Karophiyọ Aye rẹ Lọt

Lọt vẹ oniọvo ọsẹ rọyen Ebraham yen dia otọ rẹ Kenan. Ọke vwọ yanran na, Ebraham vẹ Lọt de rhi vwo uchuru buebun, asan rha herọ ayen da re odi-i. Ebraham da vuẹ Lọt: ‘Avwanre rha cha sa dia asan ọvo-o. Biko jẹ ẹbẹre ro je we, rere mi kpọ ẹbẹre ochekọ.’ Ọnana omamọ uruemu Ebraham djephia na, ọ dia ọtiọyen?

Lọt da mrẹ otọ oyoyovwin ọvo rọ kẹrẹ orere rẹ Sodọm. Ame nabọ hẹ asan na, odi je vọn. Ọ da jẹ ẹbẹre yena, ọ vẹ orua rọyen da kua kpo oboyin.

Ihwo rẹ Sodọm vẹ orere rọ kẹrẹ re se Gomora, pha brabra mamọ. Ayen bra te ẹdia rẹ Jihova da tanẹ ọyen cha ghwọrọ irere na. Ẹkẹvuọvo, Ọghẹnẹ guọnọ sivwin Lọt vẹ orua rọyen, ọtiọyena o de ji emekashe ivẹ bru ayen ra, ayen da vuẹ Lọt: ‘Jọphẹre! Ovwan vrẹn nẹ orere na! Jihova cha ghwọrọ.’

Lọt vrẹn no ugege yena-a. Ko gbeghẹrẹ. Emekashe na da yọnrọn abọ rẹ Lọt vẹ aye rọyen kugbe e rẹ emetẹ rọyen ivẹ, ayen de kpono ayen nẹ orere na, emekashe na da je ta: ‘Ovwan djẹ! Djẹ kẹ arhọ ovwan, ovwan nẹ obuko-o. Ovwan de nẹ obuko, ovwan che ghwu!’

Ayen vwo te orere re se Zoar, Jihova da rhọ osio rẹ erhanre vẹ ibieragha ku Sodọm vẹ Gomora. Irere ivẹ nana da ghwọrọ totọ. Ọke rẹ aye rẹ Lọt vwọ churhi rẹ Jihova, ro vwo ni obuko, o de hirhephiyọ ẹrhẹnre rẹ ughweraka! Ẹkẹvuọvo, Lọt vẹ emetẹ rọyen sivwinrhọ kidie ayen nyupho rẹ Jihova. Ọ cha da ayen mamọ nẹ aye rẹ Lọt nyupho rẹ Jihova-a. Jẹ, oma vwerhen ayen nẹ ayen nene odjekẹ rẹ Jihova.