Ihwo ri Jihova Vwo Ẹguọnọ rẹ Ophiọnphiọn

1. Ọdavwini vọ yen Josẹf hirharoku, kẹ die yen o ruru?

ỌMỌ ri Jekọp re se Josẹf hirharoku ọdavwini ọgangan ọvo. Aye ọvo da ta kẹ: “Mọ ra vwerhẹ.” Ọyen aye rẹ onini rọyen Pọtifa. Josẹf rhọnvwephiyọ obo rọ vuẹrẹ na-a. Nonẹna ihwo evo se roro, ‘Diesorọ Josẹf vwo sen ọdavwini nana?’ Pọtifa hẹ uwevwi-in. Vwọba, Josẹf ọviẹn vwẹ uwevwin na; ọ sa tọbọ dianẹ aye na nẹrhẹ akpọ bẹn kẹ, kidie ọ sen oborẹ ọ nọ mie na. Dedena, ọkieje yen Josẹf vwọ sen nẹ o che nene vwerhẹ-ẹn. Diesorọ? Ọ da ta: “Komavọ mi ru emu ọbrabra nana, ri mi ru umwemwu kpahe Ọghẹnẹ?”​—⁠Jẹn. 39:​7-12.

2. Mavọ yen Josẹf ru riẹn nẹ igberadja ọyen umwemwu vwẹ obaro rẹ Ọghẹnẹ?

² Mavọ yen Josẹf ru riẹn nẹ Ọghẹnẹ rọyen ni igberadja kerẹ “emu ọbrabra”? Ẹgbukpe ujorin ivẹ wanre tavwen Jihova ke womarẹ Mosis vwọ vwẹ urhi nana vwọphia nẹ, “Wo gbe igberadja-a.” (Eyan. 20:14) Dedena, Josẹf nabọ riẹn nẹ Jihova vwo utuoma kpahen igberadja. Kerẹ udje, Josẹf riẹnre dẹn nẹ Jihova rhuẹrẹ orọnvwe rere ọ vwọ dia uvwre rẹ ọshare ọvo vẹ aye ọvo. Ọ sa dianẹ o ji roro kpahen ẹdia ivẹ soso rẹ Jihova vwo vwẹ ukẹcha vwọ kẹ Sera rọ dia oni rẹ ọsẹ rọyen rode rere ọ sa vwọ fuevun vwẹ orọnvwe rọyen vwẹ ọke ra vwọ guọnọ gbe ẹgua. Ọtiọyen yen Jihova je chochọn rẹ Rebeka rọ dia aye rẹ Aizik. (Jẹn. 2:24; 12:​14-20; 20:​2-7; 26:​6-11) Josẹf vwo roro kpahen obo re phiare na, ọ da rhe mrẹvughe ẹro rẹ Ọghẹnẹ vwo nẹ obo ri yoma vẹ obo re brare. Kidie nẹ Josẹf vwo ẹguọnọ rẹ Ọghẹnẹ o ji vwo ẹguọnọ rẹ uwan rẹ Ọghẹnẹ ro shekpahen ophiọnphiọn, ọ da davwẹngba vwo yeren akpọ nene.

3. Die yen a cha ta ota kpahen vwẹ uyono nana?

³ Wo vwo ẹguọnọ rẹ ophiọnphiọn? Aphro herọ-ọ nẹ wo vwo ẹguọnọ rọyen. Avwanre gbare-e, ọtiọyena a rha jomaotọ-ọ, ẹro rẹ akpọ na vwo ni ophiọnphiọn se wene ẹro rẹ avwanre ji vwo no. (Aiz. 5:20; Rom 12:⁠2) Ọtiọyena, a cha ta ota kpahen oborẹ ophiọnphiọn mudiaphiyọ vẹ erere rọ cha ghwa rhe siẹrẹ e de vwo ẹguọnọ rọyen. A je cha ta ota kpahen owọẹjẹ erha re sa chọn avwanre uko vwo vwo ẹguọnọ rẹ iwan ri Jihova vrẹn obo ri jovwo.

DIE YEN OPHIỌNPHIỌN?

