Etiekọ Erha Rẹsosuọ

Ihwo rẹ Izrẹl na wiowian ọgangan kerẹ eviẹn. Jihova da vwẹ ovuẹ nana rhe Fero womarẹ Mosis vẹ Erọn: ‘Siobọnu ihwo mẹ rere ayen ra ga vwẹ vwevunrẹ aton.’ Fikirẹ omaephuo, Fero da kpahen: ‘Me vughe Jihova-a, mi ji che se siobọnu ihwo rẹ Izrẹl na-a.’ Fero da rhoma ru oja rayen na ganphiyọ. Jihova che gboja kẹ Fero. Wọ riẹn obo ro che ruo wan? Ọ reyọ Etiekọ Ihwe vwọ ghwiẹ Ijipt. Jihova da vuẹ Mosis: ‘Fero rhọnvwe kerhọ kẹ vwẹ-ẹ. O che kpo Urhie rẹ Nile vwẹ urhiọke. Brora wọ vuẹ nẹ Urhie rẹ Nile na che hirhephiyọ ọbara kidie ọ rhọnvwe siobọnu ihwo mẹ-ẹ.’ Mosis ru oborẹ Jihova tare, o de bru Fero ra. Vwẹ irharo rẹ Fero, Erọn da vwẹ ọkpọ rọyen vwọ teyen urhie na, ame na de hirhephiyọ ọbara. Urhie na ko gbon, iyerin na de ghwu, a rha sa da ame rẹ urhie na-a. Dedena, Fero rhọnvwe siobọnu ihwo rẹ Izrẹl na-a.

Ẹdẹ ighwrẹn vwọ wan nu, Jihova da rhoma vuẹ Mosis nẹ ọ vwẹ ovuẹ nana rhe Fero: ‘Wo rhe siobọnu ihwo mẹ-ẹ, igoro cha vọn Ijipt.’ Erọn da kpare ọkpọ rọyen kpenu, igoro da vọn orere na. E da ro iwevwin rayen, ehwa rayen, kugbe imize rayen. Igoro na da vọn asan eje! Fero da vuẹ Mosis nẹ ọ rẹ Jihova rere o si ọtiekọ nana no. O de ve nẹ o che siobọnu ihwo rẹ Izrẹl na. Jihova da dobọ rẹ ọtieko na ji, ihwo rẹ Ijipt na da ghwẹ igoro na koko ẹkuẹko. Asan eje ki gbon. Dedena, Fero je rhọnvwe nẹ ihwo rẹ Izrẹl na kpo-o.

Jihova da vuẹ Mosis: ‘Vuẹ Erọn nẹ ọ vwẹ ọkpọ rọyen vwọ teyen otọ na rere ighworighwo rẹ ekpẹn na hirhephiyọ ishushu, yẹrẹ etọre.’ Ugege yena, ishushu na da rhe vọn asan eje. Idibo rẹ Fero evo dede da vuẹ nẹ, ‘Obọ rẹ Ọghẹnẹ yen etiekọ nana nẹ cha na.’ Dedena, Fero je rhọnvwe siobọnu ihwo rẹ Izrẹl nẹ ayen kpo-o.