August

Ẹrhovwo avwanre ọyen ọ rẹ ihwo buebun vwọ kerhọ rẹ oborẹ avwanre ta, je vwomaba avwanre vwẹ ẹga rẹ uyota asaọkiephana. Kẹ ihwo rẹ orua kugbe ihwo efa re rhọnvwe kerhọ vwoo? Ọ sa dia ọhọre ri Jihova ro vwo sivwin ihwo ri wene ẹwẹn ọke rẹ ayen da mrẹ oghwọrọ ri Babilọn Rode na. Ọ da dia ọtiọyen, kọyen ọyen emu rẹ okpakpa e vwo si ayen orhọ ọkieje. Ayen sa karophiyọ oborẹ avwanre vuẹ ayen enẹna vwẹ obaro na. (Ni Izikiẹl 33:33) Ọkievo, ayen se roro kpahen oborẹ avwanre vuẹ ayen, ọnana me nẹrhẹ ayen vwomaba ẹga rẹ uyota tavwen ọke ke wan. Kerẹ ọrhẹrẹ ọto rọ vwẹrote uwodi ri Filipae ro kurhẹriẹ ọke rẹ ‘otọ vwo kpogho gangan’ nu, ọ sa dianẹ ihwo evo re rhọnvwe kerhọ enẹnaa, se wene ẹwẹn siẹrẹ ayen da mrẹ oghwọrọ ri Babilọn Rode na nu.—Iruo 16:25-34. w24.05 17 ¶9-10

O ji vwo uyono ọghanghanre ọfa rẹ avwanre yono vwo nẹ obo rẹ ọyinkọn Pọl si rhe Inenikristi ri Hibru. Evo rha yanphiaroo; ayen da “rhe họhọ ihwo re guọnọ ameivie ukperẹ emu ọgangan.” (Hib. 5:12) Ayen rhe rhiabọreyọ uyota ri Jihova memerha vwọphia womarẹ ukoko naa. (Isẹ 4:18) Kerẹ udje, dede nẹ o te omarẹ ẹgbukpe 30 re yen izobo ri Kristi phioba phiyọ Urhi ri Mosis na, jẹ ihwo ri Ju evo ji titi Urhi na. (Tai. 1:10) Kohwo kohwo ro se ileta rẹ ẹwẹn ọfuanfon na mu Pọl vwo si rhe Inenikristi ri Hibru na sa rhọnvwephiyọ nẹ ẹbe na vọnre vẹ iyono ikokodo. Ọyen oborẹ ayen ghwa guọnọ ayen vwọ bọn esegbuyota rayen gan kpahen ọrhuẹrẹphiyotọ kpokpọ rẹ ayen vwọ vwẹ ẹga kẹ Jihova je nẹrhẹ ayen fiudugberi vwo ghwoghwo.—Hib. 10:19-23. w24.04 6 ¶15

Rhavwẹn ọke rẹ Adam vẹ Ivi vwọ vwomaba Idẹbono vwo gbevwọso Jihova Ọghẹnẹ nu, iduima rẹ ihwo yen ghwure. Die yen cha phia kẹ ihwo eje ri ghwure na? Imihwo 144,000 ọvo, re dia idibo ri Kristi re fuevun yen a cha rhọvwọn nẹ ushi je kẹ arhọ ro jeghwo vwẹ odjuvwu. (Ẹvwọ 14:1) A je cha rhọvwọn eshare vẹ eya buebun re fuevun ri vwo ẹguọnọ ri Jihova vwẹ ‘evrẹnushi . . . rẹ evwata,’ kẹ ayen cha dia otọrakpọ na bẹdẹ ọ da dianẹ ayen fuevun vwẹ uvwre rẹ ọke rẹ Usuon rẹ Ẹgbukpe Uriorin ri Kristi na kugbe ọke rẹ ọdavwini rọ koba na. (Dan. 12:13; Hib. 12:1) Vwọba, vwẹ Usuon rẹ Ẹgbukpe Uriorin na, “ihwo ri jẹ evwata ẹdia”—kọyen ihwo re nama ga Jihovaa yẹrẹ i “ri ru erọnvwọn ebrabra” che vwo uphẹn rẹ ayen vwo wene akpeyeren rayen je dia ihwo re fuevun. (Jọn 5:29; Luk 23:42, 43) Ẹkẹvuọvo, ihworakpọ evo herọ re pha brabra mamọ ro brorhiẹn hwe, evrẹnushi cha dia kẹ ayeen.—Luk 12:4, 5. w24.05 2 ¶3; 5 ¶15; 6 ¶17

Ohwo rọ guọnọ dia ọrhorha vwẹ utughẹ ri Jihova cha dia ohwo “rọ ta uyota nẹ otọ rẹ udu rọye cha.” (Une 15:2) Ọnana vrẹ ra de vwọ kẹnoma kẹ ofian ẹvwọrọn. Jihova guọnọre nẹ avwanre ta uyota vwẹ kẹdia kẹdia. (Hib. 13:18) Ọnana ghanre mamọ, “kidie ohwo ọchọchọ ẹgua kẹ Ọrovwohwo oma, ẹkẹvuọvo ọ vwẹ ẹro sua ohwo rọ dia ọvwata.”(Isẹ 3:32) Ọ dia azagba ọvo yen ihwo re ta uyota nẹ otọ rẹ udu cha de ruẹ oborẹ Ọghẹnẹ guọnọree, ayen ji ruẹ ọtiọyen vwẹ odjahọn. Ayen kẹnoma kẹ obo re chọre. Ohwo ọchọchọ se vwo ẹwẹn ivivẹ kpahen irhi ri Jihova evo. (Jems 1:5-8) O se gbe urhi ri Jihova ku vwẹ erọnvwọn evo ro niri nẹ i ghwe fiemuu. Ọtiọyena o de no nẹ emu vuọvo nẹ obuko rẹ obo ro ruru na rhee, ọ sa nẹrhẹ o gbe irhi ri Jihova efa ku, ẹga rọyen kọ cha dia ọ rẹ omeru. (Aghwo. 8:11) Eriyin na, avwanre guọnọ dia ihwo re ta uyota vwẹ kemu kemu. w24.06 10 ¶7-8

