Fuevun kẹ Jihova

Inenikristi rẹ uyota choma rẹ ayen vwọ kẹnoma kẹ ohwo yẹrẹ orọnvwọn rọ guọnọ gbowọphiyọ ẹga rẹ ayen vwọ kẹ Jihova. O muẹro nẹ ọyen orhiẹn-ebro wẹn. Evun-ẹfuọn ghanre kẹ Jihova. (Se 1 Ikun Rivie 28:9.) Ẹdia vọ yen sa davwen evun-ẹfuọn wẹn ni, kẹ die yen sa chọn wẹ uko?

1. Mavọ yen ihwo efa sa vwọ davwen evun-ẹfuọn avwanre ni?

Ihwo evo guọnọ da avwanre obọ ji rere e vwo jẹ Jihova ẹga. Ono yen se ru emu tiọyen? Ihwo evo ri vrẹn nẹ uyota na gun ẹfian kpahen ukoko na rere ayen se vwo miovwo esegbuyota avwanre. Enana ihwo ri she nẹ ukoko na re vwọ suọ. Vwọba, ilori rẹ ẹga evo hrahra evuẹ rẹ efian kpahen avwanre rere ihwo rẹ esegbuyota rayen ganre-e se vwo vrẹn nẹ ukoko na. Imuoshọ herọ siẹrẹ e de nene ihwo nana phraphro, sẹ ẹbe rayen, evuẹ rẹ ayen phi phiyọ intanẹti yẹrẹ e vwo ni ividio rayen. Vwọ kpahen ihwo re guọnọ nẹ ofu dje ihwo re fuevun ga Jihova, Jesu da ta: “We jẹ ayen vwo. Irhuẹro ayen ruẹ. Orhuẹro de sun orhuẹro ayen ivẹ ki she phihọ ọgọdọ.”​​—Matiu 15:14.

2. Orhiẹn romobọ vọ yen sa davwen evun-ẹfuọn rẹ avwanre kẹ Jihova ni?

Ẹguọnọ ri Jihova che mu avwanre vwọ kẹnoma kẹ kemu kemu ro churobọ si ẹga rẹ efian. Ofori nẹ iruo, ukoko rẹ avwanre hepha yẹrẹ irueru rẹ avwanre vwobọ vwọ churobọ si ẹga rẹ efia-an. Jihova si avwanre orhọ nẹ, “Vrẹn no rhe [Babilọn Rode na], ihwo mẹ.”​​—Ẹvwọphia 18:​2, 4.

HIẸ KODO

3. Kẹnoma kẹ iyono rẹ efian

Die yen e che ru ọke re de nyo erharhe rẹ eta kpahen ukoko ri Jihova? Se Isẹ 14:​15, ovwan ta ota kpahen onọ nana:

• Diesorọ a vwọ jomaotọ e vwo je vwo imuẹro kpahen kota kota re nyori?

Se 2 Jọn 9-11, ovwan ta ota kpahen enọ nana:

• Ẹro vọ yen avwanre vwo ni ihwo ri she nẹ ukoko na re vwọ suọ?

• Dede nẹ avwanre vẹ ihwo ri she nẹ ukoko na re vwọ suọ yẹrẹn kuẹgbe-e, mavọ yen e se vwo nyo iyono rayen?

• Mavọ yen wo rorori nẹ oma che ru Jihova a da kerhọ kẹ erharhe rẹ eta rẹ ihwo ta kpahọn vẹ ukoko rọyen?

4. Fuevun kẹ Jihova ọke rẹ oniọvo ọvo de ru umwemwu

E de nyo nẹ ohwo ọvo vwẹ ukoko na ru umwemwu ọgangan, oghwa vọ yen te avwanre? Roro kpahen odjekẹ rẹ urhi rẹ Ọghẹnẹ vwọ kẹ ihwo rẹ Izrẹl awanre. Se Livitikọs 5:1.

Vwo nene ẹkpo ri Baibol yena, avwanre da riẹn nẹ ohwo ọvo ru umwemwu ọgangan, ofori nẹ a vuẹ ekpako na obo ra riẹnre. E ki ru ọtiọyen, ọyen uruemu esiri ra vwọ vuẹ ohwo ro ru umwemwu na nẹ ọ ra fan imwemwu rọyen kẹ ekpako na. O rhe ru ọtiọye-en, evun-ẹfuọn vwọ kẹ Jihova che mu avwanre vwọ vuẹ ekpako na oborẹ avwanre riẹnre. Mavọ yen owọẹjẹ yena vwo ­djephia nẹ e vwo ẹguọnọ rẹ . . .

• Jihova?

• ohwo ro ru umwemwu na?

• ihwo efa rehẹ ukoko na?

5. Kẹnoma kẹ Babilọn Rode na

IVIDIO: Vrẹn nẹ Babilọn Rode Na! (5:​06)

Se Luk 4:8 kugbe Ẹvwọphia 18:4, 5, ovwan ta ota kpahen enọ nana:

• Odẹ mẹ jehẹ ọbe re si edẹ rẹ ihwo rehẹ ishoshi rẹ ẹga rẹ efian phiyọ?

• Me hẹ ukoko ro churobọ si ẹga ọfa?

• O vwo ẹdia rẹ iruo mẹ vwo biẹcha ẹga rẹ efian?

• O vwo ẹdia efa vwẹ akpeyeren mẹ ro de fo nẹ mi si oma nẹ ẹga rẹ efian?

• Ẹkpahọnphiyọ mẹ vwọ kẹ enọ yena da dia e, ewene vọ yen ofori nẹ mi ru?

Obo rọ wanre eje, brorhiẹn rọ cha nẹrhẹ ẹwẹn obrorhiẹn wẹn fon ro ji che djephia nẹ wọ fuevun kẹ Jihova.

ỌDJẸKOKO

A sa vwọ fuevun kẹ Jihova, ofori nẹ a kẹnoma kẹ ihwo re davwẹngba rẹ ayen vwo sun avwanre ghwru.

Ẹrhomafuẹrẹn

• Diesorọ e vwo jẹ kerhọ rẹ eta rẹ ihwo ri she nẹ ukoko na re vwọ suọ?

• Die yen avwanre che ru avwanre da mrẹvughe nẹ oniọvo ọvo ru umwemwu ọgangan?

• Mavọ yen a sa vwọ kerhọ rẹ orhọ-esio re vwo vrẹn nẹ ẹga rẹ efian?

HIẸ GUỌNỌ

Yono kpahen oborẹ wọ cha ta siẹrẹ ihwo efa de gun efian kpahen Iseri ri Jihova.

“Wo Nyo Eta na Eje Re?” (Uwevwin Orhẹrẹ rẹ August 2018)

Mavọ yen wo se vwo vughe ukoko yẹrẹ irueru ri biẹcha Babilọn Rode?

“Muomaphiyọ Iruo Ẹga na Vwẹ Okuphiyọ rẹ ‘Oba rẹ Ẹdẹ Na’” (Uwevwin Orhẹrẹ rẹ October 2019, aruẹbe 16-​18)

Die yen ihwo re vwọ sua evo ruru rere ayen se vwo miovwo esegbuyota rẹ avwanre?

Vwo Oniso rẹ Eta rẹ Ophiẹnvwe (9:32)

Vwẹ ikuegbe rẹ “Rhanvwẹ Ọkiemọ Rhe Yen Me Vwọ Guọnọ Ọghẹnẹ,” se kpahen oborẹ orherẹn rẹ Shinto ọvo vwo sioma nẹ ẹga rẹ efian.

“Baibol na Wene Ohwo” (Uwevwin Orhẹrẹ ri July 1, 2011)