“Si kẹrẹ Ọghẹnẹ, rere o si kẹre owẹ.”—Jems 4:8
Ọghẹnẹ Nyo Ẹrhovwo rẹ Avwanre?
Wo roro sẹ Ọghẹnẹ tobọ nyo ẹrhovwo wẹn? Ọ da dia ọtiọyen, gba riẹn nẹ ihwo efa ji roro ọtiọyen. Ihwo buebun nẹrhovwo kpahen ebẹnbẹn evo re, jẹ ebẹnbẹn na je herọ. Kẹ ọyena mudiaphiyọ nẹ Ọghẹnẹ nyo ẹrhovwo rẹ avwanre-e? Ẹjo! Baibol na kẹ avwanre imuẹro nẹ Ọghẹnẹ nyo ẹrhovwo siẹrẹ a da nẹrhovwo na vwẹ idjerhe ro shephiyọ. E jẹ a fuẹrẹn oborẹ Baibol na tare.
ỌGHẸNẸ NYO WE.
“E wọwẹ ro nyo ẹrhovwo na! Wọwẹ ọye ihwo ejobi che bru rhe.”—Une Rẹ Ejiro 65:2.
Ihwo evo nẹrhovwo kidie ayen tare nẹ ọ nẹrhẹ ẹwẹn rayen totọ, dede nẹ ayen vwo imuẹro nẹ ohwo vuọvo kerhọ kẹ aye-en. Ẹkẹvuọvo, ẹrhovwo vrẹ obo re nẹrhẹ ẹwẹn ohwo totọ vwẹ ọke rẹ ebẹnbẹn. Baibol na kẹ avwanre imuẹro nẹ “Ọrovwohwo si kẹrẹ otu ri sere ejobi, ayen ejobi ri sere vwẹ uyota, . . . ọye ọvo ri nyo oviẹ rayen.”—Une Rẹ Ejiro 145:18, 19.
Ọtiọyena, avwanre se vwo imuẹro nẹ Jihovaa Ọghẹnẹ nyo ẹrhovwo rẹ idibo rọyen. Vwẹ idjerhe rẹ ẹguọnọ, ọ da ta: “Kẹsieye we ki se vwe re nẹ erhovwo kẹ vwẹ, ki mi nyo ovwan.”—Jerimaya 29:12.
ỌGHẸNẸ GUỌNỌRE NẸ WỌ NẸRHOVWO VWO RHE.
“Wo gbe ẹdẹ rẹ ẹrhovwo-o.”—Rom 12:12.
Vwẹ Baibol na, e jiriro kẹ avwanre nẹ a “rẹ” ọkieje, a me je “nẹ ẹrhovwo kọke kọke.” Jihova Ọghẹnẹ ghene guọnọ nẹ a nẹrhovwo vwo rhe.—Matiu 26:41; Ẹfesọs 6:18.
Diesorọ Ọghẹnẹ vwọ guọnọ nẹ a nẹrhovwo vwo rhe? Gbe roro: Ọmiọvwọn guọnọre nẹ ọmọ rọyen guọnọ ukẹcha vwo mie. Vwọrẹ uyota, ọsẹ na sa riẹn oborẹ ọmọ rọyen guọnọre, dede na o de nyo oyare rọyen, ọ nẹrhẹ ọ riẹn nẹ ọmọ na vwẹrosuọ, ọ vẹ ọyen je kpẹkpẹ. Vwẹ idjerhe vuọvo na, a da nẹrhovwo kẹ Jihova Ọghẹnẹ, jẹ avwanre djephia nẹ avwanre vwẹrosuọ, avwanre je guọnọ sikẹrẹ.—Isẹ 15:8; Jems 4:8.
ỌGHẸNẸ GHENE VWẸROTE WE.
“Vwẹ ẹnwan wẹn ejobi vwọ ya, kidie ọye re vwẹ ẹro te we.”—1 Pita 5:7.
