Iyesi vẹ Ekpẹrẹ rẹ Erhanre

Ọkeneje yen Bẹnhadad, ovie rẹ Siria vwọ kpare ofovwin cha Izrẹl. Ẹkẹvuọvo, ọmraro Ilaesha vwẹ orhọ-esio vwọ kẹ ovie rẹ Izrẹl ọkieje, ọtiọyena kọ sa vrabọ. Fikirẹ ọnana Bẹnhadad de brorhiẹn ro vwo mu Ilaesha. Ọ vwọ riẹn nẹ Ilaesha hẹ orere rẹ Dotan, o de ji isodje rọyen nẹ ayen re muo.

Ayen da rhe orere rẹ Dotan vwẹ ason. Ọke vwo rhie, odibo rẹ Ilaesha vwọ ro otafe ọ da mrẹ nẹ isodje gbogba riariẹ orere na ejobi. Oshọ de muo, o de kperi: ‘Ilaesha, die yen e che ru?’ Ilaesha da vuẹ: ‘Ihwo re vẹ avwanre gba herọ bun nọ ayen.’ Ugege yena, Jihova de rhiẹro rẹ odibo na, ọ da mrẹ nẹ igbenu re riariẹ orere na phiyọ vọnre vẹ iyesi kugbe ekpẹrẹ rẹ ofovwin rẹ erhanre.

Ọke rẹ isodje rẹ Siria na vwọ guọnọ mu Ilaesha, Ilaesha da nẹrhovwo: ‘Jihova, biko rhuẹro rẹ ihwo nana.’ Siẹvuọvo na, isodje na rha riẹn asan rẹ ayen hepha-a dede nẹ ayen je mrorẹ. Ilaesha da vuẹ ayen: ‘Orere ọfa yen ovwan hepha na. Ovwan nene uvwe, me cha reyọ ovwan bru ohwo rẹ ovwan guọnọ na.’ Ayen de nene Ilaesha kpo Sameria, asan rẹ ovie rẹ Izrẹl hepha.

Ayen te oboyin tavwen ayen ke riẹn asan rẹ ayen hepha. Ovie rẹ Izrẹl da nọ Ilaesha: ‘Mi hwe ayen?’ Ilaesha vwẹ uphẹn nana vwọ tanẹ e hwe isodje nana re guọnọ muo na? Ẹjo. Ilaesha da ta: ‘Wo hwe aye-en. Vwẹ emu kẹ ayen, rere ayen kpo.’ Ovie na da chere emu buebun kẹ ayen, o de siobọnu ayen kpo.