UYONO 21
Ọbe rẹ Ẹvwọphia —Obo ro Mudiaphiyọ kẹ Wẹ Vwẹ Obaro Na
“Isẹ. Yanrhe, Ọrovwohwo Jesu.”—ẸVWỌ. 22:20.
UNE 142 A Yọnrọn Iphiẹrophiyọ rẹ Avwanre Gan
ỌDJẸKOKOa
1. Orhiẹn ọghanghanre vọ yen ofori nẹ ihworakpọ eje bru?
NONẸNA o vwo orhiẹn ọghanghanre ọvo rẹ ihwo che bru. Ayen che bicha Jihova Ọghẹnẹ kerẹ ohwo ro fori ro sun akpọneje, gbanẹ ayen che bicha Eshu rọ dia Idẹbono na rọ je dia ọvweghrẹn Ọghẹnẹ? A cha sa ka ẹbẹre ivẹ na-a. Orhiẹn rẹ ayen bruru yen che djephia sẹ ayen cha dia bẹdẹ yẹrẹ ayen cha dia-a. (Mat. 25:31-33, 46) Vwẹ ọke rẹ “ukpokpogho rode na,” ka cha ka oka rẹ usivwin yẹrẹ ọ rẹ oghwọrọ phiyọ ayen.—Ẹvwọ. 7:14; 14:9-11; Izi. 9:4, 6.
2. (a) Die yen Hibru 10:35-39 vuẹ avwanre nẹ e ru? (b) Mavọ yen ọbe rẹ Ẹvwọphia sa vwọ chọn avwanre uko?
2 Se Hibru 10:35-39. Ọ da dianẹ wo brorhiẹn wo vwo bicha usuon ri Jihova, ọyena orhiẹn rẹ aghwanre. Ọtiọyena, ko ji fo nẹ wọ chọn ihwo efa uko vwo brorhiẹn rọ gbare. Wo se vwo ru ọtiọyen, gba reyọ evuẹ rehẹ ọbe rẹ Ẹvwọphia vwọ chọn ayen uko. Ọbe oghẹresan yena vuẹ avwanre obo re cha phia vwọ kẹ ihwo re vwọso Jihova, o de rhe djunute ebruba ri che te ihwo ri bicha usuon rọyen obọ. Ofori nẹ e yono kpahen uyota ọghanghanre nana. E de ru ọtiọyen, ọ cha chọn avwanre uko vwo vwo owenvwe ra vwọ ga Jihova ọkieje. Vwọba, avwanre sa reyọ obo re yonori vwọ chọn ihwo efa uko vwo brorhiẹn rọ gbare ayen vwọ ga Jihova ji tinka muo.
3. Die yen a cha fuẹrẹn vwẹ uyono nana?
3 Vwẹ uyono nana, avwanre cha fuẹrẹn enọ nana: Die yen cha phia kẹ ihwo ri bicha usuon rẹ Ọghẹnẹ? Vwọ vrẹ ọyena, die yen je cha phia kẹ ihwo ri bicha eranvwe ọvwavware re djisẹ rọyen vwẹ ọbe rẹ Ẹvwọphia na?
DIE YEN CHA PHIA VWỌ KẸ IHWO RE FUEVUN KẸ JIHOVA
4. Ẹko rẹ ihwo vọ yen ọyinkọn Jọn mrẹre vẹ Jesu vwẹ obodjuvwu?
4 Vwevunrẹ emramrẹ, ọyinkọn Jọn mrẹ ẹko rẹ ihwo ivẹ ri bicha usuon ri Jihova ji vwo uphẹn rẹ arhọ ri bẹdẹ. Ẹko rẹ ihwo rẹsosuọ na yehẹ 144,000 na. (Ẹvwọ. 7:4) A reyọ ayen nẹ otọrakpọ na rhe rere ayen vẹ Jesu vwo sun vwẹ Uvie rọyen vwẹ obodjuvwu. Ayen che sun otọrakpọ na. (Ẹvwọ. 5:9, 10; 14:3, 4) Vwẹ emramrẹ na, Jọn da mrẹ ayen vẹ Jesu ri mudia enu rẹ Ugbenu ri Zayọn vwẹ obodjuvwu.—Ẹvwọ. 14:1.
