Iruo rẹ Ebabọn ro Brọghọphiyọ Jihova Oma

1, 2. (a) Die yen idibo ri Jihova riavwerhen rọyen vwẹ ọke grongron re? (b) Die yen ma ghanre vwọ kẹ Jihova?

VWẸ ọke grongron re, yen idibo ri Jihova vwọ riavwerhen rẹ ebabọn rẹ asan re de jiri odẹ rọyen. Kerẹ udje, ihwo rẹ Izrẹl nabọ vwobọ vwẹ ebabọn rẹ ọgarivi na, ayen de toro ekuakua buebun ra cha vwọ bọn. —Eyan. 35:30-35; 36:1, 4-7.

² Ọ dia ekuakua ra vwọ bọn iwevwin na yen brọghọphiyọ Jihova oma-a, o ji no nẹ eyen ma ghanre-e. (Mat. 23:16, 17) Obo re ma ghanre vwọ kẹ Jihova, ro ji me brọghọphiyọ oma, ọyen ẹga rẹ idibo rọyen vwọ kẹ, ji te ẹwẹn rẹ omaevwoze vẹ oruru rayen. (Eyan. 35:21; Mak 12:41-44; 1 Tim. 6:17-19) Ota yena uyota. Diesorọ? Kidie iwevwin sa guọghọ. Kerẹ udje, ọgarivi na vẹ uwevwin rẹ ẹga na rha herọ nonẹna-a. Iwevwin nana sa guọghọ, ẹkẹvuọvo ẹwẹn ri ghwologhwolo vẹ owian rẹ idibo rọyen wianre vwo bicha ebabọn na cha sa chọrọ Jihova ẹro-o.—Se 1 Kọrẹnt 15:58; Hibru 6:10.

3. Vwẹ uyovwinrota nana, die yen avwanre cha fuẹrẹn?

³ Idibo ri Jihova nonẹna je wian gangan vwọ bọn asan ra da ga ẹga. Womarẹ odjekẹ rẹ Ovie avwanre, Jesu Kristi, ọ dia ọmọrhiẹ erọnvwọn yen avwanre rure-e! Vwọrẹ uyota, Jihova ghini bruba ẹgbaẹdavwọn rẹ avwanre. (Une 127:1) Vwẹ uyovwinrota nana, avwanre cha fuẹrẹn ewian evo re rure kugbe obo ri brọghọphiyọ Jihova oma. Avwanre ji che nyo mie iniọvo evo ri vwobọ vwẹ iruo nana.

Ebabọn rẹ Eguan Ruvie

4. (a) Diesorọ a vwọ guọnọ asan buebun ra da ga ẹga? (b) Die yen nẹrhẹ e ku eghọn ukoko evo kugbe? (Ni ekpeti na “Ewene re Ru Phiyọ Ebabọn rẹ Eghọn Ukoko.”)

⁴ Kirobo re yonori vwẹ Uyovwinrota 16, Jihova guọnọre nẹ avwanre siomakoko vwọ vwẹ ẹga kẹ. (Hib. 10:25) Emẹvwa rẹ avwanre bọn esegbuyota rẹ avwanre gan, ọ je nẹrhẹ oruru rẹ avwanre vwo kpahen iruo aghwoghwo na ganphiyọ. Ọke rẹ oba na vwo kuẹphiyọ na, jẹ Jihova ruiruo nana kpata phiyọ. Womarẹ ọnana, ihwo buebun ki rhurie ruẹ ukoko ri Jihova kukpe kukpe. (Aiz. 60:22) Ighwoghwota rẹ Uvie na vwo buẹnphiyọ na, ka je guọnọ asan ra da cha teyen ẹbe rẹ ukoko na. Avwanre je guọnọ asan buebun ra da ga ẹga.

