Ukoko ro Ruẹ Ọhọre ri Jihova

IKOKO sansan vọn evunrẹ akpọ na nonẹna, kerẹ ikoko rẹ ẹga, e rẹ usuon, e rẹ ekiẹchuọ, vẹ i ri ru erọnvwọn ra vwọ diotọ; ayen eje vwo edavwẹ kugbe iroro re fẹnẹ ohwohwo. Ẹkẹvuọvo, o vwo ukoko ọvo rọ fẹnẹ i ri chekọ na eje. Ota rẹ Ọghẹnẹ djerephia phephẹn nẹ ukoko yena yen Ukoko rẹ Iseri ri Jihova.

² Oma vwerhen avwanre nẹ wọ hẹ evunrẹ ukoko ri Jihova re. Wọ nabọ riẹn ọhọre rẹ Ọghẹnẹ re, wo ji ruo asaọkiephana. (Une 143:10; Rom 12:2) Wẹwẹ oghwoghwota ro nene iniọvo rehẹ akpọneje ga kuẹgbe. (2 Kọr. 6:4; 1 Pita 2:17; 5:9) Kirobo rẹ Baibol na veri, ọnana cha ghwa omavwerhovwẹn vẹ ebruphiyọ buebun vwo rhe we. (Isẹ 10:22; Mak 10:30) Wọ da nabọ ru ọhọre ri Jihova nonẹna, jẹ wo muegbe hẹrhẹ uvi rẹ akpeyeren vwẹ obaro na.—1 Tim. 6:18, 19; 1 Jọn 2:17.

³ Ọmemama rẹ avwanre na vwo ukoko oghẹresan ọvo ro ruẹ nene odjekẹ rọyen. Ọnana mudiaphiyọ nẹ Jihova, rọ dia Osun rẹ avwanre eje na, yen suẹn ukoko na. Avwanre vwẹrosuọ kare kare. Ọyehẹ Oguẹdjọ, Ojurhi, vẹ Ovie rẹ avwanre. (Aiz. 33:22) Ọ vwọ dianẹ ọyen Ọghẹnẹ rẹ ọrhuẹrẹphiyotọ na, o ru ọrhuẹrẹphiyotọ rere avwanre “vẹ ọye vwo ru iruo” kugbe vwẹ orugba rẹ ọhọre rọyen.—2 Kọr. 6:1, 2.

⁴ Oba rẹ eyeren nana vwo siẹkẹrẹ na, avwanre yan phiaro vwẹ otọ rẹ usuon rẹ Ovie re vwo mu na, Jesu Kristi. (Aiz. 55:4; Ẹvwọ. 6:2; 11:15) Jesu komobọ yen tare nẹ idibo rọyen che ruiruo rọ rho nọ ọrọyen ọke rọ vwọ hẹ otọrakpọ na. (Jọn 14:12) Ọyena uyota kidie uchunu rẹ idibo na bunphiyọ, ọke vẹ asan rẹ ayen de ghwoghwo ji bun vrẹ ọ ri Jesu. Ayen che ghwoghwo iyẹnrẹn esiri rẹ Uvie na ro akpọneje.—Mat. 24:14; 28:19, 20; Iruo 1:8.

⁵ Ọnana ghini rugba dẹn. Ẹkẹvuọvo, kirobo rẹ Jesu tare, aghwoghwo rẹ iyẹnrẹn esiri na che vwoba vwẹ ọke rẹ Jihova bruphiyotọ. Aroẹmrẹ ejobi rehẹ Baibol na djerephia nẹ ẹdẹ rode ri Jihova na ro ji muoshọ na sikẹrẹ mamọ re.—Joẹl 2:31; Zẹf. 1:14-18; 2:2, 3; 1 Pita 4:7.

⁶ Avwanre vwo vwo ẹruọ rẹ ọhọre ri Jihova phiyọ vwẹ ọke rẹ oba na, ko fori nẹ a kpuriẹnphiyọ ẹgbaẹdavwọn re vwo ru oborẹ Ọghẹnẹ guọnọre. E ki se ru ọnana, ofori nẹ a nabọ riẹn oborẹ ukoko rẹ Ọghẹnẹ yan wan, a me yan nene odjekẹ rọyen vọnvọn. E mu ọrhuẹrẹphiyotọ rẹ ukoko na kpahen odjekẹ ri Baibol na, ji te irhi, iji, uchebro, kugbe iyono rehẹ Baibol na.—Une 19:7-9.

⁷ Ihwo ri Jihova de nene odjekẹ ri Baibol na, kẹ ayen sa dia kugbe je wiankugbe vwọrẹ ufuoma vẹ oyerinkugbe. (Une 133:1; Aiz. 60:17; Rom 14:19) Die yen kpuriẹnphiyọ oyerinkugbe rẹ iniọvo avwanre vwẹ asan eje? Ẹguọnọ. Avwanre vwẹ ẹguọnọ vwo rhuon, kọyen ji mu avwanre vwo ruiruo. (Jọn 13:34, 35; Kọl. 3:14) Idjerhe nana yen avwanre vwọ yan nene ukoko ri Jihova rọhẹ odjuvwu.

