Ovuẹ Vwọ kẹ Ihwo re Rhiẹ Ọghwẹkoko Na

EMẸVWA RẸ OGHẸRESAN

ẸGA RẸ BẸTẸL E jẹ ighwoghwota re bruphiyame nure rehẹ ẹgbukpe 35 kpotọ, re je guọnọ ga vwẹ Bẹtẹl, kpo omẹvwa rẹ iniọvo re guọnọ ga vwẹ Bẹtẹl vwẹ urhiọke rẹ Friday. E che ghwoghwo asan vẹ ọke re che vwo ruo.

ISIKURU RẸ IHWO RI GHWOGHWO UVIE NA E durhie ekobaro rehẹ ẹgbukpe 23 fiẹ 65 re guọnọ ruiruo rẹ Uvie rayen hẹrephiyọ vwo kpo omẹvwa rẹ iniọvo re guọnọ kpo Isikuru rẹ Ihwo ri Ghwoghwo Uvie na vwẹ urhiọke rẹ Sunday. E che ghwoghwo asan vẹ ọke e che vwo ruo.

OVUẸ VWỌ KẸ IHWO RE RHIẸ ỌGHWẸKOKO NA

ASAN RA DA REYỌ IHUNVWUN Biko riẹn nẹ e ru ọrhuẹrẹphiyotọ nana fikirẹ OMAESIVWO RẸ OKPAKPA ỌVO.

EBROPHIYAME Ihwo re che bruphiyame che chidia obaro umukpe na jokpanẹ ọrhuẹrẹphiyotọ ọfa herọ. E jẹ ayen chidia tavwen ota rẹ ebrophiyame na ke tonphiyọ vwẹ urhiọke rẹ Saturday. Ayen ghwa ukpacha rhe, je sẹn osẹnvwe abavo ra vwọ họ.

ECHIDIOTỌ Biko roro kẹ ihwo efa. Karophiyọ, wọ sa sẹro rẹ egbara hẹrhẹ ihwo rẹ wọ vẹ ayen gba ro imoto vuọvo yẹrẹ ihwo rẹ wọ vẹ ayen gbe nẹ uwevwin rhe yẹrẹ ihwo rẹ wo yono Baibol na. Biko wo phi orọnvwọn vuọvo phiyọ egbara na-a, jokpanẹ wọ guọnọ sẹro rọyen kẹ ohwo.

EREVWẸROTE Iniọvo re vwẹrote echidiotọ na cha chọn wẹ uko. Biko nabọ nene odjekẹ rayen kpahen asan ra rhuẹrẹ vwọ kẹ imoto, asan ro fori nẹ a wan, ra vwọ sẹro rẹ egbara vwọ hẹrhẹ ihwo efa, kugbe eta efa.

ERỌNVWỌN RI GHWRURU RA RHOMA MRẸ Kemu kemu ra mrẹre, e jẹ e vwo kpo Akon Iruo rẹ Erọnvwọn ri Ghwruru ra Rhoma Mrẹ. Orọnvwọn wẹn de ghwru, gbe kpo etiyin. A je reyọ ọmọ ro bo ghwru kpo etiyin. Ẹkẹvuọvo, a reyọ phiyọ asan ra da vwẹrote emọboba-a. Biko vwẹrote emọ wẹn, jẹ ayen chidia kẹrẹ owẹ.

IRUO RẸ OMAẸVWỌKPAHOTỌ Wo de vwo owenvwe wọ vwọ wiowian vwẹ ọghwẹkoko nana, biko kpo akon iruo nana.

ITETORO A ghwọrọ igho buebun vwo ru asan re chidia na, vẹ ekuakua rẹ agboro, kugbe ewian efa re nẹrhẹ avwanre riavwerhen rẹ ọghwẹkoko nana, rere avwanre se vwo sikẹrẹ Jihova. Itetoro wẹn ro nẹ otọ ubiudu rhe cha nẹrhẹ a sa vwẹrote enana, vẹ owian rẹ akpọeje. Ọ vwọ phẹre kẹ wẹ, e mu ekpeti rẹ itetoro phiyọ asan sansan vwevunrẹ ọguan na. Itetoro rẹ ovwan da avwanre ẹro mamọ. Ẹko Rọvwẹrote na nabọ kpẹvwẹ ovwan vwọ kẹ itetoro rẹ ovwan ruẹ ghwologhwolo fikirẹ ẹyan obaro rẹ iruo Uvie na.