4. Iroro ọchọchọ vọ yen buebun rẹ ihwo vwo kpahen uruemu rẹ ophiọnphiọn?

⁴ A da ta ota kpahen ohwo rọ dia ọvwata, ihwo buebun ki roro kpahen ohwo ro phuoma, rọ reyọ ihwo efa vwo guẹdjọ, ro ji no nẹ ọyen yovwin nọ ihwo efa. Ẹkẹvuọvo iruemu yena tuẹn Ọghẹnẹ oma. Ọke rẹ Jesu vwọ hẹ otọrakpọ na, ọ vwẹ ọghwọku ọgangan vwọ kẹ isun rẹ ọke rọyen re vwẹ iwan romobọ rayen ri shekpahen obo ri yoma vẹ obo re brare vwo mu. (Aghwo. 7:16; Luk 16:15) O vwo idjerhe vuọvo rẹ ohwo ro vwo omamọ rẹ uruemu rẹ ophiọnphiọn vwọ họhọ ohwo ro no nẹ ọyen yovwin nọ ihwo efa-a.

5. Kirobo rẹ Baibol na djere, die yen ophiọnphiọn? Djudje rọyen.

⁵ Ophiọnphiọn ọyen uwan oyoyovwin.b E vwo dje lọhọ, o mudiaphiyọ e vwo ruẹ obo ri yovwinrinvwẹ obaro ri Jihova Ọghẹnẹ. Vwẹ Baibol na, ota na ophiọnphiọn kanrunumu re vwo yerẹn nene iwan ro me kpenu kparobọ, rọ dia iwan ri Jihova. Kerẹ udje, Jihova jurhi nẹ ineki reyọ “ovwanvwọn rọ vọnre” vwo ruiruo. (Urhi 25:15) A je sa fan ota ri Hibru na, “ọsoso” phiyọ “ophiọnphiọn.” Onenikristi rọ guọnọ dia ọvwata vwẹ obaro rẹ Ọghẹnẹ kọ je fuevun vwẹ ekiẹchuọ rọyen eje. Ọvwata vwo ẹguọnọ rẹ orhiẹn-ebro ọsoso, o ji vwo utuoma kpahen oshenyẹ. Rere “uruemu rẹ avwanre ejobi vwo se je [Jihova,]” ohwo rọ ghene guọnọ dia ọvwata che roro kpahen ẹro rẹ Jihova vwo nẹ korhiẹn korhiẹn ro brẹ.​—⁠Kọl. 1:⁠10.

6. Diesorọ avwanre sa vwọ vwẹroso iwan ri Jihova ri shekpahen obo ri yoma vẹ obo re brare? (Aizaya 55:​8, 9)

⁶ Baibol na dje Jihova kerẹ Esiri rẹ ophiọnphiọn. Fikirẹ ọtiọyena, e de se “asan rẹ ophiọnphiọn dia.” (Jer. 50:​7, NW ) Kidie nẹ Jihova yen Ọmemama rẹ avwanre, ọyen ohwo vuọvo ro fori rọ vwọ vwẹ iwan rẹ obo ri yovwinrin vẹ obo re brare vwo mu kẹ avwanre. Ọ vwọ dianẹ avwanre irumwemwu re je gba-a na, avwanre cha sa riẹn obo ri yoma vẹ obo re brare-e. Ẹkẹvuọvo kidie nẹ Jihova pha gbagba, ọyen sa nabọ riẹn obo ri yoma vẹ obo re brare. (Isẹ 14:12; se Aizaya 55:​8, 9.) Dedena, rọ vwọ dianẹ Ọghẹnẹ ma avwanre họhọ oma rọyen na, kẹ avwanre se ru obo ri yovwinrin vwẹ ẹro rọyen. (Jẹn. 1:27) Avwanre guọnọ ru obo re vwerhen Jihova oma. Eguọnọ re vwo kpahen Ọsẹ rẹ avwanre mu avwanre vwọ vwẹrokere te asan rẹ ẹgba rẹ avwanre muru eje.​—⁠Ẹfe. 5:⁠1.