5. Die yen cha phia kẹrẹkpẹ vwọ kẹ uchekotọ rẹ ihwo ra jẹreyọ rehẹ otọrakpọ na?
5 Rhanvwẹ ọke rẹ iyinkọn na rhi te nonẹna, ọyen a vwọ sane iduduru rẹ ihwo vwọba 144,000 na. (Luk 12:32; Rom 8:17) Jọn vuẹ avwanre nẹ umu chekotọ, yẹrẹ umuchunu krẹn yen cha dia otọrakpọ na vwẹ ọke rẹ oba na. A cha “ka oka” phiyọ i “ri chekọ” na, ayen ke je cha mrẹ aroesiri ri Jihova tavwen ukpokpogho rode na ke cha tonphiyọ. (Ẹvwọ. 7:2, 3; 12:17) Vwẹ uvwre rẹ ukpokpogho rode na, ka cha reyọ uchekotọ na vwọba ihwo 144,000 re fuevun na vwẹ obodjuvwu. Kẹ ayen che nene Jesu sun vwẹ Uvie rẹ Ọghẹnẹ.—Mat. 24:31; Ẹvwọ. 5:9, 10.
6-7. (a) Ẹko rẹ ihwo vọ yen Jọn mrẹre, kẹ die yen e yono kpahen ayen? (b) Diesorọ Ẹvwọphia uyovwin 7 vwọ dia ọdavwẹ rẹ uchekotọ na kugbe “urogho rẹ ihwo buebu” na?
6 Jọn vwọ mrẹ ẹko rehẹ odjuvwu na nu, ọ da rhoma mrẹ “urogho rẹ ihwo buebu.” Vwọ fẹnẹ ihwo 144,000 na, ẹko nana vwo uchunu-u. (Ẹvwọ. 7:9, 10) Die yen e che yono kpahen? A da vuẹ Jọn: “Enana hẹ ihwo ri nẹ evun rẹ ukpokpogho rode na rhe; ayen fọnrhọn edagba rayen fon vwẹ ọbara rẹ Omogodẹ na.” (Ẹvwọ. 7:14) Ayen vwo sivwin vrabọ rẹ ukpokpogho rode na nu, “urogho rẹ ihwo buebu” nana ke cha dia otọrakpọ na je riavwerhen rẹ ebruphiyọ buebun.—Une 37:9-11, 27-29; Isẹ 2:21, 22; Ẹvwọ. 7:16, 17.
7 Ọ da dianẹ a sane avwanre vwo kpo odjuvwu yẹrẹ a cha dia otọrakpọ na, avwanre mrẹ oma avwanre vwẹ idjedje ro obo re si phiyọ Ẹvwọphia uyovwin 7 na? E jẹ a mrẹ oma avwanre vwọ. Ọnana ghini oghẹrẹ ọke vwọ kẹ ẹko ivẹ rẹ idibo rẹ Ọghẹnẹ nana! Oma cha vwerhen avwanre nẹ e bicha usuon rẹ Jihova. Orọnvwọn ọfa vọ yen ọbe Ẹvwọphia vuẹ avwanre kpahen ukpokpogho rode na?—Mat. 24:21.