UKOKO RI JIHOVA—ẸBẸRE RỌHẸ ODJUVWU

⁸ Ọmraro Aizaya, Izikiẹl, vẹ Daniẹl mrẹ emramrẹ rẹ ukoko ri Jihova rọhẹ odjuvwu. (Aiz., uyovwin 6; Izi., uyovwin 1; Dan. 7:9, 10) Ọyinkọn Jọn je mrẹ emramrẹ rẹ ọrhuẹrẹphiyotọ rẹ ukoko na vwẹ odjuvwu, ọ da vuẹ avwanre erọnvwọn evo kpahọn vwẹ ọbe rẹ Ẹvwọphia. Ọ mrẹ Jihova vwẹ enu rẹ ekete rọyen rọ vọnre vẹ urinrin, ji te emekashe rọyen re ta: “Ẹfuọn, ẹfuọn, ẹfuọn, ọye hẹ Ọrovwohwo Ọghẹnẹ Ọrovwoẹgba, ohwo rọ herọ rhabae rọ je herọ vwẹ asakiephana rọ je cha dia bẹdẹ.” (Ẹvwọ. 4:8) Jọn je mrẹ “vwẹ uvwre rẹ ekete na . . . Omogodẹ ro mudia,” kọyen Omogodẹ rẹ Ọghẹnẹ, rọ dia Jesu Kristi.—Ẹvwọ. 5:6, 13, 14; Jọn 1:29.

⁹ Emramrẹ ra vwọ mrẹ Jihova ro chidia enu rẹ ekete na djerephia nẹ Jihova yen Ọgbuyovwin rẹ ukoko na. Ọke rẹ 1 Ikun Rivie 29:11, 12 vwọ ta ota kpahen ẹdia rode rọ hepha, ọ da ta: “Wẹ, E Ọrovwohwo, vwo ọrho, kugbe ogangan, vẹ urinrin vẹ ephiokparobọ vẹ ẹgba; fikiridie emu rẹ obo odjuvwu vẹ akpọ ejobi ewẹn; ọwẹn ọye uvie na E Ọrovwohwo, wẹ a kpare kpenu vwẹ enu ri kemu kemu ejobi. Te efe te ọghọ obọ wẹn inẹcha, wọwẹ ri suẹn ayen ejobi; Obọ wẹn ẹgba vẹ ogangan epha; obọ wẹn ri ruẹ ohwo rhua ọye je vwẹ ogangan kẹ ihwo ejobi.”

¹⁰ Kerẹ ohwo ro nene Jihova wiankuẹgbe, a vwẹ ẹdia rode vẹ ogangan vwọ kẹ Jesu vwẹ odjuvwu. Vwọrẹ uyota, Ọghẹnẹ “vwẹ emu na ejobi hwa otọ kẹ chiyi o de vwo ru olori rẹ emu ejobi vwọ kẹ [“ukoko,” NW] na.” (Ẹfe. 1:22) Ọyinkọn Pọl da je ta kpahen Jesu: “Kọye Ọghẹnẹ vwọ kparọ kpenu gangan o de mu odẹ ro kpenu nọ odẹ kodẹ kẹ, nẹ kohwo kohwo ejobi ki she diguẹ kẹ odẹ ri Jesu, emu re hẹ obo odjuvwu kugbe e re hẹ obotọ rẹ akpọ na, nẹ unu kunu ejobi ke cha rhọvwe nẹ Jesu Kristi hẹ Ọrovwohwo, fiki rẹ urinrin rẹ Ọghẹnẹ Ọsẹ na.” (Fil. 2:9-11) Ọtiọyena, avwanre sa vwẹroso usuon ri Jesu Kristi kare kare.

¹¹ Ọmraro Daniẹl mrẹ emramrẹ rẹ Ohwo rọ Herọ nẹ Awanre Rhe vwẹ ekete rọyen vwẹ odjuvwu kugbe emekashe “uriori uriori re ga, uriori ihwe kugbe uriori ihwe mudia vwẹ obaro rọye.” (Dan. 7:10) Baibol na tare nẹ emekashe nana eyen ihwo rẹ ẹwẹn “ri gbe odibo re ji rhe re ga, fiki rẹ ayen otu ri che vwo esivwo.” (Hib. 1:14) A rhuẹrẹ emekashe nana phiyọ ẹdia sansan, a je kẹ ayen ogangan sansan vwẹ ukoko ri Jihova.—Kọl. 1:16.

