Reyọ Ọke rẹ Aghwoghwo Wẹn Vwọ Wian Vwẹ Idjerhe rọ da Ghwa Erhuvwu Rhe
Iseri ri Jihova ghwọrọ inọke ri te 1,945,487,604 vwẹ aghwoghwo na vwẹ ukpe rẹ ẹga ri 2014. Ọnana odjephia rẹ orhiẹn avwanre bruru evwo mu oma phiyọ ẹga ri Jihova. (Une 110:3; 1 Kọr. 15:58) Rọvwọ dianẹ “ọke re bruru na rhe krẹ phiyọ” na, kẹ a ghene sa ghwọrọ ọke vwo ghwoghwo kẹ ihwo buebun?—1 Kọr. 7:29.
Avwanre sa vwọ reyọ ọke rẹ aghwoghwo na vwọ wian vwẹ idjerhe erhuvwu, avwanre ke dia ihwo re nuẹ. Kerẹ udje, ọ da dianẹ wọ mrẹ ihwo vwẹ aghwoghwo na-a, wọ sa rhuẹrẹ ọke wẹn phiyọ wọ vwọ mrẹ ihwo tota kẹ? Ẹdia se wene vwẹ asan sansan. Ẹkẹvuọvo, iroroẹjẹ nana sa chọn wẹ uko vwọ nabọ ghwọrọ ọke wẹn rere wo vwo jẹ ‘odju ẹteyọn.’—1 Kọr. 9:26.
Aghwoghwo rẹ Nuwevwin Kpẹ Uwevwin: Vwẹ ikpe buebun re, yen ighwoghwota vwọ reyọ aghwoghwo rẹ nẹ uwevwin kpẹ uwevwin vwọ tuẹn aghwoghwo rayen phiyọ. Ẹkẹvuọvo, ọ vwọ dianẹ ihwo buebun kpẹ iruo vwẹ urhiọke na, diesorọ wọ rha davwen aghwoghwo rẹ nuwevwin kpẹ uwevwin vwẹ ovwọnvwọ-ọn? Aghwoghwo rẹ urhuvwun yẹrẹ ọ re ruẹ vwẹ eki se yovwin vwẹ urhiọke fiẹ oghẹruvo.
Aghwoghwo rẹ Azagba: E mu imẹjẹ phiyọ asan rẹ ihwo wan mamọ vwevunrẹ ubrotọ rẹ ukoko na de ghwoghwo, rere e dje imagazini phiyọ. (Ni aruọbe 5 rẹ Iruo Ruvie Na ri July 2013.) Ọ da dianẹ ihwo buebun rha wan asan ra rhuẹrẹ kẹ aghwoghwo rẹ azagba na-a, Umẹ rọ Vwẹrote Iruo rẹ Ẹga Rukoko na se brorhiẹn re vwo mu imẹjẹ na kpẹ asan ọfa rẹ ihwo wan mamọ.
Orhivwinbrura vẹ Uyono ri Baibol: Wọ sa rhuẹrẹ orhivwinbrura vẹ uyono ri Baibol wẹn phiyọ ọke re de jẹ ihwo ẹmrẹ vwẹ aghwoghwo ri nuwevwin kpẹ uwevwin? Kerẹ udje, ọ da dianẹ urhiọke ri Saturday ọyen a vwọ mrẹ ihwo vwẹ uwevwin vwẹ aghwoghwo ri nuwevwin kpẹ uwevwin na, wo se ru uyono ri Baibol wẹn vwẹ oghẹruvo yẹrẹ ovwọnvwọn? A sa ghare ighwoghwota ri vwo ihwo rẹ ayen vwẹ Baibol vwo yono vwẹ ekogho vuọvo rere ayen yan kugbe?
Uyota, avwanre se kere ọke rẹ avwanre ghwọrọ phiyọ aghwoghwo na, jẹ erhuvwu ro no cha yen kẹ avwanre omavwerhovwẹn. Ọ da dianẹ oka rẹ aghwoghwo ọvo ghwa erhuvwu cha vwẹ ọke ọvo-o, gba davwen ọfa. Rẹ “Ọghẹnẹ ro vwo orhọ” na rere ọ chọn wẹ uko siẹnẹ ọke wọ ghwọrọ vwẹ aghwoghwo na vwọ ghwa erhuvwu rhe!—Mat. 9:38.