Oborẹ Ihwo Ta Kpahen Ẹrhovwo Ẹnẹ
“Me da nẹrhovwo, ki mi no nẹ Ọghẹnẹ mudia kẹrẹ ovwẹ, ọ yọnrọn obọ mẹ, o ji sun uvwe siẹrẹ mi de no nẹ mi ghwrẹ.”—MARÍA.
“Aye mẹ họnvwọn ọga rẹ ikansa ẹgbukpe 13 tavwen o ki ghwu. Me karophiyọ nẹ me nẹrhovwo kẹ Ọghẹnẹ kẹdẹ kẹdẹ, mi niro nẹ ọ nabọ kerhọ kẹ vwẹ. Ẹwẹn mẹ de rhi totọ.”—RAÚL.
“Ẹrhovwo ọyen ọke ọghanghanre rẹ Ọghẹnẹ vwọ kẹ ihworakpọ.”—ARNE.
Vwọ kẹ María, Raúl, Arne, vẹ ihwo efa, ẹrhovwo ọyen ọke rẹ oghẹresan. Ayen niro nẹ womarẹ ẹrhovwo, ayen sa ta ota kẹ Ọghẹnẹ, kpẹvwẹ, je guọnọ ukẹcha rọyen. Ayen vwo imuẹro ọgangan kpahen ive ri Baibol nana ro shekpahen ẹrhovwo: “Ọnana kọye ẹroẹvwọsuọ rẹ avwanre vwori vwẹ evun rọye, nẹ avwanre da nọ ekpẹn rẹ emu ro shephihọ ọhọre rọye ko nyo kẹ avwanre.”—1 Jọn 5:14.
Vwọ fẹnẹ ọnana, ihwo buebun mrẹ bẹnbẹn ayen vwo rhiabọreyọ oborẹ Baibol na ta kpahen ẹrhovwo. Steve ta ota kpahen ẹro ro vwo ni ẹrhovwo, ọ da ta: “Ọke me vwọ hẹ ẹgbukpe 17, igbeyan mẹ erha yen ghwuru vwẹ asidẹnti ivẹ. Ọvo ghwuru vwẹ asidẹnti rẹ imoto, ivẹ ri chekọ de rhe ghwu vwẹ urhie.” Die kọyen Steve ruru? “Me nẹrhovwo kẹ Ọghẹnẹ nẹ ọ vuẹ vwẹ oboresorọ enana vwọ phia, jẹ me mrẹ ẹkpahọnphiyọ vuọvo-o. Ọtiọyena, me da nọ oma mẹ, ‘Diesorọ me vwọ nẹrhovwo?’” Ihwo buebun niro nẹ a kpahanphiyọ ẹrhovwo raye-en, ọtiọyena o rhe fo ayen vwọ nẹrhovwo-o.
O ji vwo erọnvwọn efa re nẹrhẹ ihwo jẹ ẹrhovwo ẹnẹ. Evo tare nẹ ọ vwọ dianẹ Ọghẹnẹ riẹn emu eje na, o rhe fo nẹ a vuẹ kpahen ọdavwẹ yẹrẹ ebẹnbẹn rẹ avwanre-e kidie ọ riẹn ayen.
Efa niro nẹ Ọghẹnẹ cha kpahenphiyọ ẹrhovwo raye-en fikirẹ oborẹ ayen ru wanre. Jenny da ta: “Ebẹnbẹn rode ọvo mi vwori kẹ ọna, mi no nẹ mi fiemu vuọvo-o. Mi ru erọnvwọn evo ri mi viẹ diekpọvwẹ kpahen, ọtiọyena mi niro nẹ mi fo ohwo rẹ Ọghẹnẹ kpahenphiyọ ẹrhovwo rọye-en.”
Ẹro vo wo vwo ni ẹrhovwo? Ọ da dianẹ wo ji vwo ẹwẹn ivivẹ kpahen ẹrhovwo re, oma cha vwerhen owẹ wọ vwọ riẹn nẹ Baibol na nabọ djekpahen ẹdia nana fiotọ. A sa vwẹroso oborẹ Baibol na ta kpahen ẹrhovwo;a ọ sa chọn wẹ uko vwọ mrẹ ẹkpahọnphiyọ rẹ enọ nana:
Ọghẹnẹ ghini nyo ẹrhovwo rẹ avwanre?
Diesorọ e vwo jẹ ẹrhovwo evo ẹkpahọnphiyọ?
Mavọ wọ sa vwọ nẹrhovwo wọ me je mrẹ ẹkpahọnphiyọ?
Die yen ẹrhovwo se ru kẹ wẹ?
a Baibol na vọnre vẹ ẹrhovwo rẹ idibo rẹ Ọghẹnẹ, ji te ọ ri Jesu Kristi. Ẹbẹre ra vwẹ Hibru si vwẹ Baibol na, re ji se Ọphọ rẹ Awanre na, vwo ẹrhovwo re vrẹ 150.