kọ nẹrhẹ phiyọ ota.—1 Samuẹl 1:6, 10.
Baibol na vuẹ avwanre kpahen ọshare ọvo re se Job rẹ erọnvwọn evo phia kẹ. Dede nẹ ọyen ọshare rọ fuevun, jẹ o hirharoku ofudjevwe ọgangan ro muro vwọ ta: “Arhọ mẹ ko tu vwe oma; me rha dia bẹdẹ-e.”—Job 7:16.

E de yono kpahen oborẹ ihwo nana vwo nene erharhe rẹ iroro muabọ, avwanre komobọ sa mrẹ ọbọngan ra guọnọre e se vwo yerin ghene ofudjevwe re hirharokuẹ.

Oborẹ Baibol na Vwọ Vwẹ Ukẹcha Phia Kevin

Oborẹ Bipolar Disorder ru Vwẹ Oma Mẹ

“Me vwọ joma te ẹgbukpe ujuvẹ gbe ihwe re, a da vuẹ vwẹ nẹ mi vwo ọga re se bipolar disorder. O vwo ọkievo mi vwo roro nẹ mi se phi kebẹnbẹn kebẹnbẹn ri mi hirharoku vwẹ akpeyeren kparobọ. Jẹ ọke efa, ki mi no nẹ akpeyeren rhe vwo otọ-ọ.”

Oborẹ Baibol na Vwọ Chọn Vwẹ Uko

“Ohwo ọvo vwẹ Baibol na rẹ ẹdia rọyen họhọ ọmẹ, kẹ ọyinkọn Pita. Echobọ rọyen nẹrhẹ o nẹ oma rọyen kueku. Ukperẹ o vwo mu ẹwẹn kpahen echobọ na, Pita da vwẹ ihwo ri vwo ọdavwẹ rọyen vwo mu igbeyan. Ọga ri bipolar disorder na de kpokpo uvwe, echobọ mẹ ke họnrọ ovwẹ, ki mi no nẹ mi rhe fiemu-u. Kerẹ Pita, mi rhi yono obo re siẹkẹrẹ igbeyan mẹ re guọnọ chọn vwẹ uko vwo yerin kpobarophiyọ vwẹ akpeyeren.

“Udje rẹ ohwo ọfa vwẹ Baibol na rẹ ikuegbe rọyen je nẹrhẹ ẹwẹn mẹ tẹ otọ, yen Ovie Devid. Ọke buebun yen ofu vwo dje kpahen ẹdia rọyen, ọ je viẹ idiekpọvwẹ kpahen echobọ rọyen. Me sa tanẹ ẹdia rọyen họhọ ọmẹ, kidie me je ta eta ji ruẹ erọnvwọn re me vie idiekpọvwẹ kpahan. Eta ri Devid rehẹ Une rẹ Ejiro 51 ghini uvi rẹ uchebro vwọ kẹ vwẹ. Vwẹ owọ 3, Devid da ta: ‘Me riẹn ogbeku mẹ, umwemwu mẹ ọ hẹ obaro mẹ ọkieje.’ Oborẹ oma ru vwe ọke rẹ ofu de dje vwe gangan, yen etinẹ na ghwa ta ota kpahan, kidie ọ ghene sa bẹn mi vwo roro omamọ rẹ iroro kpahen oma mẹ. Eta rẹ Devid tare vwẹ owọ 10 je chọn vwẹ uko: ‘Ma udu ọfuanfon phihọ evun mẹ, E Ọghẹnẹ, ru wo phi erhi ọkpokpọ wẹn phihọ udu mẹ.’ Ọtiọyen me je rẹ Ọghẹnẹ nẹ ọ chọn vwẹ uko, me vwọ vwẹ ẹro abavo vwo ni oma mẹ. Ọ rọ koba, owọ 17 na nabọ phiuduphiyọ ovwẹ awọ. Ọ da ta: ‘Udu rọ guọghọre kugbe udu ọfuanfon, E Ọghẹnẹ, wọ sian otu nana-a.’ Owọrota nana vwẹ imuẹro kẹ vwẹ nẹ Ọghẹnẹ vwo ẹguọnọ mẹ.

“Me bọn iphiẹrophiyọ ri mi vwo kpahen obaro na gan womarẹ me vwọ tẹnroviẹ idje ri Baibol vẹ oborẹ Ọghẹnẹ ru kẹ vwẹ re. Ive ri Baibol na nabọ muvwẹro dẹn, ọyena chọn vwẹ uko vwo yerẹn ghene ebẹnbẹn mẹ.”