DIE YEN CHA PHIA VWỌ KẸ IHWO RE VWỌSO JIHOVA
8. Mavọ yen ukpokpogho rode na cha tonphiyọ wan, kẹ die yen ihwo buebun che ru?
8 Kirobo re djunute vwẹ uyono rọ wanre na, o rhe che kri-i isun rẹ akpọ na ke cha vwọso Babilọn Rode na, rọ dia okugbe rẹ ẹga efian eje. (Ẹvwọ. 17:16, 17) Ọnana da ghwa vwomaphia, jẹ ukpokpogho rode na tonphiyọ re. Ẹvwọsua na cha nẹrhẹ ihwo buebun rhe vwomaba ẹga ri Jihova? Ẹjo. Ukperẹ ọtiọyen, Ẹvwọphia uyovwin 6 tare nẹ vwẹ ọke ọgangan yena, ihwo re ga Jihova-a ke cha guọnọ ochọnvwe vwo nẹ obọ rẹ ihwo ri suẹn kugbe ineki ride rẹ akpọ na rhe, re vwo dje igbenu. Ọ vwọ dianẹ ihwo yena senre nẹ ayen che bicha Uvie rẹ Ọghẹnẹ na-a, Jihova kọ cha reyọ ayen phiyọ ihwo re vwọsua.—Luk 11:23; Ẹvwọ. 6:15-17.
9. Die yen ihwo che niso vwẹ uvwre ihwo re ga Jihova kugbe ihwo re ga-a, kẹ die yen cha phia vwọ kẹ ihwo ri Jihova?
9 Vwọrẹ uyota, ofẹnẹ rode yen a cha mrẹ vwẹ omarẹ idibo ri Jihova vwẹ ọke ọgangan rẹ ukpokpogho na. Ayen ọvo yen ẹko rẹ ihwo vwẹ otọrakpọ na re vwẹ ẹga kẹ Jihova Ọghẹnẹ re je cha rhọnvwe bicha “eranvwe” na-a. (Ẹvwọ. 13:14-17) Fikirẹ evun-ẹfuọn rayen, ọnana kọ cha nẹrhẹ ihwo re vwọsua Jihova mu ophu ri djọghrọdjọghrọ. Fikirẹ ọnana, okugbe rẹ ẹgborho ke cha vwọso ihwo rẹ Ọghẹnẹ vwẹ otọrakpọ na eje. Baibol na dje ẹvwọsuọ rẹ uvunmwemwu nana kerẹ ẹvwọsuọ rẹ Gọg ri Magọg.—Izi. 38:14-16.
10. Kirobo rẹ Ẹvwọphia 19:19-21 djere, die yen Jihova che ru kpahen ẹvwọsuọ rẹ ihwo rọyen?
10 Die yen Jihova che ru kpahen ẹvwọsuọ nana? Ọ da vuẹ avwanre: “Ophu mẹ kọ cha kpare.” (Izi. 38:18, 21-23) Ẹvwọphia uyovwin 19 da vuẹ avwanre obo re cha vwọ kpahen ọnana. Jihova ko che ji Ọmọ Rọyen nẹ ọ ra chochọn rẹ ihwo Rọyen ji phi ivwighrẹn rayen kparobọ. Emekashe re fuevun re vwo dje “otuofovwi rẹ odjuvwu” kugbe ihwo 144,00 na, ke cha vwomaba Jesu vwọ họnre vwọso ayen. (Ẹvwọ. 17:14; 19:11-15) Die yen che nẹ obuko rẹ ofovwin nana rhe? Kohwo kohwo yẹrẹ ikoko re vwọso Jihova eje, ka cha ghwọrọ ayen kufia kare kare!—Se Ẹvwọphia 19:19-21.
