Yan mu Ayen Kpakpata

Nẹ ọke ravwọ rhoma rhuẹrẹ wẹbsaiti ravwanre phiyọ na, ihwo re nokpẹ rẹ uyono ri Baibol vwẹ intanẹti rhoma bunphiyọ. Ena kpokpọ revwo ruẹ aghwoghwo rẹ azagba je nẹrhẹ ihwoefa buebun nokpẹ rẹ uyono ri Baibol. Kpakpata yẹn oghọn rukoko vwọ wian kpahẹn evuẹ rẹ ihwo ọtiọyen na. Kerẹ udje, ohwo da nokpẹ rẹ uyono vwẹ jw.org, oghọn rukoko vwẹ ovuẹ vwo rhe ekpako rukoko rẹ asan ohwo na dia vwẹ uvwre rẹ ẹdẹ ivẹ. Iyẹnrẹn ro te avwanre obọ djerephia nẹ idughwrẹn evo sa wanvrẹ, jẹ e ji se bru ihwo na ra-a. Ukẹcha vọ yẹn avwanre sa vwọ kẹ ihwo ọtiọyen na rere oruru rayen vwo je djiro?​​—⁠Mak 4:​14, 15.

Siẹrẹ ohwo rọ dia ekogho wẹ-ẹn de dje omavwerhovwẹn phia, fobọ ghwobọ phiyẹ ọmọbe na Please Follow Up (S-43) rere wọ reyọ kẹ osiọbe rukoko wẹn kpakpata. Uvwre rẹ ẹdẹ ivẹ, osiọbe na me vwẹ ovuẹ na vwo rhe oghọn rukoko womarẹ asan re si ukoko phiyọ vwẹ jw.org. Ofori nẹ ekpako rhe nẹ Wẹbsaiti na ọkieje. Ayen da ghwa mrẹ ovuẹ nẹ ohwo dje omavwerhovwẹn phia, ayen me yanmu ohwo na kpakpata. Ofori oghwoghwota ra vuẹre nẹ ọ nokpẹ rẹ ohwo na vwo ru ọtiọyen kpakpata. Siẹrẹ wọ rha vwa ohwo na vwẹ uwevwi-in, ofori nẹ wo phi ovuẹ rẹ obo rẹ ohwo na sa vwọ mrẹ wẹ phiyotọ.