OBO RE SE VWO PHI UTUOMA KPAROBỌ

3 | Si Uruemu Rẹ Utuoma Nẹ Ẹwẹn Wẹn

Baibol na da ta:

“Wene iroro rẹ udu rẹ ovwan phihọ ọkpokpọ, re we se vughe ọhọre rẹ Ọghẹnẹ, obo ri yoma ro fo ẹreyọ kugbe obo re gbare.”—ROM 12:2.

Obo ro Mudiaphiyọ:

Oborẹ avwanre roro pha ghanghanre vwọ kẹ Ọghẹnẹ. (Jerimaya 17:10) Ọ dia avwanre de vwọ kẹnoma kẹ uruemu ra vwọ ta ota yẹrẹ e vwo ruẹ erọnvwọn ro tuoma ọvo-o, ọ vrẹ ọtiọyen. Ẹwẹn vẹ udu yen uruemu rẹ utuoma da tuanphiyọ. Ọtiọyena, ofori nẹ avwanre si iroro rẹ utuoma nẹ ẹwẹn rẹ avwanre. Siẹrẹ e de ru ọtiọyen, ke se “wene” ji phi uruemu rẹ utuoma kparobọ.

Obo Wo Se Ru:

Nabọ roro kpahen oka rẹ ẹro wo vwo nẹ ihwo efa, ma rho kẹ ihwo ri nẹ ẹkuotọ yẹrẹ asan ọfa rhe. Nọ oma wẹn: ‘Ẹro vọ yen mi vwo nẹ ayen? Oborẹ me riẹn kpahen ayen komobọ yen mi vwo nene ayen yerẹn? Gbanẹ mi muro kpahen uruemu rẹ omaẹfẹnẹ?’ Kẹnoma kẹ ighe yẹrẹ ẹbe rehẹ itanẹti ri titi uruemu rẹ utuoma vẹ ozighi.

Ota rẹ Ọghẹnẹ sa chọn avwanre uko vwo phi utuoma rehẹ ẹwẹn vẹ udu rẹ avwanre kparobọ

Ọ ghwa lọhọ avwanre vwọ fuẹrẹn iroro romobọ avwanre-e. Ẹkẹvuọvo, Ota rẹ Ọghẹnẹ sa vwẹ ukẹcha kẹ avwanre vwo “vughe iroro vẹ omeru” rọhẹ udu na. (Hibru 4:12) Ọtiọyena, gba rha fuẹrẹn Baibol na. Reyọ iyono rọyen vwọ fuẹrẹn iroro wẹn, rere wọ davwengba vwo yono iroro wẹn vwẹ idjerhe rọ cha vwerhen Ọghẹnẹ oma. Ota rẹ Ọghẹnẹ sa chọn avwanre uko vwo phi utuoma re dia “ẹgba egangan” rehẹ ẹwẹn vẹ udu rẹ avwanre kparobọ.—2 Kọrẹnt 10:4, 5.

Oborerhiẹromrẹ Vwẹ Akpeyeren—STEPHEN

Wene Iroro Rọyen

Stephen vẹ ihwo rẹ orua rọyen rioja rẹ utuoma vwẹ abọ rẹ iyibo. Ukuotọ rọyen, ọ da vwomaba ukoko ri titi uturhi romobọ. Ọke vwọ yanran na, ọyen komobọ de vwobọ vwẹ oseghe rẹ utuoma. Stephen da ta: “O vwẹ ẹdẹ ọvo mẹ vẹ igbeyan mẹ vwọ ni ifimu ro shekpahen oja rẹ ihwo rẹ America vwọ re eviẹn rẹ Africa re. Eriyina, avwanre de kpo asan rẹ ihwo efuanfon hepha, rẹ avwanre vwọ guọnọ ihwo rẹ avwanre che hwe.”

Iroro rẹ Stephen weneri ọke rọ vwọ ton uyono ri Baibol phiyọ vẹ Iseri ri Jihova. Ọ da ta: “Ọ vwọ dianẹ mi rhiẹromrẹ uruemu re omaẹfẹnẹ komobọ na, o gbevwunu me vwọ mrẹ oborẹ Iseri na yerẹn wan. Kerẹ udje, ọke Oseri ọvo rọ dia oyibo vwo kpo asan, ọ da yanjẹ emọ rọyen vwo vwọ kẹ orua ọfa re dia ihwo ibiebi. Vwọba, orua rẹ oyibo ọvo da reyọ eghene ọvo rọ dia ohwo obiebi rọ guọnọ asan rọ cha dia phiyọ uwevwin rayen.” O de rhi mu Stephen ẹro nẹ Iseri ri Jihova yen ghini ruẹ orugba rẹ eta ri Jesu rọ vwọ tanẹ Inenikristi che yerinkugbe vwọrẹ ẹguọnọ.—Jọn 13:35.

Die yen chọn Stephen uko vwọ kẹnoma kẹ uruemu rẹ utuoma ro vwori jovwo? Rom 12:2 vwẹ ukẹcha vwọ kẹ. Ọ da ta: “Me da rhe mrẹvughe nẹ ofori nẹ mi wene iroro mẹ. Mi de rhi wene iroro mẹ, ọ dianẹ mi vwo vwo ufuoma ọvo-o, ẹkẹvuọvo mi ji rhi vwo ọmrẹvughe nẹ ọnana yen omamọ rẹ akpeyeren.” Etiyin ẹgbukpe 40 re rẹ Stephen vwọ riavwerhen rẹ akpeyeren ro vwo vwo ẹguọnọ rẹ ihwo efa re.