OFOVWIN NA DA WAN NU, ORỌNVWE KO CHE NENE
11. Emu rọ ma ghanre vọ yen cha phia vwẹ oba rẹ ọbe Ẹvwọphia?
11 Di vwẹ ẹwẹn roro oborẹ oma che ru ihwo re fuevun ri sivwin rhọ je vrabọ rẹ oghwọrọ rẹ ivwighrẹn rẹ Ọghẹnẹ vwẹ otọrakpọ na! A cha mrẹ vwo dje aghọghọ rọye-en! Dede nẹ ukperi rẹ aghọghọ cha vwomaphia vwẹ odjuvwu ọke ra da ghwọrọ Babilọn Rode nu, emu ọfa je herọ rọ cha ghwa aghọghọ rode rhe. (Ẹvwọ. 19:1-3) Vwọrẹ uyota, ọnana yen “orọvwe rẹ Omogodẹ na” rọ dia emu rọ ma ghanre rọ koba vwẹ ọbe Ẹvwọphia.—Ẹvwọ. 19:6-9.
12. Kirobo rẹ Ẹvwọphia 21:1, 2 djere, ọke vọ yen che vwo ru orọnvwe rẹ Omogodẹ na?
12 Ọke vọ yen che vwo ru orọnvwe na? Ihwo 144,000 na che kpo odjuvwu tavwen e ki phi ofovwin rẹ Amagidọn. Jẹ, ọ dia ọke yena yen che vwo ru orọnvwe rẹ Omogodẹ na-a. (Se Ẹvwọphia 21:1, 2.) E che phi ofovwin rẹ Amagidọn je ghwọrọ ivwighrẹn rẹ Ọghẹnẹ no tavwen, e ki che ru orọnvwe rẹ Omogodẹ na.—Une 45:3, 4, 13-17.
13. Die yen orọnvwe rẹ Omogodẹ na mudiaphiyọ vwọ kẹ ihwo ri che vwobọ vwọ?
13 Die yen orọnvwe rẹ Omogodẹ na mudiaphiyọ vwọ kẹ ihwo ri che vwobọ vwọ? Kirobo rẹ orọnvwe ku aye vẹ ọshare kuẹgbe ye, ọtiọyen yen orọnvwẹ nana ji che ku Ovie, Jesu Kristi vẹ ihwo 144,000 re dia ‘epha’ rọyen na kugbe. Irueru ọghanghanre yena rọ koba na yen cha ghwa usuon kpokpọ ro che sun otọrakpọ na vwẹ egbukpe 1,000 na rhe.—Ẹvwọ. 20:6.
ORERE RẸ URINRIN KUGBE AKPEYEREN WẸN VWẸ OBARO NA
Ẹvwọphia uyovwin 21 dje Jerusalẹm ọkpokpọ na kẹrẹsiẹ a da mrẹ nẹ o “wotọ nẹ obọ rẹ Ọghẹnẹ cha vwẹ obo odjuvwu.” Usuon rẹ Ẹgbukpe Uriorin na, cha ghwa ebruphiyọ rhe ihworakpọ re fuevun (Ni ẹkoreta 14-16)
14-15. Die yen Ẹvwọphia uyovwin 21 reyọ ihwo 144,000 na vwo dje? (Ni uhoho rọhẹ opharo ọbe na.)
14 Vwẹ obọ ọfa, Ẹvwọphia uyovwin 21 da reyọ ihwo 144,000 na vwo dje orere oyoyovwin re seri “Jerusalẹm ọkpokpọ na.” (Ẹvwọ. 21:2, 9) Orere nana vwo ichivwo 12 re si edẹ “rẹ iyinkọn ihwivẹ rẹ Omogodẹ na” phiyọ. Diesorọ oma vwọ vwerhen Jọn? Kidie ọ mrẹ odẹ rọyen re si phiyọ ọvo usun rẹ ichivwo na. Ọnana okpuphẹn rode!—Ẹvwọ. 21:10-14; Ẹfe. 2:20.
