Etiekọ Esan re Vwọ Kpahọn

Mosis vẹ Erọn da vwẹ ovuẹ rẹ Ọghẹnẹ vwọ kẹ Fero: ‘Wo rhe siobọnu ihwo mẹ-ẹ, mi che ji iyẹn buebun vwọ ro orere na.’ Iyẹn ke rhe vọn iwevwin rẹ ihwo rẹ Ijipt eje, te edafe te ivwiogbere. Ẹkuotọ na eje da rhe vọn vẹ iyẹn. Ẹkẹvuọvo, iyẹn vuọvo hẹ orere rẹ Goshẹn rẹ ihwo rẹ Izrẹl dia na-a. Ihwo rẹ Ijipt ọvo yen rhiẹromrẹ ọtiekọ rẹne na, vẹ e re vwọ kpahọn. Fero da rẹ: ‘Biko vuẹ Jihova nẹ o si iyẹn na nẹ otọ na. Ovwan sa yanran.’ Ẹkẹvuọvo, Jihova vwo si iyẹn na nẹ otọ na nu, Fero da wene ẹwẹn rọyen. Fero ji ru uyovwin gangan!

Jihova da ta: ‘Fero rhe siobọnu ihwo mẹ-ẹ, eranvwe rẹ ihwo rẹ Ijipt na cha muọga, ji ghwu.’ Ọke vwo rhie, eranvwe rayen ki ghini ghwu. Jẹ eranvwe rẹ ihwo rẹ Izrẹl na ghwuru-u. Dedena, Fero ji nyẹme-e, o ji siobọnu ihwo na-a.

Ọke vwọ yanran na, Jihova da vuẹ Mosis nẹ o bru Fero ra rere ọ ghwẹ iwurhie kpenu. O dju de mu iwurhie na, iwurhie na de tue ku ihwo rẹ Ijipti na. Ọ da nẹrhẹ era vọn oma rẹ ihwo rẹ Ijipt na vẹ eranvwe rayen, era na ke miavwan ayen mamọ. Dedena, Fero je rhọnvwe siobọnu ihwo rẹ Izrẹl na-a.

Jihova da rhoma vwẹ ovuẹ kẹ Mosis vwo rhe Fero: ‘Wọ je guọnọ siobọnu ihwo mẹ? Odẹ ọchana, okposio rode cha rhọ vwẹ otọ na.’ Urhiọke vwo ghini te, Jihova de siobọnu osio rode vẹ imicho, agbraran, kugbe erhanre. Orere rẹ Ijipt ji rhiẹromrẹ oka rọyen dẹvo-o. Ekankọn vẹ irhe rayen de ghwu, jẹ o te orere rẹ ihwo rẹ Izrẹl na-a. Fero da ta: ‘Biko vuẹ Jihova nẹ o dobọ rẹ osio na ji! Ki mi che siobọnu ovwan.’ Jẹ, Jihova vwọ dobọ rẹ osio vẹ imicho na ji nu, Fero da rhoma wene ẹwẹn rọyen.

Ọtiọyena, Mosis da ta: ‘Asaọkiephana, ebaka ke cha re ekankọn rẹ osio rode na ghwọrọ chekọ.’ Ebaka buebun da re ekankọn eje rehẹ otọ na vẹ irhe na. Fero da rhoma ta: ‘Biko vuẹ Jihova nẹ o si ebaka na no.’ Jihova je vwọ dobọ rẹ ebaka na ji nu, Fero de ji ru uyovwin gangan.

Jihova da vuẹ Mosis: ‘Kpare obọ wẹn kpenu.’ Ugege yena, enu na eje de mu ebri. Vwẹ ẹdẹ erha soso, ihwo rẹ Ijipt mrẹ ohwo vuọvo-o yẹrẹ emu vuọvo-o. Ihwo rẹ Izrẹl na ọvo yen mrorẹ vwẹ iwevwin rayen.

Fero da rha ta kẹ Mosis: ‘Wẹ vẹ ihwo wẹn sa yanran. Ẹkẹvuọvo, ovwan yanjẹ eranvwe rẹ ovwan vwo.’ Mosis da ta: ‘Avwanre che mu eranvwe na nene oma rere avwanre sa vwọ reyọ ayen vwo ze izobo kẹ Ọghẹnẹ avwanre.’ Ophu de mu Fero mamọ. Ọ da van: ‘Vrẹn nẹ obaro mẹ! Me da rhoma mrẹ wẹ, mi che hwe we.’