Amono Yẹn Igbeyan rẹ Ọghẹnẹ?

Jesu Kristi ọyen Ọmọ rẹ Jihova, kugbe ugbeyan rọyen rọ ma ghanre. Tavwen ọke rhe otọrakpọ na, Jesu dia odjuvwu kerẹ ohwo rẹ ẹwẹn. (Jọn 17:5) Ọ da rhe otọrakpọ rhi yono ihwo uyota kpahen Ọghẹnẹ. (Jọn 18:37) Ọ da reyọ arhọ rọyen vwọ kpahotọ rere ihwo ri nyẹme vwọ vrabọ rẹ umwemwu vẹ ughwu. (Rom 6:23) Jesu yen Ovie rẹ Uvie rẹ Ọghẹnẹ asaọkiephana. Uvie nana rọhẹ odjuvwu na cha ghwa Paradaisi rhe otọrakpọ na.—Ẹvwọphia 19:16.

Emekashe na jẹ igbeyan rẹ Ọghẹnẹ. A ma emekashe phiyọ otọrakpọ na-a. Ọghẹnẹ ma ayen phiyọ odjuvwu tavwen Ọ ke ma akpọ na. ( Job 38:4-7) Iduduru rẹ emekashe yen herọ. (Daniẹl 7:10) Emekashe nana re dia igbeyan rẹ Ọghẹnẹ vwẹ odjuvwu na, guọnọre nẹ ihwo yono uyota kpahen Jihova.—Ẹvwọphia 14:6, 7.

Ọghẹnẹ ji vwo igbeyan vwẹ otọrakpọ na, o se ayen iseri rọyen. Vwevunrẹ aguare, oseri ta obo rọ riẹn kpahen ohwo yẹrẹ orọnvwọn. Iseri ri Jihova vuẹ ihwo kpahen obo rẹ ayen riẹn kpahen Jihova vẹ ọhọre rọyen. (Aizaya 43:10) Kerẹ emekashe na, Iseri ri Jihova guọnọ chọnwuko vwọ riẹn uyota kpahen Jihova. Ayen guọnọre nẹ wọ je dia ugbeyan rẹ Ọghẹnẹ.