7. Diesorọ avwanre vwọ guọnọ omamọ rẹ iwan? Djudje rọyen.

⁷ Avwanre mrẹ erere siẹrẹ e de churu mu iwan ri Jihova ri shekpahen obo ri yovwinrin vẹ obo re brare. Diesorọ a vwọ ta ọtiọyen? Vwẹ ẹro roro obo re sa phia ọ da dianẹ kibanki kibanki kọyen brorhiẹn rẹ oborẹ uchunu rẹ igho ọvuọvo muru. Ọ da dia ọtiọyen, jẹ ekuakua yangha ku. Gba je vwẹ ẹwẹn roro idọktọ rọ rhọnvwe yan nene irhi ri suẹn omaesivwo-on, ọnana sa so ughwu vwọ kẹ ihwo evo ro sivwẹn na. Vwọrẹ uyota, omamọ rẹ iwan re phiyotọ sẹro rẹ ohwo. Ọtiọyen yen iwan rẹ Ọghẹnẹ ri shekpahen obo ri yoma vẹ obo re brare je sẹro rẹ avwanre.

8. Ebruphiyọ vọ yen hẹrhẹ ihwo ri vwo owenvwe ọgangan rẹ ayen vwo ru obo ri yovwinrin?

⁸ Jihova brẹba kẹ ihwo re davwẹngba ri vwo yeren akpọ vwo nene iwan rọyen. O veri nẹ “Ọvwata cha re ughwẹ rẹ otọ na, kọ dia enu rọye bẹdẹ.” (Une 37:29) Wọ sa vwẹ ẹwẹn roro oyerinkugbe, ufuoma vẹ omavwerhovwẹn re che vwo siẹrẹ ihwo eje de yeren akpọ nene iwan ri Jihova? Oka rẹ akpọ ọtiọyen yen Jihova guọnọre nẹ wọ riavwerhen rọyen. Vwọrẹ uyota, o vwo oboresorọ rẹ avwanre ohwo ọvuọvo vwo vwo ẹguọnọ rẹ ophiọnphiọn! Die yen e se ru vwo vwo ẹguọnọ rẹ ophiọnphiọn vrẹ obo ri jovwo? E gbe ja ta ota kpahen owọẹjẹ erha ra sa jẹ e se vwo ru ọtiọyen.

VWO ẸGUỌNỌ RẸ IWAN RI JIHOVA VRẸ OBO RI JOVWO

9. Die yen cha cha avwanre uko vwo vwo ẹguọnọ rẹ ophiọnphiọn?

⁹ Owọẹjẹ 1: Vwo ẹguọnọ rẹ Ohwo rọ vwẹ iwan na vwo mu. Ofori nẹ ẹguọnọ re vwo kpahen Jihova rọ dia Ohwo rọ vwẹ iwan rẹ obo ri yoma vẹ obo re brare vwo mu na kodophiyọ, rere e se vwo vwo ẹguọnọ rẹ ophiọnphiọn. E che vwo owenvwe re vwo yeren akpọ nene iwan ọsoso ri Jihova siẹrẹ e de vwo ẹguọnọ rọyen vrẹ obo ri jovwo. Kerẹ udje, mane kẹ Adam vẹ Ivi vwo ẹguọnọ ri Jihova jovwo, ayen rhe nyupho rọyen.​—⁠Jẹn. 3:​1-6, 16-19.