Idibo ri Jihova vwo ẹguọnọ kpahen uyota rọhẹ Baibol na. Ọyehẹ avwanre mu esegbuyota avwanre kpahen. (Rom 10:17) Avwanre vwo imuẹro nẹ Jihova yen vwẹ ukoko rẹ Inenikristi na vwo mu kerẹ “uchivwo kugbe obicha vwọ kẹ uyota na.” (1 Tim. 3:15) Eshu guọnọre nẹ avwanre vwẹroso Baibol na yẹrẹ odjekẹ ro nẹ ukoko rẹ Ọghẹnẹ chaa. (Ẹfe. 4:14) O rhe che krii, Idẹbono cha reyọ evuẹ rẹ efian vwo sun ẹgborho na ghwru rere ayen vwo gbevwọso Jihova. (Ẹvwọ 16:13, 14) Avwanre je riẹn nẹ Eshu cha davwẹngba rọyen phiyọ ro vwo sun idibo ri Jihova ghwru. (Ẹvwọ 12:9) Kọyensorọ ọ vwọ ghanre re vwo yono oma avwanre obo re se vwo vughe uyota kugbe efian, ji ru nene obo re yonori. (Rom 6:17; 1 Pita 1:22) Usivwin rẹ avwanre vwọ vrabọ rẹ ukpokpogho rode na churobọ si uyota na! w24.07 8 ¶1-3

Ọke rẹ Jihova vwọ vwẹ Izrẹl vwo ru ẹgborho nu, ọ vẹ ayen da re ọphọ je rhọnvwe kugbe nẹ ayen de nene irhi rọyen, kọ chochọn rayen ji bruba kẹ ayen. Ẹkẹvuọvo siẹrẹ ayen de gbevwọsuọ, kerẹ udje, da ra ga eghẹnẹ efa—kọ cha rhan abọ nẹ ayen, ọ gbe cha chochọn rayeen, ọke yena kẹ ayen cha rioja. Dedena, ayen sa rhoma mrẹ aroesiri rẹ Ọghẹnẹ. Ayen se “rhivwi bru Ọrovwohwo rẹ Ọghẹnẹ [rayen ra siẹrẹ ayen] de nyo urhuru rọye.” (Diut. 30:1-3, 17-20) Kọyen, ayen se kurhẹriẹ. Siẹrẹ ayen de ru ọtiọyen, Jihova ko che sikẹrẹ ayen je rhoma bruphiyọ kẹ ayen. Abọ buebun yen ihwo rẹ Izrẹl gbevwọso Jihova. Fikirẹ ọnana ayen da rioja. Dedena Jihova kpairoro vrẹ ihwo rọyeen. Abọ buebun yen o ji emraro rọyen bru ayen ra, da ra vuẹ ayen nẹ ayen kurhẹriẹ ji rhivwin bru ọyen rhe.—2 Ivie 17:13, 14. w24.08 9 ¶4-5

Inenikristi ri Hibru re dia Jerusalẹm kugbe Judia de hirharoku ọke ọgangan. A vwọ vwẹ ukoko rẹ Inenikristi vwo mu nu, o rhe krii omukpahen da rhe vwomaphia. Omarẹ ẹgbukpe 20 vwọ wan nu, Inenikristi de rhi hirharoku uweren ọgangan, ọ sa dianẹ owẹnvwe ro firi vwẹ ẹkuotọ na yen sorọ. (Iruo 11:27-30) Ẹkẹvuọvo, omarẹ 61 C.E., Inenikristi de rhi vwo ufuoma vwẹ ọmọke siẹrẹ a da vwọ vwanvwe obo re cha vwẹ obaro. Uvwre ọke yena, ẹwẹn ọfuanfon na de mu ọyinkọn Pọl vwo si ileta vwo rhe ayen, ileta ro fo aruọke. Ileta re si vwo rhe Inenikristi ri Hibru fo aruọke kidie ufuoma rẹ ayen riavwerhen rọyen na che krii. Pọl vwẹ uchebro ro fori vwọ kẹ ayen rọ cha nẹrhẹ ayen muegbe hẹrhẹ obo re cha phia kẹrẹkpẹ vwẹ obaro na. w24.09 8 ¶1-2

Siẹrẹ a da rioja, Jihova dje ẹguọnọ rọyen kẹ avwanre womarẹ iniọvo avwanre. Iniọvo rẹ avwanre sa vwẹ uchebro kẹ avwanre siẹrẹ ayen da kerhọ siẹrẹ a da ta ọdavwẹ avwanre kugbe ayen de nene avwanre ghwọrọ ọke kuẹgbe. Ayen se se ẹkpo ri Baibol ọvo vwọ bọn avwanre gan yẹrẹ nene avwanre nẹrhovwo kugbe. (Rom 15:4) Ọkievo, iniọvo na sa karophiyọ avwanre ẹro ri Jihova vwo nẹ emu, ọnana me nẹrhẹ e se chirakon rẹ ebẹnbẹn. Iniọvo na je sa vwẹ ukẹcha ro fori vwọ kẹ avwanre, kerẹ udje ayen se muẹ emu rhe avwanre ọke a dahẹ ebẹnbẹn. Ọkievo, a sa nokpẹn rẹ ukẹcha miẹ ihwo efa. (Isẹ 17:17) Ọ sa dianẹ ayen riẹn oborẹ oma ruẹ avwanre yẹrẹ obo ra guọnọree. (Isẹ 14:10) Ọtiọyena, wọ sa vuẹ igbeyan ri tedje kpahen oborẹ oma ru we. Vuẹ ayen ukẹcha ru wọ guọnọre. Wo se nene ọkpako ọvo yẹrẹ ivẹ rẹ owẹ vẹ ayen riẹnriẹn oma ta ota kpahen oborẹ oma ru we. Iniọvo eya evo niro nẹ ọyen obo ri shephiyọ ayen vwọ vuẹ oniọvo aye ọfa ro tedje kpahen oborẹ oma ruẹ ayen. w24.10 10 ¶15-16

