نکتہ 18

معلوماتی مواد پیش کریں

1-‏کُرنتھیوں 9:‏19-‏23

خلاصہ:‏ سامعین کو موضوع کے متعلق سوچنے کی ترغیب دیں تاکہ اُنہیں یہ محسوس ہو کہ اُنہوں نے کوئی فائدہ‌مند بات سیکھی ہے۔‏

آپ کیا کر سکتے ہیں؟‏

اِس بات پر غور کریں کہ آپ کے سامعین پہلے سے کیا کچھ جانتے ہیں۔‏ محض وہ باتیں نہ دُہرائیں جن سے سامعین واقف ہیں۔ اِس کی بجائے موضوع کو ایک فرق نظر سے دیکھنے میں اُن کی مدد کریں۔‏

ایسے نکات پر کم وقت لگائیں جن سے سامعین واقف ہیں جبکہ ایسے نکات پر زیادہ وقت لگائیں جو اُن کے لیے نئے ہیں۔‏
تحقیق اور سوچ بچار کریں۔‏ جب ممکن ہو تو اہم نکات کو سمجھانے کے لیے حالیہ واقعات یا ایسے حقائق کو اِستعمال کریں جن سے سامعین زیادہ واقف نہیں ہیں۔ اپنے مواد کے بارے میں گہرائی سے سوچیں اور اِس بات پر غور کریں کہ آپ کے مواد اور اُن حقائق میں کیا تعلق ہے جو آپ بتانا چاہتے ہیں۔‏

مواد کا جائزہ لیتے وقت خود سے ”‏کیا، کیوں، کب، کہاں، کون اور کیسے“‏ جیسے سوال پوچھیں اور یوں خود کو سوچنے کی ترغیب دیں۔ اپنے حصے یا پیشکش میں اِن میں سے کچھ سوال اُٹھانے اور اِن کے جواب دینے سے اپنے پیغام میں جان ڈالیں۔‏
اپنے پیغام کی اہمیت واضح کریں۔‏ اِس بات کی وضاحت کریں کہ پاک کلام کے اصول روزمرہ زندگی میں آپ کے سامعین کے کام کیسے آ سکتے ہیں۔ کچھ ایسی صورتحال اور کاموں پر بات کریں جن پر اِن اصولوں کو لاگو کِیا جا سکتا ہے۔‏