Ona Oyoyovwin Kpokpọ re se Vwo Ruiruo Aghwoghwo rẹ Azagba
1. Uchebro vọ yen a vwọ kẹ ikoko ri vwo asan rẹ ihwo wan mamọ?
1 E jiriro vwọkẹ ikoko ri vwo asan ihwo wan mamọ nẹ ayen vwo ọrhuẹrẹphiyotọ rẹ aghwoghwo rẹ azagba. Ovwan reyọ imikpekpa re ghorien vẹ imẹjẹ re dje ẹbe phiyọ vwo ruiruo vwẹ aghwoghwo rẹ azagba na. Ọ da dianẹ imikpekpa re ghorien re dje ẹbe phiyọ ọyen ovwan vwo ruiruo, e jẹ oghwoghwota ọvo siẹrẹ ọ da havwen mudia yẹrẹ chidia kẹrẹ erọnvwọn revwo dje na. Jẹ ighwoghwota ivẹ dia asan rẹ imẹjẹ re dje ẹbe phiyọ na epha. Iniọvo re vwẹrote erọnvwọn revwo dje na me nabọ sasa opharo kẹ ihwo re wanvrẹ. Siẹrẹ ohwo de rhi nẹ ẹbe revwo dje na, ọvo usun rẹ ighwoghwota na sa tota kẹ. Ọ sa ta nẹ: “Wọ tobọ riẹn obo ri Baibol na ta kpahen ota yena?” Oghwoghwota ọvo yẹrẹ ivẹ efa se mudia asan rẹ ayen da mrẹ ẹbe revwo dje na, jẹ ayen ruẹ aghwoghwo ri kpregede.
2. Gbikun rẹ oborerhiẹromrẹ ro dje ọghanrovwẹ rẹ aghwoghwo azagba ra vwẹ imẹjẹ vẹ imikpekpa re ghorien vwo ruẹ.
2 Ona nana nẹrhẹ a vwẹ iyono ri Baibol buebun vwo mu. Ohwo ọvo rọhẹ yunivasiti, guọnọ si ọbe kpahen Iseri-ri-Jihova, ẹkẹvuọvo, ọ sa mrẹ Ọguan Ruvie vuọvo rọ kẹrerẹ-ẹ. Vwẹ udughwrẹn rọ vwọ kpahọn, ọ da mrẹ imẹjẹ re dje ẹbe phiyọ vwẹ isukuru na. Ọyena da nẹrhẹ a vwẹ uyono ri Baibol vwo mu kẹ, enẹna ọ rhe dia oghwoghwota re bru phiyame ro ji ruiruo rẹ aghwoghwo ọtiọna.
3. Die yen ighwoghwota evo ta kpahen ona aghwoghwo nana?
3 Oniọvo aye ọvo rọ mrẹ aghọghọ nẹ aghwoghwo rẹ azagba tiọna rhe da ta: “Ihwoevo cha asan re dje ẹbe phiyọ na rere ayen reyọ ẹbe ọkiọke re rhere obọ. Vwọ kẹ ihwoefa, ayen ji tobọ nyo kpahen Iseri-ri-Jihova jovwo-o. Me rhe mrẹ tanẹ ona nana nẹrhẹ ovuẹ avwanre se te ihwo buebun obọ.” Ọniọvo aye ọfa da je ta: “Ọnana ona oyoyovwin kpokpọ re se vwo ruiruo aghwoghwo kidie ihwo na ọvo yin bru we cha, kiridie ayen guọnọ riẹn obo re hẹ etiyin.”
4. Diesorọ o vwo fo nẹ e mu imẹjẹ yẹrẹ imikpekpa re ghorien na phiyọ asan ọvo kọke kọke vwevunrẹ udughwrẹn na?
4 Ofori e vwo mu imikpekpa re ghorien na phiyọ asan ọvo kẹdẹ kẹdẹ, kọke kọke, vwevunrẹ udughwrẹn na. Ọtiọyena, ihwo ke sa mrẹ obo re vwo dje na ji vwo omavwerhovwẹn rẹ ayen vwo kpẹ etiyin ra reyẹ ọbe je nọ enọ. Ukoko wẹn vwo ọrhuẹrẹphiyotọ rẹ aghwoghwo azagba re? Ọ da dia ọtiọyen, wo se vwobọ vwẹ ona kpokpọ nana revwo “ghwoghwo Uvie rẹ Ọghẹnẹ” vẹ omavwerhovwẹn.—Luk 9:60.