5. Diesorọ odẹ na Ọguan Ruvie vwo shephiyọ? (Ji ni ekpeti na “Ishọshi rẹ Elo Kpokpọ Na.”)

⁵ Ọke rẹ Emọ-uyono ri Baibol na vwọ tonphiyọ obọ, ayen da mrẹ ọghanrovwẹ rẹ ayen vwo vwo asan ra da ga ẹga. Ọhọhọre nẹ ọvo usun rẹ asan rẹsosuọ tiọyena, a bọnrọ phiyọ West Virginia, U.S.A., vwẹ 1890. Vwẹ omarẹ ikpe re kpahen 1930, jẹ ihwo ri Jihova bọn je rhuẹrẹ eguan buebun re, ẹkẹvuọvo, jẹ e ji muodẹ vuọvo kẹ asan ra da vwoma na-a. Dedena, vwẹ 1935, Oniọvo Rutherford de kpo Hawaii, ọke yena a bọn ọguan ọvo vẹ oghọn ukoko kpokpọ. Ọke ra vwọ nọ Oniọvo Rutherford kpahen obo re che se ọguan na wan, ọ da ta: “Ovwan rorori nẹ ofori nẹ e se ‘Ọguan Ruvie,’ ọ vwọ dianẹ iruo rẹ aghwoghwo rẹ Uvie na yen avwanre ruẹ na?” (Mat. 24:14) Odẹ yena kọyen e vwo se ọguan yena, ji te asan buebun rẹ ikoko rẹ ihwo ri Jihova da vwoma vwẹ akpọneje.

6, 7. Erhuvwu vọ yen Eguan Ruvie ra fobọ bọn na ghwa cha?

⁶ Vwẹ ikpe re kpahen 1970, e de noso nẹ a guọnọ Eguan Ruvie mamọ. Ọtiọyena, iniọvo rẹ United States da tẹn ona rẹ ebabọn rọ pha yoyovwin rọ je reyọ ẹmẹdẹ evo. Vwẹ omarẹ 1983, Eguan Ruvie ri te 200 yen a bọnre vwẹ United States vẹ Canada. E se vwo ruiruo nana, iniọvo na da vwẹ umẹ rọvwẹrote iruo ebabọn vwo mu. Ona nana wianre mamọ te ẹdia rẹ vwẹ ukpe rẹ 1986, Ẹko Rọvwẹrote na da vwẹ ọrhuẹrẹphiyotọ na vwọ muotọ, vwẹ omarẹ ukpe rẹ 1987, Umẹ Revwẹrote Iruo Ebabọn (RBCs) vwẹ United States te 60.a Vwẹ omarẹ 1992, jẹ a je vwẹ RBCs vwo mu vwẹ Argentina, Australia, France, Germany, Japan, Mexico, South Africa, kugbe Spain re. Vwọrẹ imuẹro, ofori nẹ e bicha iniọvo re wian gangan vwọ bọn Eguan Ruvie vẹ Eguan Romẹvwa kidie owian rayen jẹ ẹbẹre ọvo rẹ ẹga ri Jihova.

⁷ Eguan Ruvie nana ra fobọ bọn na ghini oseri rode vwẹ asan ra bọn ayen phiyọ na. Kerẹ udje, ọbe rọ ghwa iyẹnrẹn vwẹ Spain vwo uyovwinrota na, “Esegbuyota Nẹrhẹ Igbenu Ghwie.” Ọke rẹ ọbe na vwọ ta ota kpahen ebabọn rẹ Ọguan Ruvie tiọyena vwẹ orere ri Martos, ọ da nọ: “Vwevunrẹ akpọ nana rọ vọnre vẹ ojevwe romobọ na, mavọ yen ihwo re vwomakpahotọ ri ne ekogho sansan rhe [vwẹ Spain] se vwo kpo Martos ra bọn uwevwin oyoyovwin rọ ma phẹre ẹbọn kparobọ, ra je nabọ ru vwo nene ọrhuẹrẹphiyotọ?” Ọbe vuọvo nana da je kpahenphiyọ rọ vwọ ta ota rẹ oniọvo ọvo ro vwobọ vwẹ ebabọn na tare: “E se ru ọnana kidie avwanre ihwo rẹ Jihova yonori.”

