UYONO 18

Vwẹ Ovuẹ Ọghanghanre Vwọ kẹ Ihwo

1 Kọrẹnt 9:19-23

ỌDJẸKOKO: Vwẹ ukẹcha kẹ ihwo vwo roro kpahen ota wẹn, jẹ ayen riẹn nẹ ayen yono orọnvwọn ọghanghanre vwo norhe.

Roro kpahen oborẹ ihwo na riẹnre jovwo. Ukperẹ wọ vwọ vwanriẹn oborẹ ihwo nyori jovwo re, vwẹ ukẹcha kẹ ayen vwọ vwẹ ẹro ọfa vwo ni uyovwinrota na.

Wo se brokpakpa djunute oborẹ ihwo riẹnre jovwo, jẹ ọ da dianẹ orọnvwọn kpokpọ yen wọ cha ta ota kpahen wọ me ta ememerha.
Hiẹ wo ji roro kokodo. Davwẹngba wọ vwẹ evuẹ yẹrẹ obo re ghwa phia rẹ ihwo ghwa riẹ-ẹn vwo dje ẹkpo na phia. Nabọ roro kpahen ota wẹn na kugbe oborẹ ovuẹ na vwo churobo si ẹkpo wọ guọnọ vwọphia na.

Wọ vwọ fuẹrẹn ota wẹn na, vwẹ enọ nana vwọ rhanriẹn iroro wẹn: ‘die, diesorọ, ọke vọ, tivọ, ono, kugbe mavọ.’ Ota wẹn cha dia sasasa siẹrẹ wọ da nọ enọ evo je kpahenphiyọ ayen vwevunrẹ ota wẹn na.
Dje ọghanrovwẹ rẹ ovuẹ wẹn phia. Dje oborẹ Baibol na sa vwọ vwẹ ukẹcha kẹ ihwo wọ ta ota kẹ na vwẹ akpeyeren rayen. Djekpahen ẹdia evo vẹ iruemu re pha ghanghanre vwọ kẹ ihwo na.