Ọdavwini rẹ Esegbuyota

Ebraham yono ọmọ rọyen, Aizik ro vwo vwo ẹguọnọ rẹ Jihova, je vwẹroso ive rọyen eje. Jẹ, ọke rẹ Aizik vwọ hẹ omarẹ ẹgbukpe 25, Jihova da vuẹ Ebraham nẹ o ru orọnvwọn ọvo rọ bẹnre mamọ. Ọyen die?

Ọghẹnẹ da vuẹ Ebraham: ‘Biko, reyọ ọmọ wẹn vuọvo na vwo ze izobo vwẹ ugbenu ọvo rọhẹ Moriah.’ Ebraham riẹn oboresorọ Jihova vwọ vuẹ ota nana-a. Dedena o nyupho rẹ Jihova.

Ọke vwo rhie, Ebraham, Aizik, vẹ idibo rọyen ivẹ da rhiọ nẹ uwevwin kpo Moriah. Ẹdẹ erha vwọ wan nu, ayen da rhe kpaẹro mrẹ ugbenu na. Ebraham da vuẹ idibo rọyen nẹ ayen hẹrhẹ rere ọ vẹ Aizik yanran re ze izobo na. Ebraham mu irhe na vwọ kẹ Aizik, ọ da rha yọnrọn aphia. Aizik da nọ ọsẹ rọyen: ‘Eranvwe re che vwo ze izobo na rhọ?’ Ebraham da kpahen kẹ: ‘Ọmọ mẹ, Jihova cha vwọ kẹ avwanre.’

Ayen vwo te ugbenu na, ayen da so agbada. Ebraham da gba abọ vẹ awọ rẹ Aizik, o de muo phiyọ enu rẹ agbada na.

Ebraham da yọnrọn aphia na. Ọke yena, amakashe rẹ Jihova de kperi nẹ odjuvwu rhe: ‘Ebraham! Wo djobọte ọmọ na-a! Me rhe riẹnre nẹ wọ nabọ vwo esegbuyota kpahen Ọghẹnẹ kidie wo muegbe wọ vwọ vwẹ ọmọ wẹn vwo ze izobo.’ Ebraham da mrẹ egbo ọvo vwẹ aghwa na. Ọ da rhan abọ vẹ awọ rẹ Aizik kpakpata, ọ da vwẹ egbo na vwo ze izobo na.

Nẹ ẹdẹ yena yanran, Jihova de se Ebraham ugbeyan rọyen. Wọ riẹn oboresorọ? Kidie Ebraham ru kemu kemu rẹ Jihova vuẹrẹ nẹ o ru, ọ da tobọ dianẹ ọ riẹn oboresorọ Jihova vwọ vuẹ nẹ o ruo-o.

Jihova da rhoma vwanriẹn ive ọyen kẹ Ebraham: ‘Mi che bruba kẹ wẹ, emọ wẹn ki che bunphiyọ.’ Jihova ji ve nẹ o che bruba kẹ ihwo esiri womarẹ orua rẹ Ebraham.