2 | “Uchebro ro nẹ Ẹbe Ọfuanfon na Rhe”

BAIBOL NA DA TA: “Kemu kemu re siri phihọ otọ rhabae rhe, e si ayen phihọ otọ kẹ eyono rẹ avwanre, rere vwẹ erhiori kugbe uchebro ro nẹ ẹbe ọfuanfon na rhe avwanre se vwo iphiẹrohọ.”—ROM 15:4.

Oborẹ Ọyena Mudiaphiyọ

Baibol na vọnre vẹ uchebro sansan re sa kẹ avwanre ẹgba vẹ odiri ra guọnọre re se vwo yerin ghene iroro echọchọ. Ovuẹ rọhẹ Baibol na kẹ avwanre iphiẹrophiyọ nẹ o rhe che kri-i, ofudjevwe rha cha dia ọfa-a.

Ukẹcha rẹ Ọnana sa Vwọphia

Ọkiọvo, ofu se dje avwanre eje; ẹkẹvuọvo, ọkieje yen ihwo ri she ọkuọrọn kugbe ihwo re ro ẹnwan vwo rhiẹromrẹ ọmiaovwẹ ri no cha. Ukẹcha vọ yen Baibol na sa vwọphia?

Baibol na kẹ avwanre omamọ evuẹ re se vwo wene iroro echọchọ re kọn ro ẹwẹn avwanre. (Filipae 4:8) Uchebro rehẹ evun rọyen sa nẹrhẹ udu rẹ avwanre totọ je chọn avwanre uko vwo sun oborẹ oma ruẹ avwanre.—Une rẹ Ejiro 94:18, 19.
Baibol na sa chọn avwanre uko vwọ kẹnoma kẹ e vwo nẹ oma rẹ ohwo kueku.—Luk 12:6, 7.
Ẹkpo ri Baibol sansan kẹ avwanre imuẹro nẹ ọ dia avwanre ọvo yen herọ-ọ, nẹ Ọghẹnẹ rọ dia Ọmemama avwanre nabọ vwo ẹruọ rẹ oborẹ oma ruẹ avwanre.—Une rẹ Ejiro 34:18; 1 Jọn 3:19, 20.
Baibol na veri nẹ Ọghẹnẹ che phioba phiyọ kemu kemu rọ họnrọ avwanre vwẹ ubiudu. (Aizaya 65:17; Ẹvwọphia 21:4) Ofu de dje avwanre fikirẹ ẹnwan ro mu avwanre rọ, a sa mrẹvughe nẹ ive nana sa kẹ avwanre ẹgba vwo chirakon.

Oborẹ Baibol na Vwọ Vwẹ Ukẹcha Phia Jessica

Oborẹ Ofudjevwe ru Vwẹ Oma Mẹ

“Me vwọ hẹ ẹgbukpe 25, mi de she ọkuọrọn, idọktọ da vuẹ vwẹ nẹ ofudjevwe ọgangan yen ru vwe. Erọnvwọn ebrabra re phia kẹ vwẹ wanre, kọyen kọn ro ẹwẹn mẹ. Idọktọ sansan chọn vwẹ uko vwọ mrẹvughe nẹ erọnvwọn ebrabra re phia kẹ vwẹ wanre ri mi roro kpahan, yen so ofudjevwe ọgangan na. Vwọba ihuvwun ro fori nẹ me reyọ, me je guọnọ omaesivwo rọ cha chọn vwẹ uko vwọ riẹn ji mu ẹwẹn mẹ nẹ erharhe iroro.”

Oborẹ Baibol na Vwọ Chọn Vwẹ Uko

“Ọke rẹ ofu vwo dje vwe mamọ, udu ko bru vwe, ke me ro ẹnwan gangan, je gha ovwerhẹn. Vwẹ ason buebun, me ro ẹnwan te ẹdia rẹ ẹnwan na mi rhi mu vwe rọ. Kirobo rẹ Une rẹ Ejiro 94:19 tare, Ọghẹnẹ sa nẹrhẹ udu avwanre gan ọke rẹ ẹnwan de mu avwanre rọ. Ọtiọyena, mi de mu Baibol mẹ vẹ ọmọbe ri mi si eta rẹ ọbọngan phiyọ kẹrẹ ehwa mẹ. Ọke rẹ ovwerhẹn rhe se sun vwe-e, ki mi se awọreta ri Baibol evo. Womarẹ ọnana, Ota rẹ Ọghẹnẹ ko se bru vwe uche.

“Baibol na jiro kẹ avwanre nẹ a kẹnoma kẹ iroro re vwọso erianriẹn re vwo kpahen Ọghẹnẹ. Vwẹ ọke rọ wanre, mi niro nẹ mi fiemu-u, ihwo vwo ẹguọnọ mẹ-ẹ, o ji vwo obo ra cha vwẹ ovwẹ ru-u. Jẹ, mi rhi yono re nẹ imuẹro tiọyena vwọso oborẹ Baibol na tare, nẹ Ọghẹnẹ ọyen ohwo vẹ ẹguọnọ, Ọsẹ ro gbe arodọnvwẹ ro ji vwo ọdavwẹ rẹ avwanre ohwo ọvuọvo. Ememerha na, ki mi se sun oborẹ mi roro ukperẹ mẹ vwọ vwẹ uphẹn kẹ nẹ o sun vwe. Mi ji yono oborẹ me sa vwọ vwẹ ẹro rẹ Ọghẹnẹ vwo ni vwe vwo ni oma mẹ. Ọnana owọẹjẹ ọghanghanre ọvo rọ chọn vwẹ uko vwọ dobọ rẹ orharhe ẹro ri mi vwo ni oma ji.

“Me rhẹro rẹ ọke rẹ erharhe iroro vẹ e vwo roro iroro vwẹ idjerhe ọchọchọ che vwo no riẹriẹriẹ. Me riẹnre nẹ vwẹ ọke rọ cha vwẹ obaro na, ọga iroro rha cha họnrọn avwanre ọfa-a. Ọnana kọyen chọn vwẹ uko vwo chirakon ji nẹ kiọkiọkiọ vwọ hẹrhẹ obaro na rẹ ofudjevwe ọgangan rha cha họnre ovwẹ ọfa-a.”