Ihwo buebun re omamọ emu je sasa oma ọkieje ayen se vwo vwo omakpokpọ. Dedena, ayen riẹnre nẹ ayen cha sa dia bẹdẹẹ. Ọ da dianẹ ayen rhẹro rẹ ọtiọyen jovwo, ebẹnbẹn rẹ ọghwo ghwa cha cha sa nẹrhẹ ayen dia bẹdẹẹ. Ẹkẹvuọvo, Jesu tare nẹ e se “vwo arhọ ri bẹdẹ,” kirobo rẹ Jọn 3:16 kugbe 5:24 tare. Ẹdẹ ọvo, Jesu da reyọ ibrẹdi vẹ erin vwọ ghẹrẹ uriorin rẹ ihwo buebun vwọrẹ igbevwunu. Ọyena vwerhoma, jẹ obo rọ rhoma ta vwẹ ẹdẹ rọ vwọ kpahọn kọyen tobọ ma vwerhoma. Ihwo buebun de nene kpo Kapanọm, ayen vwọ kẹrẹ orhoma abadi ri Galili, etiyin ọ da vuẹ ayen nẹ a sa kpare ihwo nushi ayen de vwo arhọ ri bẹdi bẹdẹ. (Jọn 6:39, 40) Eta ri Jesu na djerephia nẹ a sa kpare ihwo buebun ri ghwuru nushi, wẹ vẹ ihwo ru wo vwo ẹguọnọ kpahen ji se vwo arhọ ri bẹdi bẹdẹ. w24.12 8 ¶1-2

Okrinọ naa, iyẹnrẹn ọvo ro nẹ World Health Organization rhe tare nẹ eshare buebun hwe eya rayen, ta erharhe eta kẹ ayen yẹrẹ gboja kẹ ayen. Ọshare ro vwo iruemu nana re djunute na se ru omeru nẹ ọyen muọghọ kẹ aye rọyen siẹrẹ ọ da hẹ ohri rẹ ihwo efa, jẹ ọ vwẹ oja ria aye rọyen vwẹ obo uwevwin. Diesorọ eshare evo vwọ vwẹ oja re eya rayen? Ọ sa dianẹ esẹ rayen vwẹ oja re ini rayen, ọnana kọ nẹrhẹ ayen no nẹ uruemu ọtiọyena shephiyọ. Ẹkuruemu rẹ asan rẹ evo dia ghwanre titi uruemu ọchọchọ tiọyena nẹ ohwo vwọ dia “obọdẹn rẹ ọshare,” ọ cha reyọ ẹgba vwo dje kẹ aye rọyen nẹ ọyen yen ọga. Eshare evo herọ re yonori obo re sun omaa, ọtiọyen ji te ophu rayen. Eshare evo vwẹ ẹro abavo vwo nẹ eya vẹ ehwaree, kidie ọkieje ayen vwo nẹ ihoho rẹ ihwo re banphiyọ. Vwọba, iyẹnrẹn buebun djerephia nẹ vwẹ ọke rẹ ọga ri COVID-19 na yen ebẹnbẹn nana ma vwọ ganphiyọ. Vwọrẹ uyota, ọshare rọ vwẹ oja ria aye rọyen cha sa riase fikirẹ erọnvwọn nana re djunute naa. w25.01 8 ¶2-3

“Wo mi vwo ẹguọnọ ri Jihova Ọghẹnẹ wẹn vẹ ubiudu wẹn eje kugbe erhi wẹn eje kugbe ogangan wẹn eje kugbe iroro wẹn eje.” (Luk 10:27) Jesu tare nẹ ọnana yen ma ghanre vwẹ Urhi ri Mosis na. Jokaphiyọ nẹ ẹguọnọ avwanre kẹ Jihova churobọ si udu rẹ avwanre, kọyen ojevwe, ọdavwẹ, kugbe oborẹ oma ruẹ avwanre. O ji churobọ si ẹga ro nẹ otọ rẹ ubiudu rhe, ogangan rẹ avwanre—ji te ẹgba rẹ avwanre. Ẹkẹvuọvo e vwo vwo ẹguọnọ ri Jihova ji churobọ si iroro rẹ avwanre, kọyen ẹro avwanre vwo nẹ erọnvwọn. Vwọrẹ uyota, avwanre che se vwo ẹruọ rẹ iroro ri Jihova eje vọnvọọn. Jẹ, avwanre se vwo ẹruọ rẹ iroro rẹ Ọghẹnẹ te ẹdia evo womarẹ e vwo yono kpahen “iroro ri Kristi,” kidie Jesu nabọ vwẹrokere iroro rẹ Ọsẹ rọyen gbagba.—1 Kọr. 2:16. w25.03 8 ¶1

Jesu, ọyen ohwo rọ gbare kirobo rẹ Adam hepha tavwen o ki ru umwemwu. (1 Kọr. 15:45) Womarẹ ughwu ri Jesu, ko se phoro imwemwu rẹ Adam no, kọyen, ọ hwosa rẹ oborẹ Adam ku kufia na. (Rom 5:19) Ọtiọyena, Jesu kọ rhe dia “Adam rọ koba.” Ọnana yen sorọ rẹ a rha guọnọ ohwo ọfa rọ gbare rọ cha hwosa rẹ oborẹ Adam ku kufia naa. Jesu ghwuru “ẹsiẹvo goi.” (Hib. 7:27; 10:12) Kẹ, ofẹnẹ vọ yen herọ vwẹ ọrhuẹrẹphiyotọ rẹ ephoro kugbe ọtanhirhe na? Ọghẹnẹ yen ruẹ ọrhuẹrẹphiyotọ rẹ ephoro na rere ọ vẹ emọ rẹ ihworakpọ se vwo vwo uvi rẹ oyerinkugbe. Ọtanhirhe na ọyen osa ra hware e se vwo phoro imwemwu rẹ ihworakpọ no. Osa na mudiaphiyọ ọbara ọghanghanre ri Jesu ro kuphiyotọ kẹ avwanre.—Hib. 9:14. w25.02 5 ¶12-13