Ebabọn Vwẹ Ẹkuotọ ri Ghwe Vwo Igho-o

8. Vwẹ 1999, ọrhuẹrẹphiyotọ kpokpọ vọ yen Ẹko Rọvwẹrote na ghwobọphiyọ, kẹ diesorọ?

⁸ Ẹgbukpe ujorin 20 vwo kuẹphiyọ na, ihwo ki rhurie ro ukoko ri Jihova vwevunrẹ ẹkuotọ sansan rẹ iniọvo na de jẹ igho evwo. Iniọvo rehẹ ẹkuotọ na davwẹngba vwọ bọn asan rẹ ayen da vwoma. Ẹkẹvuọvo, vwẹ ẹkuotọ evo, a reyọ ayen vwọ jehwẹ ji muẹkpahen ayen kidie Eguan Ruvie rayen fẹro-o, a da vwọ vwanvwen asan rẹ ẹga efa da vwoma. Ẹkẹvuọvo, vwo nẹ 1999, Ẹko Rọvwẹrote na da ghwobọphiyọ ọrhuẹrẹphiyotọ ra vwọ bọn Eguan Ruvie vwẹ ẹkuotọ tiọyen ri ghwe vwo igho na-a. Igho rẹ iniọvo rehẹ ẹkuotọ ri vwo igho torori, ke yen e vwo ruiruo nana rere ayen eje sa vwọ dia “ẹrhẹnrhẹnre.” (Se 2 Kọrẹnt 8:13-15.) Iniọvo ri nẹ ẹkuotọ efa rhe nabọ vwomakpahotọ vwọ kẹ iruo nana.

9. Iruo vọ yen e rorori nẹ e che se ru jovwo-o, ẹkẹvuọvo die kọyen nẹ obuko rọyen rhe?

⁹ Vwẹ ọke rẹsosuọ, ọhọhọre nẹ e che se ruiruo nana-a. Iyẹnrẹn ọvo ra vwọphia vwẹ 2001, Eguan Ruvie re vrẹ 18,300 yen a guọnọre vwẹ ẹkuotọ 88. Womarẹ ukẹcha rẹ ẹwẹn ọfuanfon rẹ Ọghẹnẹ vẹ Ovie avwanre, Jesu Kristi, o vwo iruo vuọvo rọ bẹnre-e. (Mat. 19:26) Vwẹ uvwre rẹ ẹgbukpe 15, kọyen vwo nẹ 1999 fiẹ 2013, ihwo rẹ Ọghẹnẹ bọn Eguan Ruvie 26,849 vwevunrẹ ọrhuẹrẹphiyotọ nana.b Jihova ku ebruphiyọ kuẹ iruo aghwoghwo na ọkieje, ọtiọyena vwẹ 2013, a je guọnọ Eguan Ruvie ri te 6,500 vwẹ ẹkuotọ nana eje, asaọkiephana a je guọnọ Eguan Ruvie ujorin buebun kukpe kukpe.

10-12. Mavọ yen ebabọn rẹ Eguan Ruvie vwo brọghọphiyọ odẹ ri Jihova?

¹⁰ Mavọ yen ebabọn rẹ Eguan Ruvie kpokpọ nana vwo brọghọphiyọ odẹ ri Jihova? Iyẹnrẹn ro nẹ oghọn ukoko ri Zimbabwe rhe da ta: “Ọke buebun siẹrẹ a da ghwa bọn Ọguan Ruvie kpokpọ nu, ihwo re cha uyono ke vwẹ asakuivẹ vwo buẹnphiyọ.” Vwẹ ẹkuotọ buebun, kọ ghwa họhọ nẹ ihwo ruẹ kẹmẹ kẹmẹ ayen vwọ vwomaba avwanre, jẹ a da bọn omamọ asan nu, ayen ke vwomaba avwanre. A da bọn Ọguan Ruvie kpokpọ nu, o krẹ ọ ke vọ-ọn, ka rhoma guọnọ ọfa. Ẹkẹvuọvo, ọ ghwa dia iwevwin na yen si ihwo bru Jihova-a. Obọdẹn rẹ ẹguọnọ rẹ iniọvo re bọn eguan na djephia nẹrhẹ ihwo vwẹ omamọ ẹro vwo ni ukoko na. E jẹ a fuẹrẹn idje evo.

¹¹ Indonesia. Ọke ra vwọ bọn Ọguan Ruvie ọvo, ọshare ọvo da mrẹvughe nẹ a hwosa kẹ ihwo re bọn na-a, ọ da ta: “Ovwan ghini ọka rẹ ihwo! Mi niroso nẹ ovwan ejobi ruiruo na vẹ aghọghọ, o ji nẹ ubiudu ovwan rhe, dede nẹ a hwosa kẹ ovwa-an. Mi rorori nẹ o vwo ẹga ọfa rọ họhọ ọ rẹ ovwan na-a!”

