Orọnvwe​—⁠Oyerinkugbe ri Rhirin Rhirin

Inenikristi ri phikparobọ vwẹ orọnvwe rayen brọghọ phiyọ Jihova oma je nẹrhẹ aye gbe ọshare na vwo omavwerhovwẹn. (Mak 10:⁠9) Orọnvwe sa vwọ tọn je vọn vẹ omavwerhovwẹn, ofori nẹ Inenikristi yan nene odjekẹ ri Baibol ọke rẹ ayen da sane ọrivẹ rẹ orọnvwe.

Ghwanre “tedje” tavwen wọ ke kọnphiyọ ohwo, kidie vwẹ ọke yena urhurusivwe rẹ ehware rha gan te ẹdia rẹ o de djobọte orhiẹnbro wẹ-ẹn. (1 Kọr. 7:​36, NW ) Nabọ reyọ ọke wọ vwọ hẹ ẹdia ri kpogono vwọ bọn oyerinkugbe wẹn vẹ Ọghẹnẹ gan ji yono emamọ iruemu ro fori nẹ Onenikristi vwo. Ọke yena re, ku wo se ru obo re cha nẹrhẹ orọnvwe wẹn phikparobọ.

Tavwen wọ ke rhọnvwe nẹ wọ cha rọvwọn ohwo, nabọ ghwọrọ ọke vwo vughe “ohwo rọ djahere vwẹ obo udu” rẹ ohwo na. (1 Pita 3:⁠4) Ọ da dianẹ wo vwo ẹwẹn ivivẹ, gbe nene ohwo rẹ wọ guọnọ rọvwọn na ta ota kugbe kpahọn. Vwẹ orọnvwe, tẹnrovi obo wọ sa vwọ kẹ ọrivẹ rẹ orọnvwe wẹn ukperẹ obo rọ sa vwọ kẹ wẹn. (Fil. 2:​3, 4) Wọ da yan nene odjekẹ ri Baibol tavwen wọ ke rọvwọn, jẹ wọ bọn uchivwo rọ nabọ gan rọ cha nẹrhẹ orọnvwe wẹn vọn vẹ omavwerhovwẹn.

NI IVIDIO NA E VWO MUEGBE VWỌ KẸ ORỌNVWE​—⁠ẸBẸRE 3: “RORO UNU RO MURU,” RERE WỌ KPAHENPHIYỌ ENỌ NANA:

• Mavọ yen oyerinkugbe rọhẹ uvwre rẹ oniọvo aye na vẹ Shane yan obaro te?

• Erọnvwọn vọ yen o vwo oniso rọyen ọke rẹ o rhi vwo vughe Shane phiyọ?

• Mavọ yen ọsẹ vẹ oni rọyen wan chọn uko, kẹ, orhienbro rẹ aghwanre vọ yen o bruru?