Revwo Ruẹ Ona rẹ Aghwoghwo rẹ Avwanre Yovwẹn Phiyọ—Vwẹ Ibroshọ rẹ Iyẹnrẹn Esiri Ro Nẹ Obọ Rẹ Ọghẹnẹ Rhe! Vwọ Ton Uyono ri Baibol Phiyọ Vwẹ Anurhoro
Oboresorọ Ọ Vwọ Ghanre: Ofori nẹ avwanre yono ihwo Ota rẹ Ọghẹnẹ, e ki se gbe idibo. (Mat. 28:19, 20) Avwanre eje se yono ihwo uyota na fiotọ siẹrẹ a da reyọ ekuakua ra vwọ kẹ avwanre vwo ruiruo. Ibroshọ rẹ, Iyẹnrẹn Esiri Ro Nẹ Obọ Rẹ Ọghẹnẹ Rhe! sa chọn avwanre uko vwo ru ọnana. Avwanre sa reyọ vwọ ton uyono ri Baibol phiyọ vwẹ anurhoro.
Obo re Che Ruo Wan:
• Fuẹrẹn ona re se vwo phi ibroshọ na phiyọ ada rọhẹ ekpeti na.—Ji ni Iruo Ruvie Na ọrẹ March 2013.
• Phi ibroshọ wẹn phiyọ ekpu. Jẹ o muwẹro nẹ wo vwo ibroshọ buebun wọ che phi phiyọ ada.
• Nene ohwo na yono ẹkoreta ọvo yẹrẹ ivẹ, wọ ghwọrọ ọke vrẹ ibrẹro ihwe-e.
Davwen Iroroẹjẹ Nana Vwẹ Emeranvwe Na:
• Nẹrhovwo nẹ Ọghẹnẹ kẹ wẹ owenvwe wo vwo yono ohwo Baibol na. Ọ je nẹrhẹ wọ mrẹ ohwo ọvo wo che yono, wọ je vwọ dia ohwo rọ tẹn ona rẹ uyono.—Fil. 2:13.
• Vwẹ ẹga romobọ yẹrẹ ọrẹ orua wẹn, ghwọrọ ọke vwo yono ona rẹ aghwohwo na, wọ me je riẹn. Ọke yena, ku wo se ghwoghwota na vẹ imuẹro, wọ me je ton uyono ri Baibol phiyọ vwẹ anurhoro.
[Picture on page 1]
Wọ da Wian nẹ Uwevwin Kpẹ Uwevwin:
“Mi te etinẹ fikirẹ oborẹ ihwo roro kpahen obaro akpọ na. Wo rori nẹ erọnvwọn che yovwin nẹ enẹ? [Fọ, rere ọ kpahenphiyọ.] O gbe ihwo buebun unu siẹrẹ ayen da riẹn nẹ Baibol na vwo iyẹnrẹn esiri rọ sa kẹ avwanre iphiẹrophiyọ. Enana evo usun rẹ ẹkpahọnphiyọ ri Baibol na vwọ phia.” Dje obuko rẹ ibroshọ na kẹ ọ ro vwo uwevwin na, rere wọ nọ onọ ro me je. Kpẹ uyovwinrota rọ sanọre na rere wọ ton uyono na phiyọ. Ru ọrhuẹrẹphiyotọ wo vwo rhivwin ra kpahenphiyọ onọ rọvwọ kpahọn vwẹ uyovwinrota yena.