15 Ọkpọ orere nana ọfa herọ-ọ. Urhuvwu rẹ orere nana oro yen e vwo ruo, inurhoro 12 na vwo pẹl, igbẹhẹ vẹ ichivwo na vwo ibieragha ri lo wrowro, vẹ ovwanvwe rọ pha gbagba. (Ẹvwọ. 21:15-21) Jẹ, o vwo orọnvwọn ọvo rọ kanre orere na! Vwo oniso rẹ oborẹ Jọn rhoma ta: “Me mrẹ uwevwi rẹ ẹga vwẹ evun rẹ orere na-a, kidie uwevwi rẹ ẹga rọ herọ ọye hẹ Ọrovwohwo Ọghẹnẹ Ọrovwoẹgba kugbe Omogodẹ na. Orere na rha guọnọ ọnre eyẹ emeranvwe ro lo vwọ-ọ, kidie urinrin rẹ Ọghẹnẹ ọvo ọye hẹ urhukpẹ rọyen, urhukpẹ rọyen kọyen hẹ Omogodẹ na.” (Ẹvwọ. 21:22, 23) Ihwo ri che vwobọ vwẹ Jerusalẹm ọkpokpọ na, ayen vẹ Jihova cha dia kugbe. (Hib. 7:27; Ẹvwọ. 22:3, 4) Ọtiọyena, Jihova kugbe Jesu yehẹ uwevwin rẹ ẹga rọhẹ orere na.
Amono yen cha mrẹ erere vwo nẹ erọnvwọn re vwo dje “urhie” kugbe ‘irhe na’ rhe? (Ni ẹkoreta 16-17)
16. Die yen cha phia kẹ ihworakpọ vwẹ uvwre Usuon rẹ Ẹgbukpe Uriorin na?
16 Ọyen obo ri fori ihwo ra jẹreyọ na vwo roro kpahen orere nana. Ẹkẹvuọvo, o ji fo nẹ ihwo ri vwo iphiẹrophiyọ ayen vwọ dia otọrakpọ na ji vwo omavwerhovwẹn kpahọn. Vwẹ uvwre Usuon rẹ Ẹgbukpe Uriorin na, Jerusalẹm Ọkpokpọ na cha hwarhiẹ ebruphiyọ buebun rhe. Ebruphiyọ nana rẹ Jọn mrẹre na djẹ kerẹ “urhie rẹ ame rẹ arhọ.” Vwẹ te obonẹ te obonẹ rẹ urhie na, vwo ‘irhe rẹ arhọ’ re djẹ ẹbe re “vwo sivwi ẹgborho na.” (Ẹvwọ. 22:1, 2) Ihworakpọ eje re cha dia vwẹ ọke yena cha mre erere vwo nẹ erọnvwọn iyoyovwin nana rhe. Ememerha na, ihworakpọ eje ke cha rhe dia ihwo re gbare. Emiavwe, odjadja, kugbe ameoviẹ gbe cha dia ọfa-a.—Ẹvwọ. 21:3-5.
17. Kirobo rẹ Ẹvwọphia 20:11-13 djere, amono yen cha mrẹ erere vwo nẹ Usuon rẹ Ẹgbukpe Uriorin na rhe?
17 Amono yen cha mre erere vwo nẹ erọnvwọn nana eje rhe? Ihwo rẹsosuọ yen otu gbidigbidi re wanvrẹ ofovwin rẹ Amagidọn, kugbe emọ rayen che vwiẹ vwẹ akpọ kpokpọ na. Jẹ, Ẹvwọphia uyovwin 20 ji ve nẹ ihwo ri ghwuru che vrẹnushi. (Se Ẹvwọphia 20:11-13.) Ihwo “ọsoso” re fuevun ri ghwuru vwẹ obuko kugbe ihwo ri “jẹ ọsoso ẹdia” ri vwo uphẹn rẹ ayen vwo yono kpahen Jihova-a, cha rhoma rhivwin rhe otọrakpọ na. (Iruo 24:15; Jọn 5:28, 29) Jẹ, kẹ ọnana mudiaphiyọ nẹ kohwo kohwo yen a cha rhọnvwọ nushi vwẹ uvwre Usuon rẹ Ẹgbukpe Uriorin na? Ẹjo. A cha rhọnvwọ ihwo re vwẹ arogba vwo sen uphẹn rẹ ayen vwọ ga Jihova tavwen ayen ki ghwu nushi-i. Ayen ku uphẹn ayen vwọ dia Iparadaisi vwẹ otọrakpọ na kufia.—Mat. 25:46; 2 Tẹsa. 1:9; Ẹvwọ. 17:8; 20:15.