10. Die yen Ebraham ruru rere ọ sa vwọ nabọ riẹn ẹro rẹ Jihova vwo nẹ emu?

¹⁰ Avwanre guọnọ chukoku irhi ri Jihova kirobo rẹ Adam vẹ Ivi ruru-u. Avwanre sa davwẹngba vwọ kẹnoma kẹ ọmiaovwẹ ọtiọyena, siẹrẹ e de yono kpahen Jihova ọkieje, vwo ẹguọnọ rẹ iwan rọyen, je davwẹngba vwọ vwẹ ẹro ro vwo nẹ emu ji vwo no. Aphro herọ-ọ nẹ e de ru ọtiọyen, ẹguọnọ re vwo kpahen Jihova che kodophiyọ. Roro kpahen Ebraham. Ọ nabọ vwo ẹguọnọ rẹ Jihova. Ebraham vwọso Jihova ọke rọ vwọ tobọ bẹn kẹ ro vwo vwo ẹruọ rẹ obo vuẹrẹ-ẹ. Ukperẹ ọtiọyen, ọ da davwẹngba vwọ riẹn Jihova phiyọ. Kerẹ udje, ọke rẹ Ebraham vwo nyo kpahen orhiẹn rẹ Jihova bruru rọ vwọ ghwọrọ Sodọm vẹ Gomora, oshọ de ke muo nẹ “Obrohiẹ rẹ akpọ na” cha ghwọrọ irumwemwu vẹ evwata kugbe. Ebraham riẹnre nẹ ọyena cha sa phia-a, ọtiọyena ọ da vwomakpotọ je nọ Jihova enọ buebun. Jihova vwo odirin rọyen, ọ da kpahenphiyọ enọ rọyen eje. Ukuotọ rọyen, Ebraham da rhe mrẹvughe nẹ Jihova nabọ fuẹrẹn ubiudu rẹ kohwo kohwo, nẹ o gboja kẹ orumwemwu vẹ ọvwata kuẹgbe-e.​—⁠Jẹn. 18:​20-32.

11. Idjerhe vọ yen Ebraham vwo djephia nẹ o vwo ẹguọnọ ri Jihova je vwẹrosuọ?

¹¹ Ebraham nabọ rhi vughe Jihova phiyọ womarẹ ota rọ vẹ Jihova ta kpahen orere ri Sodọm vẹ Gomora. Aphro herọ-ọ, Ebraham de rhi vwo ẹguọnọ ri Jihova ji muọghọ kẹ vwọ vrẹ obo ri jovwo. Ikpe evo vwọ wan nu, Ebraham de rhi hirharoku ẹdia ọvo rọ pha gangan ro de djephia nẹ ọ vwẹroso Jihova. Jihova vuẹrẹ nẹ ọ vwẹ Aizik rọ dia ọmọ ọghanghanre rọyen ro ji vwo ẹguọnọ kpahen na vwo ze izobo. Enẹna, Ebraham vwọ nabọ vughe Ọghẹnẹ phiyọ re na, o rhe vwo onọ vuọvo rọ cha nọ-ọ. Ebraham da jowọ ro vwo ru obo ri Jihova vuẹrẹ na. Dedena, vwẹ ẹwẹn roro obo rọ darọ te ro vwo muegbe ro vwo ru obo ra vuẹrẹ na! Aphro herọ-ọ nẹ Ebraham nabọ roro kokodo kpahen erọnvwọn sansan ro yono kpahen Jihova re. Ọ riẹnre nẹ Jihova che se ru obo re brare kakaka-a. Kirobo rẹ ọyinkọn Pọl tare, Ebraham riẹnre nẹ Jihova vwo ẹgba rọ vwọ rhọvwọn ọmọ ọghanghanre rọyen Aizik vwo nẹ ushi. (Hib. 11:​17-19) Vwọ vrẹ ọyena, Jihova veri nẹ Aizik cha dia ọsẹ rẹ ẹgborho, jẹ ọke yena dede Aizik ji rhi vwiẹ ọmọ-ọ. Ebraham vwo ẹguọnọ ri Jihova rọ dia Ọsẹ rọyen na, ọtiọyena ọ da vwẹrosuọ nẹ o che ru obo ri yovwinrin ọkieje. Esegbuyota de muo vwo nyupho ri Jihova dede nẹ ọ lọhọ vwọ kẹ-ẹ.​—⁠Jẹn. 22:​1-12.

12. Mavọ yen a sa vwọ vwẹrokere Ebraham? (Une Rẹ Ejiro 73:⁠28)

¹² Mavọ yen a sa vwọ vwẹrokere Ebraham? Kirobo rẹ Ebraham ruru, ofori nẹ e yono kpahen Jihova ọkieje. E de ru ọtiọyen, kẹ avwanre che sikẹrẹ ji vwo ẹguọnọ rọyen kodophiyọ. (Se Une Rẹ Ejiro 73:28.) Ọnana cha nẹrhẹ e yono ẹwẹn obrorhiẹn rẹ avwanre rere a sa vwọ vwẹ ẹro rẹ Ọghẹnẹ vwo nẹ emu ji vwo no. (Hib. 5:14) Ukuotọ rọyen, ọnana me cha avwanre uko vwọ sen edavwini re vwo ru obo re chọre. Ọ je cha chọn avwanre uko vwo vwo utuoma rẹ orọnvwọn korọnvwọn re sa so ọmiaovwẹ kẹ Ọsẹ rẹ avwanre je guọghọ oyerinkugbe rẹ avwanre vẹ ọyen vwori. Ọrhọ yen idjerhe ọfa e se vwo djephia nẹ e vwo ẹguọnọ rẹ ophiọnphiọn?

