ẸBẸRE 26
Akpọ na Rhoma Dia Iparadaisi Re!
Vwẹ Uvie ri Jesu che sun na, Jihova che ru odẹ Rọyen fon, o che djephia nẹ ọyen yen fo Osun rẹ akpọ vẹ odjuvwu, o ji che si umwemwu ejobi no
ỌBE rọ koba ri Baibol na re se Ẹvwọphia, vwẹ iphiẹrophiyọ vwọ kẹ ihworakpọ eje. Ọbe nana rẹ ọyinkọn Jọn siri na, vwo emramrẹ ri che ru orugba rẹ ọhọre ri Jihova.
Vwẹ emramrẹ ẹsosuọ, Jesu ra kpare nẹ ushi na da vwẹ ujiri vẹ ọkpọvi vwọ kẹ ikoko evo. Emramrẹ rivẹ dje ekete rẹ Ọghẹnẹ kẹ avwanre, ọke rẹ emekashe vwọ vwẹ ujiri vwọ kẹ.
Ọhọre rẹ Ọghẹnẹ vwọ yan obaro na, Omogodẹ na, rọ dia Jesu Kristi, da reyọ ukpirin ọbe ro vwo isiaphrẹ ighwrẹn na. Ro vwo rhie ẹne ẹsosuọ na, egua-iyesi da vwomaphia. Ọrẹsosuọ yen Jesu rọ gua iyesi ọfuanfon vẹ erhu rẹ Ovie ro kuphiyọ. Egua-iyesi re vwọ kpahọn, gua iyesi ri vwo dohwo dohọroma rọyen, ri mudiaphiyọ ofovwin, owẹnvwe, vẹ ọga; enana eje cha phia vwẹ ẹdẹ rẹ oba na. Erhie rẹ usiaphrẹ righwrẹn na da nẹrhẹ e hworo owanre ighwrẹn na, ro mudiaphiyọ aghwoghwo rẹ ẹdjọeguo rẹ Ọghẹnẹ. Ọnana da ghwa etiekọ ighwrẹn rhe yẹrẹ ophu rẹ Ọghẹnẹ.
A vwẹ Uvie Ọghẹnẹ vwo mu vwẹ odjuvwu re, re vwo dje ọmọboba re vwiẹre. Ofovwin da rhe tonphiyọ vwẹ odjuvwu, a da djẹ Eshu vẹ emekashe umwemwu rọyen na rhe otọrakpọ na. Urhuru rode ọvo da ta: “Eka kẹ ovwan, E akpọ kugbe abadi, kidie Idẹbono wotọ bru ovwan rhire vwẹ evun rẹ ophu rode, fikiridie ọ riẹnre nẹ ọke rọye pha krẹkrẹ.”—Ẹvwọphia 12:12.
Jọn mrẹ omogodẹ ọvo vwẹ odjuvwu re vwo dje Jesu, vẹ ihwo 144,000 ri mudia kẹrẹ, ra sane vwo nẹ otọrakpọ na. Enana che nene Jesu sun kerẹ “irherẹn” vwẹ obo odjuvwu. Ọbe rẹ Ẹvwọphia na djerephia nẹ ẹbẹre rivẹ rẹ ọmọ na cha dia ihwo 144,000.—Ẹvwọphia 14:1; 20:6.
Isun rẹ akpọ nana ki che koko vwọ kẹ Amagidọn rọ dia, “ofovwi rẹ ẹdẹ rode rẹ Ọghẹnẹ Ọrovwoẹgba na.” Kẹ ayen nene ohwo ro chidia enu rẹ iyesi ọfuanfon na, phi ofovwin, rọ dia Jesu, ohwo ro suẹn emekashe rẹ odjuvwu na ejobi. A cha ghwọrọ isun rẹ akpọneje. E che mu Eshu phiyọ uwodi; Jesu vẹ 144,000 na ki che sun akpọ na “ikpe uriori.” Ikpe uriori na da wan nu, ka cha ghwọrọ Eshu.—Ẹvwọphia 16:14; 20:4.
Die yen Usuon rẹ Ẹgbukpe Uriorin ri Jesu vẹ 144,000 che ru vwọ kẹ ihworakpọ ri nyupho rẹ Ọghẹnẹ? Jọn de si: “[Jihova] ko ririe ameoviẹ nẹ ẹro rayen, ughwu gbe cha dia ọfa-a, eyẹ omaemuohọ eyẹ oviẹ eyẹ odjadja ọfa-a, kidie emu rẹ awanre na wanvrẹn nure.” (Ẹvwọphia 21:4) Akpọ na rhoma dia iparadaisi re!
Ọbe rẹ Ẹvwọphia kọyen ku ovuẹ ri Baibol na phiyọ. Womarẹ Uvie ri Mesaya na, Jihova che ru odẹ rọyen fon, ji djephia nẹ ọyen fo ohwo ro sun akpọ vẹ odjuvwu bẹdẹ bẹdẹ!
—E muro kpahen ọbe rẹ Ẹvwọphia.