Ravwọ Vwẹ Ibroshọ rẹ Iyẹnrẹn Esiri na Vwo Yono
1. Mavọ yen e ru ibroshọ rẹ Iyẹnrẹn Esiri na?
1 Kirobo ra ta kpahọn vwẹ Iruo Ruvie Na ọrẹ July, ibroshọ rẹ Iyẹnrẹn Esiri Ro nẹ Obọ rẹ Ọghẹnẹ Rhe! na, ọyen orọnvwọn ọghanghanre ọvo rọhẹ ekpeti rẹ ekuakua rẹ avwanre vwo yono. Rere ohwo ro vwo uwevwin na sevwo yono nẹ evunrẹ Baibol na rhe, e rhe si ẹkpo ri Baibol ra rionbọ ra phiyọ ọbe na-a. Dede nẹ e ru ẹbe rẹ avwanre buebun vwẹ idjerhe rẹ ohwo ro se na sevwo yono komobọ, e ru ọnana rere oyono na vwọ reyọ vwo yono ohwo na. Ọtiọyena, avwanre da vwẹ ọbe na kẹ ohwo, e jẹ avwanre ru udje rẹ uyono na kẹ rere ọ mrẹ obo ro yovwin te revwo yono iyẹnrẹn esiri na vwo nẹ Baibol na rhe.—Mat. 13:44.
2. Mavọ yen avwanre savwọ reyọ ibroshọ rẹ Iyẹnrẹn Esiri na vwo ruiruo vwẹ obọ rẹsosuọ?
2 Obọ Rẹsosuọ: Wọ sa tanẹ: “Me rhere kiridie ihwo guọnọ riẹn kpahen oborẹ obaro na cha dia. Wo rorori nẹ erọnvwọn che yovwin phiyọ? [Fọ rere ọ kpahenphiyọ.] Baibol na vwo iyẹnrẹn esiri rọ sa kẹ avwanre iphiẹrophiyọ. Enana usun rẹ enọ evo ri Baibol na kpahenphiyọ.” Vwẹ ibroshọ na kẹ ohwo na rere wọ vuẹ nẹ ọ sane onọ ọvo vwo nẹ enọ rehẹ obuko ibroshọ na. Gba vwẹ ẹkorota ẹsosuọ rẹ uyono rọ sanere na vwo ru udje kẹ. Idjerhe ọfa, nọ ohwo na onọ ro shekpahen uyono ru wọ sanere rọ sa kpare oruru rọyen, rere wo ru udje rẹ oborẹ ibroshọ na savwọ vwẹ ukẹcha kẹ vwọ guọnọ ẹkpahọnphiyọ ri Baibol na vwọphia. Uyovwinrota na de shephiyọ vẹ ividio ọvo vwẹ jw.org, ighwoghwota evo hworo ọke rẹ ayen de ghwoghwo.
3. Dje obo ra savwọ reyọ ibroshọ rẹ Iyẹnrẹn Esiri na vwo yono ohwo.
3 Obo re ru Uyono na Wan: (1) Se onọ ra vwẹ eta ri muru vwo si na vwọ chọn ohwo na uko vwọ tẹnrovi ẹkpo rẹ uyono na. (2) Se ẹkorota rọhẹ obotọ rẹ onọ na. (3) Se ẹkpo ri Baibol re siri gẹgẹre na, rere wọ vwẹ enọ ri fori vwọ vwẹ ukẹcha kẹ ohwo na vwọ mrẹ oborẹ Baibol na kpahenphiyọ onọ ra vwẹ eta ri muru vwo si na. (4) Ẹkorota ọfa da je hẹ obotọ rẹ onọ yena, gba vwarhiẹn owọẹjẹ 2 vẹ 3. Ọ da dianẹ ividio ọvo vẹ onọ na shephiyọ, jẹ wo ji hworo kẹ ohwo ro vwo uwevwin na jovwo-o, wo se hworo vwevunrẹ uyono na. (5) Ukuotọ rọyen, gba vuẹ ohwo na nẹ ọ kpahenphiyọ onọ na, o vwo muwẹro nẹ o vwo ẹruọ rẹ ẹkpo na.
4. Die yen cha vwẹ ukẹcha kẹ avwanre vwọ tẹn ona obo ra reyọ ọbe nana vwo ruiruo?
4 Nabọ riẹn obo rehẹ evunrẹ ọbe nana. Reyọ vwọ ruiruo ọkieje. Kọke kọke wọ ke ton uyono na phiyọ, roro kpahen ohwo wo che yono na vẹ idjerhe ro me yovwin wo sevwo yono womarẹ ẹkpo ri Baibol rehẹ uyovwinrota na. (Isẹ 15:28; Iruo Rẹ Iyinkọn Na 17:2, 3) Rẹ ona vẹ erianriẹn wẹn vwọ rhua phiyọ na, wọ sa rhe mrẹ nẹ ọbe nana ọyen omamọ rẹ orọnvwọn ru wo vwo yono ihwo uyota na!