Siẹrẹ a da mrẹ Jihova kerẹ Ohwo rọ herọ yerẹn, ọ cha nẹrhẹ a vwẹ ẹro abavo vwo ni edavwini avwanre. Diesorọ a vwọ ta ọtiọyen? Kidie avwanre cha mrẹ ebẹnbẹn rẹ avwanre kerẹ ẹbẹre ọvo rẹ okpota rode rọhẹ uvwre ri Jihova vẹ Eshu. Idẹbono tare nẹ siẹrẹ avwanre de hirharokuẹ uweren ọgangan e che gbobọnyẹ Jihova. (Job 1:10, 11; Isẹ 27:11) Jẹ avwanre da fuevun chirakon rẹ edavwini, jẹ e djephia nẹ e vwo ẹguọnọ ri Jihova ji dje Idẹbono phiyọ ọvwọrofian. Wo hirharokuẹ ẹvwọsuọ ro nẹ obọ rẹ usuon cha, uweren ọgangan, ihwo re guọnọ kerhọ rẹ iyẹnrẹn esiri naa, yẹrẹ edavwini efa? Ọ da dia ọtiọyen, karophiyọ nẹ ẹdia ru wọ hepha na se rhie uphẹn phiyọ ru wo vwo ru udu ri Jihova ghọghọ. Je karophiyọ nẹ, ọ cha rhọnvwe nẹ a davwen owẹ vrẹ asan rẹ ẹgba wẹn muruu. Ọ cha kẹ wẹ ẹgba wo vwo chirakon. w24.06 22 ¶9

Wọ riẹn asan ru wọ da vwiẹrẹ re sa nẹrhẹ wo she ro ọdavwini? Erere vuọvo che te avwanre obọ siẹre a da phiẹn oma avwanre nẹ e vwo ovwiẹrẹ vuọvoo yẹrẹ tanẹ avwanre gan vrẹ ohwo ro se she ro umwemwu. (1 Jọn 1:8) Karophiyọ obo ri Pọl tare nẹ, ihwo “ri tedje vwọrẹ ẹwẹn” se she ro ọdavwini ọ da dianẹ ayen rhẹrẹ ree. (Gal. 6:1) Ofori nẹ a ta uyota kẹ oma rẹ avwanre je riẹn asan sansan rẹ avwanre da vwiẹrẹ. (2 Kọr. 13:5) Die yen ofori nẹ e ru siẹrẹ a da riẹn asan sansan re sa nẹrhẹ avwanre she ro ọdavwini? Ofori nẹ a davwẹngba rẹ avwanre eje a vwọ sen edavwini tiọyena! Re vwo ru udje rọyen, vwẹ ọke rẹ awanre asan rọ ma phẹrẹ ẹ ruọ yen anurhoro rẹ orere na. Ọtiọyena, ka ghwa isodje buebun phiyọ anurhoro na rere ayen vwọ rhẹrẹ. Vwẹ idjerhe vuọvo na, ofori nẹ a nabọ vwo oniso rẹ asan avwanre da vwiẹrẹ rere a sa vwọ sen ọdavwini.—1 Kọr. 9:27. w24.07 15 ¶5-7

Iruo rẹ esiri re djunute vwẹ isese re kẹdi kẹdẹ ri nonẹna churobọ si eghwoghwo rẹ iyẹnrẹn esiri na. Ọtiọyena, avwanre de se Ota rẹ Ọghẹnẹ ji roro kpahọn, esegbuyota rẹ avwanre kpahen Jihova kọ ganphiyọ, ọnana kọ nẹrhẹ a mrẹ oboresorọ ọ vwọ ghanre e vwo ghwoghwo ovuẹ rẹ Uvie na. Avwanre sa vwọ mrẹ erere vọnvọn vwo nẹ Ota rẹ Ọghẹnẹ, ofori nẹ avwanre kẹnoma kẹ e vwo brokpakpa se, yono ji roro kpahọn. Ghwọrọ ọke vwo se. Wo de se kanre ẹkpo ri Baibol ru wo vwo ẹruọ rọyeen, wo pho waan. Ukperẹ ọtiọyen, reyọ Watch Tower Publications Index yẹrẹ Ọbe Ehiahiẹ rẹ Iseri ri Jihova vwo ru ehiahiẹ kpahen ẹkpo ri Baibol yena. Wọ da nabọ ghwọrọ ọke vwo yono Ota rẹ Ọghẹnẹ, uduefiogbere ru wo vwo kpahọn kọ cha ganphiyọ. (1 Tẹsa. 5:21) Imuẹro wẹn kpahen Ota rẹ Ọghẹnẹ vwọ ganphiyọ ye, kẹ wọ cha rhe mrẹ aghọghọ ra vwọ vuẹ ihwo efa kpahen oborẹ wo yono na. w24.04 15 ¶4-5

Devid tare nẹ: ọyen “ohwo esiri vẹ evwoghovwo.” (Une 86:5) Maika de rhe si: “Ono Ọghẹnẹ rọ họhọ owẹ, rọ vwẹ orukuruku vwo ghovwo ro mi gbobọnyẹ ogbeku?” (Maika 7:18) Aizaya da je ta: “Jẹn oruimwemwu jẹ imwemwu rọye vwọ, re ohwoumwemwu jẹ iroro ọbrabra rọye vwo; jẹn o rhivwi bru Ọrovwohwo, rere o ni arodọvwẹ rọye, bru Ọrovwohwo, kidie evwoghovwo rhere buebu.” (Aiz. 55:7) Ayen sa vwọ vwẹrokere Jihova, a vuẹ iniọvo rehẹ ukoko ri Kọrẹnt nẹ ayen dede oniọvo ro kurhẹriẹ je kẹ imuẹro nẹ ayen vwo ẹguọnọ rọyen. Siẹrẹ ayen de nene iji nana, jẹ ayen djephia nẹ ayen ihwo ri ‘nyẹmẹ . . . vwẹ erọnvwọn ejobi.’ (2 Kọr. 2:9) Dede nẹ, emeranvwe evo wanvrẹ re re vwo si ọshare na nẹ ukoko na, jẹ ọghwọku ra vwọ kẹ na nẹrhẹ o kurhẹriẹ. Ọtiọyena, o rhe fo nẹ ekpako na ghwọrọ ọke ayen ke reyọ rhivwiin. w24.08 17-18 ¶12-13

