Obo ra sa Vwọ Vwẹ Ukẹcha Phia Ọke rẹ Oghwọrọ da Phia Nu

Oghwọrọ ri kpregede ki buẹnphiyọ buẹnphiyọ nonẹna. Ọke rẹ oghwọrọ da phia, ofori nẹ e vwo omamọ rẹ ọrhuẹrẹphiyotọ a sa vwọ vwẹ ukẹcha ro fori vwọphia. Ọtiọyena, Ẹko Rọvwẹrote na da vwẹ Akon Iruo rọ Vwẹ Ukẹcha Vwọ kẹ Ihwo rẹ Emu Phia Kẹ vwo mu vwẹ oghọn ukoko rehẹ akpọneje.

Siẹrẹ iniọvo rehẹ akon iruo yena de nyo kpahen oghwọrọ ọvo rọ phiare, kẹ ayen ghwe se ekpako rehẹ ekogho yena ayen vwọ riẹn oka rẹ ukẹcha rẹ ayen sa vwọ kẹ iniọvo na. Ọ da dianẹ oghwọrọ na gan vrẹ oborẹ ighwoghwota rehẹ ekogho na sa rhuẹrẹphiyọ, oghọn ukoko na ki che ji iniọvo re tẹn ona bru ayen ra rere ayen vwẹ ukẹcha kẹ ayen. Iniọvo re ji rhe na sa guọnọ ukẹcha rẹ ihwo re sa vwomakpahotọ, ayen je sa guọnọ nẹ e toro erọnvwọn evo ra ghene guọnọ yẹrẹ ayen sa dẹ ekuakua na je gharọ kẹ iniọvo re guọnọ ukẹcha vwẹ ekogho na.

O vwo iroro buebun re sorọ e vwo ru erọnvwọn vwẹ idjerhe nana vwo yovwin. Ọ nẹrhẹ a gbe vwanriẹn ewian evo abọ buebu-un, owian na rhe ji reghe ohwo-o, ọ je nẹrhẹ a sẹro rẹ igho vẹ ekuakua ra cha ghare na, rọ rha bẹn eruo jovwo ọ da dianẹ iniọvo na vwẹ ẹwẹn rayen ọvo vwo ruo.

Iniọvo rẹ oghọn ukoko vwo mu na se brorhiẹn rẹ uchunu rẹ igho vẹ uche ihwo ra guọnọre re cha vwomakpahotọ vwọ kẹ iruo rẹ ukẹcha na. Ayen je sa nokpẹn rẹ ukẹcha mie ihwo ri suẹn ekogho yena, re sa nẹrhẹ iruo rẹ ukẹcha na phẹre. Ọtiọyena, ohwo vuọvo reyọ ọhọre rẹ obọ rọyen vwo kpo asan rẹ oghwọrọ da phia yẹrẹ reyọ igho kugbe ekuakua vwo rhe ihwo rẹ oghwọrọ phia kẹ-ẹ, jokpanẹ kẹ e jẹ avwanre.

Dedena, avwanre guọnọ vwẹ ukẹcha phia siẹrẹ oghwọrọ da phia. (Hib. 13:16) Avwanre vwo ẹguọnọ rẹ iniọvo rẹ avwanre! Die yen e se ru? Orọnvwọn rọ ma ghanre re se ru, ọyen a vwọ nẹrhovwo vwọ kẹ ihwo rẹ oghwọrọ na te oma vẹ ihwo re vwẹ ukẹcha phia. E ji se ru itetoro rẹ igho womarẹ e vwo toro vwo biẹcha iruo rẹ akpọeje na. Vwo nene odjekẹ rẹ Ẹko Rọvwẹrote na, eghọn ukoko yen riẹn asan ro me fo ra da sa reyọ igho tiọyena vwo ruiruo vọnvọn. A da guọnọ vwobọ vwẹ iruo rẹ ukẹcha na, e se djephia nẹ a vwomakpahotọ womarẹ a vwọ ghwobọphiyọ ifọmu ri Local Design/Construction Volunteer Application (DC-50).

NI IVIDIO NA OGHWE RỌ SO OGHWỌRỌ VWẸ BRAZIL, RERE WỌ KPAHENPHIYỌ ENỌ NANA:

Die yen vwerhen owẹ oma vwẹ iruo rẹ ukẹcha rẹ Iseri ri Jihova vwọphia vwẹ oghwe ro kuru vwẹ Brazil vwẹ 2020?