باب ۶
ایوب کی وفاداری
خلاصہ: شیطان نے ایوب کی وفاداری کا امتحان لیا لیکن ایوب یہوواہ خدا کا وفادار رہا۔
کیا انسان بڑی اذیت سہنے کے باوجود بھی خدا کا وفادار رہے گا؟ کیا وہ تب بھی وفادار رہے گا جب اُسے لگے کہ اُسے کوئی اَجر نہیں ملے گا؟ یہ سوال خدا کے خادم ایوب کے سلسلے میں اُٹھائے گئے۔ آئیں دیکھیں کہ اُس کے ساتھ کیا واقع ہوا۔
جب بنیاسرائیل مصر میں تھے تو ایوب جزیرہنما عرب میں رہتا تھا۔ وہ ابرہام کا رشتہدار تھا۔ ایک دن آسمان پر فرشتے خدا کے حضور جمع ہوئے۔ شیطان بھی اُن کے درمیان تھا۔ یہوواہ خدا نے اُن سب کے سامنے اپنے خادم ایوب کی تعریف کی اور اُس کی وفاداری پر اپنا اعتماد ظاہر کِیا۔ یہوواہ خدا نے کہا کہ تمام انسانوں میں سے ایوب سب سے راستباز ہے۔ لیکن شیطان نے اعتراض اُٹھایا کہ ایوب صرف اِس لئے خدا کا وفادار ہے کیونکہ خدا اُس کی حفاظت کرتا ہے اور اُسے بہت سی نعمتوں سے نوازتا ہے۔ پھر اُس نے دعویٰ کِیا کہ اگر ایوب سے سب کچھ چھین لیا جائے تو وہ کفر بکے گا اور خدا سے مُنہ موڑ لے گا۔
یہوواہ خدا نے شیطان کو اجازت دی کہ وہ ایوب کے مالواسباب کو چھین لے، اُس کے بچوں کو مار ڈالے اور اُسے تکلیفدہ بیماری میں مبتلا کر دے۔ ایوب کو معلوم نہ تھا کہ اُس پر یہ تمام مصیبتیں شیطان لا رہا ہے۔ حالانکہ اُس کا خیال تھا کہ خدا اُس پر یہ مصیبتیں لا رہا ہے لیکن پھر بھی اُس نے خدا سے مُنہ نہیں موڑا۔
پھر ایوب کے تین دوست اُسے تسلی دینے کے لئے آئے۔ پاک صحیفوں میں ایوب نامی کتاب میں اُن کی باتیں درج ہیں۔ اُن کا کہنا تھا کہ ایوب نے ضرور چوریچھپے گُناہ کئے ہوں گے جن کے لئے خدا اُسے سزا دے رہا تھا۔ اُنہوں نے دعویٰ کِیا کہ خدا اپنے خادموں کی قدر نہیں کرتا اور اُن پر اعتماد نہیں کرتا۔ لیکن اُن کی سوچ غلط تھی۔ ایوب نے اُن کی باتوں کو رد کر دیا۔ اُس نے پورے یقین سے کہا کہ وہ مرتے دَم تک اپنی راستی پر قائم رہے گا۔
البتہ ایوب نے اپنی صفائی پیش کرنے کو حد سے زیادہ اہمیت دی۔ یہ دیکھ کر الیہو نامی ایک جوان جو اُن چاروں کی باتوں کو سُن رہا تھا بول اُٹھا۔ اُس نے ایوب کی اصلاح کی کیونکہ اُس نے خدا کو راست ٹھہرانے کی بجائے اپنے آپ کو راست ٹھہرایا۔ اِس کے بعد الیہو نے ایوب کے جھوٹے دوستوں کی ملامت کی۔
پھر یہوواہ خدا ایو ب کی اصلاح کرنے کے لئے اُس سے مخاطب ہوا۔ اُس نے اپنی عظمت ظاہر کرنے کے لئے اپنی بنائی ہوئی چیزوں کا ذکر کِیا۔ اِس پر ایوب نے تسلیم کِیا کہ خدا کا درجہ انسانوں سے کہیں بڑا ہے اور اُس نے خدا کی اصلاح کو بڑی عاجزی سے قبول کر لیا۔ یہوواہ خدا نے اپنا”ترس اور رحم“ اِس طرح ظاہر کِیا کہ اُس نے ایوب کو صحتیاب کر دیا اور اُسے پہلے سے دُگنا مالودولت عطا کِیا۔ اِس کے علاوہ ایوب کو دس بچوں سے نوازا گیا۔ (یعقوب ۵:۱۱) ایوب اذیت سہنے کے باوجود بھی یہوواہ خدا کا وفادار رہا۔ یوں اُس نے شیطان کے اِس دعوے کو جھوٹا ثابت کر دیا کہ انسان آزمائشوں کا سامنا کرتے وقت خدا کے وفادار نہ رہیں گے۔
—اِن واقعات کا ذکر ایوب کی کتاب میں ہوا ہے۔