Obo Re Sevwo Vughe Ẹga Rẹ Uyota Na

Wọ da guọnọ dia ugbeyan rẹ Ọghẹnẹ, ku wọ vwomaba ẹga rẹ Ọghẹnẹ jẹ reyọ. Jesu tare nẹ “ọ gegagọ rẹ uyota na” cha ga Ọghẹnẹ nene “uyota” na. (Jọn 4:23, 24) Idjerhe ọgbagba ọvo yẹn herọ ra savwọ ga Ọghẹnẹ. (Ẹfesọs 4:4-6) Ẹga rẹ uyota suẹn ohwo kpẹ arhọ ri bẹdẹ, ẹkẹvuọvo ẹga rẹ ofian suẹn ohwo kpẹ oghwọrọ.—Matiu 7:13, 14.

Wo se vughe ẹga rẹ uyota siẹrẹ wọ da nabọ ni uruemu rẹ ihwo rehẹ evun rọyen. Rọvwọ dianẹ Jihova omamọ rẹ ohwo na, ihwo re ga vwọrẹ uyota ke je dia omamọ rẹ ihwo. Kirobo rẹ omamọ rẹ urhe rẹ utiẹn mọ omamọ rẹ utiẹn na, ọtiọyen yen ẹga rẹ uyota ji vwo omamọ rẹ ihwo.—Matiu 7:15-20.

Igbeyan ri Jihova ruẹ obo ri Baibol na tare. Ayen riẹnre nẹ obọ rẹ Ọghẹnẹ yin Baibol na nurhe. Ayen reyọ obo ri Baibol na tare vwo suẹn akpeyeren rayen, rhuẹrẹ ebẹnbẹn rayen phiyọ, je chọn ayen uko vwo yono kpahen Ọghẹnẹ. (2 Timoti 3:16) Ayen davwẹngba vwo ruẹ nene obo rẹ ayen ghwoghwo.

Igbeyan ri Jihova vwo ẹguọnọ rẹ ohwohwo. Jesu dje ẹguọnọ phia kẹ ihwo, o de yono ayen kpahen Ọghẹnẹ, o ji sivwin ihwo re muọga. Ihwo re ga ẹga uyota na je dje ẹguọnọ kẹ ihwoefa. Kerẹ Jesu, ayen ni ivwiogbere yẹrẹ ihwo rẹ jẹ ejajẹ efa sakamu-u. Jesu tare nẹ e che vughe idibo rọyen womarẹ ẹguọnọ rẹ ayen dje kẹ ohwohwo.—Jọn 13:35.

Igbeyen rẹ Ọghẹnẹ muọghọ vwọkẹ odẹ ri Jihova. Siẹrẹ ohwo rha rhọnvwen reyọ odẹ wẹn vwo se wẹ-ẹ, ohwo yena sa dia uvi rẹ ugbeyen wẹn? Ẹjo! Avwanre reyọ odẹ rẹ igbeyan rẹ avwanre vwo se ayen, avwanre ji ta omamọ rẹ eta kpahen igbeyan avwanre kẹ ihwoefa. Ọtiọyena, ofori nẹ ihwo re guọnọ dia ugbeyen rẹ Ọghẹnẹ se odẹ rọyen, je vuẹ ihwoefa kpahen odẹ na. Jihova guọnọre nẹ avwanre ru ọtiọyen.—Matiu 6:9; Rom 10:13, 14.

Kerẹ Jesu, igbeyan rẹ Ọghẹnẹ yono ihwoefa kpahen Uvie rẹ Ọghẹnẹ. Uvie rẹ Ọghẹnẹ ọyen usuon rọhẹ odjuvwu ro che wene akpọ na phiyọ paradiasi. Igbeyan rẹ Ọghẹnẹ vuẹ ihwoefa kpahen iyẹnrẹn esiri nana ro shekpahen Uvie rẹ Ọghẹnẹ na.—Matiu 24:14.

Iseri ri Jihova davwẹngba rere ayen sa dia igbeyan rẹ Ọghẹnẹ. Ayen ruẹ obo ri Baibol na tare, ayen je vwo ẹguọnọ rẹ ohwohwo. Ayen reyọ odẹ rẹ Ọghẹnẹ vwo se, ayen muọghọ kẹ odẹ na, ayen ji yono ihwoefa kpahen Uvie rẹ Ọghẹnẹ. Iseri ri Jihova yen ga ẹga rẹ uyota vwẹ akpọ na nonẹna.