Avwanre yerẹn vwẹ ọke rẹ ewene ride da cha vwomaphia! O rhe che krii, Jesu kọ cha reyọ kohwo kohwo rọhẹ akpọ na vwo guẹdjọ. Jesu vwẹ aroẹmrẹ ro vwo dje “oka rẹ ọrhire” rọyen “kugbe ọ rẹ okuphiyọ rẹ eyeren na” vwọphia kẹ idibo rọyen tavwen ẹdjọeguo na ke cha tonphiyọ. (Mat. 24:3) A niyẹnrẹn rẹ aroẹmrẹ nana phiyọ Matiu uyovwin 24, 25, Mak uyovwin 13 kugbe Luk uyovwin 21. Jesu vwẹ orhọesio vwọphia womarẹ itẹ erha ro kperi. Enana yen itẹ rẹ igegede kugbe ẹvwe na, emetobẹ ri vwo aghwanre vẹ i ri jẹ ọhọ evwo, kugbe e rẹ italẹnti na. Itẹ nana ọvuọvo cha cha avwanre uko vwo vwo ẹruọ rọyen nẹ uruemu rẹ ohwo yen Jesu cha reyọ vwo guẹdjọ rọyen. w24.09 20 ¶1-2

Ẹguọnọ rẹ Ọsẹ rọyen kugbe ẹguọnọ ro vwo kpahen ihwo efa yen mu oniruo avwanre, Jesu Kristi, vwo ru kemu kemu ro ruru. Ẹguọnọ yena yen muro vwọ wian gangan ji ruiruo rẹ ihwo ni fi emuọvoo. (Mat. 20:28; Jọn 13:5, 14, 15) Iniọvo eshare, ọ da dianẹ ẹguọnọ yen mu we wo vwo yerin tedje je ga kerẹ odibo rowian, Jihova che bruba kẹ wẹ je cha wẹ uko vwo ru ọtiọyen. (1 Pita 5:5) Vwẹ akpọ na, ihwo ri nẹ oma rayen ghanghanre eyen me je ihwo. Jẹ, ọ dia ọtiọyen ọ hepha vwẹ ukoko ri Jihovaa. Oniọvo ọshare ro vwo ẹguọnọ rẹ ihwo efa kirobo rẹ Jesu ruru, nẹ oma rọyen gegeregee yẹrẹ guọnọ ẹdia rode rere o se vwo sun ihwo efaa. Ọ da dianẹ a vwẹ ohwo ọtiọyen rọ guọnọ ẹdia rode vwo mu vwevunrẹ ukoko na, ọ cha rhọnvwe ruiruo re ni fiemuu ra guọnọre a sa vwọ vwẹrote igodẹ ri Jihova re pha ghanghanre na. O se no nẹ ọyen rho vrẹ ohwo rọ wian oka rẹ owian ọtiọyena.—Jọn 10:12. w24.11 15 ¶6-7

Vwẹ akpọneje, avwanre guọnọ iniọvo eshare vrẹ obo ri jovwo re cha ga vwevunrẹ ukoko na. (Ẹfe. 4:8) Wọ da dia oniọvo ọshare ro bromaphiyame re, wọ sa vwẹ ukẹcha phia “siẹ rẹ ogangan na de rhe we wo vwo ruo”? (Isẹ 3:27) Wo vwo owenvwe wo vwo yerin tedje kerẹ odibo rowian? Ọ da dianẹ wọ ga kerẹ odibo rowian enẹna, wo vwo owenvwe ru wo vwo yerin tedje kerẹ ọkpako? Wo se ru ewene vwẹ akpeyeren wẹn rere wọ sa ghwobọphiyọ ifọmu rẹ Isikuru rẹ Ihwo ri Ghwoghwo Uvie Na? Isikuru yena che muegbe wẹn rere Jesu sa vwọ reyọ owẹ vwo ruiruo vọnvọn. Wo de no nẹ wo muwaan, nẹrhovwo rhe Jihova. Vuẹ nẹ ọ vwẹ ẹwẹn ọfuanfon rọyen vwọ cha wẹ uko wo se vwo ru kiruo kiruo ra vwọ kẹ wẹ fiotọ. (Luk 11:13) Owian ọgangan rẹ iniọvo eshare ri Jesu vwo mu na ruẹ, ọyena odjephia nẹ Jesu suẹn avwanre vwẹ ẹdẹ re koba na. (Mat. 28:20) Oma vwerhen owẹ nẹ avwanre vwo Ovie ro vwo ẹguọnọ, ro ruẹse, rọ davwerhọn rẹ avwanre rọ je vwẹ iniọvo eshare ri tedje vwo mu re vwẹrote ọdavwẹ rẹ avwanre? w24.10 23 ¶16-17

Kẹ erọnvwọn eje re suẹ ọmiaovwẹ vẹ ojaẹriọ kẹ ihwo rẹ Ọghẹnẹ vwo? Vwọrẹ uyota, e cha ‘chọrẹ Ọghẹnẹ ẹro ji siomanu kẹ ibiẹro rọyen.’ (Aiz. 65:16) Jihova che si ebẹnbẹn rẹ avwanre eje no, ukuotọ rọyen a rha cha karophiyọ ọmiaovwẹ rẹ avwanre ọfaa kidie o che si ayen no karekare. Enẹna, oma vwerhen avwanre a dahẹ emẹvwa, re dia asan rẹ ẹwẹn rẹ avwanre de totọ, ra da je kpairoro vrẹ ebẹnbẹn rẹ akpọ rẹ umwemwu nana. Avwanre toroba omavwerhovwẹn rọhẹ iparadaisi re vwo ru udje na siẹrẹ e de dje ẹguọnọ, aghọghọ, ufuoma, uruemu esiri kugbe uruemu ri dẹndẹn re dia ẹbẹre ọvo rẹ omamọ rẹ ẹwẹn ọfuanfon rẹ Ọghẹnẹ na phia. (Gal. 5:22, 23) Mavọ yen ọ vwerhoma te re vwo kuomagbe ukoko ri Jihova! Ihwo re dajẹ iparadaisi re vwo ru udje na cha mrẹ orugba rẹ “idjuvwu ọkpokpọ vẹ akpọ ọkpokpọ” rẹ Ọghẹnẹ veri na. w24.04 22 ¶9-10