Ọghẹnẹ guọnọre nẹ avwanre nẹrhovwo vwo rhe kidie o vwo ẹguọnọ avwanre, ọ je vwẹrote avwanre. Ọ nabọ riẹn ọdavwẹ vẹ ebẹnbẹn rẹ avwanre, ọ je guọnọ chọn avwanre uko.
Vwẹ akpeyeren rẹ Ovie Devid eje, ọ yare ukẹcha ri Jihova Ọghẹnẹ womarẹ ẹrhovwo, ọ je ta obo rehẹ ẹwẹn rọyen vwọ kẹ. (Une Rẹ Ejiro 23:1-6) Ẹro vọ yen Ọghẹnẹ vwo ni Devid? Ọghẹnẹ vwo ẹguọnọ ri Devid, o ji nyo ẹrhovwo buebun rọ nẹre. (Iruo Rẹ Iyinkọn Na 13:22) Ọtiọyen Ọghẹnẹ ji nyo ẹrhovwo rẹ avwanre kidie ọ vwẹrote avwanre.
“ME GUỌNỌ ỌROVWOHWO NA, FIKIRIDIE WO NYO URHURU MẸ”
Enana eta rẹ ọvo usun rẹ ihwo ri si ine rehẹ Baibol na tare. O vwo imuẹro nẹ Ọghẹnẹ nyo ẹrhovwo rọyen, ọnana chọn rọ uko mamọ. O de rhi sikẹrẹ Ọghẹnẹ je mrẹ ẹgba vwo hirharoku ebẹnbẹn vẹ ọdjarhe rẹ akpeyeren.—Une Rẹ Ejiro 116:1-9.
Avwanre da riẹn nẹ Ọghẹnẹ nyo ẹrhovwo rẹ avwanre, ọ cha nẹrhẹ a gbomasi ẹrhovwo ẹnẹ. Roro kpahen obo re phia kẹ Pedro, rọ dia Spain. Ọmọshare rọyen rọhẹ ẹgbukpe 19 ghwuru vwẹ asidẹnti. Vwẹ ẹdia rẹ uvweri rọyen, Pedro da ta obo rehẹ ẹwẹn rọyen vwọ kẹ Ọghẹnẹ, je nẹrhovwo abọ buebun ọ sa vwọ mrẹ obicha vẹ ọbọngan. Die kọyen phiare? Pedro da ta: “Jihova kpahenphiyọ ẹrhovwo na, ọ reyọ iniọvo rẹ ukoko na vwo bicha vwẹ vẹ aye me.”
Ọke buebun avwanre mrẹ ẹkpahọnphiyọ rẹ ẹrhovwo avwanre womarẹ obicha vẹ ọbọngan rẹ igbeyan avwanre
Dede nẹ ẹrhovwo ghwa nẹrhẹ ọmọ rọyen na vrẹnushi-i, jẹ ọ vwẹ ukẹcha kẹ Pedro vẹ orua rọyen. Aye rọyen re se María Carmen da ta: “Ẹrhovwo chọn vwẹ uko vwo chirakon rẹ uvweri na. Me riẹnre nẹ Jihova Ọghẹnẹ nabọ vwo ẹruọ mẹ kidie me da nẹrhovwo rhe, ẹwẹn mẹ ko totọ, ke me je mrẹ ufuoma.”
Baibol na vẹ oborẹ ihwo rhiẹromrẹ nabọ djephia nẹ Ọghẹnẹ nyo ẹrhovwo. Dedena, ọ dia ẹrhovwo eje yen Ọghẹnẹ kpahanphiyọ-ọ. Diesorọ Ọghẹnẹ vwọ kpahanphiyọ ẹrhovwo evo jẹ ọ kpahanphiyọ efa-a?
a Jihova yen oderhi rẹ Ọghẹnẹ.—Une Rẹ Ejiro 83:18, NW.