**Revwo Ruẹ Ona rẹ Aghwoghwo rẹ Avwanre Yovwẹn Phiyọ—Obo re Sevwo Phi Ọbe ri Bible Teach na Phiyọ Ada**

Oboresorọ Ọ Vwọ Ghanre: Ọbe ri Bible Teach na, ọyen ọbe kiriguo vwẹ ekuakua rẹ avwanre vwo yono ihwo. Ẹkẹvuọvo, avwanre ke sa reyọ vwo yono ohwo, ofori nẹ avwanre reyọ vwọkẹ ohwo na tavwen. Ọtiọyena, ofori nẹ avwanre ton ona rẹ oborẹ avwanre sevwo phi ọbe na phiyọ ada. (Isẹ 22:29) O vwo ona sansan e sevwo phi ọbe na phiyọ ada, ọtiọyena ighwoghwota gba sane ona ro shephiyọ kẹ ayen.

Obo re Che Ruo Wan:

Nọ ohwo na onọ rọ sa kpare iroro rọyen, ro shekpahen uyovwinrota ọvo vwevunrẹ ọbe na. Wọ sa sane onọ ọvo vwo nẹ enọ ravwọ ton uyovwinrota ọvuọvo phiyọ. Siẹrẹ ohwo na da kpahenphiyọ onọ na nu, gbe se ẹkpo ri Baibol ro shephiyọ rere vwo dje ẹkorota rọ kpahenphiyọ onọ na kẹ, siẹnẹ ovwan fuẹrẹn kugbe.
Ona ọfa ọyen ravwọ reyọ aruẹbe 3 re te 6 vwọ kpare urhurusivwe rẹ ohwo na, wo de ru ọyen na nu, gbe dje asan rọhẹ evunrẹ ọbe na ri Baibol na da kpahenphiyọ enọ na vwọkẹ. Kerẹ udje, wo se djunute orọnvwọn ọbrabra ọvo ra tota kpahen vwevunrẹ iyẹnrẹn rere wọ vuẹ nẹ buebun rẹ ihwo roro kpahen ẹkpahọnphiyọ rẹ enọ nana rehẹ aruọbe 3 na. Wọ je sa tanẹ avwanre nene irivẹ avwanre roro kpahen erhuvwu re cha dia vwẹ obaro na. Gbe dje ihoho rehẹ aruẹbe 4-5 vwọkẹ rere wọ nọ, “Ọvọ usun rẹ ive nana yen wọ guọnọre nẹ e ru kẹ wẹ?” Yẹrẹ wọ sa tanẹ avwanre bru ihwo ra rere avwanre chọn ayen uko vwọ mrẹ ẹkpahọnphiyọ rẹ enọ ri shekpahen akpeyeren. Gbe dje enọ rehẹ obotọ rẹ aruọbe 6 vwọkẹ rere wọ nọ ọro me je.
Wọ ghwa sa ton uyono ri Baibol phiyọ ugege yena. Wọ sa tanẹ: “Avwanre dje ọbe nana revwo yono Baibol na vwọkẹ irivẹ rẹ avwanre. Wọ mrẹrẹ jovwo re? [Fọ, rere ọ kpahenphiyọ.] Wọ da sa kẹ vwẹ ọmọke, mi guọnọ dje kẹ wẹ obo ru wọ savwọ vwẹ Baibol wẹn vwo yono ọbe nana.”

Davwen Iroroẹjẹ Nana Vwẹ Emeranvwe Na:

Ru udje rẹ ọnana vwẹ ẹga orua wẹn.
Wọ da hẹ iruo rẹ aghwoghwo na, vuẹ ighwoghwota efa oborẹ wọ cha ta. (Isẹ 27:17) Wene ona wẹn siẹrẹ ọ rha wia-an.