Vwẹ Ukẹcha Kẹ Irhuẹro Vwo Yono Kpahen Jihova
1. Idjerhe vọ yin Jesu vwo dje arodọnvwẹ kẹ irhuẹro?
1 Ẹmẹdẹ krẹn yin chekọ Jesu ki rhi ghwu. Ọke ro vwo vrẹn nẹ orere ri Jeriko, ọ da mrẹ irhuẹro ivẹ ri kperẹ tanẹ: “Ọrovwohwo ni aruẹdọn rẹ avwanre!” Dedenẹ Jesu roro kpahen ebẹnbẹn ro che hirharoku, o de mudia, o de se eshare na, o de sivwin ayen. (Mat. 20:29-34) Mavọ yen avwanre sa vwọ vwẹrokere arodọnvwẹ ri Jesu djephia kẹ irhuẹro?
2. Mavọ yen avwanre se vwo ghwoghwota kẹ orhuẹro vwẹ aghwoghwo na?
2 Chọn Ayen Uko: Ọ da dianẹ wọ mrẹ orhuẹro vwẹ aghwoghwo na, djoma kẹ, wọ je chọn uko. Ẹsosuọ, oshọ se mu ayen kidie e shenyẹn ayen ọkieje. Ẹkẹvuọvo, uvi rẹ ọdavwẹ vẹ omamọ uruemu wo djephia sa nẹrhẹ udu rọyen totọ. Karophiyọ nẹ irhuẹro evo mrorẹ emerha, efa mrorẹ kakaka-a. Ọmrẹvughe nana yen cha chọn wẹn uko vwọ riẹn oka rẹ ukẹcha ofori nẹ wọ vwọ phia. Ọke wọ da chọn uko nu, wọ sa vuẹ nẹ wo yono ihwo Baibol na. Wo se se asan kerẹ Une Rẹ Ejiro 146:8 yẹrẹ Aizaya 35:5, 6. Ọ da riẹn Braille se, gba nọ sẹ ọ guọnọ ẹbe rẹ avwanre vwẹ Braille re sa chọn uko vwo yono Baibol na. Wọ je sa kẹ uhworo ra danlodu vwo nẹ jw.org. Ikomputa rọyen de vwo iprogramu ro se eta phia, oma sa vwerhọn ro vwo se ẹbe ra vwọ phia vwẹ jw.org vẹ ẹbe ra sa danlodu vwẹ RTF (Rich Text Format).—Ni ekpeti na “Ọke Wọ Da Vwẹ Ukẹcha kẹ Orhuẹro. . . .”
3. Mavọ avwanre sa vwọ guọnọ irhuẹro rehẹ ubrotọ rẹ avwanre dede ghwoghwo?
3 Guọnọ Ihwo ri Rhuẹro Na: A fobọ mrẹ irhuẹro vwẹ aghwoghwo ri nẹ uwewin kpẹ uwewi-in, kidie oshọ muẹ buebun rayen ọke ọrhorha de bru ayen ra. Ọtiọyena, ọ guọnọ ẹgbaẹdavwọn mamọ a savwọ “guọnọ” ihwo tiọyena, ji ghwoghwota kẹ ayen. (Mat. 10:11) Ohwo ro rhuẹro hẹ asan wo de ruiruo yẹrẹ isikuru wẹn? Davwẹngba wọ tota kẹ. Isikuru rẹ irhuẹro da hẹ ubrotọ wo de ghwoghwota, davwẹngba wọ reyọ ẹbe avwanre vwẹ Braille vwo kpẹ ilaibri rẹ isikuru na. Wo vughe orua rẹ orhuẹro hepha? Ubrotọ rẹ ovwan de ghwoghwo vwo asan ra da vwẹrote irhuẹro? Nabọ dje fiotọ kẹ ohwo rẹ orua rọyen, ohwo ro dede erhorha yẹrẹ ọrọvwẹrote asan na nẹ Iseri ri Jihova vwo ọdavwẹ rẹ ayen vwọ vwẹ ukẹcha kẹ irhuẹro, rere wọ vuẹ nẹ wọ cha reyọ ẹbe avwanre vwẹ Braille vẹ ọrẹ uhworo vwo rhe. Dje uve ri Baibol rọ tare nẹ, vwẹ ọmọke krẹn, Ọghẹnẹ che rhie ẹro ihwo ri rhuẹro. Wo ji se dje ividio rọhẹ jw.org ro vwẹ uyovwinrota: “Ọ Rha Dia Baibol Nana-a, Ji Mi Ghwruru” ro gbikun rẹ ọshare ro rhuẹro rọ mrẹ erere nẹ ese ri Baibol na vwẹ Braille. Uphẹn wo vwo nene irhuẹro na tota kugbe se rhie phiyọ, siẹrẹ wo de dje oboresorọ wọ vwọ rhe.
4. Die yen ikuegbe ri Janet yono avwanre?
4 Oniọvo aye Janet ro rhuẹro de kpẹ asan rẹ irhuẹro dia. Ọ da tota kẹ eghene aye ọvo. Ọ da vuẹ nẹ, “Jesu rhie ẹro rẹ irhuẹro ro vwo dje obo ro che ru kẹ irhuẹro ọke rọ cha obaro.” Ayen de se Ẹvwọphia 21:3, 4 kugbe, Janet da nabọ djefiotọ oborẹ Uvie Ọghẹnẹ che ru uve nana gba wan. Aye na da fọ gbiẹi, ọ da ta: “Mi ji nyo ota nana dẹvo vwẹ unu rẹ orhuẹro-o. Buebun ihwo re mrorẹ vwo esegbuyota nẹ ihwo rhuẹro fikirẹ umwemwu rayen yẹrẹ e rẹ esẹ ride rayen ruru.” Womarẹ imel, Janet de dje asan rẹ aye na da sa mrẹ ọbe ri Bible Teach se vwẹ intanẹti. Asaọkiephana ayen yono Baibol na kuẹgbe abọ-ivẹ udughwrẹn.
5. Dedenẹ avwanre che se sivwin irhuẹro na kirobo ri Jesu ruru-u, ebruphiyọ vọ yin che no rhe siẹrẹ avwanre de dje ọdavwẹ kpahen irhuẹro na?
5 Vwọrẹ uyota, avwanre che se rhie ẹro rẹ irhuẹro kirobo ri Jesu ruru-u, ẹkẹvuọvo avwanre sa vwẹ ukẹcha kẹ ihwo Idẹbono rhurhu ẹwẹn rayen vẹ ihwo ri rhuẹro, rere ayen se vwo vwo ẹruọ rẹ uyota rẹ Ota Ọghẹnẹ. (2 Kọr. 4:4) “Ẹro da dọn” Jesu gangan, ọyen sorọ o vwo sivwin eshare ivẹ re dia kerẹ Jeriko. (Mat. 20:34) Siẹrẹ avwanre de vwo ọdavwẹ kpahen irhuẹro kerẹ Jesu, avwanre cha riavwerhen rẹ uphẹn ra vwọ vwẹ ukẹcha kẹ irhuẹro vwo yono kpahen Jihova, rọ dia ohwo ro che phi oba phiyọ ọga revwo jẹ orẹ ẹmrẹ.