UYONO 8
Ebraham vẹ Sera Nyupho rẹ Ọghẹnẹ
Orere rẹ Ur kẹrẹ Babel, ihwo rẹ Ur ga eghẹnẹ buebun, ayen ga Jihova-a. Ẹkẹvuọvo, o vwo ọshare ọvo vwẹ Ur rọ ga Jihova. Odẹ rọyen Ebraham.
Jihova da vuẹ Ebraham: ‘Vrẹn nẹ uwevwin wẹn, yanjẹ ihwo wẹn vwo, wo kpo ẹkuotọ mi che dje kẹ wẹ.’ Ọghẹnẹ de ve kẹ nẹ, ‘Wọ cha dia ẹgborho rode, mi che bruba kẹ ihwo buebun vwẹ akpọ na fiki wẹ.’
Ebraham riẹn asan rẹ Jihova vuẹrẹ nẹ ọ ra na-a, ẹkẹvuọvo, ọ vwẹroso Jihova. Ọtiọyena, Ebraham, aye rọyen Sera, ọsẹ rọyen Terah, vẹ ọmọ-oniọvo rọyen Lọt da kua ekuakua rayen, ayen de mu oyan ogrongron na phiyọ.
Ebraham hẹ ẹgbukpe 75 ọke rẹ ayen vwo te ẹkuotọ rẹ Jihova guọnọre nẹ ayen mrẹ na. E sere nẹ otọ rẹ Kenan. Ọghẹnẹ da ta ota kẹ vwẹ etiyin, o de ve ive nana kẹ: ‘Me cha vwẹ otọ nana eje wọ mrẹ na vwọ kẹ emọ wẹn.’ Ẹkẹvuọvo, Ebraham vẹ Sera ghwore, jẹ ayen ji vwiẹ-ẹ. Mavọ yen Jihova se vwo ru obo ro veri na?
“Vwẹ esegbuyota Ebraham vwo mu ọghọ vwẹ ọke re vwo se kpo asan rọ ra reyọ vwọ reuku na; ọ da yanran, yọ riẹn obo ro vwo gbe-e.”—Hibru 11:8