قارئین کے سوال
کیا یہوواہ کے گواہوں کو جیون ساتھی تلاش کرنے والی ویبسائٹس اِستعمال کرنی چاہئیں؟
یہوواہ خدا یہ چاہتا ہے کہ جب ایک مرد اور عورت شادی کرتے ہیں تو وہ اِس بندھن سے خوش ہوں اور عمر بھر ایک دوسرے کے ساتھ رہیں اور ایک دوسرے سے محبت کریں۔ (متی 19:4-6) اگر آپ شادی کرنے کا سوچ رہے ہیں تو آپ ایک اچھا جیون ساتھی کیسے تلاش کر سکتے ہیں؟ چونکہ یہوواہ خدا نے ہمیں بنایا ہے اِس لیے وہ ایک اچھا جیون ساتھی تلاش کرنے میں ہماری مدد کر سکتا ہے۔ اگر آپ اُس کے بتائے ہوئے اصولوں پر عمل کریں گے تو آپ خوشیوں بھری شادیشُدہ زندگی گزار پائیں گے۔ آئیں، اِن میں سے کچھ اصولوں پر غور کریں۔
سب سے پہلے تو ہمیں یہ بات سمجھنے کی ضرورت ہے کہ ہمارا ”دل سب چیزوں سے زیادہ حیلہباز اور لاعلاج ہے۔“ (یرم 17:9) جب دو لوگ ایک دوسرے کو جاننے کے لیے ایک دوسرے کے ساتھ وقت گزارتے ہیں تو اُن کے دل میں ایک دوسرے کے لیے گہرے جذبات پیدا ہو سکتے ہیں اور ایسی صورت میں اُن کے لیے سمجھداری سے فیصلہ کرنا مشکل ہو سکتا ہے۔ جب دو لوگ صرف اِس لیے شادی کر لیتے ہیں کیونکہ اُن کے دل میں ایک دوسرے کے لیے گہرے جذبات ہوتے ہیں تو اکثر بعد میں اُنہیں پچھتاوا ہوتا ہے۔ (امثا 28:26) اِس لیے یہ سمجھداری کی بات نہیں ہوگی کہ آپ شروع میں ہی ایک شخص کے ساتھ جذباتی لگاؤ قائم کر لیں اور اُس سے بڑے بڑے وعدے کر لیں۔
امثال 22:3 میں لکھا ہے: ”ہوشیار بلا کو دیکھ کر چھپ جاتا ہے لیکن نادان بڑھے چلے جاتے اور نقصان اُٹھاتے ہیں۔“ جیون ساتھی تلاش کرنے کے لیے ڈیٹنگ ویبسائٹس کو اِستعمال کرنا کیوں خطرناک ہو سکتا ہے؟ اِن ویبسائٹس کو اِستعمال کرنے والے کچھ لوگوں کو بہت ہی بُرا تجربہ ہوا۔ اُنہوں نے آنلائن ایک ایسے شخص سے ڈیٹنگ کی جس نے اُنہیں دھوکا دیا۔ اِس کے علاوہ کچھ فراڈیے ویبسائٹس پر جعلی اکاؤنٹ بناتے ہیں تاکہ وہ لوگوں کو اپنی باتوں میں پھنسا کر اُن سے پیسے ہتھیا سکیں۔ کبھی کبھار تو یہ لوگ یہوواہ کے گواہوں کو دھوکا دینے کے لیے یہ ظاہر کرتے ہیں کہ وہ خود بھی یہوواہ کے گواہ ہیں۔
ذرا ایک اَور خطرے پر بھی غور کریں۔ کچھ ڈیٹنگ ویبسائٹس میں ایسا پروگرام سیٹ ہوتا ہے جو یہ بتاتا ہے کہ فلاں شخص کے لیے کون سا شخص ٹھیک رہے گا۔ لیکن اِس بات کے کوئی ثبوت نہیں ہیں کہ اِس طریقے سے ایک شخص کو بہت ہی اچھا جیون ساتھی مل جاتا ہے۔ اِس لیے یہ سمجھداری کی بات نہیں ہوگی کہ ہم ایک کمپیوٹر پروگرام پر یقین کر کے اپنی زندگی کا اِتنا اہم فیصلہ کریں۔ یہ بات ہمیشہ یاد رکھیں کہ اِنسانوں کے بنائے کمپیوٹر پروگرام کبھی بھی اُتنے قابلِبھروسا نہیں ہوتے جتنے بائبل کے اصول۔—امثا 1:7؛ 3:5-7۔
ایک اَور اصول امثال 14:15 میں ملتا ہے جہاں لکھا ہے: ”نادان ہر بات کا یقین کر لیتا ہے لیکن ہوشیار آدمی اپنی روِش کو دیکھتا بھالتا ہے۔“ ایک اچھے جیون ساتھی کا اِنتخاب کرنے سے پہلے یہ بہت ضروری ہے کہ آپ ایک شخص کو اچھی طرح سے جانیں۔ لیکن اِنٹرنیٹ پر ایسا کرنا مشکل ہو سکتا ہے۔ بھلے ہی آپ ایک دوسرے کو اپنی تصویریں دِکھائیں، ایک دوسرے کو اپنی معلومات دیں اور ایک دوسرے کو بہت سے میسج کریں لیکن پھر بھی آپ یقین سے نہیں کہہ سکتے ہیں کہ آپ اُس شخص کو اچھی طرح جانتے ہیں۔ بعض لوگوں کو آنلائن ڈیٹنگ کرتے وقت لگا کہ اُنہیں سچا پیار مل گیا ہے لیکن جب وہ شخص اُن کے سامنے آیا تو اُنہیں بہت دھچکا لگا۔