Dede nẹ a vwọ kọnphiyọ ohwohwo sa ghwa omavwerhovwẹn rhe, jẹ ọnana owọẹjẹ ọghanghanre kidie ọ sa nẹrhẹ ihwo ivẹ re kọnphiyọ ohwohwo na rọvwọn. Ẹdẹ rẹ ayen cha rọvwọn na, ayen ihwo ivẹ na che ve vwẹ obaro ri Jihova nẹ ayen che vwo ẹguọnọ ji muọghọ kẹ ohwohwo vwẹ ẹdẹ rẹ akpọ rayen eje. Tavwen avwanre ki ve ive, ofori nẹ a nabọ frẹkotọ roro kpahọn. Ọtiọyen ive rẹ orọnvwe je hepha. Ra vwọ kọnphiyọ ohwohwo, nẹrhẹ ihwo ivẹ re jowọ rẹ ayen vwọ rọvwọn na vughe ohwohwo phiyọ ji bru omamọ rẹ orhiẹn. Ọkiọvo orhiẹn ọtiọyena sa dia ọ rẹ ayen vwọ rọvwọn yẹrẹ dobọ rẹ oyan na ji. Ọ da dianẹ ayen dobọ rọyen ji, ọ dia obo re chọree. Ẹkẹvuọvo, ọ nẹrhẹ ayen ihwo ivẹ na bru omamọ rẹ orhiẹn. Diesorọ ọ vwọ ghanre a vwọ vwẹ ẹro abavo vwo ni a vwọ kọnphiyọ ohwohwo? Ihwo rehẹ ẹdia ri kpogono de vwo ẹro abavo, ayen rha cha kọnphiyọ ohwo rẹ ayen vwo ẹwẹn ayen vwọ rọvwọọn. w24.05 26-27 ¶3-4

Ọkievo, oshọ se mu ighene re dia Inenikristi rẹ ayen vwọ ta ota kpahen oborẹ ayen segbuyota. Oma sa vo ayen siẹrẹ a da tanẹ ayen rhi djekpahen oboresorọ ayen vwo imuẹro kpahen uyono rẹ arhọ mamarhee. Diesorọ? Kidie iyono rayen sa tanẹ uyono rẹ arhọ mamarhe ghini uyota. Wọ da dia ọmiọvwọn, mavọ yen wọ sa vwọ vwẹ ukẹcha kẹ ọmọ wẹn vwo vwo imuẹro nẹ obo ro segbuyota na yen ghene gba? Kẹ imuẹro nẹ ofori oma vo kidie ọ riẹn uyota rẹ obo ra mare ejee. Diesorọ a vwọ ta ọtiọyen? Uyota nẹ egbaeriariẹn buebun riẹnre nẹ ọ dia arhọ di mu va rhe kpregedee. Ayen riẹnre nẹ ohwo ọvo ro vwo aghwanre herọ rọ ma ayen. Fikirẹ ọnana, ayen rhe se uyono rẹ arhọ mamarhe gbuyotaa. Orọnvwọn ọvo rọ sa nẹrhẹ ọmọ wẹn ru esegbuyota rọyen ganphiyọ yen o vwo roro kpahen obo ri mu iniọvo eya vẹ eshare vwo segbuyota nẹ a ma arhọ. w24.12 18 ¶14-15

Jesu vwo imuẹro nẹ ihwo evo cha kerhọ rẹ iyẹnrẹn esiri na. Ọnana da nẹrhẹ o ghwoghwo iyẹnrẹn esiri na vẹ oruru. Kerẹ udje, oba rẹ ukpe ri 30 C.E., ọ vwọ ton iruo aghwoghwo rọyen phiyọ nu, Jesu da rhe mrẹ nẹ ihwo buebun herọ re guọnọ kerhọ kẹ ovuẹ rọyen na, ọ da reyọ ayen vwo dje udju rọ vware rẹ orhọ rọyen ghwo te evuo re. (Jọn 4:35) Omarẹ ẹgbukpe ọvo vwọ wan nu, ọ da vuẹ idibo rọyen: “Orhọ na rhoro.” (Mat. 9:37, 38) Ọke vwọ yanran na, ọ da rhoma kanrunumuo nẹ: “Orhọ na rhoro . . . Ovwan rẹ Onini rẹ orhọ na nẹ o ji ewiowian ro evunrẹ orhọ rọyen.” (Luk 10:2) Jesu nabọ vwo imuẹro nẹ ihwo cha kerhọ kẹ iyẹnrẹn esiri na, oma vwerherọ ayen vwo ru ọtiọyen. Jesu yono idibo rọyen nẹ siẹrẹ ayen da vwẹ ẹro abavo vwo ni ovuẹ rayen, ọnana cha nẹrhẹ ayen sẹro rẹ oruru rayen. w25.03 18-19 ¶15-16

Jihova ọyen odjahọn mẹ. Kirobo rẹ oragha rode sa sẹro rẹ ohwo vrabọ rẹ ogiribo ye, ọtiọyen Jihova je cha avwanre uko siẹrẹ e de hirharokuẹ ẹdia egangan vwẹ akpeyeren. Ọ vwẹ ukẹcha kẹ avwanre ji sẹro rẹ oyerinkugbe ra vẹ ọyen vwori rere emu vuọvo vwo je gbowọphiyọ. O ji ve nẹ o che si kemu kemu ro se gbowọphiyọ ufuoma vẹ ofuvwegbe avwanre no. (Izi. 34:25, 26) Idjerhe ọvo a vwọ vwẹ Jihova vwo ruẹ Odjahọn avwanre kerẹ oragha yen a vwọ nẹrhovwo rhe. Ọke avwanre da nẹrhovwo, kọ kẹ avwanre “ufuoma rẹ Ọghẹnẹ” rọ sẹro rẹ ubiudu vẹ ẹwẹn avwanre. (Fil. 4:6, 7) Jihova choma ọkieje rọ vwọ cha avwanre uko. Avwanre sa vwẹrosuọ kidie ọyen “Oragha ri bẹdẹ na.” (Aiz. 26:3, 4) Ọkieje yen ọ cha vwọ dia ro vwo ru ive rọyen gba, nyo ẹrhovwo avwanre, je kẹ avwanre ukẹcha rẹ avwanre guọnọre. Avwanre je sa vwẹroso Jihova kidie ọ fuevun kẹ ihwo re vwẹ ẹga kẹ. (2 Sam. 22:26) Oborẹ avwanre ru kẹ cha sa chọrọ ẹroo, ọkieje yẹn ọ cha vwọ hwosa kẹ avwanre.—Hib. 6:10; 11:6. w24.06 27 ¶4-6