¹² Ukraine. A bọn Ọguan Ruvie vwẹ asan ọvo, aye ọvo rọ wanvrẹ asan na kẹdẹ kẹdẹ niroso nẹ Iseri ri Jihova yen ruiruo na, uwevwin rẹ ayen je bọn na Ọguan Ruvie. Ọ da ta: “Mi nyo kpahen Iseri ri Jihova vwo mie oniọvo mẹ rọ je dia Oseri. Womarẹ iruo rẹ ebabọn nana me mrẹre na, mi brorhiẹn nẹ me guọnọ dia ẹbẹre ọvo rẹ orua nana. Me ghene mrẹ ẹguọnọ re djephia vwẹ etinẹ na.” Aye nana de rhiabọreyọ uyono ri Baibol, o de bromaphiyame vwẹ 2010.

13, 14. (a) Die wo yono nẹ oborẹ aye gbe ọshare ọvo ruru ọke rẹ ayen vwọ mrẹ iruo rẹ ebabọn rẹ Ọguan Ruvie ọvo? (b) Die yen wo se ru rere asan wọ da vwoma vwọ ghwa urinrin vwo rhe odẹ ri Jihova?

¹³ Argentina. Ọshare ọvo vẹ aye rọyen yanran ra mrẹ oniọvo rọ vwẹrote ebabọn rẹ Ọguan Ruvie ọvo. Ọshare na da ta: “Avwanre nabọ mrẹ iruo rẹ ebabọn rẹ ovwan ruẹ na, ọtiọyena . . . avwanre brorhiẹn nẹ avwanre che yono kpahen Ọghẹnẹ vwẹ etinẹ.” Ọ da nọ: “Die yen avwanre che ru avwanre se vwo muwan rẹ uyono ẹra vwẹ etinẹ?” Aye gbe ọshare na de rhiabọreyọ uyono ri Baibol, ẹkẹvuọvo ayen da tanẹ ayen guọnọ nẹ ihwo rẹ orua rayen eje ji vwobọ vwọ. Iniọvo na da rhọnvwephiyọ.

¹⁴ Ọ sa dianẹ wo vwobọ vwẹ ebabọn rẹ Ọguan Ruvie wọ da vwoma na-a, ẹkẹvuọvo wọ sa je vwẹ ukẹcha phia vwevunrẹ Ọguan Ruvie wọ da vwoma rere ọ vwọ ghwa urinrin vwo rhe odẹ ri Jihova. Kerẹ udje, wo se durhie ihwo wọ vwẹ Baibol yono, irhivwinbrura wẹn, kugbe ihwo efa vwọ rhe uyono re ruẹ vwẹ Ọguan Ruvie. Wo ji vwo uphẹn wo vwo vwobọ vwẹ orufon vẹ ẹroevwote rẹ asan wọ da ga ẹga. Wo se ru itetoro vwo bicha ẹroevwote rẹ Ọguan Ruvie wọ da vwoma yẹrẹ vwọ kẹ ebabọn rẹ asan efa ra da ga ẹga vwẹ akpọ na. (Se 1 Kọrẹnt 16:2.) Iruo nana eje toroba ejiro rẹ odẹ ri Jihova.

Ewiowian ri “Siobọ nẹ Oma rẹ Ayen Ọphọphẹ”

15-17. (a) Amono yen me vwobọ vwẹ iruo rẹ ebabọn na? (b) Die yen wo yono nẹ eta rẹ eya gbe eshare evo ri vwobọ vwẹ iruo rẹ ebabọn vwẹ ẹkuotọ efa?

¹⁵ Iniọvo re dia ekogho ra da bọn Eguan Ruvie, Eguan Romẹvwa, kugbe eghọn ukoko yen me vwobọ vwẹ iruo na. Dedena, ọke buebun yen iniọvo ri nẹ ẹkuotọ efa rhe, re je tẹn ona rẹ ebabọn vwọ vwẹ ukẹcha kẹ iniọvo rehẹ ekogho na. Evo usun rẹ iniọvo nana vwomakpahotọ vwẹ idughwrẹn evo vwo ruiruo nana vwẹ ẹkuotọ efa. Efa tobọ vwomakpahotọ vwẹ ikpe buebun, rẹ ayen vwo nẹ iruo ọvo vwo kpo ọfa.