ایک زبور میں خدا کے ایک بندے نے کہا:”نہ مَیں دھوکے بازوں کی مجلس میں بیٹھتا، نہ چالاک لوگوں سے رفاقت رکھتا ہوں۔“ (زبور 26:4، اُردو جیو ورشن) بہت سے لوگوں کو لگتا ہے کہ ڈیٹنگ ویبسائٹس پر اپنے بارے میں تھوڑے بہت جھوٹ بولنے میں کوئی بُرائی نہیں۔ جب وہ آنلائن کسی سے باتچیت شروع کرتے ہیں تو وہ اُنہیں کبھی یہ نہیں بتاتے کہ وہ اصل میں کیسے شخص ہیں اور اُن میں کون سی بُری عادتیں ہیں۔ جو لوگ یہ کہتے ہیں کہ وہ یہوواہ کے گواہ ہیں، کیا وہ واقعی بپتسمہیافتہ یہوواہ کے گواہ ہیں؟ کیا وہ پُختہ مسیحی ہیں؟ کیا یہوواہ کے ساتھ اُن کی دوستی مضبوط ہے؟ کیا وہ اپنی کلیسیا میں نیک نام ہیں؟ یا کیا وہ ایک بُری مثال قائم کر رہے ہیں، یہاں تک کہ ”بُرے ساتھی“ ہیں؟ (1-کُر 15:33؛ 2-تیم 2:20، 21) کیا وہ بائبل کے اصولوں کے مطابق شادی کرنے کے لیے آزاد ہیں؟ آپ کے لیے اِن باتوں کو جاننا لازمی ہے۔ لیکن یہ تب ہی ممکن ہے جب آپ کسی ایسے بہن یا بھائی سے بات کریں گے جو اُس شخص کو اچھی طرح جانتا ہو۔ (امثا 15:22) ظاہری بات ہے کہ یہوواہ کا ایک بندہ کسی غیر ایمان شخص کے ساتھ ’ایک جُوئے میں جتنا‘ تو دُور، ایسا کرنے کا سوچے گا بھی نہیں۔—2-کُر 6:14؛ 1-کُر 7:39۔
یاد رکھیں کہ ڈیٹنگ ویبسائٹس پر جیون ساتھی تلاش کرنا خطرے سے خالی نہیں۔ لیکن ایسے بہت سے طریقے ہیں جن سے آپ ایک شخص سے شادی کرنے کے لیے اُسے جان سکتے ہیں۔ آپ کو ایک ایسا شخص کہاں مل سکتا ہے جو ایک اچھا جیون ساتھی ثابت ہو؟ جب یہوواہ کے گواہ اپنی عبادتوں، اِجتماعوں یا دوسرے موقعوں پر ایک دوسرے کے ساتھ جمع ہوتے تھے تو ایسے موقعوں پر ایک شخص کو جاننا آسان ہوتا تھا۔
جیسے جیسے آپ ایک دوسرے کے ساتھ وقت گزاریں گے، آپ یہ دیکھ پائیں گے کہ کیا آپ دونوں کے منصوبے ایک جیسے ہیں۔
لیکن اب چونکہ کورونا وائرس کی عالمی وبا کی وجہ سے ایک ساتھ جمع ہونا ممکن نہیں ہے اِس لیے ہم ویڈیو کانفرنس کے ذریعے عبادتیں کرتے ہیں جہاں غیرشادیشُدہ بہن بھائیوں کو ایک دوسرے کو جاننے کا موقع ملتا ہے۔ اِجلاسوں کے دوران آپ اُنہیں تقریریں کرتے اور جواب دیتے سُن سکتے ہیں۔ (1-تیم 6:11، 12) اِجلاس کے بعد آپ بریکآؤٹ روم میں بھی ایک دوسرے سے باتچیت کر سکتے ہیں۔ جب آپ دوسرے بہن بھائیوں کے ساتھ ویڈیو کال کے ذریعے وقت گزارتے ہیں تو آپ یہ دیکھ سکتے ہیں کہ جس شخص کو آپ جاننے کی کوشش کر رہے ہیں، وہ دوسروں کے ساتھ کیسے پیش آتا ہے اور وہ کس طرح کا شخص ہے۔ (1-پطر 3:4) جب وقت گزرنے کے ساتھ ساتھ آپ اُس شخص کو اچھی طرح جاننے لگتے ہیں تو آپ یہ دیکھ سکتے ہیں کہ کیا آپ دونوں کے منصوبے ایک جیسے ہیں اور کیا آپ ایک دوسرے کے اچھے جیون ساتھی ثابت ہوں گے؟
جب غیرشادیشُدہ لوگ بائبل کے اصولوں کو ذہن میں رکھ کر جیون ساتھی کی تلاش کرتے ہیں تو اُنہیں امثال میں لکھی اِس بات کا تجربہ ہو سکتا ہے: ”جس کو بیوی ملی اُس نے تحفہ پایا اور اُس پر [یہوواہ] کا فضل ہوا۔“—امثا 18:22۔