ỌDAVWINI RỌ KOBA
18. Mavọ yen akpọ na cha dia vwẹ oba rẹ ẹgbukpe 1,000 na?
18 Vwẹ oba rẹ ẹgbukpe 1,000 na, jẹ e ruẹ ihwo eje re dia otọrakpọ na phiyọ ihwo re gbare re. Umwemwu ra riuku rọyen mie Adam jovwo gbi che rhe ohwo vuọvo oma-a. (Rom 5:12) Kọyen ekan rẹ umwemwu Adam ghwa rhe eje nuro re. Vwẹ idjerhe ọtiọyena, ka sa tanẹ ihwo rehẹ otọrakpọ na cha ‘va rhe’ kerẹ ihwo re gbare vwẹ oba rẹ ẹgbukpe 1,000 na.—Ẹvwọ. 20:5
19. Diesorọ ọdavwini rọ koba na vwo fo?
19 Ọke rẹ Idẹbono vwọ davwen Jesu ni, o dje ọyọnregan phia. Ọ fuevun ọke ra vwọ davwọn ni. Ẹkẹvuọvo, ihworakpọ re gbare je cha fuevun kẹ Jihova siẹrẹ Idẹbono da davwen ayen ni? Ohwo ọvuọvo yen cha kpahenphiyọ onọ yena sẹ ọ cha fuevun ọke re de siobọnu Idẹbono nẹ ukpotọ ro vwẹ oba-a vwẹ oba rẹ ẹgbukpe 1,000 na. (Ẹvwọ. 20:7) Ihwo re fuevun vwẹ ọdavwini rọ koba na che vwo uvi ugbomọphẹ ji vwo arhọ ri bẹdẹ. (Rom 8:21) Ka cha ghwọrọ ihwo ri gbevwọsuọ Jihova, te Idẹbono vẹ emekashe rọyen vwo no bẹdẹ.—Ẹvwọ. 20:8-10.
20. Mavọ yen oma ru we kpahen aroẹmrẹ ivwevwerhen ra mrẹre vwẹ ọbe Ẹvwọphia na?
20 Mavọ yen oma ru we ra vwọ rhoma fuẹrẹn ọbe Ẹvwọphia na? Ọma vwerhen owẹ nẹ wọ vwọ mrẹ orugba rẹ aroẹmrẹ nana eje? Ọnana nẹrhẹ wo vwo owenvwe wo vwo durhie ihwo efa rhe vwomaba ẹga ruyota rẹ Ọghẹnẹ? (Ẹvwọ. 22:17) Enẹna rẹ ẹwẹn vẹ ubiudu avwanre vwọ mwavwan kpahen erọnvwọn re cha phia vwẹ obaro na, ọnana kọ nẹrhẹ oma vwerhen avwanre vwẹrokere ọyinkọn Jọn rọ tare nẹ: “Isẹ. Yanrhe, Ọrovwohwo Jesu.”—Evwọ. 22:20.
UNE 27 E Dje Emọ rẹ Ọghẹnẹ Vwọphia
a Ọnana yen uyono rọ koba vwẹ ọbe Ẹvwọphia vwẹ Uwevwin Orhẹrẹ nana. Vwẹ uyono nana, avwanre che yono kpahen akpọ rẹ omavwerhovwẹn rẹ ihwo re fuevun kẹ Jihova che yerin vwẹ obaro na, ẹkẹvuọvo ihwo re rha vwọso usuon rẹ Ọghẹnẹ ke cha ghwọrọ kufia.