Ileta Ro Nẹ Obọ Rẹ Ẹko Rọvwẹrote Na rhe

Ighwoghwota Eghanghanre

Ọnana okpuphẹn rode re vwo kuomakugbe vwọ ga Ọghẹnẹ rẹ uyota ọvuọvo na, Jihova! Avwanre “iruiruo” rọyen ri ruiruo ọghanghanre ro sivwin arhọ rẹ ihwo, rọ dia aghwoghwo vẹ eyono rẹ iyẹnrẹn esiri rẹ Uvie na. (1 Kọr. 3:9; Mat. 28:19, 20) A guọnọ omamọ ọrhuẹrẹphiyotọ e ki se ruiruo nana vwẹ akpọneje vwọrẹ ufuoma vẹ oyerinkugbe.—1 Kọr. 14:40.

Ọbe nana cha chọn wẹ uko vwọ riẹn oborẹ ukoko rẹ Inenikristi yan wan nonẹna. Ọ ta ota kpahen uphẹn rẹ ẹga vẹ owian wo vwori kerẹ Oseri ri Jihova. Wọ da vwẹ ẹro ọghanghanre vwo ni uphẹn rẹ ẹga wẹn, ji ruiruo ro te we, ‘esegbuyota wẹn kọ cha nabọ ghwaotọ.’—Iruo 16:4, 5; Gal. 6:5.

Ọtiọyena, avwanre jiriro nẹ wọ frẹkotọ yono ọbe nana. Guọnọ idjerhe wọ sa vwọ reyọ obo wo yonori na vwo ruiruo vwẹ akpeyeren wẹn. Kerẹ udje, ọ da dianẹ wọ ghwa dia oghwoghwota obọ, die wo che ru wo se vwo bromaphiyame kerẹ Oseri ri Jihova? Jẹ, wo de rhe bromaphiyame nure, die wo se ru vwọ yan obaro je hẹre iruo rẹ ẹga wẹn kpobarophiyọ? (1 Tim. 4:15) Mavọ wo se vwo toroba ufuoma rọhẹ ukoko na? (2 Kọr. 13:11) Wọ cha mrẹ ẹkpahọnphiyọ rẹ enọ nana vwẹ ọbe nana.

Wọ da dia oniọvo ọshare ro bromaphiyame re, die wo se ru vwo yerin te ẹdia rẹ odibo rẹ owian ji te ọkpako? Ihwo buebun vwo rhurie ro ukoko ri Jihova na, a guọnọ iniọvo eshare ri che mu oghwa rẹ ukoko na. Ọbe nana cha vwẹ ukẹcha kẹ wẹ vwọ dia ohwo rọ “pharhere” rere wo se vwo yerin te ẹdia nana.—1 Tim. 3:1.

Avwanre nẹrhovwo nẹ ọbe nana cha chọn wẹ uko vwọ mrẹ ẹdia wọ kare vwẹ ọrhuẹrẹphiyotọ ri Jihova, wo mi ji no ghanghanre. Avwanre vwo ẹguọnọ rẹ ovwan mamọ, avwanre je nẹrhovwo ọkieje nẹ ovwan cha ga Ọsẹ rẹ avwanre rọhẹ odjuvwu, Jihova vẹ omavwerhovwẹn bẹdẹ bẹdẹ.—Une 37:10, 11; Aiz. 65:21-25.