مسیحیوں کے طور پر زندگی
گواہی دینے کے کام میں اپنی مہارتوں کو نکھاریں—واپسی ملاقات کریں
گواہی دینے کے کام میں اپنی مہارتوں کو نکھاریں واپسی ملاقات کریں یہ مہارت پیدا کرنا کیوں ضروری ہے؟ بادشاہت کے پیغام میں دلچسپی لینے والے بہت سے لوگ خدا کے بارے میں سچائی سیکھنا چاہتے ہیں۔ (یسع 55:6) ہمیں ایسے لوگوں کے پاس بار بار جانا چاہیے تاکہ ہم اُنہیں آہستہ آہستہ یہوواہ خدا کے متعلق سکھا سکیں۔ لوگوں کی مشکلات فرق فرق ہوتی ہیں اِس لیے پاک کلام کے پیغام میں اُن کی دلچسپی بڑھانے کے لیے ہمیں مختلف طریقے اِستعمال کرنے پڑیں گے۔ اگر ہم مؤثر طریقے سے لوگوں کو تعلیم دینا چاہتے ہیں تو ہمیں (1) اچھی تیاری کرنی ہوگی، (2) یہ سوچنا ہوگا کہ ہم اُن سے کیا بات کریں گے اور (3) اِس مقصد سے اُن کے پاس جانا ہوگا کہ ہم اُنہیں بائبل کورس شروع کرائیں۔
آپ کیا کر سکتے ہیں؟
جلد سے جلد واپسی ملاقات کریں۔—متی 13:19۔
دوستانہ انداز میں اور احترام سے بات کریں۔ گھبرائیں نہیں بلکہ پُرسکون رہیں۔
اچھی طرح سلام دُعا کریں۔ اُس شخص کا نام اِستعمال کریں۔ اُسے یاد دِلائیں کہ آپ اُس سے دوبارہ ملنے کیوں آئے ہیں۔ شاید آپ اُس کے سوال کا جواب دینے، اُسے نیا رسالہ دینے، ہماری ویبسائٹ دِکھانے، ہماری کوئی ویڈیو دِکھانے یا پھر یہ بتانے گئے ہوں کہ ہم بائبل کورس کیسے کراتے ہیں۔ اگر وہ شخص کسی اَور موضوع میں دلچسپی ظاہر کرے تو پھر اُس موضوع کے مطابق بات کریں۔—فل 2:4۔
اُس کے دل میں سچائی کا جو بیج بویا گیا ہے، اُسے پانی دینے کے لیے پاک کلام سے کوئی آیت دِکھائیں اور اگر مناسب ہو تو ہماری کوئی کتاب یا رسالہ دیں۔ (1-کُر 3:6) اُس کے ساتھ جان پہچان بڑھانے کی کوشش کریں۔
اگلی ملاقات کی بنیاد ڈالیں۔