Erọnvwọn ra vwọ dia otọ ri shephiyọọ sa nẹrhẹ ubiudu rẹ avwanre jẹ ọsoso ẹdia. Ọtiọyen ji te erharhe rẹ igbeyan, kugbe ekuakua rẹ akpeyeren. Siẹrẹ e de noso nẹ orọnvwọn ọvo nẹrhẹ ẹguọnọ re vwo kpahen Jihova shekpotọ, e jẹ a jowọ kpakpata vwọ rhuẹrẹphiyọ. (Mat. 5:29, 30) E jẹ avwanre kẹnoma kẹ kemu kemu rọ sa nẹrhẹ ubiudu rẹ avwanre jẹ ọsoso ẹdia. Asa phiẹn oma avwanre vwo roro nẹ kidie nẹ avwanre muomaphiyọ ẹga ri Jihova, emu vuọvo herọ ro che miovwo avwanree. E vwo ru udje rọyen, gba vwẹ ẹwẹn roro nẹ wọ yan vwevunrẹ uvo jẹ oheri na pha gangan. Rere oma wẹn se vwo totọ wọ da da ame odjidjiro. Die yen che phia siẹrẹ wo rhe vrẹn nẹ uvo naa? Urhurhu ame cha rhoma si uwe. Ẹkpo na kẹ ọna. E vwo ru erọnvwọn ri che si avwanre kẹrẹ Jihova ọvo terii. Kirobo ra cha dia evunrẹ uvo ọgangan ọke grongron naa, ọtiọyen ọ je hepha nẹ a cha sẹro rẹ oma avwanre vwo nẹ kemu kemu rọ cha nẹrhẹ ẹguọnọ rẹ avwanre kpahen Jihova shekpotọ.—Ẹfe. 2:2. w24.07 21 ¶6-7

Avwanre cha sa vwẹ ẹwẹn roro oja ri Jesu re re vẹ obo ro chirakon te ọke re vwo gboja kẹẹ. Dede nẹ Jesu rioja rẹ oshenyẹ nana eje, ọ fuevun kẹ Jihova ji dje ẹguọnọ phia. Ukperẹ ọ vwọ tanẹ a vwẹ isodje ri hwere mu urhe oja na, ọ da rẹ nẹ: “Ọsẹ, vwo ghovwo ayen kidie ayen riẹn oborẹ ayen ruẹ-ẹ.” (Luk 23:34) Siẹrẹ avwanre da nẹrhovwo vwọ kẹ ihwo re vwẹ oja ria avwanre, ọnana cha nẹrhẹ a kpairoro vrẹ ophu ji si eta nẹ evun, tobọ wene ẹro rẹ avwanre vwo nẹ ihwo ọtiọyen ri gbe avwanre ku. Unu che se gbe oka rẹ oshenyẹ sansan rẹ avwanre che hirharoku tavwen oba rẹ eyeren nana ki tee. Ọtiọyena, o toro obo re hirharokuu, e jẹ a nẹrhovwo rhe Jihova ọkieje vwọ kẹ ukẹcha. A je sa vwẹrokere obo ri Jesu ruru ọke rọ vwọ rioja, je reyọ uchebro ri Baibol na vwo ruiruo. Siẹrẹ e de ru ọtiọyen, ke se vwo imuẹro nẹ Jihova che bruphiyọ kẹ avwanre.—1 Pita 3:8, 9. w24.11 6 ¶16; 7 ¶17, 19

Jihova dia Ọghẹnẹ rọ rhọvwọn umiovwoo; ọ vẹ umwemwu gbaa. (Une 5:4-6) Ọ guọnọre nẹ avwanre muọghọ kẹ iwan ephiọnphiọn rọyen, rehẹ evunrẹ Baibol na. Vwọrẹ uyota, Jihova rhẹro rẹ ogbagba mie avwanre ri jẹ ẹgbaa. (Une 130:3, 4) Ẹkẹvuọvo, ọ vwẹ uphẹn kẹ ‘irumwemwu re rhẹriẹ ẹse rọyen re muwan rọye-en phiyọ uphẹn rẹ ayen vwo vwobọ vwẹ uruemu ra ghẹmrẹẹ.’ (Jud 4) Vwọrẹ uyota, Baibol ta ota kpahen “oghwọrọ rẹ ihwo ri jẹ Ọghẹnẹ ẹriẹn” vwẹ ofovwin rẹ Ọghẹnẹ, Amagidọn. (2 Pita 3:7; Ẹvwọ. 16:16) Dedena, Jihova guọnọre nẹ ohwo vuọvo ghwọrọ-ọ. Baibol na tarọ phephẹn nẹ “ọ guọnọre nẹ ihwo eje kurhẹriẹ.” (2 Pita 3:9) Ekpako ukoko na vwẹrokere Jihova vwọ vwẹ ukẹcha kẹ irumwemwu rere ayen vwo kurhẹriẹ je mrẹ aroesiri ri Jihova. w24.08 26 ¶1-2