13. Mavọ yen e se vwo nenesi rẹ ọvwata? (Isẹ 15:⁠9)

¹³ Owọẹjẹ 2: Davwẹngba rere ẹguọnọ ru wo vwo kpahen ophiọnphiọn vwọ ganphiyọ kẹdẹ kẹdẹ. Avwanre da guọnọ nẹ iriẹn rẹ oma rẹ avwanre nabọ gan, kẹ avwanre cha davwẹngba vwọ sasa oma kẹdẹ kẹdẹ. Ọtiọyen ọ je hepha nẹ, ọ guọnọ ẹgbaẹdavwọn e se vwo vwo ẹguọnọ rẹ oborẹ Jihova tare nẹ o yoma. Ọnana oborẹ avwanre se ru kẹdẹ kẹdẹ. Jihova vwẹ ẹro abavo vwo nẹ emu, ọtiọyena o rhẹro rẹ obo re vrẹ avwanre oma-a. (Une 103:14) Ọ kẹ avwanre imuẹro nẹ o vwo ẹguọnọ rẹ “ohwo ro nenesi rẹ ọvwata.” (Se Isẹ 15:⁠9.) E de vwo oborẹ avwanre tẹnrovi vwẹ ẹga ri Jihova, ka davwẹngba a sa vwọ yanmuo. Ọtiọyen ọ je hepha siẹrẹ avwanre da guọnọ nenesi rẹ ọvwata. Jihova muegbe rọ vwọ chọn avwanre uko vwo ru yovwinphiyọ ọke vwọ yanran na.​—⁠Une 84:​5, 7.

14. Die yen “ọghan rẹ ọvwata” na mudiaphiyọ, kẹ diesorọ rẹ avwanre vwọ guọnọ?

¹⁴ Jihova karophiyọ avwanre vwọrẹ ẹguọnọ nẹ e vwo yeren akpọ rẹ ophiọnphiọn dia oghwa-a. (1 Jọn 5:⁠3) Ukperẹ ọtiọyen, ọ sẹro rẹ avwanre, ọyen oborẹ avwanre guọnọre vwẹ akpeyeren ri kẹdẹ kẹdẹ. Karophiyọ ekuakua rẹ ofovwin rẹ Jihova vwo kẹ avwanre rẹ ọyinkọn Pọl djisẹ rọyen na. (Ẹfe. 6:​14-18) Ọvọ vwẹ usunrẹ ekuakua nana yen sẹro rẹ udu rẹ isodje na? Ọyen “ọghan rẹ ovwata” ro mudiaphiyọ iwan rẹ ọsoso rẹ Jihova vwo mu. Kirobo rẹ ọghan na sẹro rẹ ubiudu rẹ ohwo ye, ọtiọyen iwan ọsoso ri Jihova je sa sẹro rẹ ubiudu wẹn re vwo ru udje na, rọ dia oka rẹ ohwo ru wọ hepha. Jẹ o muwẹro nẹ ọghan rẹ ọvwata jehẹ usun rẹ ekuakua rẹ ofovwin ru wo che kuphiyọ na!​—⁠Isẹ 4:⁠23.

15. Mavọ wo se vwo ku ọghan rẹ ọvwata na phiyọ?

¹⁵ Mavọ yen wo se vwo ku ọghan rẹ ọvwata na phiyọ? Wo se ru ọtiọyen womarẹ orhiẹn ru wo brẹ kẹdẹ kẹdẹ, wo vwo brẹ ayen nene iwan rẹ Ọghẹnẹ. Wo de brorhiẹn rẹ obo ru wọ guọnọ ta ota kpahan, oka rẹ une wọ guọnọ hworo, ughe ru wọ guọnọ ni yẹrẹ oka rẹ ẹbe ru wọ guọnọ se, gba ka nọ oma wẹn: ‘Die yen me vwẹ uphẹn kẹ nẹ ọ ro ubiudu mẹ na? Ọnana oborẹ Jihova rhọnvwephiyọ? O titẹ ọfanrhiẹn, ozighi, urhuru, ojevwe romobọ re dia oborẹ Jihova niri nẹ e chọre?’ (Fil. 4:⁠8) Wo de brorhiẹn wẹn nene ọhọre ri Jihova, kọyen wọ vwẹ uphẹn kẹ iwan iyoyovwin rọyen nẹ e sẹro rẹ ubiudu wẹn.