¹² E de roro kpahen ẹdia sansan rẹ ukoko ri Jihova rọhẹ odjuvwu na, ke se vwo ẹruọ rẹ oborẹ Aizaya ruru ọke rọ vwọ “mrẹ Ọrovwohwo ro tidia phihọ enu re ekete,” vẹ “emakashe [ri] mudia obaro rọye.” Aizaya da ta: “Ekan kẹ vwẹ! Fikiridie mi ghwruru; fikiridie mẹvwẹ ohwo rẹ ẹbẹrunu rọye jẹ ẹfuọn, Me ke rha dia ohri rẹ ihwo rẹ ẹbẹrunu rayen jẹ ẹfuọn, fikiridie ẹro mẹ mrẹ Ovie na, Ọrovwohwo rẹ otuofovwi na!” Vwọrẹ uyota, oborẹ ukoko ri Jihova rho te gbe Aizaya unu mamọ. O tere ẹwẹn mamọ te ẹdia rẹ ọke rẹ use vwo nẹ odjuvwu rhe kpahen iruo rẹ oghẹresan re vwo ghwoghwo ẹdjọeguo ri Jihova, Aizaya da ghwa ta: “Mẹvwẹ na! Ji vwe.”—Aiz. 6:1-5, 8.

¹³ Nonẹna, ẹwẹn ọtiọyen yen ji rhe ihwo ri Jihova ri vwo ọmrẹvughe rẹ oborẹ ukoko ri Jihova hepha. Ukoko na vwọ yan obaro na, o ji fo nẹ avwanre yan nene kpẹkpẹkpẹ. Avwanre davwẹngba vwọ vwẹroso ukoko ri Jihova nonẹna.

UKOKO RI JIHOVA YAN OBARO GHWRAGHWRAGHWRA

¹⁴ Vwẹ uyovwin 1 rẹ aroẹmrẹ rẹ Izikiẹl, a mrẹ Jihova rọ djẹ akpẹrẹ ọrhuarho vwẹ odjuvwu. Akpẹrẹ nana rọ nyavwaro na mudiaphiyọ ẹbẹre rẹ ukoko ri Jihova re jẹ ẹro erhiemrẹ. A sa tanẹ Jihova yen djẹ akpẹrẹ na kidie ọyen kpọ je reyọ vwo ruẹ ọhọre rọyen.—Une 103:20.

¹⁵ Adjugẹ ọvuọvo rẹ akpẹrẹ na vwo adjugẹ ọfa vwẹ evun rọyen; adjugẹ ivẹ na gbere ohwohwo, ayen je rho vrẹ ohwohwo-o. Idjerhe nana yen a sa vwọ tanẹ adjugẹ “ẹne na . . . yan hirhe aro ku asan ọvo.” (Izi. 1:17) Adjugẹ na sa rhẹrioma siẹvuọvo. Ẹkẹvuọvo, ọ dia ọnana mudiaphiyọ nẹ o muẹ djẹ-ẹ. Jihova vwẹ uphẹn kẹ ukoko na nẹ o kpo kasan kasan ro jere-e. Izikiẹl 1:20 da ta: “Kasan kasan rẹ [“ẹwẹn,” NW] na djeri, etiyin ayen ra.” Kọyen Jihova sun ukoko na kpo kasan kasan rọ guọnọre womarẹ ẹwẹn rọyen. Onọ ro fori nẹ a nọ oma avwanre kẹ ọna, ‘Me yan nene akpẹrẹ na kpẹkpẹkpẹ?’

¹⁶ Ra vwọ yan nene ukoko ri Jihova kpẹkpẹkpẹ vrẹ e di vwo kpo uyono ji vwobọ vwẹ iruo aghwoghwo na. O mudiaphiyọ ra vwọ yan phiaro vwẹ ẹga ri Jihova. Ofori nẹ e “vughe obo ri yovwiri” yẹrẹ obo re ma ghanre, je yan nene kemu kemu rẹ ukoko na vwọphia. (Fil. 1:10; 4:8, 9; Jọn 17:3) O ji fo nẹ a karophiyọ nẹ asan rẹ ukoko hepha, a guọnọ omamọ ọrhuẹrẹphiyotọ vẹ ọwiankugbe. Ọtiọyena, ofori nẹ a mrẹ ọghanrovwẹ ra vwọ reyọ ọke, ẹgba, igho vẹ ona rẹ Jihova vwọ kẹ avwanre vwo ruiruo rọyen vọnvọn. Avwanre vwọ yan nene ukoko ri Jihova kpẹkpẹkpẹ na, ke che yeren akpọ nene oborẹ avwanre ghwoghwo.

¹⁷ Womarẹ ukẹcha rẹ ukoko ri Jihova, avwanre yan obaro vwo ruẹ ọhọre rẹ Ọghẹnẹ. Karophiyọ nẹ Jihova yen djẹ akpẹrẹ na. Ọtiọyena, a da yan nene akpẹrẹ na, kọyen avwanre muọghọ kẹ Jihova je vwẹroso Oragha rẹ avwanre. (Une 18:31) Baibol na de ve: “E jẹn Ọrovwohwo vwẹ ogangan kẹ ihwo rọye! E jẹn Ọrovwohwo vwẹ ufuoma bruphihọ kẹ ihwo rọye.” (Une 29:11) Avwanre mrẹ ẹgba ri Jihova je riavwerhen rẹ ufuoma rọ vwọ kẹ ihwo rọyen kidie avwanre hẹ ukoko rọyen nonẹna. Aphro herọ-ọ, avwanre cha mrẹ ebruphiyọ buebun siẹrẹ e de ru ọhọre ri Jihova nonẹna rhirin bẹdẹ bẹdẹ.