Revwo Ruẹ Ona rẹ Aghwoghwo rẹ Avwanre Yovwẹn Phiyọ—Reyọ Ọbe ri Bible Teach Vwọ Ton Uyono ri Baibol Phiyọ

Oboresorọ Ọ Vwọ Ghanre: Ihwo buebun vwo ẹruọ rẹ obo ro mudiaphiyọ avwanre da vuẹ ayen nẹ avwanre guọnọ vwẹ uyono ri Baibol mu kẹ ayen ọphẹ-ẹ. Ayen se roro nẹ ayen cha vwomaba ẹko rẹ ihwo re yono yẹrẹ a cha vwẹ isikuru ọvo vwo mu kẹ ayen vwẹ uwevwin rayen. Ukpe ru wọ de vwọ vuẹ ayen kpahen uyono na, ru udje rẹ uyono na kẹ ayen. Wọ sa vwẹ ibrẹro krẹn vwo dje oborẹ uyono ri Baibol lọhọ te kugbe erere ohwo sa mrẹ no rhe. Wo se ruo vwẹ anurhoro rẹ ohwo na dede.

Obo re Che Ruo Wan:

Ọke wo de dje oma kẹ ohwo na nu, gba nọ sẹ o roro kpahen obaro na.
Vuẹ nẹ ihwo buebun ji roro kpahen obaro na, wo dje iyovwinreta rehẹ evunrẹ Bible Teach vwọ kẹ. Vuẹ nẹ iyono rehẹ evunrẹ ọbe na pha lọlọhọ, iyono na dje obo ri Baibol na ta kpahen ọke rọ cha vwẹ obaro na vẹ erọnvwọn efa, rere wọ nọ nẹ, ọ vuẹ wẹ uyovwinrota ro je re.
Vwẹ Bible Teach ọvo vwọ kẹ, wọ vuẹ nẹ o rhie kpẹ uyovwinrota rọ sanere na. Vuẹ nẹ ẹkpahọnphiyọ rẹ enọ ra nọre vwẹ ọtonphiyọ rẹ uyovwinrota na, hẹ evunrẹ ẹkoreta re hẹ obotọ na.
Vuẹ ọrovwuwevwin na nẹ, o se ẹkorota rẹsosuọ siẹrẹ o de shephiyọ kẹ. O de se nu, gba nọ onọ rohẹ ẹkorota yena, rere ovwan roro kpahen ẹkpahọnphiyọ rẹ onọ na kugbe. Se, wọ je tota kpahen ẹkpo ri Baibol rehe evunrẹ ẹkorota na ri churobọ si ẹkpahọnphiyọ na. Dje obo ru wọ jokaphiyọ ẹkpahọnphiyọ rẹ onọ na vwevunrẹ ọbe wẹn vwọ kẹ.
Kpẹ ẹkorota rọvwọ kpahọn, ẹkẹvuọvo vwẹ ẹkorota nana, gba vuẹ ọrovwuwevwin na nẹ ọ reyọ eta robọ rọyen vwọ kpahen phiyọ onọ na.
Nabọ jiro, rere wo ru ọrhuẹrẹphiyotọ wo vwo rhivwin.
Ọ da dia obo wo se ru, dje ividio nana kẹ vwẹ jw.org/urh: Mavọ Yen E Ruẹ Uyono ri Baibol Wan?

Davwen Iroroẹjẹ Nana Vwẹ Emeranvwe Na:

Nẹrhovwo kẹ Jihova rere o kuẹ ebruphiyọ rọyen ku ẹgbaẹdavwọn wẹn wọ sa vwọ ton uyono ri Baibol kpokpọ phiyọ.—⁠Fil. 2:13.
Reyọ ọbe ri Bible Teach vwọ ton uyono ri Baibol phiyọ, yẹrẹ hworo ividio rẹ Mavọ Yen E Ruẹ Uyono ri Baibol Wan? siẹre wọ da hẹ aghwoghwo na.