16-17. Mavọ yen Aizaya 48:18 vwọ kẹ avwanre imuẹro nẹ avwanre se yeren akpọ vwo nene iwan ọsoso ri Jihova bẹdẹ bẹdẹ?

¹⁶ Wọ ro ẹnwan jovwo re sẹ wo se yerin nene iwan iyoyovwin ri Jihova nẹdẹ ra ruẹdẹ, nukpe fi ukpe? Roro kpahen udje rẹ Jihova vwo ruiruo vwẹ Aizaya 48:18. (Se.) Jihova veri nẹ ọvwata rẹ avwanre cha dia kerẹ “omimi rẹ urhie.” Vwẹ ẹro roro nẹ wo mudia orhoma rẹ urhie ru wo vwo nẹ ọgbogho na rọ mwavwan cha mwavwan kpo jẹ ọ domajẹ-ẹ. Vwẹ ẹdia yena rẹ ẹwẹn wẹn da dia dọe na, udu bru we sẹ ọgbogho na cha domaji ẹdẹ ọvo? Ẹjo! Kidie wọ riẹnre nẹ etiyin ikpe buebun re yen ọgbogho na mwavwan cha mwavwan kpo re, ọtiọtiọyen ọ cha rha mwavwan.

¹⁷ Ọvwata wẹn sa dia kerẹ omimi rẹ urhie! Vwẹ idjerhe vọ? Wọ da guọnọ brorhiẹn, gba ka fọ wo roro kpahen oborẹ Jihova guọnọre nẹ wo ru. Wo mi ji ru nene. O toro oborẹ orhiẹn na gan te-e, Ọsẹ wẹn ro vwo ẹguọnọ na cha vwẹ ukẹcha kẹ wẹ ọkieje wo se vwo yeren akpọ ri kẹdẹ kẹdẹ wẹn vwo nene iwan ọsoso rọyen.​—⁠Aiz. 40:​29-31.

18. Diesorọ o vwo fo nẹ a kẹnoma kẹ ra vwọ reyọ iwan romobọ rẹ avwanre vwo guẹn ihwo efa ẹdjọ?

¹⁸ Owọẹjẹ 3: Jẹ Jihova komobọ brorhiẹn na. A vwọ davwan re vwo yeren akpọ nene iwan ọsoso ri Jihova na, e ja kẹnoma kẹ ra vwọ vwẹ ihwo efa vwo guẹdjọ, e de rhi no nẹ e yovwin nọ ihwo efa. Ukperẹ e vwo nẹ ihwo efa kueku kerẹsiẹ ra da mrẹ nẹ avwanre yen vwo ẹgba ra vwọ vwẹ ayen guẹdjọ nene iwan romobọ rẹ avwanre, ofori nẹ a karophiyọ nẹ Jihova yen “Obrorhiẹ rẹ akpọ na.” (Jẹn. 18:25) Jihova kẹ avwanre uturhi ra vwọ reyọ ihwo efa vwo guẹdjọ-ọ. Jesu tobọ jurhi nẹ: “Ovwan gu ẹdjọ rẹ ohwo-o, rere ohwo vwo jẹ ovwan eguo.”​—⁠Mat. 7:⁠1.c

