Aghwa rọ La Erhanre

Mosis dia orere rẹ Midian ẹgbukpe 40. Ọ rọvwọnre, o de ji vwiẹ emọ. Ẹdẹ ọvo, ọ vwọ vwẹrote igegede rọyen vwẹ asan rọ kẹrẹ Ugbenu rẹ Sinai, ọ da mrẹ orọnvwọn ọvo ro gberunu. Aghwa na la erhanre, jẹ ẹbe rọyen tua-an! Mosis vwo sikẹrẹ rere ọ mrẹ obo re phia, o de nyo upho ọvo ro nẹ aghwa na rhe rọ tare nẹ, ‘Mosis! Wo siẹkẹrẹ etinẹ-ẹ. Ku isabato wẹn nu kidie otọ ọfuanfon wo mudia na.’ Jihova yen ta ota na womarẹ amakashe.

Oshọ de mu Mosis, o de rhurhu opharo rọyen. Upho na da rhoma ta: ‘Me mrẹ ojaẹriọ rẹ ihwo rẹ Izrẹl na. Mi che sivwin ayen nẹ abọ rẹ ihwo rẹ Ijipt na rere me vwẹ ayen rhe otọ oyoyovwin. Wẹ yen che sun ihwo mẹ na vwo nẹ Ijipt.’ Wo rorori nẹ ota nana che gbe Mosis unu?

Mosis da nọ: ‘Die me cha vuẹ ihwo na siẹrẹ ayen da nọ vwẹ nẹ ono yen juvwe rhe?’ Ọghẹnẹ da kpahen kẹ: ‘Vuẹ ayen nẹ Jihova, Ọghẹnẹ rẹ Ebraham, Ọghẹnẹ rẹ Aizik, kugbe Ọghẹnẹ rẹ Jekọp yen ji uwe rhe.’ Mosis da rhoma ta: ‘Kẹ ihwo na rha kerhọ kẹ vwẹ-ẹ vwo?’ Jihova da kẹ Mosis imuẹro nẹ ọyen cha chọn uko. Ọ vuẹ Mosis nẹ o do ọkpọ rọhẹ obọ rọyen na phiyotọ. Ọkpọ na de hirhephiyọ ọrọdekọ! Mosis vwọ yọnrọn urhurhu rẹ ọrọdekọ na, ọ da rhoma hirhephiyọ ọkpọ. Jihova da vuẹ: ‘Wo de ru igbevwunu nana, ayen cha riẹn nẹ mẹvwẹ yen ji uwe rhe.’

Mosis da ta: ‘Me riẹn ota ta-a.’ Jihova de ve kẹ nẹ, ‘Me cha vuẹ wẹ obo wọ cha ta, mi ji che ji oniọvo wẹn, Erọn, nene uwe rere ọ chọn wẹ uko.’ Mosis de mu aye rọyen vẹ emọ rọyen, ayen de rhivwin kpo Ijipt kidie ọ riẹnre nẹ Jihova vẹ ọyen herọ.