Oborẹ Ọmemama na Vwẹ Ive Rọyen Vwọphia

Rhanvwẹ ọke rẹ Ọmemama na vwọ ma ihworakpọ, ọyen o vwo nene ihworakpọ ta ota womarẹ emekashe vẹ emraro. Vwọba, o de ji si ota rọyen vẹ ive rọyen phiyotọ. Ive nana rẹ Ọghẹnẹ veri na shekpahen obaro na. Tivọ yen wọ da sa mrẹ ive rẹ Ọghẹnẹ nonẹna?

Ovuẹ rẹ Ọghẹnẹ vwo rhe avwanre hẹ evunrẹ Baibol na. (2 Timoti 3:16) Idjerhe vọ yen Ọghẹnẹ vwọ vwẹ emraro vwo si ovuẹ rọyen? (2 Pita 1:21) Ọghẹnẹ phi iroro rọyen phiyọ ẹwẹn rẹ eshare na, ayen de sio phiyotọ. Ọtiọyen ọ je hepha nonẹna. Ọneki rode da vuẹ osiọbe rọyen obo ro che si, ofori nẹ a riẹn nẹ ọneki na yen vwo ovuẹ na. Vwẹ idjerhe vuọvo na, dede nẹ Ọghẹnẹ vwẹ eshare vwo si ota rọyen phiyotọ, jẹ ọyehẹ Ohwo ro vwo Baibol na.

BAIBOL NA HERỌ VWẸ KASAN KASAN

Ovuẹ rẹ Ọghẹnẹ pha ghanghanre, ọ guọnọre nẹ ihwo se ovuẹ na ji vwo ẹruọ rọyen. Nonẹna, “iyẹnrẹ esiri ri bẹdẹ” rọyen na herọ vwẹ “kẹgborho kẹgborho kugbe orua korua kugbe ephẹrẹ kephẹrẹ.” (Ẹvwọphia 14:6) Womarẹ ukẹcha rẹ Ọghẹnẹ, ọsoso yẹrẹ ẹbẹre ọvo ri Baibol na herọ vwẹ ejajẹ re vrẹ 3,000, ọnana bun vrẹ ẹbe efa vwẹ akpọ na.