19. Mavọ yen Josẹf vwo djephia nẹ ọyen vwẹroso orhiẹnbro ri Jihova?

¹⁹ E jẹ a rhoma fuẹrẹn udje ri Josẹf rọ dia ọvwata. Ọ reyọ ihwo efa vwo guẹdjọ-ọ, je tobọ te ihwo ri gbere ku dede. Iniọvo rọyen gboja kẹ re, ayen shẹrẹ kpọ ọviẹn je vuẹ ọsẹ rayen nẹ Josẹf ghwure. Ikpe evo vwọ wan nu, Josẹf vẹ orua rọyen da rhoma ri kuomakugbe. Josẹf vwọ dia osun re na, ọ rha sa reyọ iniọvo rọyen vwo guẹdjọ ji gboja kẹ ayen re, yẹrẹ ru ayen keri. Dede nẹ iniọvo ri Josẹf ghini kurhẹriẹ re, jẹ oshọ ji mu ayen nẹ Josẹf che ru ayen keri. Josẹf kẹ ayen imuẹro nẹ: “Wa djẹ oshọọ fikridie kẹ ẹdia rẹ Ọghẹnẹ mi epha?” (Jẹn. 37:​18-20, 27, 28, 31-35; 50:​15-21) Josẹf vwomakpotọ vwọ yanjẹ orhiẹnbro na vwo kẹ Jihova.

20-21. Mavọ yen a sa vwọ kẹnoma kẹ uruemu re vwo nẹ oma rẹ ohwo nẹ a fonre?

²⁰ Avwanre yanjẹ orhiẹnbro na vwo kẹ Jihova kirobo rẹ Josẹf ruru. Kerẹ udje, avwanre reyọ mirori vwo brorhiẹn rẹ obo ri mu iniọvo rẹ avwanre vwo ru obo rẹ ayen ruru-u. O vwo ohwo ọvuọvo rọ sa riẹn obo rehẹ evunrẹ ubiudu rẹ ohwo ọfa-a; jokparẹ Jihova ọvo. (Isẹ 16:⁠2) Jihova vwo ẹguọnọ rẹ koka koka rẹ ihwo eje ri nẹ asan sansan rhe vẹ ẹkuruemu re fẹnẹ ohwohwo. Jihova ji jiro kẹ avwanre nẹ e “rhie udu rẹ [avwanre] phihọ.” (2 Kọr. 6:13) Avwanre guọnọ idjerhe kidjerhe re vwo dje ẹguọnọ kẹ iniọvo rẹ avwanre ukperẹ a vwọ reyọ ayen vwo guẹdjọ.

²¹ Ọnana ji mudiaphiyọ nẹ a je cha reyọ ihwo rehẹ ukoko na-a vwo guẹdjọ-ọ. (1 Tim. 2:​3, 4) Wọ reyọ ohwo rẹ orua wẹn ro vwo esegbuyota ru wo vwori-i vwo guẹdjọ-ọ, ru wọ vwọ tanẹ, “Ohwo nana che se rhiabọreyọ uyota na-a.” Ọyen omaẹkparọ, re vwo no nẹ a fonre. Jihova je vwẹ uphẹn vwọ kẹ “ihwo ejobi vwi kasan kasan” nẹ i kurhẹriẹ. (Iruo 17:30) E ja vwẹ ọkieje vwọ karophiyọ nẹ uruemu rẹ afonre dia ophiọnphiọ-ọn.

22. Diesorọ wo vwo brorhiẹn ru wo vwo vwo ẹguọnọ rẹ ophiọnphiọn?

²² E jẹ ẹguọnọ rẹ avwanre vwo kpahen iwan ọsoso ri Jihova ri shekpahen obo re phiọnre titi aghọghọ, mu ihwo efa vwo ru obo ri yovwinrin, je chọn ayen uko vwo sikẹrẹ avwanre vẹ Ọghẹnẹ rẹ avwanre. E jẹ a vwẹ ọkieje vwọ dia ihwo rẹ “owẹnvwe rẹ ophiọnphiọn hwe, rẹ urhuru rẹ ophiọnphiọn ji siẹ.” (Mat. 5:​6, NW ) Jo muwẹrọ nẹ Jihova vwo oniso rẹ ẹgbaẹdavwọn wẹn, oma je vwerhọn kpahen ẹyan obaro wẹn. Uruemu rẹ ophiọnphiọn vwọ kanre akpọ na phiyọ na, e jẹ ota nana phiuduphiyọ owẹ awọ! “Ọrovwohwo na guọnọ ọvwata.”​—⁠Une 146:⁠8.