Obicha rẹ Uvie Na—Ebabọn rẹ Iwevwin rẹ Ẹga Kugbe ra Vwọ Vwẹ Ukẹcha kẹ Ihwo re Emu Phia Kẹ

WỌ VWỌ ro Ọguan Ruvie rẹ ovwan, wo rhe vughe-e. Wọ vwẹ uwevwin nana vwọ yoma ọkieje. Ọ sa tobọ dianẹ wọ je karophiyọ ọke ovwan vwọ bọn ikpe evo re wanre. Ẹkẹvuọvo, omavwerhovwẹn wẹn rhoma ganphiyọ asaọkiephana kidie Ọguan Ruvie na rhi hirhephiyọ asan ra da vwẹ ukẹcha kẹ ihwo re emu phia kẹ. Ogiribo ọvo djuru o krinọ-ọ na, ọ da guọghọ asan buebun vwẹ ekogho wẹn; Umẹ Rọvwẹrote Oghọn Ukoko na de brokpakpa vwo ọrhuẹrẹphiyotọ re vwo mu emuọre, iwun, ame vẹ erọnvwọn efa vwo rhe ihwo rẹ oghwọrọ na te oma. E ji vwo ọrhuẹrẹphiyotọ re vwo ru itetoro vwọ chọn ayen uko. Iniọvo buebun ke yan cha, kẹ ayen reyọ kemu kemu rẹ ayen guọnọre, ọke buebun vẹ oviẹ rẹ aghọghọ.

Jesu tare nẹ ẹguọnọ yen cha dia oka re che vwo vughe ihwo rọyen. (Jọn 13:34, 35) Vwẹ ẹbẹre nana, a cha fuẹrẹn obo ra vwọ mrẹ ẹguọnọ rẹ Iseri ri Jihova djephia womarẹ ebabọn kugbe ukẹcha ra vwọ kẹ ihwo re emu phia kẹ. Ẹguọnọ nana djerephia nẹ avwanre hẹ otọ rẹ usuon rẹ Uvie ri Jesu.