1 Evun-ẹfuọn

OBORẸ O MUDIAPHIYỌ

Eya gbe eshare ri fuevun kẹ ohwohwo ni orọnvwe rayen kerẹ oyerinkugbe ri bẹdẹ, oshọ gbi mu ayen nẹ ọvo usun rayen che gbe ọfanrhiẹ-ẹn. Ayen vwo imuẹro nẹ ọrivẹ rẹ orọnvwe na cha dia orọnvwe na ebẹnbẹn da tobọ herọ dede.

Ihwo evo hẹ uwevwin rẹ orọnvwe fikirẹ obo rẹ igbeyan vẹ ihwo rẹ orua cha ta siẹrẹ ayen de no. Vwọ fẹnẹ oyena, obo ri me yovwin yen uruemu rẹ evun-ẹfuọn re mu kpahen ọghọ vẹ ẹguọnọ re vwo kpahen ohwohwo.

UCHEBRO RI BAIBOL: “Ọshare ghwrara ji siobọ nẹ aye rọye-e.”—1 Kọrẹnt 7:11.

“Wọ da fuevun vwẹ orọnvwe wẹn, ophu rha cha fobọ mu we-e, ku wọ fobọ vwo ghovwo je fobọ rẹ vwọ kẹ evwoghovwo. Ọke yena re ku wo che ni ebẹnbẹn kerẹ egbabọse, o dia eshegberudio-on.”—Micah.

OBORESORỌ Ọ VWỌ GHANRE

Ebẹnbẹn da vwomaphia vwẹ orọnvwe, eya gbe eshare ri fuevun kẹ ohwohwo-o ki ghwe brorhiẹn nẹ, ‘avwanre fo kẹ ohwohwo-o’ ayen ke guọnọ idjerhe kidjerhe rẹ ayen vwọ fan orọnvwe na.

“Ihwo buebun rọvwọn vẹ ẹwẹn nẹ, erọnvwọn rhe shephiyọ-ọ, kẹ ayen cha fan orọnvwe na. Siẹrẹ ihwo da vwẹ ẹwẹn rẹ orọnvwe ẹfan vwọ ton orọnvwe rayen phiyọ, kọyen ayen vwo uruemu rẹ evun-ẹfuọn vwo nẹ ọtonphiyọ rhe-e.”—Jean.

OBO WO SE RU

DAVWEN OMA WẸN NI

Siẹrẹ ovwan de vwo ẹghwọ . . .

• Ọ da wẹ nẹ wọ rọvwọn ọrivẹ rẹ ọrọnvwe wen na?

• Wọ vwẹ ẹwẹn roro nẹ wọ rọvwọn ohwo ọfa?

• Wọ ta eta kerẹ “me cha yanje uwe vwo” yẹrẹ “Me ra guọnọ ohwo rọ cha nabọ vwo ẹguọnọ mẹ”?

Ẹkpahọnphiyọ wẹn vwọ kẹ ọvo yẹrẹ efa usun rẹ enọ nana da dia e, kọyen ọna yen ọke ro fori wọ vwọ wian kpahen evun-ẹfuọn wẹn.

NENE ỌRIVẸ WẸN TA OTA KPAHEN ENỌ NANA

• Evun-ẹfuọn re vwo vwọ kẹ ohwohwo shekpotọ re? Ọ da dia e, diesorọ?

• Ọrhọ yen owọẹjẹ re se nene vwọ kpurhiẹnphiyọ evun-ẹfuọn avwanre vwẹ orọnvwe na?

IROROẸJẸ

• Nọke ra ruọke si ovuẹ rẹ ẹguọnọ vwo rhe ọrivẹ wẹn

• Dje evun-ẹfuọn wẹn phia womarẹ wo vwo dje ifoto rẹ ọrivẹ wẹn phia vwẹ enu rẹ imẹjẹ wẹn vwẹ iruo

• Davwẹngba vwo se ọrivẹ wẹn kẹdẹ kẹdẹ wọ da hẹ iruo yẹrẹ ọke re ovwan ra kẹrẹ ohwohwo-o

UCHEBRO RI BAIBOL: “Obo rẹ Ọghẹnẹ tan kugbe nu, e jẹn ohwo heriẹ-ẹ.”—Matiu 19:6.