¹⁶ Re vwo kpo ẹkuotọ efa re ruiruo rẹ ebabọn se vwo egbabọse evo, ẹkẹvuọvo ọ vọnre vẹ erere. Kerẹ udje, Timo vẹ Lina kpo ẹkuotọ sansan vwẹ Asia, Europe, vẹ South America ra bọn Eguan Ruvie, Eguan Romẹvwa, kugbe eghọn ukoko. Timo da ta: “Vwẹ omarẹ ẹgbukpe 30 re wanre na, ẹgbukpe ivivẹ yen e vwo wene owian mẹ.” Lina, rọ rọvwọn Timo omarẹ ẹgbukpe 25 re na, da ta: “Mi nene Timo ga vwẹ ẹkuotọ ihwe re. Ọ guọnọ ẹgbaẹdavwọn vẹ ọke, aruọke kpokpọ na ke sa riẹnriẹn ohwo oma, a ke sa riẹn obo ra riemu kpokpọ, obo ra jẹ ejajẹ kpokpọ, obo re ghwoghwo ota vwẹ asan kpokpọ, ji mu igbeyan kpokpọ.”c Erere nẹ ẹgbaẹdavwọn nana rhe? Lina da ta: “Egbabọse nana rhoma rhe ghwa ebruphiyọ buebun vwo rhe avwanre. Avwanre rhiẹromrẹ ẹguọnọ vẹ uruemu esiri rẹ iniọvo na, kugbe ẹroevwote ri Jihova. Avwanre ji rhiẹromrẹ orugba rẹ ive rẹ Jesu ve kẹ idibo rọyen, ra niyẹnrẹn rọyen vwẹ Mak 10:29, 30. Asaọkiephana, iniọvo eshare vẹ e rẹ eya kugbe ini rẹ avwanre vwori te ujorin buebun.” Timo da rha ta: “Ọ kẹ avwanre omavwerhovwẹn mamọ ra vwọ vwẹ ona rẹ avwanre vwo vwobọ vwẹ ebabọn rẹ ekuakua rẹ Ovie na.”

¹⁷ Darren vẹ Sarah, ri vwobọ vwẹ iruo rẹ ebabọn vwẹ Africa, Asia, Central America, Europe, South America, kugbe South Pacific, niro nẹ ebruphiyọ rẹ ayen rhiẹromrẹ bun vrẹ erọnvwọn rẹ ayen vwo ze. Dede nẹ ayen hirharoku egbabọse sansan, Darren da ta: “Ọnana uphẹn re vwo nene iniọvo ri nẹ ẹkuotọ sansan rhe vwọ wian kugbe. Me rhe mrẹvughe re nẹ ẹguọnọ rẹ avwanre dje vwọ kẹ Jihova pha kerẹ ufi ro churu avwanre eje kugbe.” Sarah da ta: “Mi yono emu buebun vwo mie iniọvo rehẹ ẹkuotọ sansan! Me da mrẹ eronvwọn sansan rẹ ayen vwo ze fikirẹ ẹga ri Jihova, ọnana mu uvwe vwo muomaphiyọ iruo na.”

18. Mavọ yen aroẹmrẹ rọhẹ Une Rẹ Ejiro 110:1-3 vwo ruẹgba nonẹna?

¹⁸ Ovie Devid tarọ phiyotọ nẹ dede nẹ ihwo rẹ Ọghẹnẹ che rhiẹromrẹ egbabọse sansan, ayen ji che “siobọ nẹ oma rẹ ayen ọphọphẹ” fikirẹ ọdavwẹ rẹ Uvie na. (Se Une Rẹ Ejiro 110:1-3.) Kohwo kohwo ro vwobọ vwẹ iruo re vwo bicha Uvie na ji vwobọ vwẹ orugba rẹ eta yena. (1 Kọr. 3:9) Eghọn ukoko buebun, Eguan Romẹvwa ri te ujorin buebun, kugbe Eguan Ruvie ri te uriorin buebun na djerephia nẹ Uvie rẹ Ọghẹnẹ na muẹro, o ghini suẹn re. Ọnana okpuphẹn rode ra vwọ ga Ovie na Jesu Kristi vwẹ iruo ro brọghọphiyọ Jihova oma na!