Obo ra sa Reyọ Ẹbe re Dje Phiyọ Imẹjẹ Vwo Soseri

A vwọ reyọ imikpekpa re ghorie yẹrẹ imẹjẹ re dje ẹbe phiyọ vwo ghwoghwo, nẹrhẹ ihwo mrẹ uyota na vughe. (Jọn 6:44) Ọtiọyena, e jiro kẹ ekpako nẹ ayen ru ọrhuẹrẹphiyotọ rẹ aghwoghwo azagba vwẹ asan ihwo wan mamọ vwẹ ubrotọ rẹ ukoko rayen de ghwoghwo. Rọvwọ dianẹ e muẹ imikpekpa vẹ imẹjẹ na nẹ asan kpẹ asan na, o rhe fo nẹ a nọ mie ihwo e ki mu ayen phiyọ asa-an. Ono yin se vwobọ vwẹ oka rẹ aghwoghwo nana? Iniọvo re nabọ brorhiẹn abavo, ri ruẹ dẹndẹn, ri ji riẹn ota ta. E jẹ e djekpahen obo re ru vẹ obo ra kẹnoma.

Obo re ru:

Nabọ sasa opharo, wo dede, je chọn ihwo re wanvrẹn uko. Ighwoghwota evo nabọ hwẹ siẹrẹ ayen de yeren ihwo. Ohwo rọ wanvrẹn de ni ẹbe re djephiyọ na, wọ sa tanẹ, “Wọ sa reyọ ọ ro je we.”
Wo ghwe mudia kẹrẹ imẹjẹ yẹrẹ imikpekpa na gan nọ-ọ. Vwẹ asan evo, iniọvo na mrẹ omamọ iyẹnrẹn siẹrẹ ayen de ru ọtiọyen. Efa rhe mrẹ nẹ siẹrẹ e de mudia kẹrẹ gan nọ, ihwo re wanvrẹn rha rhọnvwan vwẹriẹ-ẹ, ọtiọyena, ayen ki mudia sherẹ emerha vwọ hẹrhẹ ọke ohwo vwọ vwẹriẹ. Siẹrẹ ohwo da vwẹriẹ, davwẹngba wọ vwọ tota kẹ, wọ sa nọ: “Wo roro kpahen onọ yena jovwo re?”
Reyọ Baibol na wian ọkieje siẹrẹ uphẹn na da herọ.
Dje ọrhuẹrẹphiyotọ rẹ uyono ri Baibol rọ herọ kẹ ohwo rọ reyọ ọbe re vwo yono Baibol na kerẹ Bible Teach. Hworo ividio rẹ Diesorọ E Vwo Yono Baibol Na? vwẹ ifonu yẹrẹ itablẹti wẹn kẹ.
Ọ da rhọnvwe, reyọ adrẹsi yẹrẹ ukeri rẹ ifonu rọyen. Ohwo na rha dia ekogho ukoko ovwan de ghwoghwo-o, gbe si ovuẹ rọyen phiyọ ifọmu rẹ Please Follow Up (S-43), wọ fobọ reyọ kẹ osiọbe rẹ ukoko wẹn.