Kerẹ Jihova, avwanre ji se ruẹse kẹ ihwo efa kidie avwanre vwo ẹguọnọ rayen. Kerẹ udje, wo vughe oniọvo ọvo ro vwo emu yẹrẹ iwuun? Jihova sa reyọ owẹ vwọ vwẹ ukẹcha kẹ. A riẹn Iseri ri Jihova phiyọ ihwo ri ruẹse ọke rẹ emu ri kpregede da vwomaphia. Kerẹ udje, uvwre rẹ ọke rẹ ọga ri COVID-19, iniọvo na vwẹ emu, iwun kugbe erọnvwọn efa vwọ kẹ ihwo re guọnọ ukẹcha. Buebun ji ru itetoro vwo bicha iruo rẹ akpọeje. Ọnana nẹrhẹ a mrẹ igho vwo bicha iniọvo re guọnọ ukẹcha rẹ emu ri kpregede phia kẹ. Iniọvo na ru nene obo rehẹ Hibru 13:16 rọ tare nẹ: “Ovwan jẹ erhuvwu eruo chọrọ ovwan ẹro-o, ovwan ji nene ihwo efa ghare oborẹ ovwan vwori, kidie oka rẹ izobo ọtiọyena nabọ je Ọghẹnẹ.” w24.09 27 ¶6-7

Roro kpahen udje nana. Wọ guọnọ iruo ru wọ sa vwọ vwẹrote orua wẹn. Wọ da mrẹ iruo ivẹ. Wọ da nabọ fuẹrẹn iruo ivẹ na, je jokaphiyọ oborẹ iruo na hepha, ọrhuẹrẹphiyotọ ru wo che nene vwẹ iruo na, ọke rọ cha reyọ owẹ wo ki se te iruo na kugbe erọnvwọn efa etiọyen. Vwẹ ẹdia ivẹ na, o vwo ọvuọvo rọ vwọso odjekẹ ri Baibool. Ọ sa dianẹ ọvo je we vrẹ ọ ro chekọ kidie igho ra cha hwa kẹ wẹ vwẹ ọyena bunru mamọ. Dedena, o ji vwo erọnvwọn efa ro fori nẹ wo roro kpahen tavwen wo ki brorhiẹn. Kerẹ udje, ọvo usun rẹ iruo na che gbowọphiyọ ọrhuẹrẹphiyotọ rẹ uyono wẹn? Ọvo usun rẹ owian na cha reyọ ọke ro fori wọ vwọ vwẹrote orua wẹn kugbe ọke ovwan vwọ ga Jihova? Enọ tiọyena cha vwẹ ukẹcha kẹ wẹ vwọ reyọ “erọnvwọn re ma ghanre” vwọ kobaro kerẹ ẹga wẹn kugbe ọdavwẹ rẹ orua wẹn, ukperẹ ekuakua rẹ akpeyeren. Ọtiọyena, ku wo se brorhiẹn rẹ Jihova che ku ebruphiyọ rọyen ku. w25.01 17 ¶11-13

Ọ da tobọ dianẹ ihwo efa ru we obo re brare re, wo se vwo imuẹro nẹ Jihova vwo ẹguọnọ wẹn o ji ni we ghanghanre. Ọ da dianẹ udu wẹn “ghwọre,” karophiyọ nẹ Jihova mrẹ erhuvwu rọhẹ oma wẹn o de si we te oma. (Jọn 6:44) Ọkieje yen o vwo muegbe rọ vwọ vwẹ ukẹcha kẹ wẹ kidie wọ pha ghanghanre vwẹ ẹro rọyen. Siẹrẹ e de roro kpahan udje ri Jesu, ọnana sa nẹrhẹ a riẹn oborẹ oma ruẹ Jihova. Jesu vwo ruiruo aghwoghwo rọyen vwẹ otọrakpọ na, o vwo oniso rẹ ihwo rẹ ihwo efa ni fiemuu, o de gbe arodọnvwẹ kẹ ayen. (Mat. 9:9-12) Ọke rẹ aye ọvo rọ mua okpọga rọ rhẹro nẹ oma rọyen che kpo vwo djobọte ewun rọyen, Jesu da ta eta rẹ ọbọngan vwọ kẹ ji jiro fikirẹ esegbuyota rọyen. (Mak 5:25-34) Jesu vwẹrokere iruemu rẹ Ọsẹ rọyen gbagba. (Jọn 14:9) Ọtiọyena, wo se vwo imuẹro nẹ Jihova ni we ghanghanre, ọ je mrẹ iruemu iyoyovwin ru wo vwori te esegbuyota wẹn kugbe ẹguọnọ ru wo vwo kpahọn. w24.10 7 ¶4-5

Vwẹ akpeyeren rọyen, Devid chirakon rẹ ẹdia egangan re nẹrhẹ ọ viẹ. O hirharoku ẹvwọsuọ vwo nẹ obọ rẹ ihwo efa, igbeyan re ma kẹrẹ je fuevun kẹẹ. (1 Sam. 19:10, 11; 2 Sam. 15:10-14, 30) Vwẹ ọkiọvo vwẹ akpeyeren rọyen, o de si: “Oma rẹ oviẹ na rhọ vwẹ; kason kason me vwọ kpọrhẹ ehwa mẹ vẹ oviẹ; ukpe mẹ kpọrhọre vẹ ame ovie.” (Une 6:6) Dede nẹ Devid hirharoku ebẹnbẹn sansan, o vwo imuẹro nẹ Jihova vwo ẹguọnọ rọyen. O de si: “Ọrovwohwo nyo umri rẹ oviẹ mẹ.” (Une 6:8) Eta rẹ isese ri kẹdi kẹdẹ ri nonẹna djere phephẹn nẹ Jihova vwo ẹguọnọ rẹ avwanre mamọ nẹ ọ je davwerhọn avwanre. Devid tare nẹ ọhọhọre nẹ Jihova koko ameoviẹ rọyen phiyọ ọgọ yẹrẹ si ayen phiyotọ vwevunrẹ ọbe. Devid vwo imuẹro nẹ Jihova vwo oniso je karophiyọ ọmiaovwẹ rọyen. Devid vwo imuẹro nẹ ọ dia ọsẹ rọyen rọhẹ odjuvwu di vwo ẹruọ rẹ ebẹnbẹn ro hirharoku ọvoo, ẹkẹvuọvo ọ je riẹn oborẹ oma ruro. w24.12 22 ¶11-12