Ọgbofovwin na Kugbe Ọmọtẹ Na

O vwo ọmọtẹ rẹ Izrẹl ọvo re mu nẹ uwevwin rọyen kpo ẹkuotọ rẹ Siria. Isodje rẹ Siria yen muro jẹ orua rọyen vwo, ọ da rhe dia odibo vwọ kẹ aye rẹ onotu rẹ isodje re se Neman. Ọmọtẹ na ga Jihova dede nẹ ihwo re riarierẹ phiyọ ga Jihova-a.

Neman vwo okpọga ọvo, oma rọyen miavwọn ọkeneje. Ọmọtẹ na guọnọ vwẹ ukẹcha kẹ. Ọ da vuẹ aye rẹ Neman: ‘Mi vughe ohwo ro se sivwin ọshare wẹn. O vwo ọmraro rẹ Jihova ọvo vwẹ Izrẹl re se Ilaesha. O se sivwin ọshare wẹn.’

Aye na da vuẹ ọshare rọyen oborẹ ọmọtẹ na tare. Neman muegbe ro vwo ru kemu kemu, ọtiọyena o de kpo uwevwin rẹ Ilaesha vwẹ Izrẹl. Neman rhẹro rọyen nẹ Ilaesha che dede kerẹ okpohwo rode. Ẹkẹvuọvo, ukperẹ Ilaesha vwo bro rhe komobọ, o de ji odibo rọyen nẹ ọ vwẹ ovuẹ nana vwo rhe Neman: ‘Ra họ vwẹ Urhie rẹ Jọdan abọ ighwrẹn. Oma wẹn ko che kpo.’

Ivun miovwo Neman mamọ. Ọ da ta: ‘Mi roro nẹ ọmraro nana che kperi se Ọghẹnẹ rọyen o mi djuẹ obọ rọyen rhe djuo kpo. Ukperẹ ọtiọyen kọ vuẹ vwẹ nẹ me ra họ vwẹ urhie rẹ Izrẹl. Avwanre vwo emamọ irhie vwẹ Siria. Diesorọ mi rhe kpo oboyin ra họ-ọ?’ Ivun de miovwo Neman, o de vrẹn nẹ uwevwin rẹ Ilaesha.

Idibo rẹ Neman da ta ota kẹ. Ayen da vuẹ: ‘Wo che ru kemu kemu rọ sa nẹrhẹ oma wẹn kpo? Oborẹ ọmraro na tare nẹ wo ru na bẹnre-e. Ghwe ruo!’ Neman da kerhọ rẹ idibo rọyen na. O de kpo Urhie rẹ Jọdan na ra họ abọ ighwrẹn. O vwo vrẹn nẹ ame na ọ rẹ abọ righwrẹn, oma rọyen de kpo kare kare. Oma vwerhenrọ mamọ, o de rhivwin ra kpẹvwẹ Ilaesha. Neman da ta: ‘Me rhe riẹn re nẹ Jihova yen Ọghẹnẹ rẹ uyota na.’ Mavọ wo rorori nẹ ubiudu rẹ ọmọtẹ rẹ Izrẹl na cha dia ọke rọ da mrẹ nẹ oma rẹ Neman kpo re?