Ọmemama rẹ Avwanre Vwo Ẹguọnọ rẹ Avwanre

1. ỌMEMAMA AVWANRE YEN NẸRHẸ ỌNRE NA LO

Wọ sa vwẹ ẹro roro akpọ rẹ ọnre kanre? Ọnre na yen nẹrhẹ irhe djẹ ẹbe vẹ idodo, mọ emamọ ji vwo ibi sansan. Ọ je nẹrhẹ irhe vwẹ awọ rayen vwo se ame nẹ otọ na, ame na me je te ẹbe rẹ irhe na, ọ me rhe ranvwiẹ ro odju.

2. ỌMEMAMA AVWANRE YEN NẸRHẸ OSIO RHỌ

Osio ọyen okẹ ọghanghanre ro nẹ obọ rẹ Ọghẹnẹ rhe rọ nẹrhẹ otọ na yovwin emu rẹ avwanre ria. Ọghẹnẹ kẹ avwanre osio kugbe aruọke sansan re nẹrhẹ avwanre vwo emuọre, ọ je kẹ avwanre aghọghọ.

3. ỌMEMAMA AVWANRE YEN KẸ AVWANRE EMUỌRE VẸ IRHUON

Buebun esẹ rẹ aruakpọ ro ẹnwan rẹ oborẹ ayen sa vwọ vwẹ emuọre vẹ iwun vwọ kẹ orua rayen. Jokaphiyọ oborẹ Baibol na tare: “Gbe ni emephran re hẹ obenu na, ayen kọ-ọn, ayen vuẹ-ẹ, ayen vwo erhu-u, jẹ Ọsẹ wẹn rọ hẹ obo odjuvwu ghẹrẹ ayen. Ovwan gbe ghare nọ aye-en?”—Matiu 6:25, 26.

“Gbe roro idodo rẹ aghwa na, obo rẹ ayen rhua te; . . . Me ta kẹ ovwan nẹ, [Ovie] Solomọn vwẹ evun rẹ urinrin rọye, se rhuo emwa iyoyovwi kerẹ idodo nana-a. Ọ da dia nẹ Ọghẹnẹ sa vwẹ amwa rhuo idodo rẹ aghwa, . . . komavọ o rhuo ovwan te?”—Matiu 6:28-30.

Ọ vwọ dianẹ Ọghẹnẹ yen kẹ avwanre emu vẹ iwun na, kọyen ọ sa chọn avwanre uko vwo ru erọnvwọn efa ra guọnọre vwẹ akpeyeren. Avwanre de ru ọhọre rẹ Ọghẹnẹ, o che bruba ẹgbaẹdavwọn rẹ avwanre a sa vwọ mrẹ emu re, ọ je cha vwẹ ukẹcha kẹ avwanre vwọ mrẹ iruo rere a sa vwọ mrẹ igho vwọ dẹ obo ra guọnọre.—Matiu 6:32, 33.

Vwọrẹ uyota, o vwo oboresorọ avwanre vwo vwo ẹguọnọ rẹ Ọghẹnẹ siẹrẹ e de roro kpahen ọnre na, osio na, emephran vẹ idodo. Vwẹ uyovwinrota rọ vwọ kpahen ọnana a cha fuẹrẹn oborẹ Ọmemama avwanre vwo nene ihworakpọ ta ota kugbe.